الحلقـــــة الثانيــــــــة عشــــــر من "ســــــــايكـــــــــو"

الحلقــــــــة الثانيـــــــة عشـــــــــر

وتلاقي فريدة فؤاد ازازة محفورة وسط الرمل فتقعد تبص ليها..

رؤوف:في ايه يا حبيبتي

فريدة فؤاد:خطرت في بالي فكرة يا رؤوف انما ايه جنان

رؤوف:هههههه ايه هي يا روحي

فريدة فؤاد:عايزة اكتب رسالة

رؤوف باستغراب:لمين؟

فريدة فؤاد:مش لحد معين

رؤوف:مش فاهمك؟

فريدة فؤاد:عارف يا رؤوف ساعات الانسان بيوصل لمرحلة انه محتاج  رسالة تيجي ليه من اي

مكان في العالم ‘ ومن اي حد يقوله كلام هو مستنيه.. فليه مكتبش رسالة لكل الناس دي؟!

رؤوف بابتسامة:هههه فهميني اكتر ‘ لحسن حاسس ان دماغي بتلف..

فريدة فؤاد:لا شووف بقى انا هكتب ايه..

وتجري فريدة فؤاد على الشاليه وتجيب ورقة وقلم وترجع تاني لرؤوف اللي بيكون قاعد على

الشاطىء..

رؤوف:هتعملي ايه يا مجنونة

فريدة فؤاد تكتب وبعد ما تخلص تحط الرسالة في الازازة وتحدفها لبعيد وتفضل تبص عليها

لحد ما تختفي...

ترجع فريدة تاني للواقع وتكون الرسالة ملفوفة وماسكها بايدها ‘ فتفتحها بلهفة وبسرعة عشان

تشوف مكتوب فيها ايه وتلاقي:

" كلنا بتيجي علينا اوقات بنبقى مستنيين فيها حاجة معينه تحصل لينا ‘ أمنيه .. ولما الدنيا بتضيق

بينا بنبقى هنموت ونسمع كلام من القلب يوصل للقلب يديله أمل ان الحاجه اللي مستنيها دي

مش هتضيع هي كمان وانها هتتحقق..

وعشان توصل للي انت عاوزه ده لازم تعرف يعني ايه "تحــــــــب" ايوة تحـــــب .. الحب

هو كل حاجه في الدنيا دي ‘ لا ده يمكن الدنيا دي اتولدت عشان الحب! حُب العبد لربه .. حب

الزوج لزوجته ‘ حب الام لاطفالها ‘ لحد حبك لنفسك وحبك للحياة وحبك لشغلك وحبك

للحاجات اللي بتحبها.. رسالتي دي لكل حد توصله ‘ اعرف ان ربنا عايز انها توصلك انت

عشان تقلك كمل الحلم اللي جواك واوعى تيأس ‘ امشي في الطريق اللي انت راسمه حتى لو

كان مليان مطبات واتأكد انك قد ما هتكون واثق في ربنا قد ما طريقك هيكون سالك حتى

لو كان زحمـــــة ‘ بربنا وبالصبر وبحب اللي انت عايزه ان شاء الله هيكون.. اوعى

تستلم او تحبط لو تهت شوية.. ولو جه وقت عليك وتعبت وضعفت ‘ هتلاقي ربنا

بعتلك ايد تاخدك بس ساعتها اوعى ترفضها وامسك فيها عشان تخرج تاني للنور وتكمل

اللي انت عاوزه.. اقرأ الرسالة دي بقلبك وارميها تاني للبحر عشان توصل لواحد تاني

مستني في محطة انتظار العمر يقدر بيها ياخد نفس ويكمل تاني طريقه.. ارميها تاني

جوة حضن البحر ‘ هو ادرى ببشره وهيبعت الرسالة دي للي هيلاقيه محتاجها.."

******************************************

فريدة بتجري على شاليه امال وتخبط جامد.. امال بتفتح بقلق:ايه؟ في ايه؟؟

فريدة بفرحة:بصي؟

امال:ايه ده؟

فريدة:رسالة من جدتك الله يرحمها!!

امال بفزع وخوف:بسم الله الرحمن الرحيم ‘ ابعد يا شيطان .. ابعد يا شيطان

فريدة بتمد الورقة ليها:خديها

امال:لا لا لالا ابعدددي عني الورررقة دي

فريدة:هههههههه في ايه يا عبيطة

امال:لا لا لا يا فريدة ابعديييها الله يخليكي ‘ انا مليش في الكلام ده

فريدة:هههههههههه انتي خايفة؟

امال:اعوذ بالله من الشيطان الرجيم ‘ بس انتي عارفة يعني بحب ابعد عن الحجات دي ‘ لو حصلي

حاجة مين هيربي ادم..

فريدة:ههههههه ‘ المهم اخوكِ راجع امتى؟

امال باندهاش من سؤال فريدة:ايه ده ايه ده ايه ده؟؟؟ هو حصل بقى ولا ايه؟ ولا ايه؟

فريدة:لا بس كنت عايزة اوريله حاجه

امال:بس؟

فريدة بلخبطة:اه ‘ يعني هيكون ايه

امال:فريدة هو انتي فعلا خايفة من الحب؟

فريدة تسكت شوية كده وبعدين تجاوب:خايفة احب اوووي وادي كل طاقتي وفجأة الاقي اللي حبيته

ده اختفى من حياتي!!

امال:بس يا فريدة مش لازم عشان اللي حصل قبل كده ‘ يبقى خلاص تبقى نهاية الكون؟

فريدة:صح انا كنت محتاجة امل ودافع وجدتك عملت كده

امال:ابووس ايدك بلاش سيرة تيتا كتير الله يخليكي ‘ عشان بس ملقيش روحها بترفرف عندي

بقى وكده ها ها..

فريدة:طب ادم هيرجع امتى بقى

امال:مش عارفة ‘ كلميه؟!

فريدة بحيرة:اممم مش عارفة

امال:كلميه ‘ مش هتخسري

****************************************************

فريدة قاعدة في اوضتها تفكر وتكلم نفسها..

فريدة بصوت عالي:اكلمه؟ تؤ! لا .. بس فيها ايه لو كلمته؟ وهتقوليله بقى ايه يا فالحة؟ وحشتني

وسبتني ليه ومشيت!! اصلا هو عامل الحركة دي مخصوص عشان يعلمك الادب!

ايه يعلمني الادب؟! بس انا بقى محدش بيعلمني الادب ويخليني اعمل حاجة غصبن عني..

ايووة ما هو عمل كده عشان تكلميه وانتي زي الهبلة كنتي هتكلميه.. لا لا لا مين قال كده..

امال ايه ماسكة الموبايل ليه؟؟..الله وفيها ايه لو كلمته؟.. يعني هتتنازلي وتكلميه وانتي

عارفة انه مستني ‘ يعني هتحققي ليه اللي هو عاوزة؟؟.. لا لا لا انا هستنى لما يرجع

واكلمه.. اه عشان برده محسسهوش انه فيه حاجه..يوووووووووه احسن حاجة اناااااام..

**************************************

تاني يوم ادم في المحل بتاعه اللي في القاهرة..

عم صابر:مالك يا بني ‘ من ساعة ما جيت من شرم وانت بالك مشغول

ادم بحزن:تخيل يا عم صابر الوحيدة اللي احبها من كل قلبي واحس ان هي دي ‘ تبقى خايفة تقرب

وتدي لنفسها فرصة انها تحب من تاني وتدخلني حياتها..

عم صابر:مين دي؟

ادم:المجنونة بتاعتك

عم صابر يبتسم لانه فهم ادم بيتكلم عن مين وقال:فريدة؟

ادم:هتجنن يا عم صابر!! ماهو مش عشان حبت واحد ومقدرش يكمل معاها يبقى خلاص الدنيا!

قفلت!!

عم صابر:وانت عملت ايه؟

ادم:سبتلها شرم وجيت هنا

عم صابر:ما انت هربت زيها اهو؟!

ادم:منا حاولت ابقى جمبها ورفضتني يا عم صابر!!

عم صابر:اللي بيحب يابني مبييأسش!! وبيحاول مرة واتنين وعشرة ‘ وبعدين زي ما انت بتحكيلي

كده تبقى هي محتاجة تحس بامان من ناحيتك ..

ادم:حسستها والله يا عم صابر

عم صابر:تبقى محتاجه اكتر يا بني ..لو بتقول ان هي دي اللي انت عاوزها بجد يبقى تستحمل

لحد الاخر..

ادم بينفخ:اففففففف مش عارف

********************************************

بابا فريدة:وبعدين معاكي يعني في حوار جواز بنتك ده؟ ما انتي عارفة انها مش هتتجوز بطريقتك

دي؟

مامة فريدة:امال عايزني اسيبها كده من غير جواز؟؟

بابا فريدة:كله نصيييييب

مامة فريدة:بس ربنا قال اسعى يا عبد وانا اسعى معاك

بابا فريدة:متضغطيش على بنتك اكتر من كده ‘ كفاية اللي حصلها من بعد ما صاصو اختفى ولا

نسيتي؟؟

***********************************************

ترجع الام بذكرياتها للخلف لحد اليوم اللي رجعت فيه فريدة من الجامعة منهارة من العياط..

الام:مالك يا فريدة؟؟ فيه ايه؟؟

فريدة بانهيار:صاصو يا ماما

الام بفزع:ماله؟؟؟ ماله يا بنتي؟؟؟

فريدة:تعب اوووي النهاردة يا ماما في الجامعة وخدوه على المستشفى

الام:تعب؟؟ ليه هو عنده ايه؟

فريدة بارتباك:مصطفى عنده حالة نفسية كده نادرة

الام:ايه!! هو ده اللي كنتي بتحبيه وعايزة تتجوزيه؟! يطلع مجنوووون

فريدة بعصبية:مصطفى مش مجنوووووووووون مش مجنووووووووون

الام:امال ايييييه وانتي بتقولي راح المستشفى؟؟ هو ده اللي كنتي عايزة تبني حياتك معاه؟؟؟

وياترى لما تخلفوا هتجري انتي وعيالك وراه في مستشفيات المجانيييين؟؟؟؟ ولا هصحى في

يوم على خبر موتك بعد الشر ويكون قتلك ومياخدش اعدام عشان سيادته عقله مش فيه!!

فريدة بغضب:هو ده اللي فكرررررتي فيه وبسسسسسس!!! وهوووو مفكرتيش انه حالته

دي اكيييد محتاج حد جمبه؟؟؟ مفكرتيش انه لما ابعد عنه زي ما بتقولي مش هفرق عن

الناس العادية اللي عمرهم ما خلوه يحس بسعادة طول عمره؟ مفكرتيش انه عااااش

محرووووم حياته كلها من الحب والعطف وان في الوقت ده اكترررر وقت محتاج

فيه مني عطف وحب!!!!

الام بانكسار:ربنا يشفيه ويخليله جده ‘ بس انتي يا بنتي لسه صغيرة ومحتاجة بردو تبني

حياتك وتعشيها وحرااااام تربطي نفسك بواحد حياته متلخبطة!!!!

فريدة باصرار وغضب:لااااااا انا هقف جمب صاصوووو لو حصل ايييه ! انا بحبه ومسؤولة عن

نفسي واظن كبيرة واقدر اعرررف انا عايزة ايه..

الام:كبيرة ايه ‘ انتي لسه عيلة ومنضجتيش ومش معنى انك دخلتي كلية تبقي خلاص كبرتي..

انتي دلوقتي بتتكلمي من منطلق الحب والعشق والكلام اللي اول ما بيواجه الواقع ‘ كل الكلام

ده بيطير ويتبخر.. تقدري تقوليلي لو طاوعتك انا وباباكي واتجوزتيه! لما يتعب ويتجنن

عليكي هتستحملي لحد امتى جنونه؟؟؟

فريدة بانهيار:حرااااااااااام عليكي يا ماما ‘ انا راجعة من المستشفى مش ناااااقصة وانتي

بتزووودي عليا الجراح..

ترجع تاني الام للواقع فيقولها الاب:روحتي فين؟؟

مامة فريدة:افتكرت لما مصطفى دخلوه المستشفى وحالة بنتك...

يرجع الاب بذكرياته لورا ويفتكر يوم ما مصطفى سافر وكانت فريدة في اوضتها بتعيط..

الاب لفريدة: يابنتي بقالك اسبوع مبتاكليش كوويس

فريدة:بابا انت متخيلتش منظره كان عامل ازاي؟ زي الطفل اللي خايف من كل حاجة؟ واول ما

بيشوفني بيحس اني طوق نجاة!!

تعيط فريدة وتكمل:بابا انا لصاصو مش بس حب عادي في حياته! لا انا كنت حاجه ناقصاه

كنت الامان اللي هو مفتقده.. النهاردة وهو بيقلي خليكي جمبي ‘ انا محتاجك اكتر من اي

وقت .. خلاني مبقتش عارفة اعمل ايه..

الاب:بس يا بنتي الموضوع ده مفهوش رجا ولا امل

فريدة:خلاااص يا بابا مصطفى سااااافر سااااافر وجده قالي ان اعتبر كل حاجة انتهت ..

حضن الاب بنته وقالها:يا بنتي فيه حجات بنفتكر انها بنهايتها يعني نهاية الكون ‘ بكرة

تكبري وتقابلي الراجل الصح..

فريدة بعياط:مفتكرش يا بابا اني هفتح قلبي من جديد واحب عشان في الاخر تاخده الظروف مني

والاقيه ضاع زي السراب من بين ايديا..

الاب:استغفر الله العظيم وعسى ان تكرهوا شيء وهو خير لكم..

يرجع تاني الاب للواقع ويقول: ربنا يريح بالها ..

*********************************************

فريدة قاعدة في اوضتها بتحاول ترسم زي ما بتحب وفجأة تلاقي نفسها في شقة اول مرة تشوفها

كانت في الصالة بتبص عليها ‘ لاقت صورة كبيرة لفريدة فؤاد ورؤوف فعرفت انها في شقتهم..

فريدة فؤاد كانت قاعدة ترسم صورة أم وماسكة ولد صغير وعمالة تبص على الساعة كل شوية

وتقول:تؤ رؤوف اتأخر ليه كده؟

ومافيش دقايق ويدخل رؤوف فتجري عليه فريدة فؤاد وتبوسه وتقوله:حبيبي شووف رسمت ايه

رؤوف:تحفة اوووي

فريدة فؤاد:طب ايه ملاحظتش حاجه؟

رؤوف:ايه؟

فريدة فؤاد:شوف انت؟!

رؤوف:لا متقوووليش؟ ايه حاااامل؟؟

فريدة فؤاد:ايوووة يا رؤوف

تلف الدنيا تاني من حوالين فريدة وتشوف فريدة فؤاد وهي في اوضتها بتنيم بنتها وحامل بمولود

جديد وبعدها تسمع صوت باب..

تجري فريدة فؤاد على الصالة فتلاقي رؤوف ‘ تجري لحضنه ويبوسها ..

فريدة فؤاد:وحشتني يا رؤوف اوووي

رؤوف:وانتي كمان يا حبيبتي

فريدة فؤاد باستغراب:مالك يا رؤوف؟؟

رؤوف بارتباك:مالي؟!

فريدة فؤاد:فيك حاجة؟!!! كانك عاوز تقولي حاجة ومتردد

رؤوف بتوتر:طول عمرك بتعرفي تقريني يا فريدة

فريدة فؤاد بخوف:فيه ايه؟

رؤوف:...........

..........................

استنوني الحلقة اللي جاية