الحلقـــــــة الرابعـــة من جزيـــــــرة الـــلالا

الحلقـــــــة الرابعــــــــة

-         عن اذنك انا لازم امشي بسررررعة انا اتاخرت اوووووي

وتجري فجأة ومن غير ما تفهم أيهم في ايه وتسيبه في حيرة واندهاش لتصرفها المريب...

*********************************

 في القاهرة في البنك اللي بيشتغل فيه أيهم ‘ يكون سامح قاعد في مكتبه بيخلص الشغل

وتدخل فجأة سها عليه بملامح قلقانة وتقول:

-         سامح متعرفش حاجة عن أيهم؟

-         اممم لا والله ! ليه؟

-         اصل بتصل بيه بقالي يومين وتلفونه غير متاح!!

-         تلاقيه قافلة عشان يتبسط هناك في الغردقة! انتي مش عارفة أيهم ده تلاقيه مش عاتق حتى

سمك البحر!!

سها ملامحها تنكمش بضيق وتبص بعتاب لسامح وتقول:

-         على فكرة انا مش مطمنة وانت قاعد تتريق ع صاحبك ؟!

-         في ايه يا سها! اللي يشوفك يقول ان أيهم ده خطيبك!! ما تراعي احمد خطيبك شووية!!

سها بضيق زيادة:

-         على فكرة بقى احمد خطيبي بيمووت في أيهم لانه عارفه انه واد جدع ونضيف من جوة وفكك

من الحركات الهبل اللي بيعملها وهيصته مع البنات ! بس أيهم حد كويس اووووي!!

-         وهو انا قلت وحش ! بس طبيعي اي راجل يغير على مراته

-         بس أحمد بقى بيستجدع أيهم ده اوووي ومطمن وانا معاه ! عارف ليه يا سامح عشان لما

انا في يوم اتعرضت لموقف لقيت أيهم واقف ورايا وقفة رجالة ووصلني لحد أحمد بنفسه

ساعتها بس أحمد اطمن ان الانسان ده رغم ان هيئته من برة تقول انه اي كلام وفستك لكن

هو بقى من جوة شهم وابن بلد..

سامح بغيظ:

-         خلاص خلاص يا ست المحامية انا بقلك يعني بطبيعة أيهم تلاقيه هايص هناك وولا في

باله وانتي بس اللي مقلقة نفسك ع الفاضي!

-         ع العموم لو عرفت عنه اي حاجة خليه يكلمني ضروري

-         ماشي

تمشي سها وتخرج من المكتب ويطلع سامح موبايله ويتصل بأيهم فيلاقي رقمه غير متاح فعلا

فيقلق ويقول:

-         هو معقول يكون حاصله حاجة لقدر الله واحنا مش حاسين! والبت سها يكون قلقها في محله؟!

ولا هووو هايص وزايط هناك واحنا بس اللي لينا القرف هنا!! يووووه بقى

****************************************

تجري لارا على كوخ من الاكواخ وتخبط الباب وتدخل واول ما تدخل تقول:

-         انا اسفة ع التأخير وعارفة انكم زعلانين اكييييد بس والله غصبن عني

يجري عليها محمود ويقولها بكل براءة وبتكشيرة في نفس الوقت:

-         انتي اول مرة تتأخري علينا وانا كنت عايزك من بدري

تنزل لارا في مستواه وتحضنه اوي وتقوله:

-         غصبن عني يا حبيبي والله .. واهو انا معاك ‘ كنت عايزني في ايه بقى؟

محمود بحماس شديد:

-         اا ان اانا كنت عايز اقولك اني النهاردة نوولت شرف اني اساعد حد كبير محتاج !!!

لارا بفرحة شديدة وعيونها بتلمع من السعادة ‘ تحضن محمود جامد وتلف بيه اوي وهو يضحك

وهي تضحك وبقية الاطفال كلهم يصقفوا جامد وهي تقول:

-         محمووووود قدر يحب نفسه النهااااردة صح برااااافووووووووو

بقية الاطفال فضلوا يصقفوا جامد ويقولوا:

-         هيييييييييييييييه هيييييييييييييييييه

بعدين تقف طفلة صغيرة شعرها ناعم وقصتها نازلة ع عينها المسحوبة وكأنها طفلة يابانية وبشرتها سمرا وجسمها رفيع تقول:

-         لارا انا كمان عايزة ابقى زي محمود

فتبتسم ليها لارا وتقول برقة:

-         طب ايه رأيكم يا جماعة ندي الشرف ده لتالا؟ ونشوف هتعمل ايه؟؟؟

الاطفال يبصوا لبعض في هدوء وبعدين الكل يرفع ايده على انه موافق ويقول:

-         ماااااااااااااااااااشي

فتفرح تالا وتقول:

-         انا هفكرررر في حاجات كتيييرة واقلكم هعمل ايه

فتقول لارا:

-         طب ايه رأيكم نفكر معاها زي ما احنا متعودين ونتعاون سوا ونقترح عليها افكار تعملها عشان

تنول شرف المحبة؟!

يقول طفل صغير تاني :

-         مواااافق

ويبدأ طفل ورا طفلة ورا طفل تباعا يقولوا انهم موافقين..

****************************************************

أيهم يكون قاعد في الكوخ المخصص بتاعه ويفتح شنطته اللي جابوها ليه الشباب من اليخت ويطلع

علبة سجاير ويبدأ يدخن .. فجأة يسمع خبط خفيف على الباب فيقول:

-         اللي بيخبط يدخل

يدخل عليه محسن واول ما يشوف أيهم بيدخن يجري عليه بارتباك ويصرخ:

-         انت بتعمـــــــــل اييييه!!

أيهم يتخض فيقول:

-         ايه في ايه؟! مالك؟

-         انت بتدخن !! هناااا في الجزيرة كده عادي

-         امال المفروض مطلوب مني اعمل ايه؟! اروح استخبى ورا صخرة وادخن

-         التدخين هنا ممنوع !

-         ليه!!

-         عشان الدخان ده مؤذي عليك وع اللي حواليك وع الطبيعة

-         ايوة بس انا دلوقتي قاعد لوحدي !! يعني حر

-         لا مش لوحدك انت كده بتأذي الطبيعة معاك

-         بقلك ايه يا عم الفكيك مش طالبة خنقة ‘ اعمل نفسك ميت

يقف محسن مذبهل ويقول:

-         ازاي اعمل نفسي ميت

-         ااه لا دي قصة طويلة مش مهم تعرفها دلوقتي

-         انا جيت اقلك اني تقريبا احتمال كبير اروح القاهرة معاك

-         ازاي؟

-         يعني ايه ازاي؟

-         يعني ايه ازاي هتيجي معايا؟ هيطردوك؟

-         ولو محصلش انا همشي من هنا ! انا مشتاق جدااا لدنيتكم

-         بقلك صحيح يا أخ محسن هو انتم هنا بيبقى فيه شغل وبتقبضوا فلوس زي البني ادمين الطبيعين

ولا دي حاجات مضرة بالطبيعة برضو؟!

-         اه طبعااا بنشتغل

-         طب والله كويس ولما بتشتغلوا بقى مبيبقاش فيه تواصل بينكم وبين الناس الطبيعية؟

-         ما احنا شغلنا هنا مختلف

-         ازاي!!

-         يعني احنا هنا مش بتقبض فلوس

يتنح أيهم لمحسن ويقول:

-         أمال بتقبضوا ايه لا مؤاخذة !! ولا انتم هنا بتشتغلوا محبة في الوطن؟!

-         طبعاااا محبة في الوطن دي شيء أساسي بس احنا هنا بنقبض خدمة!

-         ايــــــــه يا روح أمك!!

يذبهل محسن جامد فيتدارك أيهم نفسه ويقول:

-         سوووري قصدي ايه يا حبيب والدتك؟!!!!!

-         يعني احنا لما بنشتغل بنقبض التمن خدمة

-         لا ووووضح الله يرضى عليك عشان خلااااص هتطيروا البرج اللي فاضلي

-         بمعنى ان مقابل شغلي انا بقبض اني بتعلم ازاي احب نفسي او احب اللي حواليا او ازاي اسعد نفسي او اسعد اللي حواليا او ازاي اخدم جزيرتي ! وبالتالي كل ده  بيتحسب لينا ومع نهاية

كل شهرين بناخد عائد مادي بسيط جدااا لمجرد لوو في يوم احتجنا نجيب حاجة من برة الجزيرة!

-         معلش يا محسن معلش برااااحة كده اقعد براحة وبشووويش وفهممممني!! انتم دلوقتي مبتقبضوش فلووس !! حلووو

-         اه

-         تماااام طيب لما تحب تشتري اكل او لبس او ااااي حاجة بتشتريها ازاي!!

-         يا بناخدها ببلاش يا بناخدها مقابل خدمة او مساعدة!

-         ببلاااش!! ده انتم كده تكونوا عايشين سبهللة

-         بص احلى حاجة هنا في الجزيرة النظام ! وان مفيش حد بيتعدى على حدود الاخر عشان عارف اللي ليه واللي عليه!

-         ياراااجل!

-         اه طبعااا واحنا لما بنجيب حاجة مقابل اننا قدمنا خدمة للحد الاخر بنكون سعداء جدااا

-         ااااه وكده تكون جبت الديب من ديله !

-         ها

-         لا متاخدش في بالك دي خدمة بنعملها احنا في القاهرة هناك ..

-         اه اوك

-         وانت بقى سايب كل ده ومستعجل ع القاهرة !

-         متشوووق جدااا

-         حبيب ماما ! ده انت هتتروّق ع الاخر

-         حقيقي؟

-         طبعاااا الناس هناك هياخدوك بالاحضان اما تقووول يا بسسس والله

محسن بكل سذاجة وابتسامة:

-         انا كنت حاسس انكم طيبين ‘ باين عليك اصلاااا

-         جدااااا مقلكش ‘ احنا برضو عندنا نظااام ايه واخلااااق ايييه!!

-         يااه طب ما تحكيلي شوية عن هناك يا أيهم

-         احكيلك شوية عن النظام ‘ احنا موووتنا وسمنا النظااام والله ! يعني في كل مكان تلاقي طوابير

طوابير ده من كتررر النظام والانظباط

-         ماشاء الله!

-         اقلك مرة حبيت اجيب رغيف يا محسن كنت واقف كده خير اللهم اجعله خير في نص الطابور

فجأة لقتني بقدرة قادر قدام مرة واحدة!

-         ياااه من السرعة صح؟! اصل الشيء لما يكون منظم بيكون سهل

-         اااه بس قدام بقى من ناحية تانية خالص وفي حتة بعيدة خالص

-         ها مش فاهم

-         وحياتك ولا هتفهم ! اصل نظامنا معقد شووية مش اي حد يفهمه !!

-         اممم ‘ طب الناس هناك بشوشة وسمحة يعني؟

-         جداااااااااااااا مش عاييييز اوصفلك البشااااشة يا محسن اللي عندنااااا ياااااه الواحد ينزل من

بيته يدخل الاتوبيس من هنا يلاقي وشوش بشوووشة بشااشاان يا اخي!! يبص يمينه يلاقي

انشكاح رهيب ويبص شماله يلاقي انشكاح اكتر!! تحس ان المصرريين منشكحيين اووي

وهما رايحين شغلهم!! وممكن من كتر الانشكاح تلاقي التجعييير بقى على الصبح!! خصوصا

لو غصبن عنك دوست على رجل حد بالغلط اكمنك لسه صاحي من النوم ومش مركز! تلاقي

بقى اللي يقولك:

"مششش تفتح يا اااااخ" واللي يقولك "اصطبحنااااا" ع الصبح !! متقلقش يا صاحبي انت هتتبسطططط

محسن بسذاجة وفرحة اكتر:

-         يااااه الحمد الله ان قراري سليم

أيهم بتهكم وتريقة:

-         يا زين ما قررت والله يا صاحبي !!

*****************************************************

يخرج أيهم من كوخه ويقعد قدامه فيجي يقف قدامه محمود ويقوله:

-         ازيك يا ضيف

يبص أيهم باستغراب ويرد:

-         اهلا ازيك

-         انا محمود وانت

-         أيهم

محمود يهرش في راسه شوية ويقول:

-         أيهم!! اسم جديد

-         انت كام سنة؟

-         انا خمسة وانت؟

-         اممم اكبر منك شوية

-         كام يعني؟

-         28

-         ياااااه

-         عادي عادي بكرة تنام وتصحى تلاقيك بقيت ادي

يحط محمود ايده على بقه ويقول:

-         انت بتكدب وده ميصحش

-         بكدب!

-         ايوووة لاني عشان اكون قدك هاخد وقت كبير !

-         انا بهزر يا عم الحج في ايه انت قلبتها كدب ليه

-         لارا علمتنا اننا ممكن نهزر من غير كدب

يبتسم أيهم على سيرة لارا ويشاور لمحمود انه يقرب ويقوله:

-         تعالي تعالى اقعد على حجري كده وكلمني شوية عن لارا

-         دي نجمة الجزيرة

-         نجمة! اشمعنا

-         عشان هي زي النجمة في السما بتنور

-         طب ما انت بتكدب اهو يا صاحبي!! الله بقى!

-         لا انا مش بكدب

-         بس لارا مش بتنور!!

-         مش لازم تنور النور ده بس هي ممكن تنور بأفعالها ! لارا علمتني كده

-         وانت بقى اللي مسميها نجمة؟!

-         لا هنا في الجزيرة كل بنت بنديها لقب ! اصل والدي الكبير بيقدر نعمتهم اوووي يعني مثلا

تالا اللي البنت اللي شعرها ناعم قدي دي ‘ شوف اللي بتلعب هناك مع الموج ..

ويشاور محمود على تالا ويرجع يقول:

-         دي لقبها حورية  بحر الجزيرة

أيهم يرفع حاجبه ويقول:

-         اشمعنى؟!

-         عشان هي بتحب البحر اووي ودايما بتلعب معاه فاحنا اديناها لقب انها حورية البحر

-         طب وانتم الولاد؟

-         والدي الكبير بيقول ان الراجل كفاية يكون راجل عشان يقدر يبقى عنده اللقب ده وانه احسن

من اي لقب تاني في الحياة

يبتسم أيهم ابتسامة فيها حزن ويقول بصوت واطي:

"يا بختك ! بتلاقي اللي يحسسك انك راجل من صغرك! مش صحيت فجأة لقيت نفسك مرمي وسط

الدنيا من غير اي توجيه ويا تخوض المعركة يا تموت! "

فجأة يصحى من شروده على سؤال محمود ليه:

-         ليه متعش معانا هنا على طول يا أيهم؟!

.................................................