الحلقة الرابعة
الحياة في المدينة الجامعية كانت مختلفة تماما عن حياتي اللي اتعودت عليها..
اول يوم لما رحت
فيه المدينة الجامعية كان لازم اقعد مع المشرفة..
المشرفة:ان شاء الله ترتاحي هنا معانا
انا:ان شاء الله
المشرفة:بصي بقى احنا عندنا شوية قوانين لازم تعرفيهم عشان تبقي عارفة
الدنيا ماشية هنا ازاي
انا:اتفضلي
المشرفة:اولا طبعا انتي كل اجازة اسبوع هتبقي عايزة ترجعي بلدك فده لازم
تقدمي على استئذان
يعني ورقة كده عشان نبقى عارفين انك مش هتكوني موجودة في الاجازة ولازم
تقدميها قبلها
بفترة عشان لو قدمتيها في نفس اليوم هتترفض..
انا لنفسي:امم بدأنا الخنقة
وبعدين ابتسمت ابتسامة صفرا وهزيت راسي بمعنى حاضر..
المشرفة:الاكل كمان هنا ليه مواعيده الصبح بيبقى فيه وقت للفطار ويُفضل انك
تنزلي بدري عشان
تلحقي تاخدي فطارك والا مش هتلحقي حاجه لان الاكل بيخلص بسرعة ‘ وبعدين يجي
الغدا
وبعده يجي العشا وكل وجبه ليها مواعيدها وممكن لو حابة تاكلي برة براحتك
محدش هيقيدك بحاجه
في الاكل .. المهم لو عايزة تلحقي اكل هنا يبقى تنزلي بدري قبل ما
يخلص..تمام؟
انا بنفس الابتسامة الصفرا:تمام
المشرفة:فاضل بقى مواعيد الخروج ليكي انك تخرجي من اول اليوم الصبح لحد 10
بليل بعد كده
ابواب المدينة بتقفل وبيتحسبلك غياب برة المدينة وبعد 3 مرات بنبعت انذار
لأهلك عشان يتصرفوا
هما قبل ما احنا نديكي انذار بسوء سير وسلوك وده ممكن يأثر على قعادك هنا
في المدينة..
انا لنفسي:حتى انتوا طلعتوا خنقة بس خنقتكم ارحم من الخنقة اللي كنت بشوفها
في البيت ‘ على الاقل
مسموحلي اكل ولا ماكلش دي حاجه ترجعلي واخرج براحتي لحد 10 بليل مش مشكلة
..
المشرفة:عندك اي استفسار؟
انا:لا..شكرا
المشرفة:طيب تعالي معايا دلوقتي هوديكي اوضتك واللي رقمها 107 ومعاكي فيها
اربع بنات وانتي
الخامسة..
انا:ماشي
ومشينا في طرقة طويلة بعدين خدنا يمين ورحنا لطرقة تانية اطول مليانة اوض
كتيرة لحد ما وصلنا
لاوضة 107 ..
المشرفة:طبعا النهاردة الخميس فهتلاقي تلت اربع البنات مش موجودين ورجعوا
لاهاليهم في بلدهم
المشرفة بتخبط وبتدخل الاوضة اللي كانت عبارة عن خمس سراير وكل سرير صغير
جدا ميكفيش
غير فرد واحد ينام عليه.. الاوضة كانت متكركبة خالص وورق متنطور على الارض
في كل حتة
والسراير متبهدلة والمليات طالعة من تحت المراتب ..
وكان فيه بنت واقفة بتتفرج علينا..
المشرفة:شيماء دي ندى البنت الجديدة اللي هتقعد معاكم في الاوضة ‘ عرفيها
بقى الحياة ماشية ازاي
انا لنفسي:حياة ايه بس بمنظر الاوضة دي! هي الناس دي عايشة كده ازاي!!
شيماء بابتسامة وترحيب:ازيك انا شيماء تالتة طب بشري وانتي؟
انا:ندى اولة اسنان ان شاء الله
شيماء:والله طب كويس عندك نورة تانية اسنان برضو معانا هنا في الاوضة بس هي
مسافرة..
معلش بقى الاوضة متكركبة شوية بس متقلقيش انا هنضفها حالا..
انا:شوية!
شيماء:ههههه شويتين كتير يعني
انا:ههههه انتي منين؟
شيماء:من المحلة وانتي؟
انا:من الصعيد
شيماء:واه يا بوي وكده يعني ههههههه
انا:ههههه لا هو انا مش بتكلم صعيدي اصلا ‘ عشان ماما قاهرية وكده فطلعنا
انا واخواتي بنتكلم
قاهري..
شيماء:ايووة فعلا انتي بتتكلمي قاهري خالص..
انا:هو مين كمان قاعد هنا في الاوضة معانا؟
شيماء:بصي يا ستي احنا خمسة بيكي هنا في الاوضة ‘ عندك انا ونورة اللي هي
في تانية اسنان
ووفاء تانية صيدلة واسراء تالتة علوم وانتي بقى الخامسة بتاعتنا..
انا:ااه
شيماء:معلش هما المفروض كانوا يوضبوا قبل ما يسافروا وكده بس كل واحدة
انشغلت باين
وملحقتش..
انا:ممكن اساعدك
شيماء:هههه مش عايزاكِ اول ما تيجي كده تشتغلي اصل لسه التقيل جاي ورا
انا:ههههه لا ده عرفته من ساعة ما دخلت المكان.. هو هنا ايه نظام النظافة؟؟
شيماء:اممم المفروض ان كل واحدة بتوضب سريرها والمكان اللي حواليها
انا:وافرض فيه بنت مهملة ومش بتنضف ماهي كده هتخلي برضو منظر الاوضة مش
نضيف
شيماء:ماهو فعلا ده اللي بيحصل وبعدين تلاقي الاوضة بعد ما كان نصها نضيف
ونصها متبهدل
بقت كلها متبهدلة..
انا:طيب ما نقسمها ادوار ‘ يعني كل واحدة ليها يوم تنضف
شيماء:تصدقي فكرة
انا:ااه
وبعد ساعة كانت شيماء قدرت تنضف الاوضة بمساعدتي طبعا ...
شيماء:احنا يادوب بقى ننام عشان نقدر نصحى الصبح نلحق لينا فطار
انا:ياه هو لدرجادي الواحد اذا مصحاش بدري مش هيلحق
شيماء:اااه يا بنتي!!
انا:انا كنت فاكرة ان كلام المشرفة ده اي كلام وبتهوش على الفاضي
شيماء:هههههه لا لللاسف ده صح اوووي وبكرة الصبح هتشوفي بنفسك... تصبحي على
خير
انا:وانتي من اهله..
وقرأت المعوذات وبعدها حاولت انام انا كمان لاني مكنتش متعودة انام في مكان
مش مكاني..
نومي كان مقلق وحلمت بكوابيس كتيرة ومتقطعة ومش مفهومة بس قلت لنفسي اكيد
ده من تغيير
المكان مش اكتر..
****************************
على الفجر كده لقيت شيماء بتصحيني والاذان كان بيأذن..
شيماء:ندى يلا اصحي عشان نصلي الفجر حاضر
انا بتعب:حاضر
شيماء:يلاااا عشان ميفوتش علينا
انا:حاضر حاضر
وبعد ما صلينا بصتلي شيماء وقالتلي بابتسامة: ها نمتي كويس؟
انا:نمت كويس ايه بس! ده انا فضلت اتقلب كتير عشان انام وبعدين نومي كان
متقطع وكوابيس
كتيرة واحلام مش مفهومة ولما بدات اروح في النوم اووووي جيتي انتي تصحيني
عشان صلاة
الفجر..
شيماء:هههههه معلش معلش بكرة تتعودي ‘ معظمنا كان كده اول ما جينا بس خلاص
بقى اتعودنا
انا:اه
شيماء:المهم يلا ننزل تحت عشان نلحق الفطار
انا:اه طيب لحسن انا جعانة اوووي
كنت نازلة المطبخ على اساس بقى اني هلاقي فطار كويس واكل عشان كنت هموت من الجوع
دخلت ريحة المكان كانت فظيعة وكانت وحشة اوووي وبنات كتييييرة واقفين
عمالين يتخانقوا
او يتكلموا بصوت عالي مكنتش قادرة احدد..
انا لشيماء:هما واقفين طوابير قدام ايه؟
شيماء:قدرة الفول
انا:اممم
شيماء راحت لطرابيزة تانية وبعدها رجعت بعصيرين تفاح
شيماء:خدي الحمد الله لحقت العصير
انا:ايه ده؟
شيماء:ماهو الفطار هنا تاخدى حبة فول وعيش وعصير
انا:اممم طب كويس
*************************
وعلى بداية الاسبوع كانوا البنات رجعوا وكنت انا تحت في اوضة المذاكرة
بحاول افتح الكتب
عشان اشوف هناخد ايه وبعد ما خلصت طلعت فوق في الاوضة فلقيت بنت رفيعة
وبشرتها قمحي
وبشعرها بتبصلي باستغراب وبتقولي:نعم!
انا:هو ايه اللي نعم دي اوضتي
البنت:انتي مين اصلا!!
انا:ندى!
البنت:ايوة يعني ايه وظيفتك في الحياة!
انا:هو ايه اللي وظيفتي في الحياة انا ندى اولة اسنان ودي اوضتي
البنت:ااه انتي بقى البنت الجديدة اللي هتقعد معانا
جت شيماء من برة وقالت:ايه ده وفاء جيتي امتى؟
وفاء:من شوية..
وبعدين شاورت عليا بقرف:هي دي بقى الجديدة اللي هتقعد معانا
شيماء:اه دي ندى وندى دي وفاء يا ستي
انا:اهلا
وفاء:اممم ‘فهميتها النظام هنا بقى
انا:ايوة فهمت كل حاجه
وفاء:طيب احب اضيفلك حاجه جديدة بقى بصي ده سريري وده مكتبي وعليه كتبي
وحاجتي ممنوع
اللمس! مفهوووم..
انا:وانا مالي بحاجتك اصلا!
وفاء:حبيت افهمك عشان لو حصل انك لمستي حاجة متقوليش اني محذرتكيش..
وقامت سبتني وخرجت برة الاوضة..
شيماء:معلش استحمليها يا ندى
انا:ايه دي!! دي فظيعة اووووي!!!
شيماء:ايوة بس احنا بنستحملها دايما عشان هي عندها سكر وبتتعب كتير وكده
انا:ماشي بس دي فظيعة
شيماء:معلش هي في الاول بس كده وبعدين هتتعودي عليها...
انا:اممم خيير خييير
***************************
عدى شهرين وجت اجازة نص السنة وكان فيه بنات هيروّحوا تاني لبلدهم وبنات لا
وانا كنت من
البنات اللي مش عايزة اروّح ‘ مكنتش عايزة ارجع البيت وللخوف اللي بعيشه من
بابا .. رغم
ان الحياة في المدينة مليانة قرف ومشاكل والاكل مش بعرف اكل تقريبا لانه
بيبقى وحش ونيّ
الا اني كنت شايفة ان ده كله ارحم من اني ارجع واعيش بخوفي تاني تحت بابا
وقلت لنفسي
كفاية اجازة الصيف اللي هضطر مرغمة اني ارجع للبيت تاني..
اسراء اللي معايا في الاوضة:ليه مش هتسافري يا ندى؟
انا:مش عايزة ارجع البيت ‘ هنا احسن
نورة:انتي غريبة يا ندى والله ده انا ما بصدق اي اجازة تيجي وطيرااااان على
اسكندرية لاهلي
انا:اديكي قولتي اسكندرية مش الصعيد
نورة:جايز بس بردو على الاقل تلاقي اكل بيتي محترم ونضيف وتصحي براحتك
متبقيش خايفة
لو صحيتي دقيقة متأخرة يا عالم هتلحقي تلاقي اكل ولا لا!!
انا:ههههه لا لو على الاكل اهو الواحد بيدبر نفسه ولو على الخوف فهو موجود
موجود! لا ده مزروع
جوايا اصلاااا..
نورة:طيب انا خلاص كده وضبت حاجتي خلاص يادوب امشي بقى عشان الحق اروح
القطر
هتوحشوووني يا بناتيت يلا قضوا اسبوعين كويس بقى عشان هنرجع للغم ده تاني
على التيرم
التاني..
انا واسراء:خدي بالك من نفسك
نورة:ماشي سلاااام
وجت وفاء من برة:ماشية خلاص؟
نورة:اه يلااا سلاااام
دخلت وفاء وقالت:امال فين شيماء؟
انا:برة لسه مرجعتش
اسراء:انتي مش مسافرة في نص السنة يا وفاء؟
وفاء:لا انا وشيماء قاعدين
انا:وانا كمان قاعدة
وفاء:محدش كلمك اصلا
اسراء عشان تداري الكسوف اللي حصل ليا:انا بعد يومين هسافر ان شاء الله..
بس غريبة شيماء
مش مسافرة ليه؟؟
انا:انا قلتلها تقعد معايا
وفاء:بقلك يا اسراء انا عندي فيلم جديد ايه رأيك نتفرج عليه؟
اسراء:بجد؟ فيلم ايه؟
وفاء:تعالي تعالي اقعدي جمبي اما نتفرج
وقمت انا عشان اتكلم في التلفون لان علياء كانت وحشاني اوي..
علياء:وحشتيني اووووووووووي يا ندى ‘ عاملة ايه؟؟
انا:الحمد الله.. انتي عاملة ايه يا علياء؟
علياء:الحمد الله ‘ عندي خبر ليكي
انا:ايه؟؟
علياء:انا ممكن احول القاهرة واجي!
انا:بجدددددد؟؟
علياء:اه والله وماما وبابا هينزلوا معايا فهنقدر نشووف بعض كتير.. انتي مش
جاية هنا في نص السنة؟
انا:لا
علياء:ليه كده؟؟
انا:مش عايزة ارجع بيتنا يا علياء
علياء:طب بقلك ايه ما تحاولي يا بنتي في الاجازات مثلا تدور على اي عيادة
اسنان تتدربي فيها واهو
بكده تكوني رحمتي نفسك من القرف اللي بتشوفيه وفي نفس الوقت مش هتقضي وقت
كبير في بيتك
انا:خايفة اقول لبابا يرفض
علياء:يا ستي جررررربي وبعدين شوفي هيحصل ايه!!!! مش على طول كده تخافي!!
انا:هفكر واشوووف
علياء:لا انتي جرررررربي اما تنزلي اجازة تقولي لباباكِ
انا:هشوف حاضر
علياء:واخبار البنت الرخمة اللي عندك في الاوضة ايه؟
انا:اهي زي ما هي بترخم عليا دايما
علياء:فكك منها...
انا:حاضر هفكني منها..
*************************
قفلت مع علياء ورجعت اوضتي وبعدها حصلت حاجة خلتني اغير رأي واقول اني ارجع
تاني البيت
واستحمل خنقة هناك احسن ما يتقال عني اني ........
استنوني الحلقة اللي جاية....
