الحلقــــة الرابعــــة عشــــر من جزيرة الـــلالا

الحلقـــــــة الرابعـــة عشـــــر

-         هاخد يومين اجازة بعيد عن الجزيرة

-         هتسافري؟ فيييين؟ وامتى؟ هتسيبي الجززززيرة!! انتي يا لااااارا؟؟

-         انا مقلتش هرحل ! قلت هاخد اجازة

-         ليييييه

-         على الاقل لحد ما تمشي

-         للدرجة دي مش عايزة تقعدي معايا؟

لارا بعيون مليانة دموع:

-         انت كسرتني

-         لاااا انا بحبك والله ! والله بحبك .. اا اانا بس ك ككنت متلخبط ب ببس عمري ما كدبت عليكي

-         عن اذنك

-         استني هنا ‘ رايحة فين؟ انتي مش كنتي بعتي ليا مرسال وقلتيلي ....

تقاطعه لارا فورا وتقوله:

-         قلت فعل ماضي ...

-         لاراا ‘ انا

-         انت يا أيهم خيبت ظني

-         لا انا كنت محتاج وقت ! انا كنت فاكر هتجوزك وارجع ع القاهرة اعيش معاكي عاااادي زي

اي اتنين طبيعين !! بس انا لقيت مرة واحدة مطلوب عليا اني اعيش مع اللي بحبها في جزيرة

فيها قوانين والتزامات عشان هي ممنوعة انها تخرج برة الجزيرة!

-         على فكرة والدي الكبير طلب مني اني اروحلك بس انا رفضت

يقف أيهم مصدوم من اللي قالته لارا ويقول بعدها بثواني:

-         ليه رفضتي؟! للدرجة دي كرهتيني خلاص؟

-         لاااا!! رفضت عشان الانسان ده اداني كتير! اداني حياة بحالة !! مينفعش فجأة انكر كل ده ورايا

-         هو انتي ليه محسساني اني هاخدك واهاجر بيكي المريخ ! طيارة في ساعتين نبقى هنا!

-         انااااا هناااا!! لارااا بتبقى لارااا جوة جزيرة اللالا غير كده مش هتلاقيني غير كيان أجوف من جوة!

-         طيب وانا؟

-         انت هتقدر لو عايز تعيش هنا تعيش ‘ لاننا مش بنطلب منك تبقى انسان تاني احنا بنطلب منك

تنضف غبار الدنيا من فوق قلبك وتعيش معانا بقلبك الحقيقي النقي! اللي مكنتش هحبه لو كان

غير كده..

يبتسم ليها أيهم بحنان ويقول:

-         يعني بتحبيني لسه؟

-         عن اذنك يا أيهم ‘ محسن مستني هناك بعيد

يبص أيهم لمحسن وبعدين ليها ويقول بعصبية وضيق:

-         انتي زيه !!! مش راضيين تدوني فرصة ادافع بيها عن نفسي؟! اومال ايه بقى قيم ومش قيم وقلوب طيبة ونقية وبتنجاااان!! القلوووب الطيبة بتساااااامح ده اذا كنتم معتبرني غلطان!

تمشي لارا وتسيبه فيزعق بصوت عالي ويقول:

-         ررررردي علياااااا !!! فيييين الأخلاااااق اللي بتنادوا بيها هناااااا

فلفت عليه بكل هدوء وقالت:

-         فيه أولويات لازم تتعمل قبل ما نشوف انت غلطت ولا لا

فيبص أيهم لمحسن ويقول بصوت عالي:

-         وانت كماااان يا صاحبي!! يا خساااارة كنت فاكر انك عرفتني صح

فيرد محسن:

-         متستعجلش يا أيهم قريب هتفهم كل حاجة

*******************************************

تمشي لارا مع محسن ويرجع تاني أيهم بكل ضيق جوة ‘ فأول ما تشوفه سها تقوله:

-         ايه يا أيهم ده صوتك كان عالي اووي!! ميصحش عيب احنا عند الناس

-         مشيت برضو وسبتني

فيتدخل عادل:

-         سيبها اليومين دول يا بني

-         انا مش فاهم في ايه!!

-         هتفهم بعدين

-         يوووووه !! اناااا عايز افهم دلوووووقتي!! انتوااا هتجنووووني ليييييه

يبص أحمد ليه ويقوله بهدوء:

-         اهدى يا أيهم ميصحش كده

-         احمد انا هتجنن!! دي مشيت من غير ما اكمل كلامي معاها

-         معلش متعرفش في ايه

-         ما اناااا عايز اتنيييل اعررررف!! متسبنيش بناري كده

فيقول عادل:

-         وانا قلتلك يا بني الصبرررر

-         ااااه انتوا بتدوني درس بقى !؟

-         اصبر يا بني .. ع العموم قوموا ارتاحوا في الكوخ اللي كان أيهم قبل كده قاعد فيه وانتي يا بنتي

ليكي كوخ خاص بيكي وهتعرفك عليه سالي ..

-         شكر ليك يا عمو

يبص أيهم ليها بنرفزة ويقولها:

-         عمو ايه انتي راخرة ‘ احنا طالعين رحلة !

تهمس سها ليه بصوت واطي:

-         بس ششش يا أيهم ‘ الراجل شكله اكبر من بابا وانت بتناديه باسمه كده عادي ! لا عييب طبعا

-         بقلك ايه ما تعيشي هنا ‘ عشان شكلك هتتبسطي اوي

فتمسك سها ايد أحمد وتقوله برقة:

-         حبيبي تيجي نعيش هنا؟

-         والله بفكر يا روحي نشتريلنا كوخ هنا ونبقى نيجي في الاجازة

-         بجد الله !! اسألهم يا أيهم لو حبينا نشتري كوخ هنا بكام ؟ او لو ايجار برضو بكام؟!

-         انتي جاية مارينا ! دول ناس مبتتعاملش بفلوس وبعدين معرفش اصلا هيسمحوا بكده ولا لا

-         هفففف انت كده دايما مهبط احلامي ! ربنا يكون في عونها لارا عليك ياااا رخم

يبص ليها أيهم بيأس:

-         اهي سبتني ومشيت

تحس سها بالذنب فتقول:

-         متزعلش مني يا أيهم والله مقصدش..

-         ولا تقصدي .. عادي

-         روحوا انتوا ارتاحوا ‘ انا رايح اقعد على البحر شوية

فيقول أحمد:

-         تحب اجي معاك

-         لا معلش يا بو حميد ‘ محتاج اقعد لوحدي

-         ماشي يا صاحبي

***************************************

يروح أيهم يقعد على البحر وتحديدا تحت شجرة الحياة ويفضل يفكر في لارا وبعد خمس دقايق

من السرحان يبص جمبه يلاقي تالا ومحمود قاعدين جمبه بهدوء وفي حزن وحاطين ايدهم

على خدودهم .. فيبص ليهم باستغراب ويقول:

-         ايه ده انتوا هنا من امتى؟

تبص تالا ليه بحزن شديد:

-         من زمااااان

-         امال ليه محستش بيكم؟!

فيجاوب محمود بتلقائية:

-         عشان انت زعلان

-         طيب وانتم مالكم قاعدين زي اللي شايلة طاجن ستها كده ليه

تبص تالا باندهاش لمحمود وبعدين الاتنين يبصوا باندهاش اكتر لأيهم ويفتحوا بقهم لانهم مش

فاهمين حاجة فيرجع أيهم يقول:

-         اه صح انتم أطفال ‘ اممم مالكم يعني قاعدين زعلانين ليه

تالا بتأثر واضح:

-         عشان انت يا أيهم زعلان واحنا مش عارفين نعمل ايه

بعدين يكمل عليها محمود:

-         ولارا كمان زعلانة وسافرت

فيبص ليهم أيهم بكل فضول:

-         حد فيكم يعرف سافرت فين؟

تالا ومحمود يبصوا لبعض بحذر فيرجع يقولهم بشك:

-         متخفوش مش هقول لحد ؟

محمود بسرعة شديدة:

-         مينفعش خااالص يا أيهم

-         مش احنا صحاب؟

-         بس ده سرها هي

فتقوم تالا بسرعة وتحضنه وتقوله:

-         هوريك حاجة لارا كانت قالتلي ابقى اورهالك لما تيجي

فلمعت عينه بحنين شديد ويقول بحزن:

-         وريني حبيبتي

تجري تالا بسرعة بكل خفة وتجيب كراسة الرسم وتوريه قلب كبير مقسوم نصين في النص الاول مكتب أيهم والنص التاني لارا ومن تحت في كل نص مكتوب اسم تالا عند أيهم ومحمود عند لارا .. فيقول أيهم :

-         الله حلووو اوووي

-         عارف يا ي يا أيهم لارا قالت ايه اول ما شافته؟

-         ايييه؟

-         قالت انها لما هتشوفك هتحول رسمتي لقلب كبييير وهتحطه على الكوخ بتاعك

فيهمس أيهم بصوت عالي شوية:

-         بس أيهم كان وحش معاها وخذلها

فيطبطب عليه محمود وتالا ويقوله:

-         متزعلش يا أيهم

*******************************************

في الكوخ عند سها تكون قاعدة ومعاها سالي ..

سها بابتسامة رقيقة:

-         بس لارا باين عليها كيوت اووي ورقيقة جدا ماشااء الله

-         ايوة احنا بنسميها هنا الفراشة

-         الله ! هي فعلا زي الفراشة .. بس اشمعنا بتسموها كده

-         عشان لارا زي ما قلتي رقيقة بجد ومبهجة ‘ هي دايما اللي بتدي لحواليها طاقة أمل رهيبة كده

-         هي فين أهلها ‘ طنط وعمو يعني عشان اسلم عليهم

-         اهلها متوفيين

-         يااه الله يرحمهم

سالي بتلعثم:

-         اا ن ا انن شاء الله

فتبص ليها سها باستغراب وتقول:

-         فيه حاجة؟

-         لالالا

-         قوليلي بقى ‘ احنا كنا عايزين نشتري كوخ او نأجر يعني عشان انا واحمد اما نتجوز نيجي ليكم

هنا اجازة فياترى عندكم الشاليهات بكام ؟ قصدي الاكواخ يعني؟؟

-         لا احنا معندناش الكلام ده !

-         ليه؟ هو مفيش حد بيزور الجزيرة هنا؟ معليهاش رجل يعني؟

-         رجل!!

-         قصدي يعني خطوة ‘ الناس مبتجيش خالص؟؟

-         لا ‘ لاننا ببساطة مش عايزين ده

-         ليه؟

-         عشان احنا هنا عايشين بنظامنا ولو الناس بدأت تهل علينا السيطرة هتخرج مننا وهنبقى مش عارفين نحكم على الجزيرة دي !

-         ايوة طيب وهتعملوا ايه دلوقتي بعد ما هي اتعرفت؟!

-         ما عشان كده لارا مضايقة من أيهم جدااا ‘ لان سر زي ده لما يتعرف الناس فعلا مش هتسيبنا في حالنا ..

سها بضيق:

-         صدقيني أيهم ملهوش دعوووة .. انا اللي غبية اتكلمت في الشغل وحكيت كل حاجة هو حكهالي

عنكم لاحمد واتاري الحيوووووان اللي اسمه ساااامح بيسمع الكلااااام وراح اتكلم ..

-         للأسف الناس في المدينة عندكم مفيش ضمير ابدا

-         مش كلنا والله يا سالي

-         فاهمة بس المعظم

*************************************************

في البنك كان سامح قاعد كل شوية يرن موبايله ‘ اتصال ورا اتصال من جريدة لقناة والكل كان

بيسأله عن الجزيرة اللي تم اكتشاف سرها .. وسامح كان بيرد يقول:

-         انا معرفش تفاصيل اوي عنها ‘ انا قلت كل اللي اعرفه ‘ انها تبع محافظة البحر الأحمر وان

عليها ناس بيدعوا المثالية وعايشين بأخلاق كده ومنعزلين مع نفسهم .. ايه؟ لالالا لسه مشفتهاش.. والله انا معرفش فين مكانها بالظبط! بس المفروض بقى تتصلوا بمحافظ البحر الأحمر وتسألوه عن تقصيره في انه ازاي ميعرفش حاجة زي دي! ولو يعرف يبقى كان ساكت ليه .. وتبدؤا تقولوا للناس بقى عن مكانها عشان الكل يعرفها ويروح!! هي على أرض مصرية واحنا من حقنا كمصريين نروح هناك وقت ما نحب..

************************************************

اليوم التاني بتصحى سها وبتفطر مع أحمد على طرابيزة على البحر وبتقوله :

-         الجو هنااا تحفة يا احمد !! انا بجد مش عارفة أيهم رافض يعيش هنا ليه!

-         بصي يا سها ‘أيهم اتعود يعيش حياته بطريقة معينة! فجأة الطريقة دي هتختلف جذريا !! فطبيعي

ردة فعله! لكن انا شايف يا جماعة انه لو خد وقته هيعمل اللي انتم كلكم بتضغطوا عليه عشان يعمله منه لنفسه ! باينه اصلها جنانه على لارا

-         بصراحة البنت يا أحمد زي البسكويتة! عمري ما كنت اتخيلها كده

-         ربنا يهدي سره يا حبيبتي

-         ياااارب

-         مستغرب معندهمش هنا تلفزيون او راديو

-         تصدق انا كمان مبقتش عارفة اعمل ايه بليل!! بس قعدت بقى ارغي مع البنات ‘ القعدة

معاهم حلوة اووي ..

-         انا بقول للشباب معندكمش كوتشينة أيهم فضل ربع ساعة يضحك!! لدرجة قلت الولد اتجنن!

-         هههههههههههه اكيد عارف ان الحجات دي مبتجيش هنا عندهم

فجأة يجري محمود ومعاه يحي لسها ويقول يحي:

-         هو فين أيهم

-         في الكوخ

فيقول احمد بسرعة:

-         لا انا صحيت ملقتهوش نايم

سها بتعجب:

-         يمكن على البحر؟

يرد محمود بسرعة:

-لالا دورنا عليه في كل مكان مش لاقيينه

تبص سها بصدمة لأحمد وتقول:

-         امال راح فين يا أحمد؟!

وتجري تدور عليه هي وأحمد وكل اللي في الجزيرة وبعد ربع ساعة يقول واحد من الشباب:

-         فيه مركبة يا والدي متاخده

تبص سها بذعر لأحمد:

-         هيكون راح فييييين؟!!

-         اهدي بس يا حبيبتي اهدددي ‘ هنستنى شوية لو محصلش حاجة نرجع القاهرة

-         ربنااااا يستررررر يااااااارب

..........................