الحلقـــــــة الأولـــــى
في بيت بيطل على البحر ‘ حلا كانت قاعدة بتفطر
مع إياد على الصفرة زي عادتهم .. الصمت كان
سيد الموقف بينهم ‘ صوت السكاكين بس هي اللي
طالعة والشوك وخبطها في الاطباق اللي قدامهم..
الصفرة كان عليها كذا صنف للفطار.. مربى وبيض
مسلوق وجبنة بيضة وزيتون اسود ..
حلا بتبص بكل استغراب لإياد اللي بياكل في صمت..
إياد فجأة يقول:
حلا ناوليني زتون لو سمحتي
حلا:مكلتش يعني مربى النهاردة؟!
إياد :ممم مليش نفس
حلا باندهاش:غريبة دي المربى اللي بتحبها مخصوص
وبتخليني اعملهالك؟!
إياد:عادي بقى حبيبتي الواحد زهق منها
بتفضل حلا تبص بكل استغراب وحيرة على إياد اللي
بقت شايفاه في نظرها متغير..
إياد كان من فترة لفترة يبص لحلا بطرف عينه وكان
متوتر وقلقان وشايف بردو ان حلا متغيرة..
*********************
بعد ما خلصوا الفطار حلا شالت الفطار وغسلت
المواعين ونظمت كل حاجة في المطبخ بدقة ‘
بصت شوية كده للحاجات اللي رتبتها بنظام ودقة
وقامت منعكشة كل حاجة تاني ‘ ابتسمت وخرجت
من المطبخ..
إياد نزل من اوضته من فوق الطابق التاني وكان
لابس بدلة وماسك في ايده شنطة صغيرة ..
إياد:انا هتأخر برة شوية ‘ عندي كام مشروع كده
هدرسهم شوية في الشركة
حلا بابتسامة:اوك
يدخل إياد المطبخ عشان يشرب كوباية مية يلاقي كل
حاجة في المطبخ متنعكشة يخرج باستغراب
لحلا ويقولها:حلا؟!
حلا بهدوء:ايوة؟
إياد باستغراب:من امتى بتسيبي المطبخ في الفوضى
دي؟!
حلا بابتسامة:زهقت من الترتيب والتنظيم اللي بدأ
يخنقني ‘ حبيت انعكش المطبخ
إياد بقلق:بس ... بس دي مش طبيعتك؟
حلا بتوتر اكتر:عادي يعني يا إياد كرهت النظام
اللي بيتحسب بالشعرة في البيت ده!
إياد بيبتسم بقلق ويقرب ليها ويبوسها في خدها
ويقولها:
باي حبيبتي
**************************
يخرج إياد ويروح يركب عربيته ويفضل يبص على
الفيلا لمدة ثواني وبعدين يرجع يبص للطريق
الفاضي اللي قدامه ويقول لنفسه:
حلا بقالها فترة متغيرة؟! من ساعة عيد ميلادها
الاخير ؟! معقول يكون اللي في بالي حصل؟!
لالالالالا دي تبقى مجنونة لو اللي في بالي ده
فعلا حصل!!
*************************
حلا بعد ما يخرج إياد بتبص من شباك كبير بيطل
على البحر اللي قدامهم وبعدين تبص على صورة
محطوطة على طرابيزة جمبها هي موجودة فيها وجمبها
واحدة تؤام شبهها بالظبط لدرجة ان اللي
يبص ليهم ميعرفش يفرق ما بينهم.. ترجع تبص على
البحر تاني وتفتكر اخر عيد ميلاد ليها
في مطعم شيك اوي كان محجوز بس للعيد ميلاد
وبلالين متعلقة في كل حتة وزينة في كل حتة
ولوحة كبير مكتوب عليه : كل سنة وانتم طيبين يا
حلا وهلا ..
صحابهم كل شوية يدخلوا ويكون معاهم هدايا ..
اغاني ورقص مالية المكان وبنتين نفس الشبه ونفس
الطول بس واحدة شعرها طويل لونه بني
والتاني شعرها قصير اوي من جنب والجنب التاني
اطول شوية ولونه بني نحاسي ..
هلا بكل حيوية بترقص مع الاغاني اللي الدي جي
مشغلها وبترقص ‘ اما حلا فقاعدة بتتفرج
وتصقف..
هلا بكل حيوية:مش ناوية ترقصي شوية يا حلا؟ ده
عيد ميلادناااا ..
حلا بابتسامة هادية:انا مبسووطة كده
إياد بيوشوش حلا: اختك مجنونة وطاقة اوووي !
سبحان الله اللي يشوفكم ميعرفش يفرقكم بس مع
ذلك الشخصيتين مختلفتين تماما!
حلا بابتسامة:ويا ترى بتحب شخصيتي؟
إياد بيمسك ايد حلا ويحضنها ويقول:بحبها جداااا
بتيجي هلا وتقطع اللحظة عليهم وتمسك ايد حلا وتقول:بعد
اذنك يا إياد اصل النهاردة عيد ميلاااادنا
مش عيد للحب ابدااا ..
هلا بتاخد حلا في نص القاعة وتحاول تخليها ترقص
وحلا بتضحك بكسوف وتقولها:
انتي بتحاولي تعملي ايه
هلا:اررررقصي ‘ الدنيا بتتعاش مررررة وفي الرقص
بتعيشي الدنيا دي ألف مررررة!
حلا:هههههههه
إياد بيقف جمبهم وبيكون مضايق من تصرف هلا
فيقولها:
انتي عارفة يا هلا ان حلا بتتكسف اوووي
هلا بتبص لحلا وتقولها:منفسكيش تغيري من حياتك
دي بقى!؟
حلا:بالعكس نفسي اوووي
إياد باندهاش:تغيريها ازاي يعني!
حلا:ياه لو فينا نبدّل الادوار
هلا:هههههههههههه لا انا لو عشت حياتك دي ممكن اتخنق
هلا بتمشي من جمبهم وتروح ترقص مع صحابها فيبص
إياد باستغراب لحلا ويقولها:
للدرجادي حياتك معايا مملة؟!
حلا:لا حبيبي انا متكلمتش عنك انت بالعكس ‘ انا
اقصد اغير من نفسي انا وشخصيتي
إياد بيلمس خد حلا برقة ويقولها:بس انا بحبك كده
اوووي ‘ انا هدوئك ورقتك ونظامك هما
اللي شدووني اني احبك واتجوزك مش زي اختك
الفوضوية دي!
حلا بتبص على هلا اللي بتتنطط من مكان لمكان في
العيد ميلاد وبترقص وبتضحك وترجع تبص
لإياد وتقول:
احيانا جوة الفوضى بنخلق لينا حياة جديدة بدل
الروتين اللي بيخنقنا..
فجأة النور بيتطفي في المكان وبيخرج من مطبخ
المطعم العاملين ماسكين كيكة كبيرة من كذا دور
ومليانة شموع بتقيد شرارة وبيغنوا:
هابي بيرث داي تو يوووو هابي بيرث داي تو يوووو
هابي بيرث داي حلا وهلا هاااابي بيرث داي
تو يوووو ...
هلا بتجري على حلا وتاخدها من ايد إياد وتروح
بيها ناحية الكيكة والاتنين يصقفوا وسط الصحاب
اللي اتلموا حواليهم..
بيطفوا الشمع والكل بيصقف وإياد يكون واقف بعيد
مضايق جدا من تصرفات هلا..
بيخلص العيد ميلاد وحلا وهلا واقفين عند باب
المطعم بيودعوا كل صحابهم اللي جم العيد ميلاد
هلا:انا هروح الحمام ثانية اظبط شعري وارجعلك
حلا:يا بنتي وهو ده وقته! الناس بتمشي دلوقتي
وعايزين يسلموا علينا
هلا:يابنتي كان زماني روحت ورجعت بدل ما انتي
بتضيعي وقتي كده
************************
بتفوق حلا من الذكريات وتبص تاني للصورة وتمسح
دمعة نزلت منها..
************************
إياد وصل الشركة ودخل مكتبه ‘ طلع المشاريع
قدامه وحاول يشتغل بس مكنش قادر ‘ افكار
كتيرة مسيطرة عليه.. رجع بذاكرته لورا ليوم عيد
ميلاد حلا وهلا الاخير..
بتروح هلا ناحية الحمام وبيوقفها إياد ويقول:
ياريت يا هلا تاخدي بالك من تصرفاتك شوية!
هلا بتعجب:زي؟
إياد:انتي اتصرفتي كذا موقف النهاردة وكأن قصدك
تضايقيني؟!
هلا:انت شارب حاجه؟ وهقصد اضايقك ليه يعني؟! انا
كنت عايزة اختي تتبسط بالعيد ميلاد بدل ما
انت مستحوذ عليها طول القعدة كده ومش مخليها حتى
تتهنى في يوم زي ده براحتها!
إياد:هه مستحوذ عليها!!
هلا:اه ولا انت مش واخد بالك؟
إياد:ما تقولي بقى انك غيرانة ومضايقة ‘ دي
مراتي!!
هلا:مييين اناااا!!! وهغير ليه؟
إياد:لسه مش قادرة تنسي اني حبيتها هي مش انتي!!
هلا بابتسامة ساخرة:ههههههههه بص يا إياد منكرش
اني اول مرة شفتك فيها في الجامعة وعرفتك
اني كنت مشدودة ليك بس صدقني مجرد ما قربت منك
قرفت وقرفت اوووي كمان.. اصل انت
مش التيب بتاعي يعني مش الكاركتر اللي احب اعيش
عمري معاه.. عن اذنك بقى عشان انا
كده اتاخرت اوي على حلا..
تمشي خطوة وترجع تاني تقول: وااه لو كنت عايزة
اخدك كنت هخدك صدقني ‘ وتأكد كويس اوي
انك فعلا مش الاستايل بتاعي.. انا فري وانت تخنق
اووي واختي قريب هتتخنق منك..
*************************
يفوق إياد على صوت تلفونه ‘ يبص في التلفون
يلاقي ان حلا بتتصل بيه..
إياد:ايوة يا حلا ايه؟ فيه حاجه؟
حلا بعد صمت :إياد انا عايزة ارجع الشغل تاني!
إياد يسكت شوية وبعدين يقولها:هلا بردو!! صح!
حلا بعصبية:الموضوع ملهووووش دعوة بهلا خالص!!
انا اللي محتاجة ارجع لحياتي تاني!
إياد بعصبية:وانتي عارفة يا حلاااا رأي في
الموضوع ده..
حلا بعند:إياد متخلنيش احس انك كنت بتكدب عليا
لما قلتلي اقعدي لحد ما .....
تسكت حلا ويبرق إياد من الجملة اللي قالتها حلا
وعرف هي كانت تقصد ايه..
إياد:وانا من امتى بكدب عليكي؟!
حلا:....
إياد:على العموم اعملي اللي يريحك لان في الاول
وفي الاخر انا كنت بعمل لراحتك ‘ بس واضح
انك غاوية تعب..
حلا:شكرا يا إياد
حلا تقفل السماعة من هنا وإياد يرجع تاني
بذكرياته لورا..
**********************
في يوم من الايام إياد كان راجع من برة وحلا
واقفة في المطبخ بتحضر الغدا وهلا قاعدة قدامها
على
الطرابيزة اللي في المطبخ بتشرب عصير وبتقول:
يا بنتي انتي مهندسة اد الدنيا وشاطرة جدااا
وموهوبة وهو عارف ده كووويس
حلا بهدوء:ايوة عارف بس انتي عارفة إياد بيخاف
عليا اد ايه
هلا وهي بتجز على سنانها:لااا انا اللي اعرفه هو
.........
استنوني الحلقة اللي جاية
