الحلقــــــــــــة الرابعـــــــــــة من خبيـــــــــــــني

الحلقــــــــــة الرابعــــــــة

بعد ما دارين طفت الشمع خرجت هي وشروق برة في الجنينة عشان يقعدوا مع بعض براحتهم

بعيد عن الدوشة والهيصة..

بعدها بلحظات بيروح  وراهم هشام واول ما يوصل يبص لشروق ويقولها:

-         خوخة سبيني لحظة مع دودو شوية

تبصله دارين باستغراب وتقول:

-         ايه الرخامة دي يا اتش! ما تسيبنا قاعدين مع بعض

يبرق هشام ويقول بجدية بالغة:

-         قلت عايز ابقى لوحدنا شوية! مش هكررها كتير

تتوتر شروق وتقوم .. اما دارين فتحس بشعور غريب ناحية هشام! تحس وكأنها بتشوف نسخة

تانية شبه باباها اوي وساعتها يجي في بالها كلام باباها ليها

"حلاوة الحب في عذابه " "الخوف من الحبيب له شعور لذيذ مش هتعرفيه الا لما تجربيه"

يتأكد هشام ان بقى لوحده مع دارين ويخرج علبة حمرا من جيبه ويطلع منها سلسلة فيها قلب

داخل جواه سهم كبير ويهمس ليها وهو بيلبسها:

-         كل سنة وانتي حلوة وليا !

تبص ليه دارين بفزع وتقوله:

-         ايه؟!

-         ايه؟؟

-         ا اا انت قلت ايه؟؟

يبص ليها جوة عينها مباشرة ويقولها بشكل ساحر:

-         ليا ...

ترتبك دارين وتتوتر جدا وتبقى ملخومة مش عارفة تقوم ولا تقعد ‘ فتتنفض من مكانها

وتيجي تمشي ‘ يمسكها هشام بقوة من ايدها ويقعدها بالعافية ويقول:

-         لسه مخلصتش كلامي!

تكشر جامد وتقول:

-         اا انت ازاي تقعدني كده! وووسع

يشدها تاني ويقعدها غصب ويقول وهو مبرق ليها:

-         قلتلك اقعدددي لسسسه مخلصتش كلامي!!

تزعق ليه اكتر:

-         وانا قلتلك ووووسع!!

-         اقعدددي واسمعي الكلام

-         مش هقعد!!

وثواني وتلاقي قلم منه نزل على وشها ويقول بتبريقة خوفتها جدا:

-         اول درس لازم تفهميه لما اقلك كلمة متخلنيش اكررها كتييير!

شعور مختلف ومتناقض تماما كان جواها ‘ شعور بالغضب وفي نفس الوقت شعور بالاستمتاع

بالاهانة وشعور بالحيرة من نفسها!!

في نفس اللحظة ياسين كان واقف بعيد وبيتفرج واول ما شاف دارين بتتضرب جري عليهم

وضرب هشام جامد وقاله بعصبية:

-         انت ازاااي يا حيوان تمد ايدك عليها ! انت فااااكر نفسك مين؟!

يقوم هشام بكل عصبية ويجري يمسك في خناق ياسين فتقوم دارين مزعقة لياسين وقايلة:

-         انت مااااالك اصلاااا!! بتتحشر ما بينااا ليه!!

ينصدم ياسين من موقف دارين ويقلها باشمئزاز:

-         تصدقي انتي صح! واحدة تافهة زيك المفروض ولا اعبرها ولا اسأل فيها! واخليكي كلبة

ينهش فيكي في سكته..

ويزق هشام من طريقه ويمشي ‘ فتجري وراه ريم اللي خرجت من جوة لما شافته بيتخانق

مع هشام:

-         ياااسين استنى .. ياااسين

يلتفت ليها بعصبية :

-         عاااايزة ايه!

بدلع :

-         انا اسفة على اللي حصل

-         وانتي مالك بتتأسفي ليه! انتي مغلطتيش في حاجة

-         هي دارين كده طول عمرها دلوعة وغبية وطايشة .. متوقع منها ايه!

-         تتفلق! انا بس اضايقت اما شفت الحيوان التاني بيمد ايده عليها فقلت ادافع عنها عشان هي

بنت خالتي لكن اتاريها كلبة متستاهلش..

بدلع اكتر:

-         متزعلش .. سيبك انت .. تعالى نتمشى شوية

-         لا معلش انا مضايق عايز اروّح

-         لااه مش هسيبك تروّح وانت مضايق ‘ تعالى بس نتمشى

وشدته من ايده وفضلت تتمشى جمبه وتتكلم عن اي حاجة عشان تحاول تكسب وده..

*************************************

تاني يوم في المدرسة دارين كانت قاعدة سرحانة وجمبها شروق .. كل شوية شروق تلتفت

ليها وتلاقي دارين في عالم تاني ومش مركزة مع الشرح ولا مع اي كلمة بتتقال في الدروس..

ولما جرس الحصة ضرب شروق ضربت دارين على كتفها وقالت:

-         اييييييه انتي! رووووحتي فين!!

تبص دارين ليها بكل تعجب وتقول وهي في عالم تاني:

-         عمرك حسيتي باللذة في الإهانة؟

-         اييييه!! انتي بتخرفي تقولي ايه

-         امبارح لما زعقلي وضربني من الصدمة في الاول كنت مضايقة بس مش عارفة ليه حسيت

بعد كده بمتعة غررريبة..

-         هو مين ده؟ انتي عبيطة يا ديرو؟ ولا ايه؟؟

-         لا مش عبيطة بس شكلي كده .....

-         لااااا اوووووعي تقوووليها!!

هزت دارين رأسها تأكيد على احساس شروق ‘ قامت شروق قالت بعصبية:

-         ملقتيييش غير هشاااام يا دااارين!!

-         ماله اتش!! نفسي اعرف بتكرهيه اووي كده ليه؟!

-         بكرهه عشان اناني ومغرور ومعندهوش قلب يحب وعينه زايغة وكل يوم مع واحدة اصلا!! وبعدين احنا مش قلنا اننا صغيرين على الكلام ده اصلا؟! ايه اللي غير رأيك؟؟

-         متغيرش ومين قالك اصلا اني هصاحبه بس كفاية اني عرفت انه بيحبني...

-         يا سلاااام وهو اللي يحب يضرب حبيبه في عيد ميلاده!!

-         اه عادي طب ما بابي بيحب مامي و ....

-         و ايه!! انتي هتقارني حب عمو لطنط بهشام ده! وبعدين انا عمري ما ارتحت لمامته بصراحة

وانتي نفسك بتكرهيها؟؟

-         شيرو لسه بدري على كل الكلام ده ولا اقلك يا خوخة زي ما اتش بيناديكي

-          اوعي تقولي خوخة دي وياريت تقولي لنفسك الكلام ده ومتخليش عم هشام ده ياخدك لبعيد

ويغرقك..

-         يا بنتي انتي مالك بتتكلمي زي الستات العواجيز كده ليه

-         عشان شايفة حجات انتي مش شايفاها يا ديرو وبحبك وخايفة على صحبتي من الوجع والهم

بدري..

-         على فكرة عمر الحب ما كان هم وجع!

-         لما يبقى حب حقيقي مش وهم ..

-         انا مش عارفة انتي جايبة كلام العواجيزي ده منين

-         وبعدين انتي ايه اللي عملتيه في ياسين ده امبارح!!

-         افففف متجبليش سيرة الولد ده انا بكرهه وشايف نفسه ومغرور ومش عارفة على ايه!

-         هو مين ده اللي مغرور حرام عليكي ده راجل اووي ومستحملش يشوف اهانتك وجري

ساعدك وانتي زي الغبية وقفتي في صف هشام..

-         يووووه يا شيرو انتي مملة النهاردة كده ليه

-         الله يسامحك

-         خلاص متزعليش مني ‘ والله مبحبش ازعلك مني .. انتي بالذات بحبك اووي عشان انتي

زي اختي ..

-         وانا من حبي ليكي خايفة والله عليكي ..

-         عارفة عارفة .. متخافيش بقى ..

*****************************************************

كانت أمل قاعدة مع يوسف في الجنينة الاتنين بيشربوا قهوة مع بعض ويوسف بيشوف ورق

شركته الخاصة وبالايد التانية ماسك ايد أمل ومش راضي يسبها .. أمل بتبص ليه بحب وفي

نفس الوقت بحيرة وتوتر وارتباك ..

-         حبيبي ممكن اتكلم معاك في موضوع

-         حاضر يا روحي ثواني بس اراجع اخر حسابات وافضالك

-         طيب انا هقوم اجهز أكل لدراين عشان اما ترجع

-         لا حبيبتي

-         ليه؟

-         عايز ايدك تفضل في ايدي كده

-         طب ما انت بتشتغل يا يوسف دلوقتي! ومش مركز معايا وبعدين ايدي متشعلقة في ايدك كده

بقالها نص ساعة وانا عايزة اعمل الاكل بسرعة واجيلك ..

يضغط يوسف بقوة على ايدها ويكمل شغله من غير اي مبالاة بأمل .. فتفهم أمل انها لازم

تسكت وتستحمل الوضع ده لحد ما يخلص.. وبعد دقايق يبص يوسف بابتسامة باردة لأمل

ويقول:

-         ها حبيبتي ايه بقى المووضوع؟

-         قبل ما نتكلم يا يوسف في الموضوع ممكن اسألك سؤال؟

-         طبعا قولي

-         انت ليه كده؟ ليه مسبتنيش اقوم اعمل اللي انا عايزاه؟ ليه دايما عايزني اعمل اللي انت عايزه

وبس؟؟ مش مهم رغبتي مش مهم مشاعري مش مهم الالم اللي بحس بيه المهم انت تكون

مبسوط وبس؟؟

يقرب يوسف منها ويسمك بايده شعرها فتبدأ امل تخاف وتتوتر ويقول:

-         انا بحبك وبحبك اوووي كمان وانتي عارفة ده! ليه بتقولي كده؟؟

-         عشان معاملتك ليا يا يوسف! ساعة بفهمك وعشرة لا! انا .....

-         قوولي قوولي متخافيش!

-         انا حاولت افسر اللي انت فيه بس صدقني عجزت وفشلت ..

يروح يوسف عند أمل ويركع على رجله ويمسك ايدها برقة ويبوسها وبعدين يبص ليها بعمق

ويقول بهدوء:

-         انا بحبك وعشان كده وقلتلك قبل كده ببقى عايز اننا نكون زي بعض في كل حاجة .. ولما بشد

شوية عليكي فده عشان انا وانتي نحس بطعم الحب اللذيذ..

تبص ليه أمل بحيرة اكتر وغموض وتقول:

-         وليه منحبش بعض بطريقة تانية

هنا يضغط يوسف جامد على ايد أمل ويقول بابتسامة مميتة وباردة:

-         عشان انا الراجل وانا اللي اختار الطريقة ‘ بس انتي لو سمعتي الكلام هتلاقي كل حاجة

ماشية حلوو.. انتي بس اللي عنيدة شوووية وبتحبي تغلبيني معاكي .. بس مش مشكلة

مشاكستك دي بتدي ليا دافع اعيش معاكي لعبة حلوة اوووي..

تسكت أمل لانها عارفة ان مهما اتكلمت يوسف مش هيرجع عن طريقة تفكيره فتكتفي

بابتسامة بضعف.. يبص ليها يوسف ويكمل:

-         المهم حبيبتي قوليلي ايه الموضوع اللي كنتي عايزاني فيه؟

-         م مم مفيش ك كا كان فيه أرض في الجولف عجبتني لـ لما روحنا نشوف الفيلل مع ماهينار

هناك الاسبوع اللي فات وبفكر لو ناخدها ونعمل مشروع لدارين عشان لما تكبر تلاقي حاجة

ليها..

-         ما فلوسي كلها ليها بس عشان اثبتلك اني بحبك حاضر يا روحي ‘ الارض دي ناخدها وفورا

وتكتب باسم دارين..

-         ربنا يخليك لينا

-         حاف كده؟

-         ....

يقف يوسف ويشدها وراه ويطلع بيها على اوضته ..

********************************************************

في بيت أماني ياسين كان قاعد بيذاكر وتدخل عليه أماني وتقول:

-         ايه اللي خلاك تمشي امبارح وانت مضايق يا ياسين

-         مفيش حاجة يا ست الكل

-         لا يا حبيبي انا عارفاك ‘ اكيد فيه حاجة حصلت هناك ضايقتك

-         أمي خلاص اللي حصل حصل وانا مش هعتب هناك تاني

-         طيب بس قلي عشان اهدى يا ياسين

-         مفيش بنت اختك تصرفاتها عيالي اووي وبجدد بقت اووووفر وانا ان كنت مستحملها

فعشان هي عيلة مفعوصة لسه مراهقة..

-         معلش يا ياسين بس هي صغيرة لسه واكيد لو كانت ضايقتك متقصدش

-         كبري يا ماما اللي حصل حصل

-         بس دي مهما كان بنت خالتك الوحيدة يعني مهما عملت يا ياسين لازم تكون باقي عليها

-         ياريت هي بس تكون باقية علينا مش ماشية في سكة التانيين

-         دارين دي طيبة ومفيش في طيبتها بس ممكن تكون طايشة ‘ نستحملها شوية

-         ماشي يا حبيبتي

-         هسيبك تزاكر بقى .. ربنا ينجحك يا ياسين ويدخلك الطب زي ما نفسك يا حبيبي

****************************************

دارين قاعدة في اوضتها بتزاكر فيدخل ليها يوسف فجأة ويقول:

-         حبيبة بابي بتعمل ايه؟

-         بزاكر يا بابي

-         طب البسي يا روحي عشان فيه ضيوف جايين لينا

-         بس بابي انا عندي مزاكرة و .....

قطع كلامها يوسف بتبريقة من عينه خلتها تترعب وقال:

-         بابي مبيحبش يعيد الكلام يا دودو كتير .. قوومي البسي

-         ح ح ححاضر يا بابي

يسيبها يوسف وبعدين يدخل اوضته فيلاقي أمل واقفة قدام الدولاب محتارة تلبس ايه :

-         مينفعش حبيبتي تختار لانها اميرة ‘ انا اللي لازم اختار ليها بنفسي

-         بس ....

-         لالالا مفيش بس ششششش ..

يروح عند الدولاب ويقف قدامه ‘ يبص في فساتينها الكتيرة وبعدين يخرج فستان لونه اخضر

غامق وطويل وبكم واحد من ناحية واحدة ويقلها:

-         ده هيبقى تحفة

-         بس انا مبحبش ده يا يوسف !

-         أمــــــــــــــــــــــــل!! كااااام مررررة اقلك اني بكرررره ايه

تتفزع امل وترتجف من الخوف وتقول:

-         حاضر حح حاضر هلبسه

***********************************************

بعد نص ساعة يكون يوسف وأمل ودارين قاعدين في الصالون مع الضيوف واللي عبارة عن

رئيس شركة بيتعامل معاها يوسف ومراته ..

طول القعدة يوسف يكون حاطط رجل على رجل وقاعد بغرور واستعلاء كبير ويتكلم بكل

غرور ومرؤوسية:

-         انا الشركة عندي ليها نظامها ‘ والعمال عندي بيبقوا عارفين شغلهم بالظبط ولو حد فكر

بس يخرج عن القانون بيبقى عارف انه عمل كارثة..

-         والله يا يوسف بيه ده اللي شجعني اني اتعامل مع شركة حضرتك لاني سمعت انك منظم

جدااا في شغلك

-         هاهاها مش شغلي بس وبيتي كمان! أمل معودها دايما على نظام هي ودارين ولازم يمشوا عليه

زي ما انا راسم ليهم بالظبط..

-         والله يا بختهم يا يوسف بيه..

يبص يوسف على أمل ويبتسم ليها فترد الابتسامة بابتسامة مليانة خوف وقلق..

********************************************

في بيت ماهينار تدخل على هشام اوضته فتلاقيه بيتكلم في التلفون مع بنت واول ما يشوفها

قعدت فيقفل التلفون ويقول:

-         ايه انتي قعدتي ليه!! مش شايفاني بتكلم في التلفون؟!

-         انا مش قلتلك يا اتش نركززز على دارين!

-         منا مركز ومسيطر كماان بس ده ميمنعش اني اشم نفسي مع حد تاني

-         بس هي لو عرفت ده مش هترضى تبصلك

-         هه دارين اللي بتتكلمي عنها دي انا بلفتها بصباعي الصغير وبعدين انا عندي فكرة وخطة

جهنمية

ماهينار بفضول شديد:

-         ايه هي؟!

*********************************************