الحلقة التالتــــــة
تفوق حلا من الذكريات دي على صوت إياد وهو داخل
الاوضة مبتسم ليها
وبيقلها:
مش عايز حبيبي يكون زعلان مني.. ايه رأيك تكلمي
هلا تجيلك؟!
تبرق حلا جامد لإياد وتبصله بخوف وتفضل ساكتة في
مكانها وهي في قمة استغرابها
إياد:ها حبيبتي هتكلميها؟
تبص حلا بكل خوف وتوتر لإياد وتقول:اا ا ااه هـ
هـ هبقى اقولها
إياد بشك: لو مش حابة تقوليلها ‘ انا ممكن اخرج
معاكي نتفسح ‘ بقالنا كتير معملنهاش .. ايه رأيك؟
حلا:ممكن بردو
إياد:خلاص يلا حبيبتي ‘ نلبس وننزل وبلاها هلا
..
تروح حلا بسرعة على الدولاب وتبلع ريقها بصعوبة
وكل شوية تبص بطرف عينها على إياد
اللي بقت شايفاه مريب الفترة دي معاها..
***********************************
بعد ساعة بيكونوا في مطعم شيك وراقي وباين في
عنيهم هما الاتنين الحب والغرام..
إياد بيمسك ايد حلا وبيقولها بكل رومانسية:
كل ما العمر يمر بينا اكتر بحبك اكتر واكتر
حلا:وانا كمان يا إياد بمووووت فيك اوي وكل لحظة
بحبك فيها اكتر واكتر
إياد يبتسم ويقول: فاكرة اول يوم شفنا فيه بعض؟
حلا تبتسم وتقول:دي حاجة مينفعش انساها ابدا
إياد:كنت ببقى خايف لتكون لحظة تاخدها شمس غروب
الفراق لبعيد وتسافر لمكان منعرفش نوصله..
حلا:ليه دايما خايف من مشاعري كده؟ رغم انك
واااثق اووي من حبي ليك؟!
إياد:انا مش خايف منك انا بخاف من الزمن..
حلا بابتسامة رقيقة:من اول يوم لينا وانت كده
فاكر؟
******************************
إياد يرجع بذكرياته لورا ‘ لحد اليوم اللي كان
رايح يحضر فيه محاضراته عادي .. كلية الهندسة
بيروح يسلم على صاحبه فيلاقي بنتين واقفين
معاهم..
إياد بيسلم على صاحبه بكل ترحيب وتلقائية وميديش
وش للبنتين اللي واقفين مع صحابه..
اسامة صاحب إياد:ايه يا إياد مش تسلم على الباقي
إياد باقتضاب:انت عارف مبعرفش اسلم على حد
معرفهوش ..
اسامة:نعرفك يا سيدي دي شيماء وحلا سنة أولى
هندسة برضو ‘ شيماء تبقى قريبتي يا عم
إياد بابتسامة مقتضبة:اهلا وسهلا
اسامة للبنتين:معلش يا جماعة اصل إياد ملوش في
البنات اوي وكده
إياد:طب عن اذنكم
اسامة:انت زعلت ولا ايه؟
إياد:لا عادي ‘ بس ورايا مذاكرة اهم من الكلام
الفاضي ده .. اشوفك بعدين
***********************************
في نفس الوقت تسرح حلا هي كمان في ذكرياتها
وترجع لنفس الذكرى لاول يوم جامعة وبعد ما
يمشي إياد من عندهم..
شيماء:ليكون زعل يا اسامة؟
حلا بتبص على اياد وهو ماشي وتفضل متبعاه
بنظراتها ..
اسامة:لا مزعلش هو إياد كده ‘ بصوا هو ملهوش في
البنات وتقريبا كده مبيحبش البنات
حلا باستغراب:مبيحبش البنات؟ قصدك انه تقيل يعني
وكده وملهوش في جو انه يقعد مع بنات؟
اسامة:والله انا بقالي سنتين اهو معاه بحاول
افهم هو ملهوش فعلااا في البنات ولا هو اصلا مبيحبش
حاجه اسمها بنات!
شيماء:ليه يعني معقد؟
اسامة:مش عارف بس لما سألته كذا مرة انت ليه
بتدي وش خشب للبنات يرد يقول انه مبيحبش
يقعد معاهم وان البنات مبيجيش من وراهم غير حوارات
تافهة وبيجيبوا هم للقلب..
شيماء باستنكار:اااه ده معقد بقى ! وهو مش شايف
الولاد يعني ولا مش شايف هما بيعملوا ايه!
طب ده حتى احنا نسمة اوووي يا حلا صح؟
حلا بتكون لسه بتبص على إياد اللي راح قعد بعيد
وعمال يبص في كتبه وبعدين تلف على شيماء
وتقول:
ها؟ اا ااه اه صح
شيماء تبص على إياد وتقول: اه باينه كده معقد ‘
بصوا قاعد لوحده ازاي
اسامة بسخرية:ههههه قاعد لوحده يا ماما عشان
حضرتك ده دحيح الدفعة ‘ موس في المزاكرة
ابن الــ ....
حلا:ده حقد ده ولا ايه
اسامة:هحقد على صاحبي ليه ‘ انا بس حبيت اقلكم
يعني هو ايه ..
شيماء:يبقى عشان كده بقى لازم فعلا يبعد عن
البنات ههههه اصل لو حب بنت ممكن تخليه الاخير
على الدفعة..
اسامة وحلا:هههههههه
وفجأة تيجي هلا من بعيد بكل اشراقة واول ما تظهر
اسامة يتخض ويقول:ايه ده!
شيماء بتفهم انه اسامة اتخض لما شاف هلا وقعدت
تضحك وتقوله:ايييه
اسامة يبص على حلا وبعدين يبص على هلا ويرجع يبص
لحلا تاني ويقول:
هو اللي انا شايفه ده صح؟!!
حلا تضحك لانها فهمت وقالتله: اختى التؤام هلا
اسامة يتنهد بارتياح ويقول:ايوووة كده يا شيخة
مش تقوليلي من قبل كده واحنا بنتعرف لحسن كنت
اشوفها واروح اكلمها على اساس انتي والبنت
تفتكرني بتبلى عليها..
شيماء وهي بتنادي على هلا: هلوووولة تعالي
هلا بتعدي من قدام إياد بس من غير ما تبص عليه ‘
هو بيبص عليها ويستغرب ويروح يبص
عند اسامة فيلاقي حلا ‘ فيفهم انهم اتنين تؤام
بس بعدين يرجع يبص في اللي في ايده..
هلا توصل عندهم وتقول:كليتكم خنيقة اوووي! ايه ده
مفيش حيوية كده
اسامة:ههههه معلش بقى يا قمر منعرفش انك جاية
عندنا ‘ الا هو انتي مش هندسة زي اختك
هلا بتضحك بصوت عالي وبدلع:ههههههه لا انا تجارة
انجليش
اسامة:يا خساااارة ‘ ياريتك كنتي معانا
شيماء:اساااامة شكله هيتدي يغني عليكي يا
هلووولة ههههههه
هلا:متخافيش اختك بتعرف تسد
حلا تكون واقفة معاهم بس مش مركزة ونظرها كل
شوية على إياد ..
اسامة:طيب اسيبكم انا بقى واروح لصاحبي المعقد
هلا:مين ده اللي معقد ؟
اسامة:شايفة الدحيح اللي هناك ده؟ اعرفك اياد
سنة تانية هندسة موس في المزاكرة وبيكره البنات
هلا بضحك بدلع:ههههههه يا عيني
اسامة:المهم خلينا نشوفك ها
شيماء:امشي يا اسامة روح لصاحبك يلا..
**************************************
تفوق حلا من ذكرياتها فتلاقي إياد هو كمان سرحان
فتقوله:
ايه حبيبي؟ روحت لفين؟
إياد:هههه روحت لزمان
حلا:طب يلا كل ‘ الأكل كده هيبرد
يرجع إياد ياكل لكن يرجع تاني لذكرياته
**************************************
اسامة بعد ما يسيب البنات يرجع لإياد..
اسامة:فاتك يا عم الوتكة اللي جت بعد ما انت
مشيت
إياد:اللي شبه البنت اللي كانت واقفة معانا
اسامة:اه حلا اللي انت سلمت عليها وهلا اختها
تؤام بقى
إياد:اممم هلا دي قليلة ادب
اسامة بضيق:ليه يعني؟
إياد:صوت ضحكها عالي جدا ومستفزة
اسامة:هو انت تعرفها عشان تقول كده!
إياد:لا معرفهاش بس من شكلها بيبان ‘ مش
محتاجة..
اسامة:واد يا إياد اسكت عشان انت ملكش فيهم
اصلااا ‘ انت معقد اصلا
إياد وشه يحمر من الغضب:انا مش معقد ‘ انا بس
بحب احترم نفسي معاهم
اسامة:قصدك ايه يعني؟
إياد:بص ياريت نطلع البنات برانا عشان البنات
مبيجيش من وراهم غير المشاكل اصلااا
اسامة:مش كلهم يا إياد
إياد يبص لاسامة وبعدين يفتكر لما كان صغير في
الفيلا عنده ..
إياد عمره سبع سنوات راجع من برة بعد ما كان
بيلعب كورة وهدومه متوسخة وبينادي:
مااامااا يا ماااامامااااا ‘ دااادة نادية يا
داااادة ناااادية ‘ هو مفيش حد في البيت ولا ايه!
يروح المطبخ عشان يشرب مية وبعدين يلاقي مامته
نازلة بسرعة من اوضتها ولابسة روب
أسود حرير ..
الام بتوتر:اا اانت ايه اللي جابك دلوقتي يا
ولد!!
إياد بكل براءة:خلصت الماتش
الام بعصبية وتوتر وكل شوية تبص لفوق:مش قلتلك
لما تيجي متزعقش كده! وبعدين انت موسخ
نفسك كده ليه؟! هاااا وايييه القرف اللي انت
عملته ده! شايف وسخت المطبخ ازاااااي!!
إياد:ما انا قعدت انادي على دادا نادية كتير وهي
مردتش عليا
الام بزعيق:لانها واخدة اجازة النهاردة !!
لالالا انت لازم تتعاقب ‘ هتطلع تروح في الجنينة برة
وتنقي اكتر حتة الشمس فيها وتقف لمدة ساعتين
تتنقع في الحر يلااااااااااا
إياد بعياط:خلاص انا اسف يا ماما هنضف المطبخ
بنفسي
الام:انت فعلا هتنضفه بس بعد ما تطلع برة في
الجنينة تقف في اكتر حتة فيها شمس لمدة ساعتين
يلااااااا.. اجررررري
يخرج إياد يقف في الجنينة ويختار اكتر حتة فيها
شمس ويفضل واقف ودموعه بتنزل في صمت
تخرج مامته تبص عليه وتقوله:عاااارف لو سمعتلك
حس!! ساعتين وترجع تنضف المطبخ وتخليه
يلمع ..
بعدين تدخل وتخرج وفي ايدها الكورة والسكينة
وتقوله:ادي الكورة بتاعتك اهي
وتبدأ تقطعها حتت حتتت
وإياد واقف بيعيط جامد بس كاتم صوته ومش قادر
يقول حاجه
بعدين بتطلع تاني وتسيبه ..
بعد نص ساعة يبدأ إياد يحس بتعب اوووي ويدوخ
جامد فيبدأ ينادي بصوت واطي:
ياماما انا تعبان ‘ ماما انا اسف
لكن طبعا مبيلاقيش رد ‘ بيحاول يدخل براحة لكن
ميلاقيش مامته ‘ فيقرر يطلع اوضتها
بهدوء ‘ يفتح الباب بكل هدوووء وبشووويش جداااا
‘ فيسمع صوت اغاني عالي جدا
ومامته قاعدة في حضن راجل غريب غير باباه وعمالة
تشرب وتضحك معاه وتقول:
متخفش عاقبته ساعتين يقف تحت في الجنينة يعني مش
هيحس بينا ‘ بطل تخاف بقى
وبعد شوية هخرجك من باب المخزن اللي تحت..
يقفل إياد بسرعة باب الأوضة وينزل تحت في
الجنينة ويقف مصدوم ويفضل يعيط كتير اووووي
يفوق من ذكرياته على صوت اسامة وهو بيقوله:
ايه روحت فين؟
إياد:لا كل البنات زي بعض كلهم ميستاهلوووش اي
حاجة..
اسامة:انت فيه واحدة لعبت عليك وجرحتك
إياد:لا
******************************
حلا:إياد حبيبي خلصت اكل؟
إياد يفوق من دوامة الذكريات:ااه ‘ تحبي نقوم؟
حلا:ياريت لحسن تعبت اوي ‘ بس استنى اروح الحمام
وارجعلك
إياد:ماشي حبيبتي
بيبص اياد على الطرابيزة يلاقي حلا سايبها
تلفونها يقوم ياخده بسرعة وبتوتر ويفضل كل شوية
يبص ناحية الحمام..
يمسك الموبايل وايده بتترعش ويحاول يفتح
الموبايل لكن يلاقي عليه رقم سري!
بترجع حلا وبتشوفه وهو بيحاول يفتح الموبايل
وبيكون مش واخد باله انها رجعت..
حلا بضيق:بتعمل ايه يا إياد
إياد بخضة:ها!
حلا بشك:موبايلي بتعمل بيه ايه؟
إياد:من امتى موبايلك عليه رقم سري؟
حلا:ممكن نروّح ونتناقش في بيتنا!!
إياد:من امتى موبايلك عليه رقم سري؟!
استنوني الحلقة اللي جاية
............
