الحلقة العاشرة من "قصة سيلينا"

الحلقة العاشرة

نادر:لا طبعا دي تبقى كارثة

سارة: لييييييييه؟؟؟؟!!

نادر:لان باختصار سيلينا اكبر منه بمئات السنين!!

سارة:اوووبا تاااهت عن بالي!! بس عادي يعني مش حرام لو اتجوز واحدة اكبر منه!!

نادر:انا مقلتش حرام! انا بتكلم عن فرق السن يا سارة؟! دي اكبر منه بكتيييير اوووي! مش سنة

ولا اتنين!! ولا حتى عشرة!!

سارة:طب اسكت بقى دلوقتي لحسن ياخد باله.. بعدين نشوف الموضوع ده هيرسى عليه..

ويركبوا الكل الطيارة.. وطبعا من ساعة ما دخلت سيلينا وهي منبهرة اوي بالطيارة..

واول ما طلعت الطيارة خافت جدا..

سيلينا:سييييييف!! ايه اللي بيحصل؟

سيف:ههههه اهدي اهدي متخافيش ‘ الطيارة بس بتطلع

سيلينا بكل براءة:يعني هنطلع فوق؟ في السما؟

سيف:اه

سيلينا:عارف زمان .. قصدي يعني اما كنت في زمني ‘ كنت دايما اقعد لمدة ساعة اتأمل الدنيا

من حواليا ولما كنت ابص فوق في السما كان ببقى نفسي اوي المس السحاب بايدي.. انا عارفة

انها حاجة هبلة اوي بس كان حلم بالنسبالي ‘ مكنتش اعرف ان الحلم ده ممكن يتحقق..

سيف فضل مبتسم ليها وباصص جوة عنيها ومكنش حاسس لا بنفسه ولا بالناس ولا باي حاجة

حواليه..

سيلينا باستغراب:مالك؟

سيف:مالي؟

سيلينا:كانك اول مرة تشوفني؟

سيف:جايز اكون فعلا اول مرة اشوفك!

سيلينا:ازاي ده انا بقالي سنة قاعدة معاكم

سيف:ايوة عارف ‘ بس اول مرة اشوفك بعين تانية..

سيلينا:مش فاهمة!!

سيف:مش لازم دلوقتي.. المهم احكيلي بقى كنتي بتقولي بتتأملي الدنيا؟! ليه وازاي؟

سيلينا:كنت كل يوم اصحى الصبح بدري اووي وانزل اقعد في الحديقة بتاعت بيتنا وافضل اتأمل

السما والطيور وحتى صوت المية بتاعت النهر.. انت عارف احنا جمب بيتنا كان فيه نهر وكنت

بحب اسمع اوي العصافير وهي بتغني عنده!

سيف:ههههه العصافير بتغني عنده!! ازاي يعني..

سيلينا:كانت بتعمل صوت مختلف اما يكونوا عند النهر..

سيف:وليه يعني كنتي بتتأملي كتير كده؟

سيلينا:كنت بتمنى كتير اني اكون جزء من الطبيعة ‘ عشان كده كنت بتفرج عليها كتير..

وفجأة سمعوا صوت كابتن الطيارة وهو بيقول انهم وصلوا الغردقة ‘ خرجوا من المطار وراحوا

فندق وهناك خدوا اوضتين. اوضة للبنتين واوضة للولدين..

سيف:طيب احنا نريح ساعتين وبعدين ننزل نخرج؟

سارة:تمام

سيلينا:هو انا ممكن ابقى انزل عند البحر الصغير؟

نادر وسارة باندهاش:بحر صغير؟؟ فين ده؟

سيلينا وهي بتشاور على مكانه:اهو ده اللي هناك..

سيف:قصدك خير اللهم اجعله خير ‘ البسيييييين مثلا!!

سيلينا:بسين؟؟ يعني ايييه؟؟

سيف بسخرية:يعني البحر الصغير.. ايوة ماله بقى يا ماما البحر الصغير؟ كنتي عايزة منه ايه؟

سيلينا بكل براءة:بسأل لو ينفع انزل اقعد قدامه لوحدي يعني؟

سيف بخوف:اوووووووعي تنزلي لووووحدك!! احنا اوضتنا جمب اوضتكم لو حبيتي تنزلي وسارة

كانت نايمة او مشغولة بس خبطي علينا وانا انزل معاكي ولو كنا نايمين ترجعي تاني لاوضتك..

بس اوووووعي اووووعي يا سيلينا تخرجي لوحدك! انتي لو تهتي هتبقى مصيبة ..

سيلينا:حاضر

سيف:طيب يعني انتي مش عايزة تنامي؟ او ترتاحي؟؟

سيلينا:مش عايزة انام دلوقتي.. عايزة اشوف الطبيعة اللي في المكان ‘ وشكل البحر الصغير ده حلو..

نادر:اااه صح يا سيف شكل البحر الصغير ده ميتعوووضش بصراحة!!

سارة:ههههههه وياه العوووم فيه بيبقى احلى حتى من البحر الكبير

سيف:احنا هنتريق بقى ولا ايييه!! ولا يا سارة لما تشرب العصير عليه بيبقى احلى من البحر الكبير

سيلينا:انا حساكم بتتريقوا؟؟

سارة:ابدااااا

سيف:خلاص اطلعوا انتوا يا جماعة لو حابين وانا وسيلينا هنروح نتفرج على البحر الصغير ‘ يووه

قصدي على البسيين..

نادر:خلاص ماشي

تمشي سيلينا لناحية البسيين وهي مبتسمة وبعد ما يقعدوا يطلبوا عصير عشان يشربوا..

سيلينا: انا كنت عايزة اسالك سؤال؟

سيف:اسالي؟

سيلينا:هو انت يتيم؟

سيف:لا!! ليه؟

سيلينا:اصل مش بشوف غير جدك!

سيف:ماما وبابا برة

سيلينا:وليه مش بشوفك بتتكلم معاهم او حتى بيجوا هنا؟!

سيف:مش بحب اتكلم في الموضوع ده

سيلينا:ليه؟

يسكت سيف شوية وبعدين يكمل كلامه: من وانا عندي خمس سنين قرروا انهم يسافروا لبرة

وطلبوا من جدي انه ياخد باله مني على اساس انهم هيرجعوا بعد سنة! هه ومن ساعتها وانا

مع جدي طول الوقت.. عدى سنة وسنتين وتلاتة وجدي يقلهم تعالوا الولد بيسأل عليكم دايما

تعالوا الولد محتاج ليكم ‘ تعالوا الولد بيعيط ليل ونهار عايز يشوفكم! تعالوا الولد عيان وعايز حنان

مامته وانا مهما كنت حنين عليه مش هقدر اعوضه بحنان مامته! لكن مفيش فايدة ‘ كل همهم انهم

ازاي يجمعوا اكبر قدر من الفلووس.. رجعوا بعد خمس سنين ‘ بس قلبي كان بقى مليان حقد

من تجاهم . قلبي كان اتملى كره ليهم..

لسه فاكر اول يوم لما رجعوا كان عمري 10 سنين ‘ يرجع سيف بذكرياته للوقت ده..

الجد بيصحي سيف:اصحى يا سيف بابا وماما جم ‘ بابا وماما جم..

سيف ببرود:سبني نايم يا جدو

الجد باندهاش:نااايم!! مش انت كنت بتعيط كتييير عشان يجوا

سيف:مش عايز اشووف حد

الجد:ووولد! اما جدك يتكلم معاااك تقوم وتتكلم عدل

يقوم سيف عشان يكلم جده:ايوة يا جدو

الجد:مالك بقى؟ مش عايز تقوم تشووف مامتك وباباك ليه؟

سيف بعند:كدددده!! ملييش نفس اشوووفهم!! هما اصلا جايين ليه!! عايزين مني ايه دلوقتي!!

الجد:فيه ولد صغير يعلي صووته كده وهو بيكلم حد اكبر منه؟!

سيف:بس انا يا جدوو

الجد مقاطعا:يلاااا قوووم..

يقوم سيف ويخرج من الاوضة وتجري الام عليه وتحضنه وتبووس فيه وتقله:وحشتني اوووي يا حبيبي

عامل ايه؟؟

سيف:...

الام:كبرت اووووي يا سيف ماشاء الله

وتستمر في بوس ابنها..

الاب:تعالي يا حبيبي في حضن بابا شوووية

لكن سيف ميتحركش

الاب باندهاش:مالك يا سيف؟

سيف ببرود:عادي.. مفيش

الجد:واخد على خاطره منكم ‘ عشان بقالكم خمس سنين مبتنزلووش!

الام:يا حبيبي ما احنا عندنا شغل وبنجيبلك فلوووس كتيير..

سيف:انا مش عااايز فلوووس انا عايزكم انتم!!

الاب:حاضر يا حبيبي.. ده احنا هنفسحك فسح! تعالى اوريك الالعاب اللي جبتهالك

وبعد يومين تدخل الام ووراها الاب اوضة سيف وهو نايم ويبوسوا..

سيف يصحى من نص النوم مفزوع:انتم رايحين فين؟

الام:مسافرين يا حبيبي

سيف:ليه؟؟ انتم مش قلتوا مش هتسافروا دلوقتي؟

الاب:فيه شغل مهم لازم نسافرله.. بس احنا هنبعتلك تيجي لينا في الصيف

سيف بكل برود:انا مش هاجي ليكم! سافروا وملكوش دعوة بيا..

الام:خد بالك من نفسك يا حبيبي واحنا اما نوصل هناك هنبقى نصالحك

واول ما يخرجوا من اوضة سيف ‘ يروح سيف للعب اللي جابوها ليه ويفضل يكسر فيها ويعيط

ويدخل عليه جده وياخده في حضنه..

يرجع سيف للحاضر فتقوله سيلينا:انا عارفة شعورك ده ‘ انك في الوقت اللي كنت محتاج فيه حبهم

متلاقيش منهم اي حاجة بس دول مهما كان اهلك! يعني جدك معاه حق ‘ مينفعش اما يجوا متشوفهمش

انت دلوقتي كبرت وتقدر تتكلم معاهم وتصارحهم بكل حاجة..

وفجأة يجي تلفون لسيف ويفضل باصص في الشاشة كتير فتسأله سيلينا:مين؟

سيف:نرمين..

ويقوم سيف من جمب سيلينا ويفضل يتمشى بعيد ويرد على التلفون..

سيف:ايوة

نرمين بدلع:انا اسفة يا سيف ‘ والله انا بحبك اووي انا بس مبعرفش اعبر عن حبي دي.. قلي انت

فين دلوقتي وانا اجيلك اصالحك..

سيف:انا مش في القاهرة

نرمين:امال فين؟؟

سيف:ملكيش فيه يا نرمين

نرمين بدلع:قلبك ميبقاش اسوود وبعدين على فكرة انت لما دخلت علينا المكتب وشفته ماسك ايدي

كان بيقلي على حاجة مش زي ما انت فاكر..

سيف:نرمين انا وانتي مش قادرين نفهم بعض! لا انا قادر اتأقلم مع استهتارك ولا انتي قادرة تتأقلمي

مع مشاعري السخيفة على رأيك..

نرمين بتمثيل وكانها بتعيط:سييف انا مش عارفة انااام بجد.. سيف انا مقدرش اعيش من غيرك..

بس اديني فرصة وانا هثبتلك اني فعلا بحبك‘ وهتلاقي مني الاهتمام وهتلاقي مني كل حاجة مكنتش

عاجباك غيرتها عشانك بس اوعى تسبني..

سيف:نرمين

نرمين مقاطعة:سييييف انا بحبك!! وقدر بقى اني عمالة اقلك كده كتيير وانت عارف كووويس اوي

اني مش بقول الكلام ده

سيف:شفتي اهووو!!

نرمين:انا بس بقلك شوف انا عايزة اثبتلك ازاااي!!

سيف:نرمين صدقيني

نرمين مقاطعة:هنرجع لبعض صح يا حبيبي؟؟

سيف:...

نرمين بفرح:رجعنا؟

استنوني الحلقة اللي جاية