الحلقــــــــة السابعــــة عشر والأخيرة من جزيــــرة اللالا

الحلقــــــة السابعــة عشــــــــر

والأخيــــــــرة

يبص أيهم لملامح عادل واللي يشوفها بدأت تتوتر من كلام المحافظ اللي يقول :

-         كلمني سيادة الريس النهاردة وناقشنا سوا قرار اننا نكتب الاسم دي بأرض كبير الجزيرة بس

بشرط ان الأرض دي جزء من مصر وكيان جوة الكيان مش كيان برة مصر ..

يبص أيهم لعادل اللي ملامحه اتقلبت من توتر لفرح شديد وسعادة بالغة جدااا وقال:

-         يعني يا سيادة المحافظ انت فعلا هتكتبوا الأرض دي باسمهم؟! يعني محدش هيهددهم ابدا؟!

-         لا الريس تفهم جدااا قصتكم وبالعكس اعجب جدا بالحالة اللي انتم عاملينها لنفسكم بس طبعا

برضو ده مش معناه ان مش من اي حق حد يجي ويزور الجزيرة !

فيتكلم عادل ويقول:

-         بس انا عند شروطي لسه

فيبص ليه أيهم باستغراب ويقول:

-         شروووط ايه يا عم الحج! بيقلك هيدولك الارض والمهم بس انها تابعة للدولة !

يبتسم عادل ويقول بهدوء:

-         عارف ان الارض حق ملك ليا وللدولة وعمرنا ما كنا هناخدها وننفرد بنفسنا ‘ احنا كل

اللي كنا طالبينه وقتها أرض نعيش فيها بسلام وبحب وصفاء !! نبعد عن كل شر وفساد

فيسأله المحافظ:

-         ايه شرطك يا عادل؟!

-         انا مش همانع الناس تيجي وتزورنا ‘ يمكن كان المفروض اعمل كده من زمان بس زي ما انت

عارف انا كنت خايف من ايه ‘ بس اللي هيزورنا هيخضع لقوانينا يا سيادة المحافظ ..

واللي غلط مفيش قانون هيرحمه من الغلط !  طالما غلط على أرضنااا يبقى هيتجازى ويتعاقب

في أرضنا ..

يسكت المحافظ لمدة دقايق ويقول:

-         هنشوف الموضوع ده بعدين يا عادل ..

-         لا انا اسف ‘ الموضوع ده خط أحمر عندنا

فيتدخل أيهم سريعا:

-         ايه يا عادل ‘ اكيد سيادة المحافظ هيوافق على كده طبعااا

فيقول المحافظ:

-         بس انتم قوانينكم صعبة يا عادل؟!

-         بالعكس مش صعبة ولا حاجة ! على اد الغلط بنعاقب واكيد قبل ما بنعاقب بنشوف المبررات ونحاول نعالج ولو مكنش فيه سبب قوي للغلط يبقى وقتها العقاب بيكون بالعدل ..

يفرك المحافظ بايده وبعدين يفرك في دقنه ويقول:

-         ربنا يسهل هرد عليك قريب متقلقش ..

وبعدين يبص حواليه في المكان ويقول:

-         امال فين رامز؟!

فيقول عادل بطمأنينة:

-         بيلعب مع الاطفال

يبص المحافظ لأيهم:

-         عرفت ليه بقى خليته يجي معاك بسهولة ! عشان انا كنت جاي وراكم بس محبتش اقلك عشان

مكنتش هخلص من اسئلتك ومكنتش هتسبني وبصراحة مكنش لسه القرار بقى اكيد ..

أيهم بابتسامة:

-         ااه فهمت ! اصل انا استغربت فعلا انك سبته كده عادي معايا !

-         اكيد مش هسيب حفيدي لاي حد يا أيهم

********************************************

يصحى يحي من النوم ويخرج يلعب مع تالا شوية وبعدين يروح لشنطته ‘ عشان يخرج منها

كراسة الرسم ويلاقي ساعة فيها .. يسأل تالا:

-         تالا بصي لقيت الساعة دي

-         روح اديها لحد كبير بسرعة

-         حاضر

يمشي يحي عشان يروح لريم وهو في طريقه كان محمود بيدور على حاجة ورامز واقف

ورا الشجرة بيضحك عليه ‘ واول ما رامز شاف يحي ومعاه الساعة جري عليه وقاله:

-         انت بتعمل ايه بالساعة دي

-         انا لقيتها وهوديها

رامز يكون متغاظ من يحي ويكشر ويقول:

-         لاااااا انت كداااااب

يحي يضايق بس يرد بكل احترام:

-         انا مبكدبش على فكرة عشان عارف ان الكدب حرام ومش حلووو

-         لاااااا انتتتت كدااااااااب

-         قلتلك مبكدبش

يزعق رامز ليحي ويزقه جامد لدرجة توقعه على الأرض ويقوله:

-         انت كداااااااب وحرااااااامي

يجري محمود على يحي اللي واقع على الارض ويشد ايده عشان يقوم ويبص بضيق لرامز

ويقوله:

-         انت ليه عملت كده

رامز وعيونه كلها شرر وضيق من يحي:

-         عشان هوووو خد الساعة بتااااعتي

يحي بص بكل براءة لمحمود وقال:

-         انا والله لقيتها في شنطتي يا محمود وكنت هوديها لريم

تسمع ريم صوت الاطفال وهما بيتخانقوا فتطلع بسرعة من كوخها وتلاقي رامز بيقدم بخطواته

عشان يضرب يحي ‘ فتجري عليه تحوشه وتقوله:

-         ليه كده؟!

رامز باستفزاز:

-         ملكييش دعوووة ‘ انا جدوو لما يجي هقله يزعقلكم كلكم !!

ويجري رامز بعيد وبعدين يلاقي جده واقف مع عادل وأيهم فيجري عليهم وهو عمال يعيط ..

عادل اتفزع اول ما شاف رامز بيعيط  والمحافظ كمان وجري عليه وقاله بقلق:

-         مالك يا رامز

-         جدووو الناس دي ووحشة

-         ليه؟!

-         اضربهم يا جدووو

-         ليه يا بني؟! حصل ايه؟

رامز وهو بيعيط:

-         ي يي يحي يا يي يا جدو خد ساعتي وكدب عليا لما قلتله انت حرامي

عادل يقول:

-         اولا يا حبيبي انت حقك فوق راسنا بس تعالى معايا

ويبص على المحافظ ويقوله:

-         بعد اذنك يا سيادة المحافظ ‘ هاخد رامز شوية

المحافظ وهو مكشر:

-         ليه هتعمل ايه؟! هتعاقبه ولا ايه؟!

-         حاشا لله ‘ اكيد هكرمه!! احنا الضيف بيكرم يا سيادة المحافظ مش بيُهان عندنا ابدا

-         طب بسرعة يا عادل ‘ عشان انا مش فاضي للعب العيال ده

******************************************

ياخد عادل رامز ويدخله كوخ كبير متقسم لأوض كتيرة ‘ فدخله اول اوضة مليانة كلها العاب حلوة ويقوله:

-         يلا اختار لعبة حلووة

رامز اول ما يشوف الالعاب ينبهر جامد ويقول:

-         وااااااو كل الالعاب دي عندكم

-         ايه رأيك؟

-         دي حلووووة اووووي

-         طب يلا اختار اللعبة اللي انت عايزها

يمسح رامز دموعه بسرعة ويروح يختار لعبة هو حبها وبعدين ياخده عادل ويروح بيه على

اوضة تانية مليانة حلويات ويقوله:

-         ها بتحب الحلويات؟

رامز مستغرب من عادل ومن كل اوضة بيدخلها فيها وبيخليه يختار اللي هو عاوزه وبيبتدي يحس بالذنب اللي عمله في يحي ويقول بخجل:

-         انت يا عمو  هتخليني اخد الحلويات اللي نفسي فيها

-         طبعا يا حبيبي يلااا اختاااار

يروح رامز وياخد كيس شيبسي واحد بس ‘ فيبصله عادل بشك ويقوله:

-         ليه بس خدت كيس واحد مع اني قلتلك خد كل اللي انت عايزه براحتك؟

يبص رامز في الارض بخجل ويقول بكدب:

-         مش عارف

-         خد لان يحي هو اللي بيصالحك مش يحي غلط فيك؟! وخد الساعة بتاعتك

يبص رامز في الارض فيقوله عادل:

-         بُصلي؟

فيبص رامز في عيون عادل بسرعة ويلف وشه لبعيد ‘ وبعدين ياخده عادل ويروح بيه على اوضة تانية ويقعدوا ويطلب من ريم تنادي يحي ومحمود وتالا..

ومفيش دقايق كانوا التلاتة عند عادل ورامز اللي قاعد ساكت خالص مبيتكلمش .. فعادل يبص

ليحي ويقوله:

-         ايه اللي حصل يا يحي

-         والله يا والدي انا مضربتهوش ولا عملتله حاجة

فترفع تالا ايدها ‘ فيبص عادل ليها ويقولها:

-         خير يا تالا؟ عندك ايه تقوليه؟

-         بص يا والدي يحي كان نايم وو وو وبعدين صحي ماشي و ووبعدين قام جه ولقى ساعة في شنطته وقالي والله وانا انا قلتله روح وديها لريم وكان هو ماشي لريم وبعدين رامز اتخان قمعاه

فيبص عادل لرامز اللي وشه في الارض ويسأله:

-         الكلام ده حصل يا رامز؟ اصل يحي ميحبش حد يزعل منه ابدا

يفضل رامز ساكت فيقوله عادل:

-         ساكت ليه؟

فيبص رامز بخجل على يحي ومحمود وتالا ‘ فيأمرهم عادل انهم يمشوا خلاص.. واول ما يمشوا يسأله عادل:

-         فيه كلام عندك صح؟

يبص بخجل رامز وبعدين يعيط ‘ فيروح عادل مطبطب عليه ويقوله بحنان:

-         ليه كدبت طيب؟ وعملت كده

رامز وهو بيعيط:

-         ع عع عشان عشان هو كان رخم معايا ومرضاش يلعب معايا

-         بس هو اكيد كان محتاج ينام ومكنش قصده يكون رخم معاك

-         اا اا انا افتكرته بيكرهني

-         لالالا ابدااا مفيش ولا حد هنا بيكرهك ‘ كلنا بنحبك ..

وبعدين يخرج عادل وينادي يحي فيجي يحي ويطلب منه عادل انه يحضن رامز ..

فيحضن يحي رامز ‘ فرامز يقوله من تلقاء نفسه:

-         انا اسف متزعلش مني

يحي وهو مبتسم:

-         مش زعلان خلاص ‘ احنا بقينا صحاب

يبص عادل بكل حب ليهم ويقول:

-         طب يلا يا رامز عشان جدك مستنييك واتأخرتم

********************************************

بعد ما يمشي المحافظ ومعاه رامز اللي ودع يحي ومحمود بكل حب ووعدهم انه يجي يلعب معاهم كتير بص أيهم بتعجب شديد لعادل وقاله:

-         انت عملت ايه مع رامز خلاه بعد ما كان كاره يحي بقى بيحبه

-         علمته انه يعرف يحب

يسكت أيهم ويبص لعادل ويقوله:

-         ليه الجزيرة دي متكبرش وتاخد حيز كبير في الدنيا ؟! ليه مصحناش كلنا فضلنا كده

-         هرجع واقلك ياأيهم مهم جدااا تعرف اننا مش ملايكة

-         فاهم ان ليكم عيوبكم ! ما انتم طلعتم بتكدبوا زيينا يا عادل

-         هرجع تاني واقلك لارا مكدبتش

-         لا كدبت يا عادل! جايز تكون كدبة بيضا زي ما بنقول مش هتضر حد بس لو حطيتها جوة

مسمى هتلاقيها كدبت..

-         خليني معاك للاخر وهقلك ماشي كدبت بس الكدبة زي ما انت بتقول مضرتش حد

-         طب اشمعنى زمان كنت خايف من ظهور الجزيرة للناس ودلوقتي مبقتش خايف؟

-         زمان مكنش لسه عندنا العزوة اللي بقيت شايفها دلوقتي حواليا ‘ انما دلوقتي احنا بقينا عزوة

والفكرة اترسخت اكتر جوانا وجوة احفادنا وهتترسخ بأذن الله جوة احفاد احفادنا .. بقينا كيان

كبير وبنكبر مع الزمن  اكتر.. مبقاش خوف ان كيانا يتهدم زي زمان يا بني موجود..

-         كنت خايف في يوم من الايام دي غصبن عني اهدم الحلم الجميل اللي كنتم عايشين فيه

-         انا مصدقك يا بني ان مكنش ليك ذنب

-         امال ايه بقى الدخلة الامريكي اللي دخلتها عليا دي اول ما رجعت ليكم تاني

-         كان لازم اتأكد قبل اي شي

ابتسم أيهم بألم:

-         اتأكدت؟

-         باقي عليك انت لما تتأكد انت عايز ايه

يطبطب عادل بايده برقة على ضهر أيهم ويبتسم ليه ويسيبه ويمشي

**************************************

 بعد خمس ساعات على بليل والنجوم بترقص في السما والقمر بدر منور وواخد مكانه بين السما الصافية تروح تالا لأيهم وتقوله :

-         انت بتحب تالا

-         اكيد ليه؟

وياخدها في حضنه وهو قاعد على البحر فتبص ليه بكل حب وتقوله:

-         وانا كمان بس انا نفسي انت ولارا تتجوزوا

يبص ليها بصدمة ويقولها:

-         ليه بتقولي كده؟

-         .....

-         قولي يا حبيبتي ليه بتقولي كده؟

تالا توطي راسها وتنزل دموع وتقول بحزن:

-         عشان لارا بتتعب اما انت بتكون زعلان منها

يتخض أيهم ويقول:

-         ازاي؟ مالها ؟

-         سالي دخلت عليها من شوية لقيتها نايمة من الصبح فاستغربت ‘ لان لارا مش بتنام كتير

-         وبعدييين؟

-         بعدين بتصحيها براحة فلما لمستها لقتها سخنة وبابا عادل عندها زعلان

يتفزع أيهم ويقوم ويقولها:

-         تعالي بسسسرررعة

تمسك تالا بايدها الصغيرة أيهم وتقوله:

-         يلا يلااا بسرررعة عشان لارا متتعبش اكتر ‘ يلاااا الحقها يا أيهم

يشيل أيهم تالا في حضنه ويجري بيها بسرعة على الكوخ بتاع لارا وجملة واحدة بس بتردد

جوة عقله كانت لارا قالتها ليه :

" ومن عند غروب الشمس وأشعتها وهي مسافرة لبعيد عشان تروح

لناس تانية بقلك بعتاب "ان فيه نجمة لسه مستنياك بشوووق وان لسه فيه ابتسامة رافضة تخرج

من القلب الا في حضن لُقياك"

يوصل أيهم لكوخ لارا ويخبط بقلق وتوتر فيخرج ليه عادل :

-         لاراااا مالها؟؟

-         تعبانة يا ابني !

-         تعباااانة مالها ؟!

-         سخنة وبتترعش

-         ممكن ادخلها ؟!

-         أيهم قبل ما تدخلها عايز اكلمك في موضوع

-         ممكن نأجله؟

-         لا يا بني لانه يعتمد اذا كنت هتدخلها ولا لا

فيقوله بتوتر اكتر:

-         طب قوووول يا عادل

-         انت هتكمل حياتك مع لارا ولا لا يا بني؟! انا بنتي مش اد العذاب النفسي اللي انت عامله ده

ليها ‘ لو ناوي متكملش دي حريتك بس سامحني لاني همنعك من انك تدخل ليها .. ملهوش

لزوم انك تعلقها ..

-         ايوووة بحبها وعايزاها وهتجوزها وهعيش في اللالا بس سبني ادخل ليها بقى

يوسع عادل من على الباب ويخلي أيهم يدخل فورا .. يدخل أيهم يلاقي لارا نايمة في سبات عميق وجمبها سها وريم وسالي ..

سها بتقوله بصوت واطي:

-         نايمة يا عيني مش حاسة بحاجة خالص

أيهم بحزن:

-         ممكن تسبوني لوحدي معاها

تقوله سالي بحنان:

-         ممكن بس متضايقهاش

-         حاضر مش هاكلها متخافيش

فتقول سها فورا:

-         يباااي رررخم حتى وانت ملهوف على البنت كده

*********************************************

بعد ما يخرج الكل يقعد أيهم برقة جمب لارا ويمسك خصلة من شعرها بشويش ويقلها بهمس:

-         لارااا لارااا

لارا تكون نايمة وتعبانة ومش حاسة بنفسها بس من فترة لفترة بتفضل تهمهم وتخطرف بالكلام

فياخد أيهم طبق مليان تلج ومية ساقعة ويعملها كمادات .. بعد نص ساعة يكون أيهم قاعد جمب

لارا وعمال يبص على السقف ويكون سرحان .. تفتح لارا عينها بشويش وتبص حواليها فتلاقي

أيهم جمبها فتبدأ تعمل أصوات عشان تحسسه انها صحيت وياخد باله .. وبالفعل اول ما ياخد

باله يبتسم ليها ويقولها:

-         عاملة ايه دلوقتي؟

-         كويسة

-         ومالك هتضربيني باللي في رجلك كده ليه!

تبص ليه باندهاش وتسكت .. فيمسك ايدها برقة وحنان ويبوسها من جوة ويقولها:

-         عارف اني وجعتك واني اتاخرت اوي بس تعملي ايه ! حبيتي واحد غبي ومتخلف بس والله عنده

قلب بيموت فيكي .. حظك بقى

تفضل لارا ساكته فيكمل أيهم ويقول:

-         عايزة نعيش في اللالا موااافق يا ستي نعيش بس انا عايز اطلب منك طلب

فتقول على مضض:

-         ايه؟

فيبص ليها أيهم ويغمز بابتسامة ويقول:

-         افهم من كده موافقة تتجوزيني

فتتكسف لارا جامد فيرجع يقلها:

-         عايز نبقى ننزل برضو القاهرة ونعيش هناك شوية مش على طول والله بس قال يعني بنصيف

شوفي الناس بتصيف في اماكن هادية وبحر وبتاع ‘ احنا نروح نصيف في القرف والزحمة

-         اشمعنا؟

-         عايز الناس هناك تتعامل معاكي ‘ تتعامل مع حتة من الجنة ‘ عايز السحر بتاعك اللي قدر

يدخل جوايا ويخلعني من توب مكنش توبي ومن توهتي وضياعي يروح هناك ويخرجهم

من ضلمة هما عايشين فيها ..

تتكسف لارا وتقوله:

-         النقاء كان موجود جواك اصلا يا أيهم

-         كان تايه وكان تعبان وكان محتار  وضايع ..

-         مش انت طلبت مني طلب ‘ ممكن انا كمان اطلب

-         لا

فتبص ليه بتعجب وترفع حاجبها فيضحك ويقول:

-         ما انتوا بترفعوا حواجبكم زينا اهو يا بتوع اللالا ! انتي تشرطي مش تطلبي

-         ممكن تصالح باباك وتجيبه يتقدم معاك لبابا

-         بصي بالنسبة نتقدم فدي ممكن ناخد يجي حسبة خمناشر سنة كده عقبال ما اقنع ابويا اصلاااا

انه فيه حاجة اسمها لالا ! ما اصله يعني هو هيقول اني يا اتجننت يا اتجننت!

-         ليه!

-         طب تعالي نتخيل كده ‘ بابا انا عايز اتجوز .. ماشي يا بني خير وبركة ‘ منين البنت.. من اللالا يا بابا ..

-         ايوة وفيها ايه؟

-         هيقلي فورا يلا بلالاتك دي بعيد يا واطي اصلي مربتكش !! هيفتكرني بشتمه يا حبيبتي

-         ايه اللي انت بتقوله ده يا أيهم

يبتسم ليها بهدوء ويضمها برقة في حضنه ويقول:

-         يااااااااه يا لاراااا !! عارفة جوة حضنك بحس برعشة بتدفيني ! لحظة استسلام للجنة بنعيمها ..

وكأني طاير بجناحات بحرية في دنيا ملهاش حدود .. انا طفل تايه من غير موج عشقك! فخديني

لــ برك واوعي اوووعي تطرديني من حضنك..

-         هتفضل مرسوم كحل جوة عيني ‘ انت اللي اوعدني انك متبعدش عني

-         يا عبييييطة انا لما بعدت مكنتش عارف اعيش! زي اللي مخنووق ‘ مفيش ولا لحظة أكسجين !

-         بس قدرت وبعدت؟!

-         غبـــــــــــــي ! والله غبي تقولي اييييه

وفجأة يسمعوا خبط جامد وسها بتدخل وهي فرحانة جدا وبتزعق بحماس:

-         أيهــــــــم أيهــــــــــــــــــــــــــــم الحق يا أيهــــــــــــــــم الحق

-         ايييييه في اييييه يخربييييتك !! في ايه؟! سررررعتيني

-         بااابااااا وتيتة وماااماماااا هناااا

أيهم بصدمة:

-         هنا فين لا مؤاخذة ؟!

-         هنااااا جم الجزيرة يا أيهم !!

-         نعـــــــــــــــــــــــــم؟!

-         اه والله ! اصل انا كلمت بابا وحكتله وقلتله وجه يا أيهم

تبص لارا ليه وتقوله:

-         يلا يا أيهم روح صالحه

-         حاضر

تبص سها بصدمة واندهاش وتقول:

-         لالالاااالالاااااااا أيهم بيسمع الكلااااام!! مش معقووول

أيهم بهزار:

-         انتي بالذااات تسكتي بعد ما خلتيني افقد احساسي ‘بالخضة اللي اتخضيتها دي في دخلتك علينا! ولا دخلة أمن الدولة !

*********************************************

يروح أيهم لعند باباه وجدته ومامة سها اللي بيكونوا قاعدين في المطعم اللي على البحر

مع عادل ويسلم على جدته ويبوس ايدها وبعدين يروح يسلم على مامة سها ويقف قدام باباه

يكون مرتبك ومتوتر ومش عارف يسلم ازاي ‘ بس باباه يشده لحضنه فينسى أيهم كل

العتاب اللي في الدنيا ويعيط في حضن باباه ويقوله بتأثر شديد:

-         وحشتني اوووووي يا باباااا

-         يااااااه يا بني ‘ اخيراااا الحجر القاسي اللي جواك دااااب

فتقول سها من وراهم:

-         طبعاااا البركة في اللالا ولاراااا اللي صحوا البني ادم اللي جواه ..

يمسح أيهم دموعه ويمسح بابا أيهم كمان دموعه ويبتسم ويقول:

-         هي فين بقى اللي خطفت قلب ابني

فتيجي لارا من بعيد بطلتها الرقيقة وهي لابسة فستان أزرق طويل انيق بكم واحد والياسمين

في شعرها السايح من على جمب واللي النسيم بيطيره كل شوية برقة فيزيد جمالها فيه..

فأول ما تشوفها الجدة تقول:

-         ماشااااء الله ‘ حلوووة دي ياأيهم اووووي

-         عجبتك يا تيتة

-         اووووي يا حبيبي ‘ بس مش كنت تتجوز مصرية يا حبيبي ‘ يعني البنات المصريين خلصوا

الكل يضحك ويقول أيهم:

-         قلتلكم !! بلاااااش تجبوها قبل ما تتعشى ! ماهي مصرية يا تيتة

-         مصرررية! امال ايه بس مطيرني في طيارة وهنسافر هنسافر ومتعبني!! بتضحكوااا عليا يا ولاد

فتقرب منها لارا وهي بتضحك وتحضنها وتقولها:

-         سلامتك يا أحلى جدة وبعد الشر عليكي من اي تعب ‘ اصل احنا هنا في اخر مصر وعشان متتعبيش بزيادة فركبوكي طيارة..

بتضحك الجدة ليها وتقول بحب:

-         ماهي مصرية وحلوووة اهي ‘ واد يا أيهم خددد بالك منهااااا

وبعدين تبص للارا وتقولها:

-         وانتي يا بنتي معلش استحمليه وهو نايم ‘ اصله بيرفص كتييير

يجري أيهم على جدته بهزار ويقول لسها:

-         سهاااا سهاااا ‘ تيتا جعاااانة هاااا اكليها بقى اي حاجة بسرعة الله يرضى عليكي بدل ما نلاقي

ذكريات الطفولة اتشردت دلوقتي ..

*************************************************

عند الفجر وعند شروق الشمس وبعد ما الكل نام تكون لارا قاعدة عند شجرة الحياة وعلى البحر

وفي حضنها تالا نايمة وجمبها أيهم قاعد مبتسم وجمبه محمود نايم برضو.. ومع الشمس وهي

بتشرق بهدوء والأشعة بتبتدي تنتشر فوق جزيرة اللالا بكل أمل وسعادة والسما لونها أزرق وبرتقالي داخل فيه أحمر خفيف تبص لارا بحب لأيهم اللي يمسك ايدها بهدوء ويلبسها خاتم في جيبه ويقول:

-         كده احنا قرينا الفاتحة معاهم ولبستك دبلتك ‘ اكتر من كده بقى متطلبيش

-         هههههه

-         ضحكتك شباك موارب على الدنيا الحلوة

-         بتكسفني بكلامك

-         بحبك يا لارا اووووي بحبك اوووووي

-         وانا كمان بحبك

تصحى تالا وتدعك في عيونها اللي نص مغمضة ونص مفتوحة:

-         هو انتوا لسه منمتوش

فيضحك أيهم ويقوم يمسك ايدها ويلف بيها جامد ويقول:

-         وانتي يا شقية ايه اللي صحاااكي دلوقتي

-         عشان نجمة البحر لازم تصحى على صوت الموج ! وانتوا كمان صوتكم عالي

فياخدها أيهم ويجري بيها على البحر ويعوم معاها ويضحكوا سوا وعلى صوت ضحكهم

صحي محمود اللي نزل معاهم وهو فرحان وتفضل لارا تبص عليهم وتضحك ..

فيطلع أيهم يسحبها بكل حب ورقة ويقولها:

-         يلا نغوص سوا ‘ الموج بينادينا

فتبص ليه بكل رقة وحب:

-         يلااا بينا

النهايـــــــــــــــــــــــة