الحلقـــــــة التاسعـــــــة من جزيـــــرة الــــــلالا

الحلقـــــــــة التاسعـــــــــــة

لارا بعيون حزينة ومليانة دموع:

-         مش هقدر اكسر القواعد حتى لو ....

أيهم بخوف وفزع شديد:

-         حتى لو ايه؟ حتى لو ايه لارا ؟

لارا بدموع:

-         حتى لو بـ حـ بـ ــك

يبتسم أيهم وفي نفس الوقت يجري عليها يحضنها بخوف وهلع زي ما تكون هتطير منه ويقولها:

-         لااااااا ما هو مش معقول يوم ما اسمعها اسيبك تضيعي مني لاااااا انسسسسسي مش هسيبك

-         بس انا مش هقدر اكسر اي قاعدة انا اتربيت عليها يا أيهم

-         يعني ايه يا لارا؟

-         يعني انت محتاج تفكر يا أيهم .. لو بتحبني فعلا وعايزني اكون شريكة حياتك تعيش هنا ....

يقاطعها أيهم فورا بعصبية ويقول:

-         اعيش فيييين؟!!! اعيييش في حتة مش معروفلها صاحب!! اصلاااا تعالي هنا ! فهميني هي الارض دي كلها فين من الحكووومة؟! انتوااااا ايه موقعكم من الاعراب؟! بلاش كل ده !

عايزاني اسيب شغلي وحياتي وكل ناسي هناك واعيش هنا؟!

-         احنا مش هنمنعك انك تشوف اللي انت عايزه ! بس الحياة بتاعتنا هتبقى هنا ع الجزيرة!

-         لييييييه ما نعملش العكس ؟! ليييه منعش هناك ونبقى نيجي في الاجازات هنا يا ستي؟!

-         صدقني مش هينفع يا أيهم

-         انتي بتحبيني!

-         .....

يبص ليها أيهم بغضب شديد ويمسك ايدها بعنف ويقول:

-         قووووليلي ! انتي بتحببببيني !!!

لارا وعيونها بدأت تنزل جامد وراسها في الارض:

-         ايوة

-         يبقى يلا بينا نهرب يا لارااا

-         مش هقدر اخذل والدي الكبير

-         ووالدك الكبيييير ده يقربلك اييييييه!! ده مجرد راجل عامل زي الريس عندنا !

-         فيه حجات مش هتعرف تفهمها يا أيهم الا اما تبقى واحد مننا

-         انا عايززززك انتي وبس ومش عايز افهم اي حاجة!!

-         ......

يمسك ايدها برقة ويبوسها بكل حنان ويقولها بهدوء:

-         صدقيني مش هخليكي تندمي ولا تخسري اي حاجة يا لارا وهجيبك هنا يا حبيبتي كل ما يوحشوكي

-         ......

-         اسمعي كلام قلبك اللي بيشاور ليكي على الحب وادي لنفسك فرصةلانها تستحق

-         .....

-         يلا نهرب

تفضل لارا تعيط وهي ساكتة وتهز راسها وتقول:

-         مش هقدر اخذلهم ! مينفعش !! مقدرش

-         انتي مبتخذلييش حد حبيبتي ! انتي بتختاري الحب اللي هو بيحاول يعلمه طول حياته ليكوا!!

-         والحب عمره ما كان أناني يا أيهم!! عمرررره

-         انتوا الانانيييين!!

-         ارجوك يا أيهم فكر انت و اي قرار هتاخده انا هرضى بيه

-         اسمعيني انتي كوووويس اوووي!! انااا همشي النهاردة بليل بما ان اليخت اتصلح ! ومعدش فيه

لازمة استنى اكتر من كده في المسرحية البايخة دي! وانتي لو بتحبيني هتيجي وتهربي معايا

ولو مبتحبنيش هفهم ده لما متجيش..

ويسيبها ويمشي وهو في قمة عصبيته

************************************

عادل يكون قاعد في كوخه ومعاه شاب من شباب الجزيرة ويقول:

-         هيمشي النهاردة يا والدي

-         تمام يا بني اكرموه لحد ما يمشي

-         بس يا والدي انا شايف انه بقى خطر وجوده هنا ولازم يمشي فورا بدل ما تبقى العواقب وخيمة

-         كده كده ماشي خلاص ..

-         ربنا يستر

يقفل عادل عينه زي ما يكون خايف من حاجة ومش عايز يبين الشعور ده وبعدين يسمح للشاب

بالانصراف ..

*************************************

عند شجرة الحياة تكون قاعدة لارا وبتبص لموج البحر وفي ايدها نجمة وكل شوية تبص ليها

وبعدين تبص على النجوم في السما .. فتيجي سالي وريم ويقعدوا معاها بهدوء .. يفضلوا ساكتين

بعدين ريم تقول:

-         احنا عارفين ان الموقف صعب عليكي

-         متخافوش انا مؤمنة بحاجة ومينفعش ازعل من اول جولة !

تبص ليها سالي بابتسامة وتقول:

-         انا كنت متأكدة اني هسمع منك ده ! برافووو عليكي حبيبتي .. تعالي يا ريم نمشي ونسيبها تقعد

لوحدها تفكر براحتها .. لارا عاقلة وعارفة بتعمل ايه ..

تبعد سالي وتفضل ريم واقفة شوية لحد ما تتأكد من ان سالي بعدت شوية ومش هتسمعها فتقول

-         لارا اهربي معاه

تتصدم لارا من اللي قالته ريم وتبص ليها وهي مصدومة ‘ فتكمل ريم بكل ثقة:

-         ايوووة اهربي ! مش عايزة اشوفك بتدبلي زي اختي ما دبلت !!

-         ا اا انتي اللي بتقوولي كده!

-         ايووة انااا ‘ لاني عارفة يعني ايه الحب لما يجي يرويكي وفجأة لما يختفي تلاقي نفسك بتتخنقي

ومفيش حد قادر ينقذك ! فتدبلي وتموتي!! تقدري تقوليلي مين وقتها هينقذك غيره !! اهررربي

يا لاراااا ‘ اهربي..

تفضل لارا باصة لريم بكل اندهاش وصاعقة وترجع تبقى لوحدها تاني .. بعد ثواني يجي

أيهم من وراها ويقول بصوت مبحوح وحزين جدا ..

-         من ساعة ما جيت هنا انا مش فاهم الدنيا اللي لقيتها بالصدفة دي  ‘ لقيتها ليه!! ولما شفتك

افتكرت ان ده سبب اني الاقي الجزيرة الخرفانة دي! بس انتي دلوقتي بتسبيني اضيع منك؟؟

طب ليييييه..

بتلف ليه لارا وبتقول بكل هدوء:

-         بايدك متضعش ولا تضيّعني منك

-         اني امشي ورا سراب مجهول! انتم عالم مغيبة !! ااه عندكم صفات واخلاق نفسنا ترجع تصحى تاني

جوانا بس مش لدرجة اننا ننعزل !! انتم بتضحكم على نفسكم صدقوووني!!

-         لسه الدرس صعب عليك بعد كل اللي حسيته في وسطنا؟

-         منكرش اني معاكم لمست قلبي اللي كان تايه طول الطريق ! بس مينفعش فجأة تخرجي سمكة

من البحر وتطلبي منها تعيش جوة الصحرا عادي؟!

-         واحنا مبنقلش للسمكة تخرج من توبها !

-         ده جنووووون اللي بتطلبيه مني ده!

تبص لارا ليه بحزن عميق وتقول بتماسك :

-         تسافر بألف سلامة يارب يا أيهم

-         مش عايزة تتنازلي ولو مرة واحدة في حياتك عشان الحب اللي بينا؟

-         عشان الحب اللي بينا انا اعمل اي شيء الا اني اتنازل عن مبدأ وحلم انسان عزيز عليا

-         ده لو ابوووووكي مش هتعملي معاه كده

-         هو فعلا وااااالدي!!

-         لااااااا

-         لا واااالدي!! جايز مكنش من دمه بس هو والدي في كل شيء!!!

-         يا خسارة

-         ........

-         بس اعرفي انكم رغم كل الحجات الحلوة اللي جواكم الا انكم اناننييين اووووووي

ويمشي ويروح يركب اليخت بتاعه ويمشي بعيد واول ما تشوف لارا يخته بيبعد تنهار على الارض

وتفضل تبكي كتير ‘ لحد ما تلاقي عادل بيطبطب عليها ويحضنها جامد ..

******************************

بعد تلت ايام يكون أيهم رجع للقاهرة تاني ويكون شحن موبايله واول حد يكلمه هي سها اللي اول

ما بتسمع صوته وبتعرف انه في شقته بتجري عليه ..

اول ما بتوصل وتشوفه بتحضنه بهستيريا وتفضل تعيط وتقوله:

-         حراااااااااام عليييييييك يا اخي كنت فييييييييين

-         موضوع طويل اوي يا سها هبقى احكيه ليكي اما افوق

-         مالك يا أيهم؟ ومال رجلك؟ وشكلك هلكان كده ليه؟!! حبيبي انت كوويس

-         الحمد الله يا سها .. تيتا كويسة؟

-         تيتا هتتجنن عليك من القلق يا أيهم لازم تروح تطمنها عليك

-         حاضر بس افوق من اللي فيه يا سها

-         اول مرة اشوف عينك دبلانة كده؟ فين أيهم المجنون الطاقق اللي مش هامه الدنيا ولا فارقة معاه حد!

-         اتهد!

تتغير ملامح سها وتكون مصعوقة من الجواب وتجري تحضن أيهم اللي لأول مرة في حياته يبكي

وبقوة وده يرعب سها أكتر لانها في اللحظة دي اتأكدت ان اخوها مكسور اوي فعلا ..

-         بسم الله الرحمن الرحيييييم ‘ ماااالك يا حبيبي فيك ايه يا أيهم؟؟ ايه اللي حصل

-         تعبااااان اووووي وموووجوع

-         سلامتك يا حبيبي ‘ والله سلاااامتك .. ياااارب انا ولا اشوووفك ابدا كده يا أيهم.. مالك بس؟ احكيلي

يمدد أيهم ع الكنبة ويفضل يعيط زي الاطفال ويقول:

-         مش قاادر احكي دلوقتي

تطبطب عليه سها بحنان شديد وتمسح بايدها خصلات شعره وتقوله:

-         خلاص ارتاااح دلوقتي .. بلاش تتكلم .. غمض عنيك وصفي ذهنك من كل حاجة بتوجعك ونام

الجملة دي كانت كفيلة انها تشعل نار الذكريات اللي عند أيهم لأنها كانت نفس الجملة اللي بتقولها

ليه لارا لما كانت بتعلمه ازاي يتأمل ‘ ففضل يبكي اكتر وبدأ يبكي بصوت مسموع اكتر وبحرقة

اكتر واكتر ..

************************************

بعد ساعة كان أحمد جاب جدة أيهم وسها ووصل الشقة عند أيهم زي ما طلبت منه سها واول ما دخلوا جريت

الجدة على أيهم واللي كان في سابع نومة وفضلت تبوسه وتحضنه جامد وتقوله:

-         يا حبيبي يا بني ‘ يا حبيبي يا ضنااايااااا وحشتنيييي يا غااااالي والله ..

-         يا تيتا حرام عليكي هيصحى ‘ سبيه انا ما صدقت انه بطل عياط وراح في سابع نومة

-         كان بيعيط !! يا حبييييبي اكيد خاف من التووهة اللي كان فيها

-         طب تعالي حبيبتي نطلع برة

-         لااااااا مش هسيبه يتوووه تاااني ‘ انا ما صدقت لقيته

يفتح أيهم عينه شوية ويبدأ يفرك في عينه جامد وأول ما تشوفه جدته صحي تنقض عليه تاني

وتفضل تبوس فيه وتحضنه جامد فيقولها أيهم:

-         في ايه يا تيتا هو انا راجع من الحجاز !

-         وحشتني اووووي يا غااالي

-         وانتي كمان يا حبيبتي

-         توهت فين ؟

-         في البحر

-         يالهوووووي! خطفوووك اللي معندهمش قلب في عرض البحر!

يرفع أيهم حاجبه ويبص لسها واحمد ويقول:

-         خطفوني؟! هما مين دووول!!

يضحك أحمد ويقول:

-         ههههههه وحشتنا يا أيهوووم وخضتنا عليك يا اخي ! طيب تهت كنت اتصلت بينا فورا واحنا

نتصرف

أيهم بعفوية:

-         ماهو في جزيرة اللالا مكنش فيه ارسال ولا شبكة فمكنتش عارف فعلا اكلم حد

سها واحمد بصوت واحد:

-         الـــــــلالا !!

يرتبك أيهم ويقول بتوتر شديد:

-         اا ... مم ما انا لما تهت يعني لقيت نفسي ع جزيرة غريبة و ولقيت ناس اغرب و والمكان هناك

اسمه كده!

تبص ليه الجدة وتقول بسذاجة:

-         دي في الحجاز يا بني؟!

-         سها اعملي الاكل لتيتا شكلها جعانة ‘ انا ملاحظ انها مسافرة بعيد شوية عننا

فيقول احمد:

-         ايه الجزيرة دي يا أيهم؟! انا اول مرة اسمع عنها

-         انا نفسي اول مرة كنت اشوفها

-         طب وبعدين حصل ايه؟؟

يسكت أيهم لثواني ونظراته تكون تايهة لبعيد اوي ‘ زي ما يكون بيحاول يشوف حاجة بس

مش عارف يشوفها وبعدين يقول:

-         بعدين يا أحمد .. مش دلوقتي ..

فتحس سها ان أخوها مش عايز يتكلم وان الجزيرة دي فيها سر هو اللي عامل فيه كده ومشقلب كيانه

فتقول:

-         بقلكم ايييييه تيتا فعلا شكلها جعانة وانا كمان بصراحة!! انت طبعا يا احمد باشا تاخد أيهم وتلعبوا

بلاي استيشن لحد ما اعمل الغدا ..

أيهم متعجبا:

-         بلاي استيشن!! ياااااه ده انا كنت قربت انسى كل الحجات دي واحس اني عايش في العصر الحجري!!

فتقول الجدة متعجبة:

-         ليه يا بني مخدتهوش معاك في الرحلة اللي كنت طالعها

-         نسيته مع الزمزمية يا تيتا!

*******************************

تاني يوم يصحى أيهم ‘ يلبس ويروح ع الشغل وهناك في الشغل الكل يستقبله بحرارة شديدة

واول ما يشوفه سامح يجري عليه ياخده بالاحضان ويقوله:

-         كده يا صاحبي تبعني ولا تسأل فيا

-         معلش يا سامح حقيقي انا كنت يادوب طالع ويك اند! بس فجأة بقوا اسابيع !

-         ده المدير كان مستحلفلك ! لولا ان البت سها عملت الواجب معاك وقدمت شهادة مرضية ليك

كان زمانك اطردت.. البت دي شكلها بتحبك ع فكرة .. وعينها منك! وخطيبها ده مش مالي عينها

فجأة يتعصب أيهم جامد جدا ويقول لسامح بصوت عالي:

-         انت بتتكلم عنهااااا كده ازااااااي!! انت اتجننت في مخك ولا ايه !!

يبص سامح بتعجب ليه ويقوله:

-         انت بترفع صوتك عليا عشان دي!!! دي حتت بت ولا راحت ولا جت

يمسك أيهم سامح من قميصه جامد ولسه هيضربه فتجري سها تحوش عنهم وتزعق في أيهم

وتقول:

-         انت اتجننت!!

يزعق أيهم جامد في نص الشغل ويقول:

-         قسما عظمااااااا اللي هيجيب سيرة اختي تاني ع لسانه لاقطعهوووووله!!!! اللي انت بتتكلم عنها

دي اختتتتتتتتي يا وااااطي!! دي اشررررف منكم كلكمممممم!!! يا ابو عقل مريييييض وسخ!

سها تتصدم من جرأة أيهم وانه كشف السر اللي كان طول عمره بيخبيه ومبيحبش يبوح بيه..

وبعدين أيهم يطلع بطاقته من جيبه ويقول:

-         ابقى بص في البطاااقة كووويس عشان تتأكد انها اختي!!!

وقام ساب المكان ومشي وفضل سامح والكل مصعوق من الصدمة اللي اتفجرت ..

بعد ربع ساعة دخل سامح لسها في اوضتها واعتذر ليها ع سوء نيته وقال:

-         معلش اعذريني أي حد في مكاني هيفكر كده

-         احنا لو بطلنا يا سامح وخلينا الخلق للخالق مشاكل كتيرة هتتحل !!

ينزل سامح راسه في الارض من الاحراج ويخرج من مكتب سها ..

**********************************************

في جزيرة اللالا الكل كان قاعد برة كوخ لارا حزين والبنات صحابها  كانوا قاعدين قلقانين جدا والاطفال الصغيرة بتعيط ..

بعد ربع ساعة يخرج عادل ومعاه واحد تاني من سكان الجزيرة ويقول:

-         درجة حرارتها مرتفعة جدا

-         اكيد من البرد اللي اتعرضت ليه

-         لازم نعمل على راحتها

يقف محسن فجأة ويقول:

-         وهنسكت عليها كده واحنا عارفين الدوا !

يكشر عادل فجأة ويقول بصوت حازم وجاف :

-         انت بالذات متتكلمش يا محسن!!

-         جايز انا متمرررد!! بس هتهون عليك اكتر بنت انت بتحبها هنا في الجزيرة! وانت شايفها بتدبل!!!

فتقوم ريم وتقول:

-         لحد امتى يا والدي اللي يحب حد من برة الجزيرة لازم يطحن في مطحنة حب الحياة!!! هي مش من حقها تعيش وتختاااار!! مش انت علمتناااا ده؟!!!!

فتجاوب ست كبيرة وتقول:

-         واتعلمنا وعلمناكم ان الحرية اللي تتعدى على  حق التاني متبقاش حرية!!

فتقول ريم بغيظ:

-         وهي لما لارا تعيش مع أيهم اللي حبته وحبها بجنون تبقى اتعدت على حرياتنا!!!

-         هياخدها ويوديها فين يا بنتي!!

-         للدنيا بتاعته! هي كبيرة وعارفة مسؤولية تصرفاتها

-         ولما هي تمشي وغيرها يمشي !! مين هيتبقى هنا؟!!!!!! والدك الكبير بيحاول يراعي مصلحة

الجزيرة!!

بعد لحظة سكوت طويلة يقول عادل:

-         انا عمري ما كنت قاسي ع حد فيكم هنا ابداااا!! من ساعة ما اتوليت الحكم ولحد ما هموت!!

انا في يوم كنت اكيد زيكم عندي الحماس والاندفاع اني اجرب العالم التاني اللي ميشبهش لينا

ابدا!! بس عرفت ان مفيش احسن من هنا !! اوعوا تفتكروا اني لما بكون حاسم انا كده بقسى!!

انا بحافظ على الكيان بتاعنا لاخر رمق في حياتي!!

يقول محسن بكل عصبية وغضب:

-         واناااا مش هقعد هنا ! انا ماااااشي

يبرق عادل جامد ويقول بصوت يهز الجزيرة:

-         بس اعرررف انك يوم ما هتمشي ! انت بتتنازل عن كونك تبقى واحد مننا

يبص ليه محسن بحرقة:

-         برضو همشي لان من حقي اني اختار واعيش حر!!

********************************