الحلقــــــــة الثانيـــــــة عشـــــر من جزيرة الـــلالا

الحلقـــــــة الثانيـــــة عشـــــــر

في الشغل سها قاعدة بتتكلم في التلفون مع احمد خطيبها وسامح كان معدي جمب مكتبها فسمعها:

" ايوة !! عايزة اقلك انا قعدت اعمل سيرش كتير اوي يا احمد على حاجة اسمها جزيرة اللالا في

مصر ملقتش!! بجد معرفش ازاي أيهم قدر يوصلها ويقعد فيها!! لو تسمعه وهو بيتكلم عن الناس

هناك تقول دول اكيد في حدوتة من حواديت ألف ليلة وليلة !! مش حاجة طبيعية ابدا اكيد فيها سر"

يكلم سامح نفسه ويقول باستغراب شديد:

-         جزيرة الــلالا!! يا ترى ايه دي؟! وايه السر اللي بتتكلم عنه سها!! لااا الواحد مش لازم يقعد يتفرج انا لازم اجيب قرار الجزيرة دي ‘ جايز اقدر اعرف ايه شقلب أيهم وخلاه بقى بني آدم

تاني..

يرجع سامح على مكتبه بسرعة ويفتح الكمبيوتر ويتكلم بصوت عالي وهو بيكتب على الكيبورد

على جوجل :

-         جـ ز يــ رة الــ لا لا

 يستنى ثواني كده وتطلعله كذا اختيار بس ميلاقيش حاجة باسم جزيرة اللالا وبعدين يبحث في

الصور فميلاقيش حاجة .. يقفل الكمبيوتر ويفضل يفكر بصوت عالي :

-         الله!! ازاي يا جدع مفيش حاجة عن الجزيرة دي!! امال سها بتقول أيهم راح ليه جزيرة اسمها

كده؟! يمكن انا سمعت غلط! صحييييييح ما ادخل على الانستجرام واشوف صور أيهم يمكن

يكون نزل صورة ولا حاجة ..

وبالفعل ياخد سامح موبايله ويدخل على انستجرام ويدخل على اكونت أيهم ويبدأ يتفرج في الصور ويلاقي صورة من الصور لجزيرة فيقول بصوت عالي وبكل انتصار:

-         ايووووووووة هـــــــــــــــــي دي !!

يقرأ الجملة المكتوبة تحت الصورة فيلاقي أيهم كاتب:

-         في جزء من الواقع اللي في حياتنا أحيانا بنلاقي جنة خيال بتظهر فجأة قدامنا ونلاقي نفسنا

عايشين جوة دوامتها اللي بتاخدنا بعيد عن الدنيا وقرفها ‘ انا كنت هناك في يوم من الايام..

يبدأ يقرأ الكومنتات بحماس واهتمام وفضول اكتر ويلاقي النا بتسأله عن المكان فكان

بيرد ويجاوب بأنها سر.. فيقول سامح:

-         سر!! اشمعناااا بقى!! من امتى يعني أيهم بيكتشف مكان وميقلش لحد! ده كان كل ما يروح

مكان جديد لازم يتصور سيلفي وينزل الصور!!

بعدين يفضل يقرأ في الكومنتات فيلاقي واحدة كاتبة ليه " هو ده المكان يا يويو اللي فكستلنا

في الغردقة عشانه"

بس ميلاقيش رد من أيهم عليها فيرجع يقول لنفسه:

-         بسسس يبقى هو فعلا دي الجزيرة !! بس الاقيها فين دي؟! او اعرفهااا ازاااااي!!

فجأة يدخل عليه أيهم ويقول:

-         ايه يا سامح بتكلم نفسك ولا ايه!

-         ايه ده انت جيت يا صاحبي

-         اه جيت

-         كنت فاكرك اجازة

-         لا محبتش ‘ كنت هاخده فعلا بس محبتش

-         طب بقلك ايه ما تيجي نخرج سوا بعد الشغل

-         والله ممكن مقدرش يا سموح

-         اشمعنا؟

-         يعني اصل عندي واحد كده ‘ فعايز اكون معاه .. جاي زيارة يعني

-         مين الواحد ده؟

-         واحد معرفة

-         طب ما نخرج كلنا

يرتبك أيهم لانه مكنش عايز سامح يشوف محسن فيقول بتردد وارتباك:

-         اممم مش عارف والله يا صاحبي

يحس سامح ان فيه حاجة في موضوع الواحد اللي عند أيهم فيقوله بإصرار:

-         هعدي عليك نخرج كلنا سوا .. تمام يا صاحبي

يسكت أيهم ويقول في سره:

"ربنا يستر"

*******************************************

بعد ما الشغل يخلص ويروّح أيهم على البيت ويقول لمحسن انهم هيخرجوا فيقوله:

-         خلي بالك من صحبي ده لانه ممكن يوقعك في الكلام عشان يعرف انت منين

-         اه تمام متقلقش

-         طب هتقول انت منين

-         عادي هقوله مش لازم تعرف

-         لا ياراجل!! هو ده ردك!!

-         اه انا حر والمفروض هو يتقبل حريتي في اني مش عايزه يتدخل في تفاصيل حياتي

-         لااااااا ابووووس ايدك !! هناك في اللالا انتم بتحترموا نفسكم !! الناس هنا بقى عندنا لو متحشرتش في اللي ميخصهاش تحس ان هيجيلهم شلل أطفال بعيد عنك!!

-         يعني اعمل ايه

-         قوول انك من .... اممم مش عارف ‘ انا مكنتش عايزه يجي !! بس خفت يشك فيا وسامح

لو فضوله اشتغل مش هيرحمني !! انا عارف دم أمه التقيل في الموضوع ده ..

يحط محسن فورا ايده على بقه عشان أيهم قال كلمة مش لطيفة ويقول:

-         انت بتقول يا أيهم احيانا كتيرة كلام مش حلو

-         ااااه امال لو قعدتك مع شلتي وسمعت كلامنا هتقووول ايه!! ابوووس ايدك انسى بقى المثاليات

اللي اتربيت عليهاااا!! انت في دنيا غير الدنيا ..

-         مش فاهم انت ليه مصمم تغير مبادىء!!

-         عشان انت طلبت تعيش ما بينا !! يبقى لازم جلدك يبقى زي جلدنا

-         بس انا مش عايز اكون كده!! انا عايز اعيش بلوني وجلدي انا وسطكم!! لا بأمركم تتغيروا

عشاني ولا عايز اني اتغير عشانكم!! امال فين الحرية..

-         حرية! هأوو ماتت واتسحلت من زمان

-         من امتى الحريات بتموت

-         اسمعني يا عم الفيلسوف دلوقتي ‘ فكر معايا هنهبب اييييه فيك اما يجي سامح!!

-         انا مش هكدب

أيهم بعصبية:

-         يعني عايزه يعرف عن الجزيرة!!

-         لالالالا طبعاااااا بس مش هكدب

-         ماهو يا تكدب عشان تداري ام الزفت الجزيرة يا اماااا تقول بقى !!

-         لا طبعاااا مقدرش اقول عن الجزيرة

-         الا قولي صحيح يا محسن ليه مبتقلوش على الجزيرة

-         عشان الناس لو عرفت مش هيسبونا في حالنا واحنا عايشين في حالنا ‘ ملناش دعوة بحد

ولا عايزين حد ليه دعوة بينا..

-         بس انا لسه مستغرب ازاي محدش من الحكومة خد باله منكم! ومن الارض!!

-         بص انا هقلك على سر صغير وبسيط جدا

-         قول يا عم

-         والدي الكبير متفق وعامل اتفاقية مع محافظ البحر الأحمر بما ان الجزيرة واقعة تحت محافظة

البحر الأحمر..

-         ااااااااه من تحت الطربييييزة يعني

-         مبنسمهاش كده!!

-         امال بتسميها اييييه؟! هاااا؟؟ مش دي رشوووة برضو يا بتوع المثاليات

-         لاااا ده دفاع عن وطن وكيان

-         ولما انت انتمائك ليه اوي كده ايه اللي مقعدك هنا

-         .....

-         اييييييه سكت لييييه!

-         قلتلك قبل كده بزود يقيني

-         يعني انت شايف ان العيشة هناك احسن؟!

-         زي ما انت شايف كده وبتقاوح!

يقول أيهم بغضب شديد :

-         انااا وضعي غييييييييير

-         جايز

-         لاااااااا مش جااااايز!! عشان هي اكيييد بتبصلي نفس نظرررتك دي!! بتبصلي على اني جبان

وسبتها وسبت الحب وهرررربت!! بس انا المعادلة بالنسبالي صعبة اوووي

-         انا مش شايفك جبان ولا هي ! هي اكيد عارفة ان المعادلة صعبة ! ولارا عندها يقين

-         لااااا بشووووف في عنيك كتير اني خذلت لارااااا !! بشوفها في عنيك يا محسن !!

-         لا انت عايز تشوفها تفرق يا أيهم

لسه هيجي أيهم يرد يلاقي جرس الباب بيرن فيجز على سنانه ويقوله:

-         شفت اهووو الززززفت سامح جه ومتفقناش هنقول ايه

-         هتصرف انا ملكش دعوة

-         يوووووه انت حرررر افففففف

*********************************************

يفتح أيهم الباب لسامح اللي يدخل واول ما يشوف محسن يقوله:

-         اهلاااا انا سامح صاحب أيهم في الشغل

محسن بابتسامة واسعة :

-         وانا محسن صاحب أيهم برضو

-         منين يا محسن؟

-         اهلا بيك

يتدخل أيهم فورا ويقول:

-         ها ناويين على ايه يا شباب؟

يقول سامح:

-         بص انت تروح تعملنا قهوة وتجهز الشيشة يا صاحبي ونقضيها هنا نلعب بلاي ستيشن

محسن بتلقائية:

-         ايه البلاي ستيشن ده

أيهم يتوتر مع سؤال محسن ويبص سامح ليه باستغراب وتعجب شديد وشك ويقول:

-         ليه انت متعرفش البلاي ستيشن!

-         لا!

فيرد أيهم بسرعة وبتوتر شديد:

-         اا اصل ا اصل محسن دحيح اوووي ومكنش ليه في اللعب زيينا فتلاقيه يعني يادوب هو ومذاكرته وشغله طبعا دلوقتي !

سامح بشك اكتر:

-         برضو ! يا معلم مش لدرجة كده!! مين ميعرفش حاجة تافه زي دي

فيقول محسن:

-         طب ما تيجوا نخرج نشوف المدينة

فيهمس أيهم بصوت واطي ليه :

-         اسكت الله يخربيييييتك هتفضحناااااا

فيبص سامح ليهم بشك اكتر واكتر ويقول:

-         فيه حاجة يا شباب؟

أيهم بغيظ:

-         لااااا ابداااا مفيييش

********************************************

في الجزيرة لارا قاعدة قدام البحر بتفتكر أيام ما كان أيهم موجود في الجزيرة وشافها مرة

قاعدة لوحدها قدام البحر فقرب منها وقالها:

-         زي موج البحر اما يخطفك لجواه ! خطفتي قلبي

فتلتفت ليه وتبتسم بخجل شديد وتقوله:

-         رجلك عاملة ايه ؟

-         كويسة

-         الحمد الله

-         ليه دايما بتهربي مني لما اقلك كلام حب

-         مم مبهربش ‘ انا بس مش عايزاك تستعجل في مشاعرك

-         ليه! هو انا صغير؟

-         مم مش ص مش صغير لا بس .....

-         انا عايز اقرب من حضنك اوي! عايز اكون ملكك

-         وعشان تعمل كده انت متأكد من ده؟

-         انا عمري ما قلت لأي بنت كلام حب ولا عشمتهم على فكرة! انا كل بنت كانت بتخرج معايا

وتقضي معايا وقت لطيف بتبقى عارفة انها مش اكتر من وقت حلو هيعدي وبس وبيبقوا عايزين ده اصلا !! هما عارفين ان قلبي مش للحب! ودايما كنت بقلهم كده..

-         ليه قلبك مكنش للحب؟!

-         عشان مكنتش شفتك زمان

-         .....

-         سكتي ليه؟

-         مش عارفة اقلك ايه....

-         قولي انك بتحبيني

-         يوم ما هقولها هكون متأكدة منك

-         معقول تكوني خايفة مني؟!

-         فيه حجات انت لسه مفهمتهاش عشان كده انت مش متخيلها !! جايز اما تعرفها ميكنش ده

هو هو ردة فعلك..

-         اي حاجة هعرفها عنك مش هتغير حبي ليكي!

تفوق لارا من ذكرياتها وتفضل تبكي بحرقة وتقول بصوت مبحوح ومليان غصة ووجع:

"واديك سبتني  لووحدي!! انا عارفة ان قلبك حبني ! بس اول مرة اخاف من الرهان!! انا

مراهنة عليك انك هترجعلي بس خايفة تخذلني اووووي يا أيهم خااااايفة!! ومش عارفة لو

خذلتني هيحصلي ايه!! "

تعيط اكتر وترجع تكلم البحروتقول:

"هو قالي اي حاجة هعرفها مش هتغير حبي ليكي طب ليييه لما عرف انه لازم يعيش معايا

رفض !! هو مش بيحبني يبقى لييييه ميفضلش جمبي!! طب ليه مشي بسرعة وساب هناااا

مكان يفضل شوووية !! ليه زوّد البُعد بينا؟! "

فتيجي ريم وتقاطعها وتقول:

-         مش يمكن عايز يتأكد من حبك ليه

تمسح دموعها بسرعة وتبتسم بألم وتقول:

-         انتي سمعتيني

-         غصبن عني ‘ لقيتك من بعيد واقفة بس مكنتش عارفة انك بتعيطي .. قلت اجي اقف معاكي

ومسبكيش لوحدك وسمعتك..

-         هو مين اللي محتاج يتأكد من التاني؟ انا ولا هو؟

-         انتم الاتنين !

-         ......

-         ابعتيله مرسال

-         اقله ايه؟

-         قولي كل اللي قلبك نفسه يقوله ليه..

-         تفتكري انا كده صح؟

-         ايووووة طبعا

-         مش هيقول اني ببتزه!؟ عشان يجي هنا وبضغط عليه

-         لو هو مش عايز يجي مش هيجي صدقيني لو بعتي مليون مرسال

-         اكيد لو مردش عليا مش هتحايل عليه

-         انا بقول لووو! بس مع أيهم هيرد صدقيني

-         اشمعنا؟

-         عشان اللمعة اللي كنت بشوفها في عيونه وهو بيهمس بس بأسمك تقولي ده! الابتسامة اللي

كانت بترقص أول ما يشوفك جاية من بعيد تقول ده.. نظراته اللي كانت بتابعك وانتي

قاعدة مع الاطفال تقول ده ..

-         بس هو مشي ...

-         عشان القرار مش سهل وانتي نفسك عارفة ده

-         عاااارفة بس خاااايفة!! خايفة اوووي!! اول مرة اخاف

ريم بابتسامة رقيقة:

-         لانك ببساطة قلبك دق ليه..

لارا ودمعة بتنزل من عينها بكل حزن:

-         ايوة بحبه

-         يبقى ابعتيله مرسال مش هتخسري

-         حاضر هبعتله

************************************************

اليوم التاني سامح قاعد مع أيهم في الشغل فيقوله:

-         بس محسن ده شكله خااام كده ومريب

أيهم يعمل نفسه مشغول:

-         امم لا عادي

محسن بلؤم:

-         لا بجد تحسه جاي من عالم تاني؟!

أيهم بتوتر شديد:

-         لالا

-         اممم جايز !

-         بقلك ايه انا عندي حسابات عايز اركز فيها

-         صحيح انا مبقتش اشوفك بتلعب بديلك ياض يا أيهم زي زمان

-         معدش ليا مزاج

-         ايه ده ايه ده!! انت اتغيرت اوووي يا أيهم بعد السفرية اياها

-         عادي بقى..

*******************************************

بعد يومين تيجي رسالة لأيهم عنده في الشقة ويكون هو ومحسن قاعدين بيتفرجوا على التلفزيون وفجأة يرن جرس الباب ‘ يفتح ميلاقيش حد ويلاقي بس رسالة ملفوفة بشريطة حمرا

يبص باستغراب ليها وبعدين يبص يمين وشمال ميلاقيش حد ‘ فيدخل ويقفل الباب .. ويروح

يقعد جمب محسن تاني وهو باصص باستغراب على الرسالة الملفوفة بشريطة حمرا ‘ اول ما

يبص محسن ليه ويشوف الرسالة يقول:

-         ايه ده!! دي رسالة من الجزيرة!!

يبص أيهم بصدمة ودهشة لمحسن ويقول:

-         ايـــــــــــه!! وانت ازاي عرفت؟

-         ايوة احنا لما بنبعت مراسيل بنبعتها بالشكل ده!! بس دي ليك ولا ليا

-         مش عارف!!

-         افتحها افتحها بسرعة كده وشوووف

يفتحها أيهم وكل دقة في قلبه بتدق بسرعة ويلاقي اسمه في الرسالة فيبص لمحسن ويقول:

-         دي شكلها ليا انا!!

يبتسم محسن ويقوله :

-         يبقى لارا اللي كاتباها ‘ هدخل جوة اقرأ شوية واسيبك معاها

-         ها ؟!

-         اقراها براحتك ‘ وانا هدخل جوة عشان تكون على طبيعتك

-         طيب طيب

*********************************************

يدخل محسن جوة بالفعل ويفتح أيهم الرسالة اللي تكون على اليمين من فوق مكتوب اسم أيهم

وبعدين يلاقي السلام وبعد السلام يلاقي مكتوب:

"وانا واقفة مرة قدام البحر سمعت موجه بيعاتبني ! بيعاتبني على قلب صافي جه لينا من دنيا

احنا ملقناش مكان جواها اختفى من وسطنا .. وقلتله ان القلب ده عايز كده ومرتاح بس برضو

عاتبني تاني ازاي اسيبه يضيع مني وسط الهوجة دي .. احتارت ومعرفتش اقوله ايه!؟ واكتفيت

بالصمت اللي ساعات كتيرة بنلاقي جواه ميت ألف جواب وجواب! وساعات بيكون زي المسكن

المؤقت اللي بيريحنا من وجع وألم كبير مش لاقين لسه ليه الدوا! بس انا زي ما كان عندي يقين

بالقلب ده عندي يقين برضو انه هيقدر حبي وانتمائي لهنا .. من جوة الموج الصافي ومن عند

شجرة الحياة اللي فهمتني في يوم درس ان الأمل طول ما هو عايش جوانا ده أكسير الحياة

ببعتلك سلامي وأشواقي .. ومن عند غروب الشمس وأشعتها وهي مسافرة لبعيد عشان تروح

لناس تانية بقلك بعتاب "ان فيه نجمة لسه مستنياك بشوووق وان لسه فيه ابتسامة رافضة تخرج

من القلب الا في حضن لُقياك"

لارا ..

يحسس أيهم على الرسالة وعلى الحروف زي ما يكون بيحاول يلمس لارا جواها ‘ ويحس بدموعها اللي كتبت بيها الرسالة دي ويبتسم ويتوجع ومع كل دقة قلب يحس بشوق وألم فظيع..

ويلاقي دمعة بتهرب منه فيحضن الرسالة ويقول:

"بحبـــــــــك أووووي"

ويحط الرسالة في جيبه اللي بتفضل دايما معاه وبيفضل كل شوية يطلعها ويقراها مرة واتنين وعشرة وحتى وهو في الشغل ‘ يطلعها ويقعد يقراها ويسرح ‘ وفي البيت يقراها واحيانا يبكي

واحيانا تانية يحاول يجيب ورقة وقلم عشان يكتب بس بعدين بيرمي الورقة اللي حاول يكتب فيها في الزبالة..

**********************************************

بعد يومين كان أيهم نايم في الاوضة العصر وفجأة لقى محسن بيجري ليه وبكل عصبية بيصحيه ويقوله بزعيق:

-         الوااااااحد اتصدممممم فييييييييييييك!! مكنااااااش فاكرينك مش رااااااااجل كده!!

.........................................