أنثى في عيــــــون مفترســـــــة "قصـــة قصيـــرة" لفاطمــــة طــــلال

أنثى في عيونٍ مفترسة

مأساة حياتي بدأت لما كنت في تالتة ثانوي ‘ كان بيتنا مليان هدوء وامل وحب وحياة..

احلامي وقتها كانت بتطير لسابع سما.. مكنتش اعرف انها هتموت بعد شوية..

كنت بحلم ادخل كلية طب وابقى دكتورة .. عيلتي كانت متوسطة الحال وبابا كان عنده

محل وزي اي واحد عنده محل معرض للخسارة والديون..

فجأة في يوم لقينا الناس بتخبط علينا وشايلة بابا وهو تعبان ومش قادر..

امي جريت عليه وسألته..

ماما:مالك يا عبد الله ايه اللي جرالك..

بابا:متخفيش يا سعاد .. انا الحمد الله كويس

جريت من اوضتي وروحت ساعدت الناس وماما انهم يحطوا بابا على سريره.. وبعد ما

الناس مشيت بابا قال:المحل ديونه كترت اوووي يا سعاد ومبقتش عارف اعمل ايه

ماما بحزن:في ستين داهية المحل .. المهم انت يا عبد الله وصحتك..

بابا بيأس:مش عارف اعمل ايه.. من بكرة باذن الله هلف على صحابي بتوع زمان

احاول الاقي حد يساعدني في الورطة دي..

ماما:ان شاء الله يا عبد الله.. وانا هحاول اشوف صرفة باذن الله..

كنت في اوضتي وانا بسمع الحوار ده وكنت خايفة وقلقانة جدا على بابا..

***************************

بعد يومين لقيت بابا داخل البيت والفرحة مش سيعاه وبيقول لماما:باركيلي يا سعااااد

الحمد الله ‘ لقيت اللي هيسدد ديون المحل وهيستنى عليا لحد ما اوقف المحل تاني

على رجليه وياخد فلوسه براحه..

ماما والفرحة مش سيعاه:بجد؟؟ مييين يا عبد الله؟؟؟

بابا:صاحبي صلاح ربنا يباركله اول مرة عرف قالي طبعا

ماما:طب الحمد الله يااااارب.. الحمد الله ياااااارب

واول ما سمعت كده انا كمان فرحت وافتكرت انه اخيرا هقدر احلم من تاني بكلية طب

وابقى دكتووورة..

عدى شهرين وكان صلاح سدد ديون محل بابا كلها وبدأ يزورنا كتييير.. في الاول

مخدناش بالنا انه زيارته ده وراها مصلحه وافتكرنا انه بيزورنا عشان بابا..

لحد ما جه في يوم..

خبط الباب وبابا فتحله كالعادة..

بابا بترحيب:اهلااا اهلااا.. خش يا صلاح

صلاح بضحكة خبيثة:ازيك يا عبد الله..

بابا:ايه بس الهدايا دي كلها والله ماليه اي لزوم

صلاح:يا راجل احنا بينا الكلام ده..

بابا:ولو بردو كده جمايلك كترت اوووي ومش عارف اردها ليك ازاي!

صلاح:لا فيه طريقة ان شاء الله

بابا:خيير؟

صلاح:طب نقعدالاول ونشرب

بابا:اه ثواني يا ررريم اعملي حاجه لعمك صلاح يشربها

صلاح بخبث:لااا عمك ايه يا راجل انت هتكبرني اووي.. ده انا حتى لسه شباب

بابا بضحك:ههههه شباب القلب بقى

ودخلت قدمت العصير ليهم ولسه جاية اخرج لقيت صلاح بيقلي:

عقبال ما نشرب شربات فرحك يا عروسة

كان ممكن زي اي بنت افرح للجملة واقعد اتخيل بقى اليوم اللي هبقى فيه عروسة بس

نظرته الخبيثة مريحتنيش..

صلاح:بقلك ايه يا عبد الله ‘ انا طالب ايد بنتك

بابا بصدمة:ايه!؟

صلاح:طالب ايد بنتك.. ايه؟

بابا بصدمة:بس بب بس دي اد بنتك يا صلاح

صلاح:يا راجل قوول كلام غير ده! هو لا عيب ولا حرااام

بابا:بس انا بنتي لسه صغيرة ولسه هتدخل جامعة

صلاح:وهو انت عندك فلوس تدخلها جامعة؟؟! ده انت يدوووب بتسدد ديوونك بالعافية

محنا دفنينه سوا يا عبد الله..

بابا بعصبية:بببس بس انااا ااا انااا مممكن اشحت وادخلها الكلية اللي نفسها فيها واحقق

ليها حلمها..

صلاح:وانا هدخلها الجامعة وعلى حسابي بس انا بصراحة شاريها اوووي.. فكر كده

وافتكر انك مديونلي بكتير اوووي..

********************************

بعد شهرين بابا رفض يسمع لصلاح في الاول وقال انه هيعمل المستحيل عشان يسدد

ليه فلووسه بس للاسف صلاح كان اذكى بكتير من انه يدي فرصة لبابا انه ينجو فيها..

ولقيتني فجأة مضطرة اني اوافق على راجل كبير في السن واتجوزه..

عشت معاه في فيلا في المعادي.. اول يوم كان بالنسبالي عذاب وانا بشوف احلامي

بتقع مني في الارض..

حلم الكلية بيروح وحلم اني اتجوز شاب ادي في العمر نحلم سوا ونعيش لحظات حلوة

زي اي اتنين ونحب بعض بردو بيروح في الارض..

كنت شايفة صلاح زي الحيوان المفترس اللي ما صدق وقع فريسته في شباكه وانقض

عليها..

احساس فظيع بالنسبة ليا كأنثى بتقدم شبابها لراجل عجوز في سن باباها على طبق من

ذهب..

بعد اول اسبوع من الجواز بقى ليا اوضة منفصله وصلاح ليه اوضه منفصلة وده كان

طلبه هو.. جايز عجزه قدام شبابي كان بيقتله فمكنش بيحب يشوفني انام جمبه وعشان

كده قالي احنا نعمل زي الاجانب انتي في اوضة وانا في اوضة ولما توحشيني اجيلك..

**************************

حاولت افتح  تاني موضوع اني اكمل دراستي مع صلاح..

كنا بنفطر في يوم..

انا:صلاح انا عايزة اكمل دراستي

صلاح بسخرية:هه ليه ان شاء الله ‘ ناقصك حاجه؟

انا:لا بس انت مكنش ده اتفاقك من سنتين قبل ما تتجوزني من بابا

صلاح:انا كنت بقول كده عشان بس اخليه يوافق على جوازنا

انا بعصبية:بس انا عايزة اكمل تعليييم

صلاح وهو بيبرق ليا:وانا قلت لا! وصوتك الحلو ده ميعلاش تاني عليا والا علمتك

الادب..

خفت وقتها جدا من نظرته ‘ كل حاجة فيه كانت بتخوفني وفي نفس الوقت بتقرفني منه

قرعته اللي في النص وشعره على الجمبين وعينه الحمرا على طول من كتر شرب

الويسكي وسنانه المتكسرة ومعوجه ولونها اصفر غامق من كتر شرب السجاير..

**************************

في يوم كنت في اوضتي بقرا رواية وسمعت صوته وهو راجع متأخر من بره وعمال

يغني بصوت عالي وتقيل..

صلاح بيغني ولسانه تقيل: يــ ا ــ يا يــ ــ ا يـ و ا د يـ ا تقـ ـي ل يـا يـ م شيب نـي

انا:ايه يا صلاح ده؟ صووتك عالي

صلاح بلسان تقيل:اهـ ـلا اهـ ـ ـ لا تعـ الي

وقام شدني من دراعي جامد وحاول انه يتعدى عليا وانا كنت بصرخ واحاول ازقه لكن

هو كان اقوى مني وجرني لاوضته وحاول انه يمارس عليا رجولته..

وبعدها راح في النوم ‘ خرجت من الاوضة وهدومي متقطعة وكحلي سايح مع دموعي

وشفايفي بتترعش وجريت على اوضتي واول ما دخلت جريت على الحمام ورجعت..

كان كل يوم يرجع سكران البيت وينقض عليا بوحشية ‘ لحد ما بقيت اول ما اسمع

صوته اجري اقفل عليا باب اوضتي بالمفتاح عشان ميعرفش يدخل..

*************************

وفي يوم لقيته بيقلي..

صلاح:بقلك ايه المحامي بتاعي هيجي على الغدا النهاردة فعايزك تعملي غدا عليه

القيمة كده ..

انا:غريبة يعني؟؟ من امتى المحامي بتاعك بيجي هنا

صلاح:عندنا شغل كتير ولازم نراجعه ولقيت مفيش احسن من هنا

انا:اممم

صلاح:ايه عندك اعتراض

فرحت لانه لاول مرة يسألني عن راي وبعدها لقيته بيقلي:لو عندك اخبطيه في الحيطة

انا بعصبية:هو انت امتى هتحترمني؟؟

صلاح بسخرية:احترمك؟! انتي نسيتي نفسك ولا ايييه!! انا يا بنتي واخدك على البيعة

عشان ابوكِ الكحيان مقدرش يسدد ديونه ليا..

وقام سبني وخرج ‘ بعد ما خرج رميت كوباية العصير واتكسرت..

***********************

وعلى الضهر رجع صلاح ومعاه المحامي بدر وكان عمره في التلاتينات ..

دخل صلاح المكتب ووراه بدر.. وانا لما خلصت الغدا نديتهم عشان يتغدوا ..

كنا قاعدين احنا التلاتة على الصفرة وصلاح وبدر عمالين يتكلموا في الشغل وانا كنت

باكل بملل وزهق لحد ما بدر قال:

طب احنا نغير الموضوع بقى ونتكلم في اي حاجة عشان مدام ريم متزهقش

صلاح بسخرية: لو زهقت ممكن تقوم تعمل اي حاجة مملة من اللي بتعملها

حسيت باحراج ووشي احمر فلقيت بدر بيسألني:هو حضرتك بتقضي يومك ازاي

انا بملل وباحراج من صلاح: عادي لما بكون زهقانة بقعد اقرا

بدر باهتمام:ايه ده حضرتك بتحبي تقري؟

انا:اه

بدر:لمين؟

انا:احسان عبد القدوس وانيس منصور وتوفيق الحكيم

بدر:انا كمان بحب اقرا ليهم اووي.. تسمحلي يا صلاح بيه ابقى اجيب روايات لمدام

ريم..

صلاح بسخرية:اه وماله اهي الروايات دي اللي عملالها مخ فاضي..

بدر بص ليا نظرة مكنتش فاهمة معناها ‘ بس حسيت وقتها ان بدر ده طوق نجاة لحياة

مملة ومقرفة انا عايشاها..

عدى شهر وكنت بشوف بدر كتير مع صلاح وكان بيجي البيت معاه عشان يخلصوا

شغلهم ولما كان صلاح بيعمل حفلات في الفيلا كان بدر بيبقى اول المعزومين..

واللي لاحظته طول الشهر ده هو اهتمام بدر الغير عادي بيا ومحاولته انه يقرب مني..

مخبيش عليكوا كنت طايرة من الفرح ‘ كنت بحس بانوثتي الي قتلها صلاح ودفنها عشان

ميحسش بعجزه قدامي..

******************************

وفي يوم لقيت صلاح بيقلي: بقلك ايه انا مسافر في شغل لمدة اسبوع كده..

انا:فين؟

صلاح:من امتى وانا بقلك يعني..

انا بسخرية:يا سيدي اعتبره فضول

صلاح:مبحبش الفضوليين

انا بيأس وكسرة:ماشي

وبعد ساعتين من سفر صلاح لقيت جرس الباب بيرن روحت فتحت لقيت بدر قدامي..

انا بخضة:بدر!

بدر بيدخل:ايه؟ زعجتك؟

انا بخوف:لا بس صلاح مش هنا.. صلاح سافر

بدر:عارف وعشان كده جيت ‘ انا محتاج اتكلم معاكي..

انا:تتكلم معايا انا؟؟

بدر وعينه بتلمع بخباثه:اه

انا:خير؟

بدر:اكيد مش على الباب؟

انا بخوف وتردد:اتفضل

قعدت مع بدر في المكتب وكان عمال يبصلي وساكت..

انا باستغراب:خير؟

بدر:انا ممش مش عارف اقول ايه ‘ بس انا بصراحه بقالي شهر فيه حاجة جوايا بتكبر

ناحيتك وحاولت اشيلها من دماغي بس مش قادر..

انا بخوف:حاجة ايه دي يا بدر؟

بدر:اا انا معجب بيكي ومن اول يوم شفتك فيه لما جيت ابارك لصلاح وبصراحة

استخسرتك فيه خصوصا لما عرفت معاملته الزبالة ليكي.. حد يكون معاه جوهرة زيك

ويعاملها كده..

فرحت بكلام بدر لاني كنت محتاجه اسمعه واحسه من زمان اوي..

انا بخوف:بس انا متجوزة يا بدر

بدر:بس انا بحبك ومش قادر على بعدك يا ريم

انا بخوف:لا لا ! لااا! لا مينفعش.. انا متجوزة ولازم احافظ على جوزي وسمعته والكلام

اللي بتقوله ده مينفعش.. ولو سمحت بقى اخررج برة..

وقمت وقفت ولقيت بدر وقف وقرب اكتر ومسك ايدي وقال:انتي مالك بتترعشي ليه كده

انا بخوف:بدر لو سمحت اخرررج برة.. ارررررجوك..

بدر بهمس:انا بحبك يا ريم ‘ صدقيني بحبك.. بس انا مش هضغط عليكي النهاردة وهمشي

بس فكري في كلامي كوويس..

وساب ايدي وسابني ومشي وبعد ما مشي وقعت على الكرسي وكنت هطلع اجري واناديه

واجري في حضنه..

لمسته غيرت جوايا حجات كتيرة وكلمة بحبك حركت فيا مشاعر كنت بحلم طول عمري

اعيشها..

عشت في صراع ما بين قلبي وبين عقلي اللي رافض انه يخون صلاح رغم كل اللي

بيعمله فيا..

اسبوع غاب فيه بدر عني ‘ مشاعري كلها كانت متلخبطة ‘ احساس جديد بيتولد جوايا

وصراع عنيف مابين احتياجي اني اشعر اني انثى حقيقية واتمتع بده واني افضل زوجة

وفية لانسان عديم الرجولة..

رجع صلاح تاني من السفر ومعاملته بقت اوحش من قبل كده زي ما يكون بيديني فرصة

اكتر عشان اكرهه واتعلق ببدر اكتر واكتر..

وفي يوم قالي:

بليل انا عامل حفلة ‘ وشك العكر ده حاولي تفكيه شوية

انا:عازم بدر؟

صلاح باستغراب:ومن امتى مبعزمهوش! ليه؟

انا بخوف:لا عادي يعني اصل بقلكم فترة مش بتشتغلوا هنا في البيت فقلت جايز تكون

مبقتش تشتغل معاه..

صلاح:كام مرة اقلك متدخليش في اللي ملكيش فيه

انا بعصبية:انت هتفضل لحد امتى تعاملني زي ما اكون مجرد فازا في البيت ده

لقيت صلاح بيقرب مني وقام ضربني قلم وقعني على الارض وزقني برجله وقال:

انتي حيوانة وناكرة جميل ‘ انتي اللي زيك يحمد ربنا اني مخليها فازا في بيتي..

شعور كره فظيع كان جوايا وقررت اني مش هعمله حساب بعد كده واني هعيش

حياتي زي ما انا عايزة ‘ زي ما اكون كنت باخد اللي حصل ده حجه ابرر لنفسي

خيانتي ليه..

**********************

بليل في الحفلة لبست فستان اسود طويل وضيق وعملت تسريحة لشعري وكنت اول مرة

اهتم بشكلي في حفلة من حفلات صلاح وحطيت ميك اب ‘ زي ما اكون عايزة اثبت

لنفسي اني حلوة.. وحطيت روج احمر غامق فوق شفايفي ..

ونزلت واول ما نزلت عيوني كانت بتدور ما بين كل الموجودين على بدر وملقتهوش

وبعد نص ساعة لقيته جاي..

جريت عليه وقلتله:فينك؟ اتاخرت ليه

بدر باندهاش:انا مكنتش جاي! بس غريبة انتي مهتمة بيا

انا بصوت واطي:انا مستنياك من بدري

بدر:انا اول مرة اشوفك متشيكة اوي كده.. انتي حلوة  اوووي

انا:يعني انا مكنتش حلوة قبل كده

بدر وعيونه بتلمع بخباثه:كنتي حلوة اوي

انا:مرة تانية اوعى تتأخر

بدر:طيب انا لازم امشي عشان محدش ياخد باله بس صلاح كمان يومين هيسافر

ولازم نتقابل

انا باستسلام:اووك ‘ ابقى تعالي ليا هنا البيت وانا همشي كل الخدامين..

**************************

بعد يومين لبست فستان قصير احمر وحطيت من نفس الروج الاحمر الغامق اللي بحب

احطه واستنيت بدر يجي..

اول ما جرس الباب رن جريت وفتحت ليه.. ساعتها حسيت اني مش بفتح مجرد باب

فيلا لا انا بفتح باب لاحاسيس ومشاعر عمرها ما زارتني قبل كده..

الدفا اللي كان في لمسة ايد بدر كانت كفيلة انها تدوب براكين التلج اللي زرعها جوايا

صلاح..

بدر بيدخل وبيهمس في وداني:وحشتيني

انا:انت اكتر

قرب بدر ليا جدا ‘ غمضت عيوني وحسيت بنشوة عمري ما حسيتها قبل كده لما شفايفي

حسوا بلمسة شفايفه..

سحبني من ايدي لحد اوضتي وهناك سبت نفسي ونسيت كل الدنيا من حواليا...

شهر وانا حاسة اني بغرق في بئر الحرمان اللي عشت فيه سنين كتيرة.. وده خلاني

اقرف من صلاح اكتر كل ما يحاول يتعدى عليا وينقض زي الحيوان المفترس

لمجرد انه عايز يثبت لنفسه انه مش عاجز..

لحد ما في يوم تعبت وطلبت من بدر انه يطلقني من صلاح

بدر بتردد:تتطلقي؟

انا باستغراب:ايه مالك مندهش ليه؟ انا كنت فاكرة انك هتفرح

بدر:وافرح ليه؟

انا:عشان هطلق!!

بدر:بب بس انا اانا شايف انه بلاش

انا:ليه؟

بدر:احنا كده كويسين

انا:والله؟! بنتقابل في السر وبتجيلي البيت هنا اما يسافر وتقلي كويسين؟؟؟؟

بدر:وانتي عايزة ايه اكتر من كده يا ريم ‘ انتي عايشة في مستوى عالي وانا جمبك

يبقى ليه تتطلقي..

انا بجنون:ولييييييه مطلقش اصلاااا!!!!!! ولا انت عشان بتشبع رغباتك

يبقى خلاص؟

بدر:انا كنت فاكر انك فاهمة الحكاية من الاول

انا:حكاية ايه؟

بدر:انا لقيت عندك فراغ وعايزة تحسي بانوثتك وانا نفس الشيء عندي فراغ فنقضي

وقت لطيف ‘ لكن انا مش بتاع جواز..

انا بجنون:وقت لطيف!!! والحب بقى والكلام والهيام ده كان مجرد وقت لطيييف!!

بدر:بصي متبقيش مجنونة يا ريم ‘ صلاح انتي تقدري تستغلي كويس اوي وتستغلي

فلووسه وعندك انا الحب .. يبقى ليه تضحي بقى وتبقي عايزة حاجة واحدة بس

لما في امكانك تجمعي حاجتين مع بعض..

انا بهستيريا:انت زبالة زيه يا بدر ‘ انت متفرقش عنه كتيييييير ‘ انا مجرد بالنسبالكم

انثى في عيون مفترسة..

بدر ببرود:قدرك يا حبيبتي..

انا بجنون:اطلع برررررررررررررة ‘ مش عايزة اشوووف خلقتك 

**************************

بعد سنة مات صلاح وورثت كل حاجة عنه وساعتها بدر وصحاب صلاح كلهم بقى

كل واحد يقدملي عرض الحب على طبق من الكذب والنفاق عشان اختار زوج

واديله ثروة صلاح!!

لكن قلبي الوحيد اللي كان عارف ان انا هفضل طول حياتي مجرد انثى في عيون

مفترسة..

النهايــــــــــــــــــــــة