الحلقــــة الثانيــــة من جزيـــــــــرة الــــلالا

الحلقة التانيـــــــــــة

بعد خمس ساعات طلع أيهم فوق تاني ووجه عجلة القيادة حسب ما الخطوط اللي في الخريطة بتقول وبعدها نزل للكابينة وبدأ يشعر بأن عينه بتقفل ‘ حاول يفتحهم بس النوم كان أقوى واستسلم للنوم..

************************

اليوم التاني بيصحى أيهم مذعور وبيطلع يجري فورا على فوق ومن السرعة والخضة اللي طلع بيها رجله اتخبطت جامد في السلم بس مهتمش للخبطة وجري على عجلة القيادة فورا ‘ بص حواليه

لقى نفسه الصبح بدري وجبال كتير حواليه قعد يزعق ويشتم نفسه بغضب ويقول:

-         اناااا ازاااااي نمت ومحستشششش بنفسييييي اوووووي كدددده!!!

بص للخرايط قدامه وضرب بايده بكل عصبية وحاول يوجه عجلة القيادة عشان يلف ويرجع

بدل الطريق اللي كان اليخت متجه ليه .. في نفس اللحظة اللي كان بيلف بيها حس بوجع شديد

في رجله ‘ بص على رجله لقاها بتنزف دم ومخدش باله من ايده اللي بتحود عجلة القيادة

وفجأة صوت ارتطام اليخت في جبل متوسط ‘ بس الخبطة كانت جامدة لدرجة انها

طيّرت أيهم من مكانه وخبط في سور اليخت من الجهة التانية ووقعت عليه طاولة من الزجاج

كانت في نص اليخت محطوطة عشان الاكل ..

*************************************************

لارا كانت قاعدة في الكوخ الخاص بيها وكانت لابسة فستان لونه وردي فاتح رقيق وعليه وردة

لونها ازرق في الجنب اليمين من الفستان .. وشعرها كانت ربطاه على الجنب بياسمينة قطفتها

الصبح من الركن المفضل بتاعها والخاص بيها..

فضلت تتمشى على البحر وهي سرحانة وبتبص على كل حاجة حواليها وفجأة وهي بتبص

لبعيد شافت يخت أيهم وهو خابط في الجبل اللي بعيد شوية عن الجزيرة ! اترعبت وجريت

فورا على كوخ باباها وخبطت بذعر:

-         ياباااااباااا الحقني يا بااابااااااا فيه يخت خابط الجبل اللي هناك في الجهة الشمالية للجزيرة

-         ايــــه!! اندهي على الشباب فوراااا يروحواا

-         حاضررر حا ححاضر

*********************************************

بعد ساعة يفوق أيهم ويبص حواليه يلاقيه نايم في سرير في اوضة جدرانها من الزجاج وارضيتها

خشب .. وفجأة تدخل عليه لارا بكل هدوء .. يبص ليها باستغراب شديد ويقول:

-         ايه ده انتي مين!

بعدين يبص تاني يمين وشمال ويقول:

-         هـ هه هو انا فين؟!

لارا بكل رقة شديدة:

-         انت بخير؟ حاسس بوجع؟ حاسس بشيء؟

-         اا اانتي ميين!!

-         احنا لاقيناك واقع مغمى عليك في اليخت بتاعك ورجلك الشمال مكسورة وايدك اليمين مكسورة

وفيه رضوض بسيطة في ايدك الشمال..

-         هو انتي حلوة اوي كده ولا انا اللي من الخبطة دماغي لفت!

لارا تنزل عينها في الارض باحراج شديد وخدودها تحمر زيادة وتقول بخجل وارتباك:

-         اناا ا اا انا هروح اطمن والدي عليك

-         استني هنا لو سمحتي .. قوليلي احنا فين؟ يعني في الغردقة ولا لا ولا اييه؟؟

-         انت في الجزيرة عندنا

-         جزيرة؟ جزيرة ايه؟

-         جزيرة الـلالا!

-         والله ! دي زي عند ام اللالي وكده يعني! لالا مين لامؤاخذة؟؟

-         دي الجزيرة بتاعتنا

-         والجزيرة بتاعتكم دي فييين! في مصر ولا الهند ولا شمال افريقيا ولا اوروبا ولا فييين!!

-         في البحر الأحمر!

-         انا امبارح كنت في البحر الابيض المتوسط! فجأة جيت كده عند البحر الأحمر؟! هو انا لسه

في مصر؟

-         ايوة انت لسه في مصر

-         امال ايه جزيرة اللولي دي

-         لا عفوا الـلالا

-         عفوا ايه انا مشكرتكيش اصلا!

-         لا مش لازم تشكرني عشان اقول عفوا .. بعد اذنك هسيبك ترتاح وهقول لوالدي يجي يطمن

عليك بنفسه.. حمد الله على السلامة ونوّرت الجزيرة..

يتفحصها بنظراته اللي مليانة اعجاب بجمالها الشديد ويقول بهمس:

-         ده  نووورك .. دي شكلها رحلة عجيبة من اولها! بس ايه جزيرة الكاكا دي؟! انا عمري ما سمعت عنها! شوف يا اخي مصر دي حقيييقي ياما في جرابها يا حاوي!

******************************************

اول ما تخرج لارا من برة تهفهف على وشها من كتر الحرارة اللي كانت حساها وتلمس

جبينها وتقول:

-         هو ازاي جرىء اوي كده !

يقاطعها فجأة والدها الكبير ويقول:

-         مالك يا بنتي

لارا بتوهان:

-         ها

-         مالك واقفة كده ليه؟

-         ككككنت لسه خارجة من جوة والمفروض كنت اجيلك يا والدي عشان ا اطمنك عليه

-         انا قلقان

-         ليه يا والدي؟

-         الولد ده من عندهم يا بنتي !! يعني لازم ناخد حظرنا منه لانه منعرفش هيفتن مين هنا!!

مش كفاية محسن !!

حست فجأة لارا بخوف شديد وقالت بتوتر:

-         مش هتدخل تطمن عليه

-         اه هدخل

-         بعد اذنك يا والدي هروح اقعد عند شجرة الحياة

**********************************************

يكون أيهم قاعد زهقان وقرفان ‘ يحاول يقوم بس ميقدرش فينفخ من الملل:

-         اففففففففف يووووووه

يدخل فجأة عليه راجل عجوز ولحيته بيضا فأيهم يبص عليه بكل استغراب ودهشة ويقول:

-         انت مين يا عم الحج!؟

-         انا هنا الوالد الكبير

-         نعم!

-         اسمي عادل

-         اه؟!

-         واعتبر الوالد الكبير للجزيرة دي

-         وده يعني بمعنى الكوماندا بتاعت الجزيرة!

-         عفوا؟

-         هو ايه حكاية عفوا اللي مغرقة المكان عندكم دي؟!

-         البنوتة المزة قصدي الـ كانت هنا من شوية يعني

-         طبعا احنا هنستيضفك عندنا بكل صدر رحب وهتنوّر المكان عندنا لحد ما رحلة علاجك تنتهي

بس قبل كل شيء لازم نتفق على حاجة مهمة ..

أيهم يكون باصص عليه بكل اندهاش وفاتح بقه ..

-         نتفق؟

-         اا ااه نتفق؟ خير؟ بس خلي بالك فلوس انا مش دافع في الليلة اكتر من 50 جنيه ! ااه

يبتسم عادل ويقوله:

-         من كرم الضيافة يا بني عيب تاخد مقابل خدمتك

-         تشكر يا حج اصيل والله ‘ الحج حج قبل كده ولا لسه؟

-         ايوة حجيت الحمد الله

-         طب الحمد الله ‘ اتفاق ايه بقى ده يا حج؟

-         لازم تعرف ان الجزيرة هنا مختلفة تماما عن الدنيا يا بني اللي انت جاي منها ‘ فأرجوك

تلتزم بقوانين المكان هنا .. ولازم تعرف برضو ان فيه قوانين لو اخليت بيها هيتم نفيك

فورا حتى لو مكنتش خلصت علاج وده بعد ما تقضي العقوبة !

-         تنفووووني!!!

-         ايوة وارجوك احنا عندنا هنا أطفال كتير وأكيد هيسألوا عن الدنيا اللي انت جاي منها كتير

فلازم تستوعب انك متتكلمش عنها..

يبص ليه أيهم بتعجب شديد ويقول:

-         بزمتك انت راضي عن اللي بتقوله؟

-         نعم؟!

-         يعني انت شايف انك بتقول كلام ناس عاقلة! طب عيب على اللحية يا اخي

-         انت بتقول ايه يا بني

-         انت اللي بتقول ايه يا عم الحج! انا مش فاهم منك ولا حاجة! دنيا ايه اللي بتتكلم عنها ! انا واحد

جاي من القاهرة وحبيت اروّش واريح الجمجمة من الشغل وقلت اطلع ع الغردقة ! خبطت

ام اليخت في ام الجبل واتقلبت صحيت لقيت بنت ولا فلقة القمر وراجل مريب اللي هو

حضرتك يا حج! فيا تفهمني الليلة فيها اييييه!! يا تقلي ان دي الكاميرا الخفية؟!

-         اولا يا بني من اول القوانين اللي لازم تلتزم بيها هنا في الجزيرة عدم استخدام الالفاظ الجارحة

وتنقي لسانك وانت بتتكلم ولازم تحترم البنات اللي في الجزيرة عندنا ومتخدش حياء اي واحدة فيهم ..

أيهم بيكلم نفسه بصوت واطي جدا:

-         اااه ده شكله هيعكنن علياااا طول ما انا مرزوع عندهم ومش هيخليني اخد راحتي بقى

-         والقوانين اللي بعد كده هتعرفها بنفسك وتتعرف عليها

-         اممم لا خير ان شاء الله

-         هسيبك ترتاح بقى

-         راحة ايه  يا شيخ بعد العكننة دي

-         بتقول حاجة؟

-         لا بقول يا عالم هيحصل اييه !!

-         صحيح يا بني احنا عند الغروب بنقعد قدام البحر لو حابب تنضم لينا

-         ايوووة بقى كده فُك يا اخي وخليك شِرح كده ولذوذ مش الرصة اللي رصيتهالي من شوية

دي .. وها بتشغلوا دي جي وكده ورقص ولا ايه النظام؟

يبتسم عادل ويقول:

-         تعالى وشوف بنفسك

-         خلاص ماشي هقيّل كده شوية واحصلك ..

****************************************************

وبعد ساعتين صحي أيهم من وجع رجله وفضل يصرخ جامد اوي:

-         يا أهل الله اللي هنااااا اااااااااااي حدددددد يلحقني بسرررررعة

بعد ثواني تدخل عليه لارا بفزع وتقول:

-         ماااالك؟

-         ررررجلي مشششش قاااااادر

-         طب اهدى ‘ انا هشوف الجرح ليك ..

وبالفعل تبدأ لارا تشوف الجرح اللي في رجله وتلاقيه بينزف ‘ تبدأ تعمله اسعافات بسرعة

وتوقف النزيف وبعدين بتحط ليه من علبة حاجة زي الجل وتمسح على رجليه برقة ‘ في نفس

الوقت يكون أيهم قاعد يبص عليها ويراقب كل حركة فيها .. بتبص ليه فجأة وتقول:

-         بقيت كويس؟

-         ها؟

-         رجلك لسه حاسس بالوجع!

-         وجع؟!

-         ايوة؟

-         لا لاا

-         طب الحمد الله

-         هو انتي ايه اللي حطتيه ده؟

-         ده جل بنعمله من الطبيعة اللي حوالينا مفيد جدا وزي مسكن للوجع ‘ لما الجسم يشربه..

-         اه ‘ هو انتي دكتورة؟

-         لا ابدا

-         انتي درستي ؟

-         اه طبعا !!

-         عندكم مدارس هنا يعني؟

-         طبعاااا

-         اصل حاسسها جزيرة مهجورة

-         مهجورة ازاي واحنا فيها!

-         مش عارف !! اذا كان من الطبيعي احسبكم علينا بشر زيينا ولا لا!

-         عفوا؟!

-         انتي تاني!!

-         عن اذنك

-         انتي زعلتي ولا ايه؟

-         لا مقدرش ازعل من ضيف عندنا في الجزيرة مهما كانت اساءته !

يبص ليها بتعجب شديد ويقول:

-         الحفلة ابتدت صحيح؟

تفضل لارا متنحة شوية وتقول:

-         حفلة؟!

-         اه اصل عادل قالي انكم هتقعدوا على البحر وقت الغروب

تحط لارا ايدها على بقها بخضة وتقول:

-         اسمه والدي الكبير او بابا الكبير! مينفعش تقوله عادل بس كده

-         ليه ان شاء الله! هو كان من بقية عيلتي!!

-         وهو احترامك لشخص اكبر من سنك لازم يكون لحد قريبك؟! ولا ممكن يكون لاي حد تاني؟!

-         احم ... طيب ممكن تساعديني يا اخت لارا اقوم عشان اروح البحر

تتكسف لارا اوووي وتبص في الارض بخجل شديد وخدودها تحمر زيادة وتقول بارتباك:

-         هــ ه ها ا اانا دي حد من الشباب يساعدك

-         وانتي لا ليه؟!

-         عشان مينفعش تمسك ايدي

وتسيبه وتجري فورا وهي حاسة انها في قمة الخجل ..

**************************************

وبعد فترة يجي حد من الشباب يساعد أيهم انه يروح عند البحر مكان ما الكل متجمع .. واول

ما يروح يتخض من العدد الكبير اللي لقاه هناك .. رجالة وستات واطفال صغيرة وشباب وبنات

اول ما يقرب منهم ‘ يلتفت ليه عادل ويقول:

-         النهاردة عندنا ضيف في الجزيرة وهو أيهم هيقعد هنا لحد ما رحلة علاجه تنتهي ! ياريت من

الكل يراعي إكرام الضيف زي ما هو هيراعي قوانين الجزيرة اللي مينفعش اي حد من برة

او من جوة يتعداها والا عرض نفسه للمساءلة ..

يبلع أيهم ريقه بخوف وبعدين يبص على كل العيون اللي بتبص ليه ويبتسم ابتسامة بلهاء ويقول:

-         مسا مسا

كل الناس اللي كانوا هناك يبدؤا يبصوا على بعض ويبصوا عليه بتعجب شديد جدا

فيقول لعادل:

-         هو انا قلت حاجة غلط

-         يا بني كلامك غريب

-         ده انا برضو!!!

-         اقعد يابني عشان التأمل هيبتدي

-         نعم! الـ ايه؟

-         التأمل

-         ايوة وده ايه ان شاء الله

-         احنا بنقعد في كذا وقت عشان نقعد نبص ع الطبيعة من حوالينا ونتعرف عليها ونشكر ربنا عليها .. بنسيب روحنا تتوه في ملكوت الله .. بنرمي كل حاجة وحشة جوانا ورانا وبنرفرف

بأجنحة جوة دنيا كلها لونها أبيض في أبيض بــ

يقاطعه أيهم بتوتر وعصبية:

-         اييييه الخرررف اللي بتقوووله ده!!! وانا لما احب اعيش اللحظة دي بنفسي ده لو على اساس

اني في يوم طلبت معايا اتجنن اقوم اجمع جزيرة بحالها واقعد اعمل كده! انت مصدق نفسك!!

فجأة الكل يشهق والعيون المتربصة بأيهم تبدأ تزداد في الاتساع والتوتر يسود المكان والذعر

يدب جوة قلب أيهم لما يحس من ردة فعل اللي قدامه انه ارتكب غلطة كبيرة..

.................................................