الحلقــــــــــة العاشــــــــرة من جزيـــــرة الــلالا

الحلقـــــــــة العاشـــــــــــرة

يقول محسن بكل عصبية وغضب:

-         واناااا مش هقعد هنا ! انا ماااااشي

يبرق عادل جامد ويقول بصوت يهز الجزيرة:

-         بس اعرررف انك يوم ما هتمشي ! انت بتتنازل عن كونك تبقى واحد مننا

يبص ليه محسن بحرقة:

برضو همشي لان من حقي اني اختار واعيش حر!!

وياخد بعضه ويمشي بسرعة يروح على بيته في وسط عياط الاطفال والستات الكبيرة .. بتجري

سالي وقتها على لارا اللي نايمة في كوخها تعبانة وتدخل بارتباك وتوتر وخوف وتبقى بتقدم خطوة

وترجع خطوة ومترددة تقولها انه محسن قرر يمشي من الجزيرة ولا لا .. تفتح لارا عينها اول

ما تسمع خطوات سالي فتبص ليها وتشك ان فيه حاجة:

-         مالك يا سالي؟

-         مم هـ اا م مفيش يا لارا ‘ انتي عاملة ايه دلوقتي ؟

-         من امتى بنكدب يا سالي؟!

-         بـ بصراحة خايفة اقلك دلوقتي

تتفزع لارا من مكانها :

-         حصل حاجة؟؟

-         م ممحسن

-         ماله!

-         قرر انه يرحل عننا ويروح المدينة

-         ايـــــــــه ! قرر كده قرار مفاجىء!

-         ا اانا جيت اقلك انتي بالذات عشان عارفة انك اكتر واحدة ليكي تأثير عليه

-         محسن معدش ينفع الواحد يأثر عليه .. والدي الكبير قالي لو فضل وصمم هيخليه يجرب بنفسه

-         يعني والدي الكبير عارف انه كان هيعمل كده

-         طبعا ‘ هو مش عارف شخصية كل واحد فينا وبيتوقع تصرفاتنا بناءا على شخصيتنا

وفجأة يقطع حديثهم صوت خبط ع باب الكوخ وصوت محسن من برة:

-         لارا انتي صاحية؟ عايز اودعك قبل الرحيل

لارا تبص بحزن لسالي:

-         افتحيله يا سالي

-         حاضر

****************************************************

يدخل محسن بكل حزن وابتسامة بسيطة على وشه ويقول:

-         انا ماشي يا لارا

-         مش عارفة اقولك ايه يا محسن !

-         انا حتى لو ملقتش الامان هناك يا لارا بس عايز اجرب بنفسي!

-         ....

-         احنا هنا ملتزمين اوووي بالقوانين والاخلاقيات

-         وده وحش؟

-         مش وحش بس من حقي اني اختار

-         واحنا عمرنا ما حرمناك من الاختيار بس اتعلمنا في نفس الوقت ان الاختيار ميكنش اناني

-         وانتي مرتاحة لما اخترتي الجزيرة ومروحتيش مع أيهم!!

مع ذكر اسم أيهم دقات قلب لارا بقت سريعة وملامحها اتغيرت والحزن طغى عليها وبعيون

مليانة دموع ردت:

-         عشان هنا انتمائي ! وانت اكتر واحد فينا فاهم يعني ايه الانتماء وليه !

بلع محسن ريقة بصعوبة لما حس وفهم من نظرات لارا اللي بتوصله ليها .. فيقول سريعا:

-         هروح اشوف طريقي .. سلام يا لارا ..

-         خد بالك من نفسك

واول ما يمشي محسن تعيط لارا وسالي اوي

********************************************

بعد اربع ايام في القاهرة كان أيهم لسه نايم والساعة كانت خمسة ونص الفجر لما سمع خبط

كتير على الباب .. قام وشعره منكوش وفتح الباب لقى محسن بابتسامة واسعة بيقول:

-         صباااااح الخييييير

بص ليه بصدمة وعينه كان لسه مفتحهاش كلها وقال:

-         ايه ده! انت ايه اللي جابك هنا؟! لا قصدي يعني انت جيت هنا ازاي؟

-         انا مشيت من الجزيرة

-          يا حلاوة !!

-         انا هقعد معاك بقى لحد ما اشوف هعمل ايه .. وعايزك توريني المدينة وتعرفني عليها وتعرفني

ع الناس

-         لا استووب ثانية واحدة كده ! اعرفك ع المدينة!! المديييينة!!

-         ااه المدينة دي اللي انت عايش فيها

-         والله هي بقت مدينة مرة واحدة

-         اه معلش احنا بنسميها كده في الجزيرة فعشان كده انت مستغرب

-         اه لا بص يا عم محسن انت لو هتقعد هنا تنسى بقى الجزيرة ومش الجزيرة !! هنا انت في غابة

مش مدينة كيوت زي اللي عندكم !

-         يعني ايه؟

-         بص انا مش هشرح يا معلم ليه بقى لاني مهما شرحت مش هقدر اوصفلك جمال واخلاق الناس

اللي هنا .. انا هسيبك تدوس معاهم! وانت وحظك يا باشا ..

-         ادوس معاهم على ايه؟

-         اه انت المفردات ضايعة اصلا من عندك ! لا انت شكلك هتقضي يومين لذاذ كده تستجم فيهم

في المدينة وترجع تاني ع الجزيرة ..

-         هو العيشة هنا صعبة للدرجة دي

يسكت أيهم شوية ويتكلم جد ويقول:

-         بص يا محسن انا اللي رفضت العيشة هناك بقلك ارجع تاني للجزيرة !

-         ليه؟!! وانت اهو بتقلي انك رفضت تعيش هناك وعايزني انا ارجع هناك؟ ليه؟ ايه التناقض

ده؟

-         عشان انا عشت هنا من زمان فمتعود على الاخلاق الضايعة وع حجات كتير وحشة ! بس واحد

زيك قلبه نقي صعب يا محسن .. صعب بعد ما عشت عمرك كله في بيئة نضيفة تيجي تعيش

وسط المية العكرة!!

-         خليني اجرب

-         التجربة صعبة يا صاحبي

-         هتعلم منها وهرجع احكيها للناس اللي هناك

-         مصمم تدخل الامتحان يعني

-         ايوة مصمم

-         براحتك عيش بقى واستلم ..

يبتسم محسن ويقول:

-         طب ايه مش يلا بقى توريني الاماكن هنا

يبص أيهم في الساعة ويقول:

-         حبيبي احنا الساعة 6 الا وانا اصلا عندي شغل ‘ انت تيجي معايا دلوقتي تفطر وتنام كده وتأنتخ

لحد ما ارجعلك من  الشغل .. وبليل بقى هوريك الدنيا هنا ماشية ازاي ..

-         تمام وتعرفني على أهل المدينة

-         لا يا بابا مش كلهم ليه بقى لاننا مش اوضة وصالة هنا زي الجزيرة عندكم

يمشي أيهم للمطبخ وبعدين يرجع تاني بخطوات مترددة ويقول:

-         لارا عاملة ا اا ايه؟

-         عيانة

-         ايه؟ مالها؟ ومقلتليش ليه انها عيانة اول ما جيت؟ لارااا مالها يا محسن؟

-         اهدى اهدي .. هي بس تعبت من ساعة ما انت مشيت ومبقتش هي لارا اللي نعرفها كلنا

-         طط طب  و و ووهي اا ب ببقت كويسة ؟

-         الوجع مش وجع جسدي يا أيهم ! الوجع وجع الروح ووجع الروح ملوش دوا الا من ربنا وحده

وتعالى..

يبص أيهم بحزن في الارض ويدخل المطبخ يحضر فطار ليه ولمحسن

**********************************************

في الجزيرة تكون لارا قاعدة مع عادل والاتنين قلوبهم مليانة حزن .. يبص عادل بحزن شديد

للارا ويقول:

-         انا مش عارف يا بنتي انا خوفي عليكم صح ولا غلط

-         ليه بتقول كده يا والدي

-         انا بقيت حاسس اني بظلمكم

-         لا طبعا .. انت زي ما بتقول خايف علينا

-         بس من بعد إصرار محسن انه يسيبنا ويمشي ‘ الأمور عندي اتلخبطت

-         انت عارف يا والدي محسن بطبعه متمرد وعنيد ‘ بس مصيره يعرف ان هنا أمانه وداره !

-         وانتي؟

ترتبك لارا وتقول:

-         اا انا ايه؟

-         انتي امانك ودارك عند أيهم؟

-         اا  ب ب بس انتمائي هنا

-         انتمائك هو حبك يا بنتي

-         وانتم حبي

-         وهو الروح اللي بتكلمك

-         وانتم كمان حياتي يا والدي!!

وتبدأ تعيط فيقولها عادل بكل حنان:

-         وانا اللي بنفسي دلوقتي بقلك يا لارا اكسري القاعدة واكسري كل درس قلتهولك

تبرق لارا من اللي عادل بيقوله وتقول بصاعقة:

-         ايـــــــــه!! معقووول انت يا والدي اللي بتقول كده!!

-         اخت ريم زمان لما حبت واحد مش مننا انا مانعت لاني لما لمست قلبه عرفت انه مش هيصون قلبها فرفضت لكن مع أيهم قلبه شبه قلبنا .. فيه الروح الحلوة اللي لسه مستخبية جواه..

-         مينفعش ! مينفعش يا والدي !! اسيب هنا .. اسيبك؟ اسيب القلوب الصافية واروح اعيش في دنيا

رفضتنا؟ دنيا مكنتش عايزانا !! دنيا مبتعرفش ازاي تتعامل معانا صح!! انت يا والدي قدمت لينا

الامان في اللحظة اللي هما طردونا منها!! انت كنت الصيف الدافي في عز الشتا ..

يدمع عادل على كلام لارا ويقول:

-         محدش يعرف السر ده غيرك انتي ومحسن ورغم كده محسن سابنا

-          محسن مصيره يعرف ان هنا افضل و محدش هيقدر هنا زيّ يا وااالدي!! محدش هيقدر!! مينفعش اعض الايد اللي اتمدتلي ولا انكر خيرها ..

-         وانا اللي بقلك بذات نفسي روحي ليه ..

-         والدي! أيهم بيحبني وعشان يثبتلي انه بيحبني لازم يعمل حاجة كبيرة ولو معملش الحاجة دي

يبقى حبه ليا مزيف وكانت مجرد أيام .. فأرجوك متتعبنيش انت كمان يا والدي ..

وتطلع لارا تجري تنهار في كوخها

*********************************************

في الشغل يكون أيهم قاعد بيشتغل شوية ويسرح أكتر وتكون سها واخدة بالها من ده فتروح ليه وتقوله:

-         مالك يا أيهم ؟ من ساعة ما رجعت من السفرية المشؤومة دي وانت غير العادة؟

-         مفيش حبيبتي

-         ازاي مفيش؟ انت بقيت حزين جدا! مكسووور اوي من جواك؟!

-         هحكيلك بعدين

-         لا قووم بينا حالا نستأذن وتحكيلي !! انا مش هقعد اتفرج عليك كده

-         اهدي بس يا سها وروحي كملي شغل ونخلص وهحكيلك على طول .. انا دلوقتي تعبان ومش قادر

احكي حاجة ..

تبص ليه بحزن ويأس وتخليه يكمل شغل

*****************************************

محسن بيصحى من النوم يلاقي لسه أيهم مرجعش من الشغل فيقرر ينزل شوية يتمشى ويكتشف

المكان بنفسه .. حفظ شكل العمارة ورقمها وسأل البواب على اسم الشارع وبعدين فضل يتمشى

وراح دخل محل وشاف لبس عجبه فراح يشتريه وخرج فلوس كتيرة اوي من المحفظة وقال

للبايع كام ‘ فالبايع استغرب و قاله:

-         دخل يا عم الفلوس دي كلها بدل ما حد يقطرك كده ويسرقك ‘ الدنيا مبقاش فيها اماان

-         ها؟ يقطرني؟

-         انت مش من هنا ولا ايه؟ انت مصري؟

-         اا اا ه اانا مصري ايوة من اللالا

-         والله فعلا شكلك لالا خالص .. هات 150 جنيه ولما تيجي تطلع المحفظة مش لازم تطلع الفلوس

كلها من جواها بس طلع على القد ..

ابتسم محسن ليه بكل عفوية وقال:

-         شكرا على النصيحة جدااا

-         العفو ..

 بعدها خرج من المحل وفضل يتمشى ومن شارع لشارع لحد ما لقى شلة ولاد قاعدين جمب كشك

وبنات بتعدي من قدامهم ‘ فواحد قام فورا يعاكس البنات دي ويمشي وراهم ويحاول يتحرش بيهم

قام محسن جري عليه ومسكه وفضل يزعق ليه ويقوله:

-         انت ازااااااااي تضايق بنات الناس كده

الولد يبص ليه بكل استحقار ويقول:

-         وانت مالك يااااض يا معفن انت!!

-         انت مش عارف انها كده بتنزعج !!

-         ما تنزعج ولا تتعمل انت مال اهلك اساسااااا

-         ولسانك طويل كمان !!

يجروا صحاب الولد على محسن ويزقوه جامد وواحد يقوله:

-         امشي ياض بدل ما نخرشمك ونخليك تسف تراب الاسفلت

-         انااا مش مصدقكم!! انتم بتتعاونوا معاه ع الفساد!! ده بدل ما ترشدوه

فيبصوا لبعض باندهاش وواحد تالت يقولهم:

-         فككم يا جماعة من ده شكله عبيط !!

-         انااااا مش عبييييييط!! انتم اللي مش رجالة ومتعرفوش معنى الرجولة الحقيقي!!

وكانت جملته كفيلة انهم يتلموا عليه ويفضلوا يضربوه لحد ما وشه يجيب دم وبعدين يسيبوه

مرمي ع الارض ويقولوا ليه:

-         متبقاش تعملنا فيها دكر يا روح امك

ويكون الناس ملمومة حواليهم ومحدش بيتدخل لما بيشوف ان شلة الولاد دي ماسكة مطواة

***************************************************

أيهم وسها يكونوا قاعدين في مطعم ويكون أيهم متوتر ومرتبك وهو بيحكي عن لارا لـ سها ..

وبعد ما يخلص كلام تقوله سها بعيون مليانة فرحة:

-         ياااااااااه يا أيهم!! أخيرااااا حبييت

-         ليه وهو انا كنت كلب مثلا !

-         مش قصدي يا حبيبي بس طول عمري كنت بقول امتى اشوفك بتحب عشان طيبة قلبك وحنيتك

دول يظهروا بقى ‘ انت جواك بحر من الحنان والدفا اللي يقربلك يعيش جواهم في نعيم .. بس

انت اللي طول عمرك رافض تبين ده .. وحابب الحياة اللي كنت عايشها..

-         عارفة يا سها لما امي ماتت ‘ كنت متوقع هلاقي حنان الدنيا كله في بابا !! بس للاسف صحيت

لقيته بيتجوز واحدة تانية!! انا معنديش اعتراض ع مامتك ‘ انا بس كان عندي اعتراض انه

نسى امي بسرعة!! ده غير انه معوضنيش حنانها ....

-         مش يمكن انت اللي فهمته غلط ؟!

-         فهمته غلط!! ولما انا فهمته غلط هو محاولش يفهمني الصح ليه!

-         وعشان كده انت قفلت على قلبك؟

-         قلت واحب ليه واتعلق والاقي مصير امي بيتكرر تاني؟!

-         لا طبعا ايه الهبل ده

-         بس انا غصبن عني حبيت واحدة والاقيها من اللالا

-         انا لحد دلوقتي مش مستوعبة قصة الجزيرة دي!! معقول يا أيهم فيه بجد جزيرة كده!!

-         انا وايه عرفني!! انا صحيت لقيتني فيها ! وناس غريبة ومريبة وعايشين ع اخلاقيات ماتت جوانا

من زمان..

-         وحد يسيب الدنيا دي ويجي لهنا!

-         انت عارفة الناس اللي هناك لو حبت تشتغل بتشتغل ايه؟

-         اييه؟

-         بيقدموا خدمة لوطنهم! هو ده شغلهم

-         الله !!

-         يا ستي الله وحلووو وكيوووت ولطيف !! بس متجبيش واحد متعود على الحياة والعيشة هنا والتنطيط والصحيان للبنك واروح اخدم الوطن هناك!! بعدين يعني يرضيكي شحط زي

وطنه يبقى للالا!! طب ده حتى عيبة في حقي

-         انت بتتريق يا أيهم!!

-         ما انا لازم اتريق عشان ممتش من القهررر!! انا بحبها يا سهااا وبمووت فيها ومش عارف اعيش

من غيرها!! مش قادر!! من ساعة ما جيت وانا برجع من الشغل ع البيت ولا زي الست المطلقة!!

-         هههههه ضحكتني يا أيهم

-         لا بجد حاسس اني مطلقة! مش طايق اخرج مش طايق اشوف بنات !! عايزها هي وبس! عايز

حضنهاااا ..

-         يبقى روحلها يا أيهم .. متخسرش الحب اللي اخيرا ما صدقت ولقيته

-         القرار صعب يا سها .. صعب اوووووي

-         طب ما تاخدني هناك والنبي يا أيهم

-         هي ملاهي انتي راخرة

-         نفسي اشوف المكان اللي بتقول عليه ده!! طيب عملت سيرش عليه صحيح؟

-         لا!

-         لييه!!

-         اصل هتكتبي ايه على جوجل ؟! جزيرة اللالا اكيد هيرجع يرد عليكي يقلك لالا دي تبقى خالتك!

-         بالذمة دي اخلاق واحد محترم راح قعد في اللالا فترة

-         لا ! بس اعمل اييه مش طاااايق نفسي يا سها

-         فكر يا أيهم وانا لو في مكانك هتنازل عن اي شي في سبيل حبي الحقيقي

وفجأة ينط أيهم من مكانه ويقول بسرعة:

-         يالهووووووي انا نسييييت محسن

-         محسن مييين!!

-         ده واحد من الجزيرة هناك اتنفى وجالي

-         ايييييييييه!!

-         م ممم مش هتستوعبي ‘ يلاااا بينا بسررررررعة لحسن انا سايبه من الصبح في البيت ..

-         طب يلا بينا

**************************************

يرجع أيهم مع سها لشقته ويدور على محسن ميلاقهوش فيقول بتوتر:

-         راااااح فين المجنووون ده

-         طب اتصل بيه

-         معندهوش موبايل

-         ايه! معندهوش موبايل وهو فيه حد في الزمن ده مبيشلش موبايل

-         تخيلي بقى انه فيييه!! اللالا كلها كده

-         معقول !

-         ده انا بقيت بتصور هناك سيلفي كتير واقول هبقى انزلهم بعدين اما ارجع !

-         سيلفي ايه دلوقتي والولد تاه منك!!

-         مش عارف انا هستنى كده ساعة لو مجاش هنزل ادور عليه

ومجرد ما خلص الجملة من هنا جرس الباب رن ‘ فجري أيهم يفتح الباب لقى قدامه والده..

...........................