الحلقــــة الحاديـــة عشـــر من جـــزيرة الــــلالا

الحلقــــــــة الحاديـــــــة عشر

-         مش عارف انا هستنى كده ساعة لو مجاش هنزل ادور عليه

ومجرد ما خلص الجملة من هنا جرس الباب رن ‘ فجري أيهم يفتح الباب لقى قدامه والده..

اول ما أيهم يشوف باباه يتصدم ويقول:

-         انت!

تيجي وراه سها عشان تشوف مين  جه وبعدين تلاقي باباها فتتصدم بس ترجع تقول بسرعة وبفرحة:

-         باباااا اتفضل يا حبيبي ايه الخطوة الجميلة دي

يبص ليها أيهم باحتقان شديد ويقول:

-         يتفضل فييين!!

تتصدم سها من رد أيهم وتقول:

-         ايه يا أيهم اللي بتقوله ده!!

وتاخد ايد باباها وتخليه يدخل وبعدين تزق أيهم براحة وتهمسله:

-         عيب يا أيهم ده مهما كان بابا وميصحش اللي بتعمله ده !

-         ميصحش!! وهو لسه فاكر ان له ابن؟!

-         مششش وووقته وخلينا نروح نشوفه جاي ليه

يمشي أيهم بخطوات تقيلة ويقعد قدام باباه ويفضل ساكت مستني يسمع ايه سبب الزيارة المفاجئة دي ..

وبعد لحظات يقول مدحت :

-         انا عارف انك مش طايقني وانك من زمان خلعت نفسك من توبي

-         وايه الجديد في اللي بتقوووله؟

سها بضيق:

-         بسسسس بقى يا أيهم !! الله

-         زمان كنت بقول انك عيل ولسه متفهمش الدنيا ولا توعى عليها ‘ بس دلوقتي انت كبرت ولازم

افهمك اللي انت مفهمتهوش زمان وكنت رافض تفهمه..

-         جاي بعد السنين دي كلها عايز تفهمني ايه!! ولييييه؟!

-         يمكن عشان العمر مبقاش فيه ايام كتيرة

-         بس! عشان العمر مبقاش فيه ايام كتيرة!! مش عشاني

-         يا بني افهمممم بقى

-         لا افهم انت!! افهم ان كنت محتاج منك حجات كتيرة مدتهنيش وضيعتها وفاااات وقتها خلاص

-         لا المرادي هتسمع ! سبتك كتيييير تعترض وتتمرد من وانت صغير! بس المرادي هتسمع..

-         اسممممممممع ايييييييه!! مبررررات وااااهية

-         تسمع ان انا ومامتك كنا متفقين انها بعد ما تموت هتجوز عشان نلاقي انا وانت حد يراعينا

-         انت وماما؟؟!

-         مامتك كانت تعبانة وكنا عارفين انها لو عاشت يوم اليوم اللي بعده هتكون مهددة بالخطر

-         ....

-         عشان كده اتفقت معايا اننا محتاجين حد يراعينا

-         اا ن انت بتقول ايه!!

-         مكنش وقتها ينفع افهم طفل كل الكلام ده!! قلت هتتعود! بس غلطت لما افتكرت كده

-         وتتفق معاك ليه كده؟!

-         عشان كانت بتحبني ‘ كانت بتحبني وكانت بتحبك ومكنتش عايزة حد فينا يتبهدل

-         وليييه مفهمتنيش؟!! انت لووو كنت بس فكرت مرة واحدة تاخدني في حضنك!! لو بس

كنت تكلمني !! تحسسني ان ليا لسه اب عايش ممتش مع امي!!!! ده اناااا كنت بموووت لما اشوف

صحابي في المدرسة مع اهاليهم وانا لوحدي مستنيك تيجي ليا!!

-         تفتكر فراق امك كان سهل عليا يا بني!! انا كنت زيك بموت من الضعف والوحدة ويمكن غصبن

عنك قسيت عليك ومفهمتكش لان مكنش عندي خُلق افهمك اللي حصل..

-         ولما السنين داوت جرحك محاووولتش معايا ليييه؟!

تتدخل سها في الكلام وتقول:

-         لا يا أيهم بابا حاول بس انت كنت خلاص بعدت وبتعند اوي معاه! ومش بس بابا حاول .. بابا

وتيتا واناااا!! حتى ماما كان نفسها تتدخل بينكم كتير بس هي حبت تفضل بعيد لانها كانت حاسة

انها السبب في سوء العلاقة دي..

-         ....

-         انا كنت ياما بشوف ماما بتتخانق مع بابا عشانك!

يبص أيهم بعيون حزينة لباباه ويقول:

-         مش عارف اذا جيت في الوقت الغلط ولا الصح

-         انا جيت يا بني بعد ما سمعت سها بتتكلم مع احمد في التلفون وبتقوله انها شايفاك مكسور الايام

دي على غير العادة.. جيت عشان اقلك صالح نفسك .. وصالحها على الدنيا .. لانك يوم ما هتصالحها هتحس بسلام داخلي جواك .. وقتها بس هتعرف تعيش يا بني ..

بص أيهم لباباه وعينه كان فيها كسرة وحزن ودموع بس كبريائه منعه انه يجري يحضن باباه

وفضل باصص في الارض وساكت .. وقتها وقف مدحت وقال:

-         هديلك وقت عشان تقعد مع نفسك وتفكر في كل حرف قلته ليك .. وهستناك .. بس متتأخرش

زيّ لأن العمر بيجري بينا والعند بياخدنا وفجأة بنصحى ونفوق نلاقي نفسنا تهنا اوووي بعيد

ونلاقي الطريق اللي كنا في اوله مع ناس بنحبهم بقينا في اخره من غيرهم! ومفيش حاجة

في الدنيا تستاهل ده يا بني.. صدقني مفيش..

تعيط سها على الكلام وعلى أيهم وعلى باباها وتجري تحضنه وتقوله:

-         ربنا يخليك يا بابا لينااا ولا يحرمنا منك .. هو بس أيهم محتاج وقت زي ما قلت عشان يصالح

نفسه ..

***************************************

بعد ربع ساعة يكون أيهم قاعد لوحده في الصالة سرحان ‘ فجأة يلاقي جرس الباب بيرن فيفتكر

محسن اللي رجع نساه .. فيطلع جري يفتح الباب يلاقيه واقف قدامه بقه كله دم وعينه منفوخة

وهدومه متقطعة .. يبصله بقلق ويدخله بسرعة ويقوله:

-         انتتتت كنت فيييين يا بني ادم انت!! انت ازاااي تنزل من غير ما تقولي؟!  وايه اللي مشلفطك

كده!

-         ايه المدينة دي!! انتم معندكمش حسن الضيافة ابدا!!

-         حسن الضيافة ؟! وهما ايه عرفهم انك ضيف اصلا!! وبعدين انت هببت ايييه؟؟ خلاهم يعملوا

معاك الدنيئة؟!

-         اعووووذ بالله !! انا شفت واقعتين كل واقعة اسوء من التانية

-         واقعتييين!! يارااااجل؟! وبعدين ؟

-         شفت جماعة ولاد بتضايق بنات دمي فار ومقدرتش اسكت عن الغلط ده

-         اوباااااا شفت تحرش! بس بس فهمت يبقى اتحرشوا بيك في الاخر

-         تخيل يا أيهم اقلهم كده ميصحش وازاي تضايقوا البنات ‘ الاقيهم كلموني باسلوب بشع واهانات شنيعة والمشكلة ان أهل المدينة اتلموا بس ولا كأن حد يعرف حاجة وكأنهم مش شايفين العراك

اللي بيني وبين الولاد دول..

-         ههههههههه دي اخلاقنا ايه رأيك مبسوووط؟!

-         معقووول!! انتم عندكم كده عادي؟

-         كويس يا صاحبي ملقتش واحد غزك بالمطوة واتقتلت فيها !! قلتلك يا محسن انت هنا مش في

العالم الخيالي بتاعكم! انت نزلت أرض الواقع ..

-         يعني ايه؟! واقع وخيال!! على فكرة انتم اللي خيال مش احنا ! انتم اللي شكلكم عايش في الوهم!

احنا الواااقع!!

-         يا بني الواقع هو اللي خلاهم يسكعوك بالقلم على وشك وتتبهدل كده .. بص يا ابن الحلال انت

هنا سكتك مش هتعمر..

-         ولما هي سكتي هنا مش هتعمّر يبقى ليه انت متمسك بدنيا عاملة كده! فيها الفاسد هو الماشي

-         عشان صحيت لقيتني هنا ‘ يمكن لو كنت اتولدت في الـلالا بتاعتكم دي كنت هبقى عامل زي

لارا مش عايز اسيبها ابدا ..

-         يعني انت مقدر موقفها؟

لسه هيرد عليه أيهم فيبص ليه ويقوله:

-         روح يا محسن خدلك شاوّر وغير هدومك دي وتعالى نتعشى سوا

-         مش قلتلي هتعرفني على المدينة

-         لسه مصمم تتعرف بعد اللي شفته؟

-         لسه عايز يقيني يزيد

-         يا جدع البني ادم مننا لازم يتسك على نفوخه عشان يعرف يقدر الحاجة اللي كانت في ايده

-         وساعات بيبقى عايز يتسك عشان يقينه يكون متأكد منه

يبص ليه أيهم بتتنيح ويقول:

-         لا والله مليش في فلسفة الـلالا دي

**********************************************

لارا بتكون قاعدة في الجزيرة مع الاطفال وبتخليهم يرسموا وهي كمان بترسم معاهم فتيجي

تالا ليها وتقولها:

-         لارا هو أيهم جاي امتى تاني؟

-         ليه؟

-         عشان برسمله جواب

-         لا حبيبتي اسمها بتكتبيله جواب

-         اه صح .. هو جاي امتى؟

لارا بابتسامة مليانة حزن وضعف:

-         هو خلاص راح على مدينته

-         لاااا هوو قالي انه جاي

-         قالك!

-         ايوووة قالي انا ومحمود

وبعدين تبص على محمود وتناديه بحماس:

-         محموووود تعالى بسرعة لو سمحت

يجي محمود باستغراب:

-         ايه؟

تبص لارا ليه بلهفة:

-         هو أيهم قال انه جاي هنا تاني؟

-         اه هو قالنا اخر مرة لما لعبنا معاه و وو كان بيرقص مع تالا وبعدين هي قالتله انا عايزة اطلب

منك طلب ....

فتقاطعه تالا بسرعة وبكسوف شديد:

-         لا متقلش يا محمود ده سر لو سمحت

فيبص محمود للارا وبعدين تالا ويقول:

-         سامحيني يا لارا مقدرش اقول خلاص

فتنزل لارا على ركبتها لتالا وتمسكها برقة :

-         ليه مش عايزة تقوليلي ايه الطلب؟

-         اصل انا مكسوفة

-         من ايه حبيبتي؟

-         يعني عشان انا بنت ولازم اتكسف وكده

وتنزل راسها بخجل شديد فتبتسم لارا على برائتهم وتقولها:

-         طيب ما انا بنت زيك؟!

-         اااه صح ‘ خلاص بصي انا هطلع اجري وخلي محمود عشان هو ولد وجريء يقلك

-         طيب

وتطلع تالا تجري بعيد بس تفضل نظراتها المكسوفة متابعة لارا ومحمود ‘ وبعدين محمود

يكمل:

-         قالتله عايزاك تحتفظ بنجمة البحر بتاعتي اللي غرقت بسببها

-         ورد قالها ايه؟

-         قالها انا ...... نسيت

تبص لارا ليه بإصرار:

-         لا افتكر يا حبيبي

-         اه اه قالها انا هحتفظ بيكي انتي كنجمة في خيالي

وبلهفة اكتر:

-         هاااا وبعدين ؟ قالها ايه تاني؟؟

-         قالها انه هيخليها معاها عشان هو هيرجع يشوفها تاني ووقتها هياخدها منها

-         طب مقلش امتى راجع؟

-         لا لما سألناه شكله كان زعلان ورد علينا وقال لما الوقت الصح يجي

تبلع لارا ريقها بصعوبة وبحزن شديد وتحاول تداري حزنها :

-         ماشي حبيبي روح كمل

يجري محمود وبعدين يرجع تاني لارا ويبصلها بكل سذاجة :

-         هو مقلكيش انتي يا لارا

-         ها؟

-         مقلكيش انتي؟

-         لا ! وهيقلي ليه

محمود بكل تلقائية:

-         عشان هو قلنا انه هيتجوزك في يوم من الايام

مع الجملة دي تعيط لارا وتجري على كوخها فيستغربوا كل الاطفال ويبصوا لمحمود

ويسألوه:

-         قلتلها ايه خلاها تعيط !

-         والله ما عملت حاجة

يقول طفل تاني:

-         احنا لازم نقول لبابا الكبير ان لارا عيانة وبقت تعيط كتير

فتبص تالا بدهشة ليه:

-         هو اللي بيعيط كتير يبقى عيان؟؟

-         ايوة لان قلبه اكيد موجوع يبقى عيان!

-         اصل انا بشوف ريم بتعيط كتير!! يااااه دي طلعت عيانة من زمان

-         طب تعالوا نقول لبابا الكبير الكلام ده

-         ايوة يلا

**********************************************

عادل وهو قاعد على البحر وبعد ما بيخلص لحظة الصفاء بيقدم محمود خطوة :

-         احم ممكن يا بابا نتكلم مع حضرتك

-         اتفضل يا حبيبي؟ ايه الزيارة الحلوة دي

يبصوا الاطفال لبعض ويبتسموا بإحراج وتقول تالا:

-         حضرتك اللي حلو

-         هههههه تفتكري انا حلو

تتكسف تالا وتقول:

-         ايوة

-         عاملين ايه؟

فيرد طفل اسمه يحي بابتسامة:

-         كويسين يا والدي الحمد الله

-         الحمد الله .. ايه ؟ فيه حاجة مضايقاكم؟

محمود بكل شجاعة:

-         ايوة

يرفع عادل حاجبه بانزعاج :

-         ايه ده! ما عاش ولا كان اللي يضايقكم؟ في ايه يا حبايبي؟

-         لارا عيانة يا بابا

تقول تالا:

-         وريم كمان

عادل باندهاش شديد:

-         عيانييين! ازاي؟؟

-         على طول بيعيطوا

فيقول يحي:

-         وانت  حكتلنا قبل كده ان القلوب بتتوجع ولما بتتوجع ممكن التعبير عن الوجع يكون بالعياط

يسكت عادل شوية ويبص ليهم بحنان ويقول:

-         اولا انا بشكركم جدااا على أخلاقكم النبيلة دي وثانيا انا هكفائكم عارفين ليه؟

كلهم بحماس:

-         ليييييه يا بابا؟

-         عشان اللي يشوف حد موجوع وينزعج عشانه ويبقى عايز يعمل اي حاجة عشان يخفف

وجعه يبقى ده قلبه نقي ويستاهل انه يتكافأ وعشان كده هخلي كل واحد فيكم يختار لنفسه

لقب يليق بقلبه ويعيش يوم كامل ممتع ..

يبصوا الاطفال لبعض ويفرحوا من الحماس ويجروا يحضنوا عادل :

-         هييييييييييييه شكراااااا اووووي يا بابا

-         وانا هشوف موضوع لارا وريم بس عايزكم تدعولهم كتير وخصوصا وانتم بتصلوا

-         حاضر يا بابا

***************************************

اليوم التاني يصحى محسن ويلاقي أيهم قاعد في الصالة سرحان فيروح ليه ويقوله:

-         انت صحيت بدري كده ليه

-         اااخ انا منمتش يا محسن

-         ليه؟ تعبان؟

-         قلبي موجوع

-         عشان بتكابر

-         مش عارف يا محسن ! مش عارف اعمل ايه!!

-         انت عارف بعد ما حكتلي اللي باباك عمله معاك ولما جه كلمك هنا هو قالك على الخلاصة

-         انا مش بس تعبان بسبب بابا

-         ولارا؟

-         همووت واشوفها ! احضنها ! احسها حقيقة جوايا! اخدها من ايدها واتجوزها غصب وان شاء الله اعيش معاها في المريخ!

-         طيب يبقى اتحلت اهي

-         الكلام سهل يا صاحبي بس التنفيذ صعب! انا كل ما بقنع نفسي بعندكم ‘ اقعد اتخيل نفسي

وانا مأنتخ طول الليل والنهار قدام البحر والسما والطيور والعب مع العيال واقرا!! انا اقعد

امسك كتاب واقرا!! لييييييييييييه الكون اتهد

يبص محسن بصدمة لأيهم ويقول:

-         انت مبتقراش!!

-         لاااا طبعاااا!! انا ما صدقت اتخرجت من الكلية تقلي اقرأ !! اتهبلت ولا اتهبلت

-         يعني عقلك زمانه بيحتضر ومفيش غذاء روح ليه

-         نعم يا خويا؟! عقلي ماله يا حبيبي

-         بيحتضر

-         ان شاء الله يفطس !! اقرأ انا لييييه !! فهمني!! انا واحد عندي بنكي وشغلي ‘ اخلص انزل

افرفش!!! اه لو اتجوزت لارا هيبقى الوضع غير بس مش توصل اني انتحررر!!

-         فين الانتحار ده

-         ما هو انا لما هقرأ هنتحر!! مش محتاجة فكاكة يعني!!

-         لالالا انت بجد صعب!!

-         شفت بقى يا عم ان موضوع اللالا ده صعب فعلا اوي عليا

-         بس الحب يعمل المستحيل

-         يعمله ياباباااا بس مش اني اقرااااا!! لا بجد بتهزروااا

-         فكر يا أيهم وسيب قلبك يصفى وانت  هتلاقيه لوحده بيشاورلك تعمل ايه

**********************************

في الشغل سها قاعدة بتتكلم في التلفون مع احمد خطيبها وسامح كان معدي جمب مكتبها فسمعها:

" ايوة !! عايزة اقلك انا قعدت اعمل سيرش كتير اوي يا احمد على حاجة اسمها جزيرة اللالا في

مصر ملقتش!! بجد معرفش ازاي أيهم قدر يوصلها ويقعد فيها!! لو تسمعه وهو بيتكلم عن الناس

هناك تقول دول اكيد في حدوتة من حواديت ألف ليلة وليلة !! مش حاجة طبيعية ابدا اكيد فيها سر"

يكلم سامح نفسه ويقول باستغراب شديد:

-         جزيرة الــلالا!! يا ترى ايه دي؟! وايه السر اللي بتتكلم عنه سها!! لااا الواحد مش لازم يقعد يتفرج انا لازم اجيب قرار الجزيرة دي ‘ جايز اقدر اعرف ايه شقلب أيهم وخلاه بقى بني آدم

تاني..

.............................