الحلقــــــــــــة الثامنـــــــــــة من "لليلك"

الحلقة الثامنــــــــــــة

تقفل مهرة التلفون وهي في قمة انهيارها من العياط  .. وترجع بذكرياتها للماضي..

*****************************

مهرة في بيتها قاعدة عمالة بتطبخ الغدا لحد ما جوزها يرجع من الشغل وفجأة باب البيت رن .. بتقلب

البصل والتوم في الزيت وبعدين تحط مية وكل ده اللي على الباب عمال يرن الجرس بس هي مش قادرة

تسيب اللي على النار الا لما تحط المية بعد ما البصل والتوم يتحمروا عشان ميتحرقوش .. وبعد  ما تحط

المية ويتحمروا تجري تفتح الباب .. تكون حماتها وبناتها الاتنين ووقفين متعصبين .. الام بكل غضب:

- انتي طارشة ولا بتهببي ايه !!

مهرة بكل خجل:

- والله اسفة بجد بس الاكل كان على النار واستنيت احط المية عشان ميتحرقش

الام بكل عجرفة:

- اكل ايييه وقرف اييييه اللي انتي خايفة عليه !! انتي مش عارفة اني مبقدرش اقف على رجلي كتير بعد

ما بطلعلكم الدور السابع ..

- والله لو اعرف ان حضرتك جاية لكنت فتحت فورا بس والله ما اعرف

تقول شادية :

- ليه واحنا ان شاء الله لما نحب نزور اخونا لازم يختي نعمل أذن قبله؟! ولا ايه ؟؟؟

- لا طبعااا مش قصدي والله ..

بعدين بضيق تقول:

- تحبوا تشربوا ايه؟

الام بضجر:

- مش عايزة اشرب ‘ عاملة غدا ايه ؟؟

مهرة بتوتر:

- مكرونة وفراخ بانيه

- وهو ده يختي اللي كنتي خايفة عليه يتحرق!! تقوولش كات بتجيب الديب من ديله !!

- مش قصدي ياماما بس انا كنت بحمر البصل والتوم في السمنة ولو كنت سبته ثواني كان زمانه اتحرق

حنان تقول بسرعة:

- اففففف افتحي الشبابيك بقى ريحة البيت فعلا كلها تقلية التوم والبصل ‘ ريحة تخنق !! افتحي يا ميمي

تقوم مهرة بكل ضيق وحزن وقهرة:

- حاضر ..

تقول الام:

- قومي يا شادية شوفي اللي انتي عايزاه

تلتفت مهرة بتعجب ليهم وتقول:

- ايه؟

شادية ببجاحة:

- هشوف لبس ليا ! هو ايه اللي ايه؟؟!

مهرة بضيق شديد ونبرة باين فيها الضيق:

- من حاجتي!

شادية بسخرية:

- ايــــه؟! سمعني كده يختي !! حاجتك!! حاجة ايه اللي انتي هتتفرعني يا بت فيها علينا ؟!!! اياك تكوني

مفكرة يا بت الصعايدة انتي دخلتي علينا بايشي وشوووويات !! ده انا اخويا جابك من هناك بشنطة هدومك

المعفنة!!

تصعق مهرة من الكلام والدموع تتجمع في عنيها فتكمل شادية ببجاحة اكتر:

- ايوة ايوووة مثلي يختي دور البت المنكسرة بقى عشان اخويا اما يجي يفكر يا عيني احنا بقى الاختين

الشريرتين!!

تقاطعها حنان بسرعة:

- وانا مالي انا متكلمتش..

تبص ليها شادية بغيظ وحنق وتقول بصوت عالي:

- لا يا حبيبتي وانتي مفكرة انها مش هتجيب سيرتك لاخويا ماهي هتبع ببقين زي السم !!

تبدأ مهرة تعيط وتقول للام:

- يا ماما لو سمحتي خلي شادية تحترم نفسها في الكلام معايا !! انا حقيقي عاملة احترام لحضرتك

تقول الام بكل غضب:

- وانتي لو كنتي عاملة احترام كنتي تخليها تدخل من سكات من غير ما تقطميها كل شوية !!

مهرة بكل غضب:

- لا والله حراااام عليكم بجدددد ‘ انا مش قادرة استحمل اهانات اكتررر من كده وظلم وقهرة!! هو انا

عشان محترمه عبد القادر ومحترمة انكم اهله يحصل فيا كده

شادية بكل جبروت:

- شووووف البت !!! وبتعلي صوووتك على ولية كبيرة في السن يا اللي اخويا لمك من الشوااارع !!

يا عيلة عرة ولا ليكم لازمة!!

مهرة اول ما تسمع الكلام ده تخرج عن طورها وتزعق:

- كلمة زيااااادة مش هيحصل طييييب

وتسيبهم وتدخل اوضتها وتقفل الباب عليها بالمفتاح..

*********************************

اول ما تنفرد مهرة بنفسها تفضل تعيط وتتصل بمامتها وتقولها بانهيار تام:

- هزأوني يما وعايروني وقالولي ان ملزمش يماااا !!

- معلش يا بنيتي انتي عارفة ان الام عقربة ولازم تداري على بيتك

- يما كفياكي بقى كلام معدش له واصل وتعالي انتي وخالي خدوني وعرفوووهم اننا لينا قيمة!!

- واااه عايزة اهلنا هنا في الصعيد يقول ايييه!! حمدية معرفتش تربي بنيتها بعد ما جوزها مات؟! وهملتها

فجات بخيبتها تاني !!؟

- خيبة ايه يمة ده اللي انا فيه هنا ده مراااار وبسكت وبستحمل عشان جوزي وبقول اعدددي بس اللي بيحصل

كتييير كتيييييير اووووي..

- اسكتي واقفلي خشمك ومسمعش الكلام الماسخ ده واااصل فاهمة !! وتجعدي في بيتك وتداري على شمعتك

مهرة بزعيق:

- حرااااام عليكم هو انا عشان يتيمة تعملوا فيا اكديه !! والله حراااااام حراااااام

وتقفل التلفون في وش مامتها..

****************************************

 وتكمل  مهرة عياط بشكل اكبر وهي سامعة شادية بتقول:

- وكمان رايحة تشتكي لامك طب احنا قاعدين بقى لحد ما اخويا يرجع ونقوووله عشان يشوف شغله

معاكي ‘ عشان واضح ان ابوكي مات قبل ما يكمل تربيتك ..

حنان تقول لشادية بصوت واطي:

- بس بقى اسكتتتي انتي عارفة ان اخوكي بيحبها

- ما ده اللي قايد قلبي وناااري !! حبها على نيلة ايه ده !

- طيب يعني فيه احتمال كبير اوووي انه يقف في صفها ويديكي علقة من بتوع زمان

شادية وهي بتبص لبعيد وبتقول:

- امك هتكون في صفي !!

تبص حنان بخوف لامها وتقول بصوت واطي اكتر:

- في ايه يمه !! ما تهدوا اللعب شوووية!!

- اخرررسي انتي ملكيش دعوة وعارفة لو فتحتي بقك بحرف واااحد وقلتي لاخوكي حاجة ولا وقفتي في صفها

حنان بخوف :

- وانا مالي تولعوا في بعض كلكم

تقول شادية في نفسها:

"اما وريتك يا عبد القادر وخربت عليك بيتك زي ما خربت عليا ومخلتنيش اتجوز اللي بحبه مبقاش شادية!!

هخلي حياتك جحيم زي ما خليت حياتي كلها جحيم وهوريها الكلبة دي !! ااااااخ يا ناااري كل ما اشوووف

نظرة الحب اللي بينكم وانا اللي حرمتني من اللي بحبه وخليته يهج ويسيب البلد ويسافر لبرة ابقى عايزة اولع

فيكم .. هه وقال المغفلة اختي تقولي هدي اللعب !! ده انا على اد ناري اللي متشعللة جوايا لاشعلل قلبك

عليها يا عبد القادر"

*************************************

اول ما يوصل عبد القادر البيت بعد ما رجع من الشغل واول ما يفتح الباب تعمل شادية نفسها بتعيط وتقول:

- يا خيبة حظك يا شادية في اخوكي اللي قهرك على طول

يبص عبد القادر لمامته اللي قاعدة واخواته ويدور بعينه على مهرة وميلاقهاش قاعدة معاهم فيسأل :

- امال فين مهرة؟!

تتغاظ شادية اكتر وتقول:

- فينها !! طبعاااا بعد المرمطة اللي مرمطتتهالنا ليها عين ولا وش تقعد هنا !! حابسة نفسها يا اخويا في الاوضة

عبد القادر يبص لمامته بعدم فهم ويسألها:

- في ايه يما؟؟

- البت اللي كان يوم اسود يوم ما روحت وجبتهالنا ‘ عمالة بتمرمط في امك واخواااتك وانت رجلنا قاعد تتفرج

عبد القادر بغيظ وعصبية:

- بقلكم ايييييييه ما تتكلموا دووووغري ايه الالغازززز دي!!!

الام بغيظ:

- وكمان بتعلي صوتك على امك اللي تعبت في تربيتك !

عبد القادر وهو بيجز على سنانه:

- قولي يما في ايه وجرا ايه لكل النواح ده؟!

- مراتك سايبانا على الباب ربع ساعة ومكنتش عايزة تفتح لينا ولما فضلنا نخبط كتير فتحت بحجة قال ايه

مش عايزة الاكل يتحرق!! ولما بقول لاختك تدخل تشوف هي عايزة ايه تستلفه من جوة مرمطت بكرامة

اختك الغلبانة وقهرتها وكسرت نفسها!!

خرجت مهرة من اوضتها وقالت وهي عيونها منفخة عياط:

- والله ما حصل يا عبد القادر

الام بكل غضب:

- واهييييي بتكدبني كمان!!

شادية بحرقة وغيظ:

- خليه يا ماما يشوف قلة ادبها وبجاحتها معاناااا!! مش تحترم سنك لاااا دي بتقلك يا كداااابة

الام بعياط مزيف:

- على اخر عمري اتبهدل من ابني كده ! وقداااامه وهو اللي عملي فيها راجل بسبع شنبات واقف شايف

وساكت..

اخر جملة كانت كفيلة تخلي نيران الغضب تزيد جوة عبد القادر ‘ حاولت مهرة تتكلم وتقول:

- والله ابدا ‘ اللي حصل ......

يقاطعها عبد القادر بعصبية:

- اسكتي انتي دلوقتي لما اقلك تتكلمي تتكلمي

مهرة بخوف:

- بس اسمعني الاول يا عبد القادر ......

بكل غضب:

- قلتلك اسكتي انتي دلووووووقتي

مهرة بعصبية:

- لا اسمعي الاول !! الكلام اللي بيتقال ده ......

ويقاطعها قلم على وشها من عبد القادر ويقول بكل غضب:

- لما اقلك تسكتي يبقى تسكتي !! وتخلي امي تكمل كلامها ومتكدبهاااش ابدااااا

تفرح الام وشادية لكن حنان تكون مضايقة بس في نفس الوقت مش قادرة تتكلم ولا تنطق ..

************************************

تخرج بيري من المدرسة بسرعة وتلاقي محمود واقف بابتسامة مستنيها ‘ تسلم عليه وتقوله:

- امال هيما مجاش ليه؟؟

- معلش اصله مشغول وقالي يا ستي اخدك واوديكي المطعم اللي هتتغدوا فيه

- طب وانت؟؟

- لا انا غلبان لسه عازب فهروح اجيب كيس مكرونة وهمبرجر واكله

- هههههههه طب لا حرام ما تيجي تتغدى معانا

- يوم تاني نتغدى كلنا سوا وحتى ممكن تبقي تجيبي صحابك

- خلاص حلو

محمود بارتباك:

- هي اللي ندتك جوة دي صحبتك صح؟ اصل انا يعني عزمت عليها اوصلها بس انا عشان يعني من عشمي

اني زي اخوكي وكده..

- اه اه مهرة صحبتي فعلا في السكن وفي نفس الشقة بس هي كده اصلا منعزلة دايما ومبتحبش تخلي حد

يعملها حاجة ..

محمود يسرح لبعيد ويكتفي بهز راسه ...

****************************************

تركي قاعد في مكتبه ويلاقي اتصال من والده :

- هلا هلا حبيبي ازيك

- الحمد الله ‘ انت فين يا ولد ؟! انت مجتش ليه ليا لحد دلوقتي؟

- مشغول يا والدي وبعدين الشغل هنا كتير وفوق راسي

- تُركي انا بعت مامتك عشان تقعد مع العنود وميبقاش ليك حجة انك متسبهاش لوحدها وتعالى ليا انا عايزك

في موضوع خطير ..

- طب مينفعش اعرف ايه الموضوع ده ؟!

- انا وجوز خالتك  اتفقنا على حاجة وعايزينك فيها

- ايوة اللي هي ايه يا والدي؟ لو شغل ابعتلي ملف المشروع مع اي عامل جاي هنا البحرين وادرسه

وارد عليك بس حقيقي انا حاليا مش فاضي.

الاب بنبرة مليانة جدية:

- امال فاضي بس تسهر مع الشباب الصايع اللي عندك؟!

- اسهر ؟؟ هو انا لو خرجت اخر الليل مع صحابي شوية افك عن نفسي يبقى انا كده بضيع وقت ؟!

- انت عمرك كام يا بني دلوقتي؟

- 28

- وامتى ناوي تتجوز؟!

اول ما سمع تركي السؤال قلبه دق من الخوف وقال فورا وهو رافع حاجبه:

- هو الموضوع يخص مين يا والدي؟!

- يخصك انت وخديجة ‘ انا شايف انها بنت حلوة وهتصونك وقريبتك و .....

يقاطعه تركي بسرعة:

- ده اخر المستحيلات

الاب بغضب شديد :

- بكرة لو مجتش ليا هنا عشان نخلص الموضوع مش هيحصل طيب..

*************************************

محمود وهو قاعد في العربية سرحان تبص ليه بيري وتقول:

- محمود هسألك سؤال صريح بس تجاوبني

- طبعا يا بيري اسألي؟

- هو ابراهيم بيخوني ؟!

........................................

الحلقـــــــــــــة السابعـــــــــة "ليلــــــــــك"

الحلقة السابعـــــــــــة

في نفس الوقت تركي داخل محل الورد وبيقول للراجل :

-         عندك ليلك

اسم الورد خلى بيري تلتفت ليه ‘ في نفس اللحظة اللي الراجل بيشاور لتركي على الورد واللي

بيكون جمب بيري وياسمين .. والعيون بتتلقي ووقتها بيري تترعب وتُركي يبتسم ابتسامة واحد

كان بيدور على حاجة ولقاها من تاني ..

بيري بتقول بارتباك شديد:

-         يي يل ايلا بسررررعة يلا نمشي بسسسسرعة يا ياسو

ياسمين بتعجب:

-         فيه ايه يا بنتي؟ّ!! مالك؟ شفتي عفريت

-         بلييييز يا ياسميييين يلاااااا بسرعة ارجووووكِ

وتشدها بيري وتطلع بسرعة وياسمين بتقول باستغراب:

-         يا بنتي والورد اللي دوختينا عليه؟!!!!

-         مش مهمممم مش مهممممم

-         يا بنتي ما تفهميني عمالة بتشديييني ليييييه كده !!

وفجأة يسمعوا صوت تركي اللي بيجري وراهم وهو بيقول:

-         استني متخافيش

تلتفت ياسمين ليه باندهاش اكتر وتقول لبيري:

-         مين  ده !!

-         ملناش دعوووة بيه يلاااا نمشي بسرعة يا ياسمين ارجوووكِ

تُركي يلحقهم ويقف قدام بيري وهو ماسك الورد معاه ويقول:

-         قلتلك متخافيش

بيري بضيق شديد:

-         انت عايز اييييه!! انت مالك بيا ؟ الله

ياسمين تبص بتعجب وتقول:

-         فيه ايه حضرتك!!

-         مفيش انا حصل بيني وبين الانسة موقف وحبيت اعتذر ولما عرفت من صاحب المحل انها

كانت عايزة ورد "الليلك" انا جبته ليها كاعتذار مني ليها..

بيري بضيق:

-         شكرا مش عايزة اي اعتذار منك اصلا

ياسمين بعدم فهم:

-         انا مش فاهمة اي حاجة خالص

بيري بغضب:

-يلا بينا يا ياسمين

وبعدين تبص لتُركي وتقوله بتحذير:

-         لو شفتك في اي وقت تاني وبتعترضني صدقني مش هيحصلك طيب!!

وتمشي بيري بسرعة  ووراها ياسمين فيناديها تُركي:

-         لو سمحتي ابقى اديها البوكيه ده

تبص ياسمين بحيرة لبيري اللي ماشية مضايقة ولتُركي واصراره وبعدين تاخد البوكيه بتردد

وتجري تلحق بيري..

**************************************

بعد يومين رينا تكون قاعدة في اوضتها ولسه منعزلة عن بندر ‘ تفتح الباب بعد ما تسمع صوت

الباب اتقفل وتخرج بس تلاقي بندر واقف قدام الاوضة فتتخض جامد ‘ يضحك بندر ويقول:

-         اعملك ايه!! مش مدياني فرصة وانا بقالي يومين عايش متمرمط مع العيال وانتي ولا في بالك!!

-         .....

-         رينا انا عارف اني غلطت بس مش اوي كده

تبص ليه بعتاب شديد وتقول:

-         شفت !! انت لسه مش حاسس بنفسك ؟! لسه فاكر انك مغلطتش الغلط اللي يستاهل

-         طب قوليلي بس انتي عايزة ايه ؟

-         عايزة اشتغل

بندر يسكت ويكشر وملامحه تتغير ويقول:

-         الموضوع ده اتقفل نهائي يا رينا واظن انتي عارفة ده كووويس

-         لييييه اتقفل !! لييييييييه!؟

-         عشان انتي عارفة كووويس من ساعة ما اتجوزنا ان بيتك وعيالك دلوقتي اهم بكتير من الشغل

-         انت مكنتش متفق معايا كده قبل الجواز يا بندر!! اييييه اللي اتغير؟!

-         ان بقى لينا اطفال دلوقتي محتاجين منك اهتمام؟!

-         منا اقدر اهتم يا بندر فيييين المشكلة !! وبعدين تعالى هنا قبل الجواز مكنتش عارف ان هيبقى

عندنا عيال؟!

-         لا كنت عارف ....

-         وليه متفقتش معايا قبل الجواز ؟ ليه استنيت لما نتجوز ووقتها تملي عليا شروط جديدة؟

-         ريناااا انتي ايه اللي حصلك؟! انا سايبك بقالي يومين تتدلعي براحتك وعمال اقول معلش معلش

لكن في اييييييييه!!!! ما تعقلي كده وتفوووووقي الله ..

-         امشي يا بندر روح على شغلك وشوف اللي وراك ‘ لان الكلام مبقاش نافع معاك

-         يوووووه دي بقت عيشة تززززهق

**************************************

في المدرسة كانوا بيحتفلوا بيوم الوطني عند البحرين واللي بيكون موافق يوم 16/12 بس نظرا

لانه اليوم ده بيخدوه اجازة فالاحتفالات بتبقى قبلها .. والطلاب بيبقوا لابسين شال عليه علم

البحرين او صور الملك حمد ملك البحرين وبيشغلوا اغاني وطنية والمدرسات بيكونوا لابسين

احمر وابيض على لون علم البحرين ..

كانت بيري عاملة مسابقة رسم للطالبات بمناسبة اليوم ده عشان في الاحتفال يعرضوه في

الطابور كاحتفال باليوم ده ..

وياسمين كانت واقفة تنظم الفعاليات اللي هيعملوها في الاحتفال ‘ اما مهرة فكعادتها في كل

احتفال بيحصل في المدرسة بتنسحب وتنعزل لوحدها في اوضة المدرسين تخلص في شغلها..

كانت بيري طالعة تحط حاجة فلقت مهرة قعدة لوحدها:

-         ما تنزلي يا مهرة تتفرجي معانا ؟ اليوم حلو وهيصة

بابتسامة باهتة:

-         لا شكرا انا خليني كده .. اتبسطوا انتوا

-         مممم طيب

-         عمتن انا شوية وهستأذن من المديرة لاني مصدعة جدا

-         ماشي حبيبتي سلامتك ..

**************************************

ابراهيم بيجيله تلفون من بيري:

-         ايه يا ابراهيم انا بقالي يومين بتصل بيك وانت كل شوية مشغول مشغول وهكلمك !! ومبتكلمنيش؟!!

-         ما انا اكيد مشغول يا بيري؟!

-         مشغووول ايه بس وبتاع ايه ؟ واناااا يعني فين من مشغولياتك؟ هو انت ناسي اني هنا في

بلد غريبة عليا وانت راميني كده ؟؟

-         راميكي ايه بس ما انتي مع البنات في السكن انا متأكد من ده

-         ابرااااهيم متلفش وتدووور ‘ لو سمحت انا عايزة اشووفك

-         حاضر هشوف ايه النظام واتصلك

بيري بغضب:

-         هوووو ايييييييه اللي تشووف نظاااااامك وتتصلي!! انت في ايه يا ابرااااهيم؟!

-         بيري اقفلي دلوقتي عشان داخل اجتماع وهخلي محمود يعدي عليكي يجيبك المطعم اللي

جمب الشغل عشان نتقابل .. سلام سلام

تقفل بيري والدموع في عينها وتقول:

-         استغفر الله العظيم بجد!!!

بعدين تقعد ثواني كده وترجع تتصل بشيماء اللي اول ما تقولها الو تقول بعياط:

-         شيموو وحشتيني اووي

-         وانتي كمان يا حبيبتي ‘ بس مال صوتك؟ انتي بتعيطي؟؟

-         مخنوقة شوية

-         ليه كده؟؟

-         بصي انا المفروض لسه في المدرسة وفيه احتفالات عندنا وهيصة بس حسيت اني محتاجة

اسمع صوتك..

-         طب خلاص روحي لشغلك دلوقتي وكلميني يا روحي لما ترجعي على سكايب وخلينا نفضفض

شوية ..

-         ايوة يا شيمو انا تعبانة اوووي ومحتاجة لفضفضتك ..

*********************************

محمود قاعد في مكتبه عمال بيلعب في الموبايل يدخل عليه ابراهيم بغضب:

-         بقلك ايه روح هات الزفتة بيري بعد ما تتنيل تخلص شغلها وجيبها هنا على مطعم

الابراج ..

-         ايه ده ايه ده !! مالك يا جدع انت ؟ بتتكلم عليها كده ليه

-         عشاااان مش طااااااايق الخننننننقة بتاعتهااااا

-         خنقة؟ خنقة ايه؟؟

-         مبتتصلش بيا ليه ؟ وكل دقيقة مسج انت فين ‘ مبتردش ليه ‘ انا بتصلك ‘ كلمني ‘ انت سايبني

في الغربة لوحدي!! وقرررف قررررف قرررررف !! هو اناااا ناقص لشغل العيال ده

-         تصدق بالله يا صاحبي انت متستاهل بيري دي ولا ضفرها حتى

ابراهيم بغضب شديد جدااا:

-         محموووووووود انت اتجننت ولا ايييييييييييه!! اقلك خلاص خلاص متروحش تجيب اي زفت

مش عايز منك حاجة ..

-         اهدى بس ومتعشش الدور اووي وهروح اجيبها مش عشان خاطرك لانك متستاهلش بس عشان

افرفش البونية الغلبانة اللي رضيت تتغرب وتتذل في سبيلك ..

-         لا يا حبيبي انا مضربتهاش عشان تيجي لاني اصلا مكنتش عايزها تيجي !

*****************************

على الضهر راح محمود للمدرسة اللي شغالة فيها بيري وفضل مستنيها برة وكان عايز

يدخل يسأل جوة على بيري امتى هتخرج بس حارس المدرسة منعه انه يدخل لانه مش ولي

أمر وملهوش صفة يدخل بيها المدرسة... وبعد دقايق شاف محمود مهرة وهي خارجة من

المدرسة ‘ فاتردد في الاول يسألها عن بيري لانه ميعرفش اذا هي تعرفها او لا لا بس

قرر يروح يسألها ..

-         لو سمحتي

مهرة بتلفت ليه :

-         نعم؟

-         هي استاذة بيري جوة؟ اصل بتصل بيها ومبتردش؟؟

-         اه جوة مشغولة مع الطالبات عشان النهاردة عندنا احتفال باليوم الوطني

-         اه طب هي هتطلع امتى؟

مهرة تبص في الساعة وتقول:

-         فاضل تلت ساعة وجرس المدرسة يضرب وهي هتخرج ‘ انت حضرتك خطيبها ابراهيم؟

-         اا لا انا صاحبه هو انتي تعرفيها؟

-         ايوة هي معايا في السكن

-         بجد والله ‘ طب ممكن اتقل على حضرتك وتروحي تقوليلها بس اني واقف برة مستنيها او ترد

عليا في التلفون ضروري ..

-         ماشي طيب ..

تدخل مهرة ويبص ليها محمود باعجاب شديد ‘ هدوئها وحجابها الرقيق وملامحها البيضة ولون

عيونها السود يجذبوه ليها .. تخرج تاني ليه بعد دقايق وتقوله بابتسامة باهتة:

-         انا قلتلها وهي هتخلص اللي في ايدها وتكلم حضرتك بعد اذنك ...

-         ا استني ...

تبص مهرة باندهاش:

-         ايوة؟

-         هو ا ا يعني بعد اذنك ومش قصدي اكون حشري بس هو انتي مروحة؟

-         اه خير!!

-         يعني انا ممكن اروّح حضرتك لما بيري تخرج

تكشرمهرة ليه وتقوله:

-         بعد اذن سيادتك ‘ اعتقد انك فهمتني غلط ..

وتمشي بسرعة قبل ما تدي محمود فرصة انه يتكلم فيقول بصوت عالي :

-         لا والله مفهمتش غلط ‘ انا عارف انك اكيد مش هتركبي مع اي حد ..

************************************

مهرة بترجع السكن وبتروح تشرب مسكن للصداع اللي هي حاسة فيه من اول اليوم واول

ما تقعد على الكنبة تنهار من العياط وتبدأ تكلم نفسها:

-         لحد امتى يا مهرة هتفضلي بعيد عن الفرحة؟!!!

تمسح دموعها اللي بتنهمر بغزارة وتكمل:

-         لحد امتى هتفضلي شايلة الحسرة جواكِ وساكتة؟!

وفجأة يرن تلفونها فتبص تلاقي رقم والدتها فترد لاول مرة من غير تردد وهي بتبكي :

-         ايوة يا امي

-         ايووووة يا ضنااياااااا ‘ اخيرااااا يا بُنيتي حنييييتي على امك ورديتي

-         يا امي سبيييني في حزني

-         لحد امتى يا ضنايا

-         لحد ما الولعة اللي جوة قلبي تتطفي يا امي لحد ما تتطفي

-         نارهااااا صابتنا يا بُنيتي نارهاااا صابتناااا

-         نارها بتحرقني انا كل يوووم وساكتة ! بتحرق عمري وانا ساكتة همليني يمه دلوقتي الله

يخليكي ..

-طب انزلي الصيف ده يا بُنيتي انزلي يا ضنايا نتكلم ؟؟

- هشوف وافكر !

- متخاااافيش مش هنعملك حاجة تاني والله ما هنعملك بس انززززلي ابووس ايدك

تقفل مهرة التلفون وهي في قمة انهيارها من العياط ...

******************************