وفاتت الايام..
ياسمين بتبص في التلفون وبعدين تبص على الساعة وترجع تبص للتلفون لحد ما
تزهق وتقول لنفسها..
تؤ!! ماهو مينفعش كل ده يعني؟!! انا لازم اتصل بيه اشوف عمل ايه مع بابي؟؟
تمسك ياسمين الموبايل ولسه هتضرب ارقام هي حفظاها كويس تلاقي التلفون بيرن
واسمه مالي
الشاشه..
رامي ...
ياسمين بتوتر:ايوووة يا رامي!! ايه في ايه؟؟
رامي بحزن:لسه خارج من شركة باباكِ
ياسمين وهي بتقرقض ضوافرها:ايوووة وبعدين؟؟
رامي:باباكِ قالي انه فاضلي كتير اوي عشان اقدر اعيشك في مستواكِ وانــ
وانــه ... انه انتي مخطوبة
لابن عمك اشرف..
ياسمين بعصبية:اشرف مين وبتنجان ايه! انا مش هتجوزه طبعا .. انا عاوزاك
انت...
رامي:وبعدين يا ياسمين اما تعوزيني؟؟ تقدري تقولي هنعمل ايه؟؟ هتحدي باباكِ
مثلا ولا هنهرب
زي الافلام الهندي!! انتي مش عايشة في دنيا من خيال ‘ انتي عايشة في واقع..
ياسمين:ومين قالك اني ههرب!! انا هحارب معاك ومش هتجوز من وراهم !!
رامي:الحرب دي خسرانة يا ياسمين..
ياسمين:ايه اليأس اللي بتتكلم بيه ده يا رامي؟!!
رامي بغضب:ما انتي لو شفتي باباكِ بيكلمني ازاااااي وبيديني في دروس عن
المسؤوليات والدنيا
والحياة هتعرفي اني بالنسبة ليكي مجرد صفر وانك بحياتك دي مش هتقدري تعيشي
في مستوايا
لمدة يومين!
ياسمين:يا سلااااام!! وانت لسه جاي تكتشف ده؟! ماا احنا عارفين ده يا رامي!
بس احنا مش لازم
نستسلم ونيأس ونحارب وانا مستعدة انساك سنة واتنين....
رامي مقاطعا ليها:عشرررررة صح! وسنك يكبر وانا كمان اكبر وانا يادوب بكون
نفسي عشان اعرف
الحق مستواكم يا هانم...
ياسمين بحزن:انا مش مصدقة يا رامي انك بتتخلى بسهوولة كده وان كلام بابا
قدر يحطمك للمستوى
ده!!
رامي بعصبية:انا اللي غلطت من الاول لما جريت ورا وهم الحب اللي لا بيأكل
ولا يخلي الواحد
يعيش في الدنيا دي وحبيت واحدة مستواها اعلى مني بكتير.. كان لازم با بنت
الحلال معذبكيش
معايا من الاول ولا اعذب نفسي معاك واقلك ان قلبي مش للحب...
ياسمين وهي بتعيط:حرااام عليك بقى حراااااام عليك.. انت ازاااي بسهولة كده
بتستسلم!!
رامي بيأس فظيع:مــ عــ لش يا ياسمين مبقاش فيه كلام نقوله.. ربنا يوفقك يا
بنت الحلال وتتجوزي
واحد يقدر يعيشك في نفس المستوى..
ياسمين:استنى يا رامي.. رااااامي؟؟ الووو.. الوووووو..
تووت تووت تووت تووت
ياسمين بتحاول تتصل برامي تاني فبتسمع صوت بتكرهه جدا:
الرقم الذي طلبته غير متاح حاليا....
ياسمين بترمي التلفون وتقعد تعيط كتير لحد ما تنام..
**********************
تاني يوم الصبح بتصحى بتفتكر اللي حصل اليوم اللي قبل وتبدأ تعيط من تاني
وبعدين تقرر
تلبس وتنزل‘ تلاقي باباها بيفطر..
ياسمين:بابا انت رفضت رامي؟
الاب:ايوة.. لسه قدامه كتير اوي عقبال ما يكون نفسه..
ياسمين:والله!! وانت بقى شايف ان اشرف هو الراجل الصح ليا؟
الاب:ايوة.. اشرف ابن عمك واكيد احسن من الغريب
ياسمين بتحدي:بص يا باباي انا مش صفقة عشان تتفق عليها مع عمي ومع احترامي
الشديد اشرف ده
لو بموووت واخر يوم ليا في الدنيا انا مش هتجوزه ..
الاب بعصبية:يعني بتعصي اوامري وهتتجوزي الزفت بتاعك؟!
ياسمين:الزفت بتاعي رفض يتجوزني!! اطمن
الاب:وهتفضلي من غير جواز؟
ياسمين:ايوة وانت اللي حكمت بكده يا باباي.. عن اذنك..
تمشي ياسمين وتروح بيت رامي .. تخبط كتير وبعد محاولات كتيرة يتفتح الباب
ويطلع واحد شعره
منكوش وعينه لونها احمر ..
ياسمين بخوف:رااامي!! ايه اللي مبهدلك كده!
رامي بصوت حزين:ما خلاص يا ياسمين الحلم اللي حلمته معاكي ضاع..
ياسمين:رامي احنا ممكن نقنع بابا تاني وتالت وهو بعدين هيقتنع بس انت
متيأسش..
رامي بعصبية يمسكها من ايدها ويفضل يسحبها في شقته المتواضعة ويقلها:بصي
كووويس
بصي الشقة بتاعتي عاملة ايه؟!! شوفي الفرق بينها وبين فيلتك يا هانم!!!!
بطلي تخلف بقى
حبك اللي انتي جاية فرحانة بيه ده بعد شهر هتزهقي منه وتتعبي لما تلاقيني
مش قادر اوفرلك
اللي كنتي عايشة فيه!! باباكِ عنده حق يا ياسمين..
يزق رامي ياسمين بعيد ويزعق ويقلها:ابعدددددي بقى عن حياااااتي مش
عااااااوز اشوووفك
تانني ... ابعدي وارحميينييييييييييييييييييي..
تبص ليه ياسمين وهي بتعيط وتقوله:هتندم يا رامي على اليوم اللي جتلك فيه
برجلي وانت طردتني
من بيتك بس هيبقى متأخر اووووي.....
***********************
بعد سبع سنين ياسمين بترجع من الشركة ولسه هتنام بتتصل بيها بنت خالتها..
ياسمين بصوت كله تعب:ايوة يا انجي
انجي بحماس:مين عيد ميلاده بكره
ياسمين:مين اخلصي؟
انجي:انتي يا ياسمييين!!!!
ياسمين:يااه تصدقي فعلا!! بكرة 21-9
انجي:كل سنة وانتي طيبة يا حبيبتي بصي بكرة عملالك مفاجئة بمليوووون هدية
بقى..
ياسمين بابتسامة باهتة:ان شاء الله..
انجي:والله وكبرنا وبقى عندنا 28 سنة
ياسمين بابتسامة باهتة:هه ماشي يا مزعجة ‘ خليني اروح انام عشان مش قادرة
افتح عيني..
انجي:ماشي بس بقلك ايه اعملي حسابك ان بكرة فيه خروجة ومفاجئة كمان..
ياسمين:خلاااص ماشي يا انجي..بكرة بقى..يلا سلاااام
وتقفل ياسمين بسرعة وتغير هدومها وتنام ودموعها تنزل مجرد ما تغمض عينها..
**********************
تاني يوم تصحى ياسمين وتحضر الفطار لنفسها وبعدين تروح تشرب القهوة في
الحديقة بتاعت
الفيلا ..
ترجع ياسمين بذكرياتها لتلت سنين فاتت..
باباها نايم في السرير في لحظاته الاخيرة وياسمين بتعيط جمبه..
الاب باستسلام:انا غلطت يا بنتي في حقك لما مخلتكيش تتجوزي اللي انتي
عاوزاه ‘ بس سامحيني
انا اب وخايف عليكي.. وساعات من كتر خوفنا ده بندوس واحنا مش حاسين على
احلام اقرب الناس
لينا..
ياسمين بتعيط:لو سمحت يبقى متتكلمش ‘ الموضوع ده انتهى خلاص
الاب:ياريته كان انتهى عشان مموتش بحسرتي وعذابي وانا شايفك كل يوم بتذبلي
عن اليوم اللي قبله
ياسمين:ارتاح انت دلوقتي يا بابا ‘ وبعدين نتكلم
الاب:مفيش وقت يا بنتي.. انا خلاص ‘ اسمعيني يا ياسمين لو تعرفي مكان رامي
فين روحيله وقولي
ليه اني كان نفسي الاقيه انا بنفسي واجوزكم لبعض.. عيشي يا بنتي اللي فاتك
من حياتك وخليني
احس وانا في قبري انك ارتحتي اخيرا...
ياسمين:يا بابا اللي بتتكلم عنه ده مشي من زمان ومش راجع خلاص ولا انا
مستنياه خلاص ‘ انا بس
مش قادرة احب تاني..
***************************
صورة تانية من ذكريات ياسمين بعد ما مات باباها وهي قاعدة في العزا وبنات
خالتها اقرب اتنين ليها
قاعدين معاها..
انجي:امال فين عمك؟
ياسمين بعدم اهتمام:مجاش
ايمان اخت انجي:ايه قلة الذوق دي! معقول مش ناسي انك رفضتي ابنه؟ ده مهما
كان عزا اخووووه!!
ياسمين:الله يخليكم غيروا السيرة دي...
بعد ساعتين بعد ما العزا خلص والكل مشي وفضل انجي وايمان..
ايمان:يلا يا ياسو روحي ارتاحي حبيبتي..
ياسمين:مش جايلي نوم يا ايمان.. خشوا ناموا انتوا..
انجي بتعب وارهاق:اممم طيب انا قايمة انام بقى لحسن عيني مش قادرة تفتح
ياسمين قاعدة سرحانة وايمان جمبها..
ايمان:ايييه اللي واخد عقلك؟!
ياسمين:تفتكري رامي شاف في الجرايد خبر وفاة بابا ويجي يعزيني؟
ايمان:انتي لسه بتفكري فيه يا ياسمين؟
ياسمين:مش عارفة انساه ‘ كل مرة اكذب على نفسي واقول نسيته وبكرهه وانا
هموت واعرف
عنه اي حاجه.. نمرته غيرها وروحتله كذا مرة البيت ملقتهوش ولما سالت
الجيران قالولي انه
عزل.. تخيلي غير كل حاجه عشان معرفش اوصله..
ايمان:معلش يا حبيبتي ‘ انا هموت واشووف رامي ده! عايزة اتكلم معاه واعرف
كان بيفكر في ايه
لما مشي كده من غير ما يحارب معاكِ!
ياسمين وعيونها مليانة دموع:انجي شافته ‘ انتي بقى عقبال ما نزلتي اجازة من
امريكا انتي وجوزك
كانت القصة الحلوة الجميلة ماتت..
ايمان بتحضن ياسمين اوي وبتقولها:معلش يا حبيبتي ‘ متعرفيش الخير فين..
ياسمين بتنهيده:اااه ياااارب..
******************************
بتفوق ياسمين على صوت جرس باب الفيلا ‘ بتقوم تفتح تلاقي انجي قدامها
وماسكة كيكة كبيرة
وفجأة تطلع من ورا ضهرها ايمان وهي ماسكة طفل صغير بين ايدها..
ياسمين بفرحة ولهفة:ايماااااااااااااااان.. جيتي امتى من امريكا
ايمان:من ساعة ويدوب ارتحت شوية وجيت
ياسمين بتحضن ايمان بشوق:وحشتيني اوووووي اوووووي يا ايمان
ايمان:وانتي كمان يا حبيبتي
ياسمين باندهاش:ده ابنك ولا بنتك؟؟
ايمان:ابني صغنن حبيبي
ياسمين بتشيله بفرحة وعيونها مليانة دموع:دي احلى هدية في عيد ميلادي بجد ‘
بس انتي مقلتليش ليه
يا كلبه انك كنتي حامل!!!
ايمان:انا اصل ايه بقى كنت عارفة اني اول ما هولد فارس حبيب مامي هنزل على
مصر فقلت بقى
ملقش ليكي واعملها مفاجئة وقعدت احلف انجي اد كده عشان متقلش والحمد الله
مسكت لسانها لاول
مرة..
انجي:يا سلاااااااااام!!
ياسمين وهي شايلة فارس:حبيبي ماشااااء الله عليه صغير اووي
انجي:ياااه ايه العبقرية دي!! عرفتيها لوحدك!!
ياسمين:افف على رخامتك يا شيخة.. فاارس شووف خالتو رخمة ازاي.. وحشة؟ صح؟؟
انجي:يلاااا ناكل الكيك بقى وكده ‘ فارس ايه دلوقتي!!
ايمان:ههههههه مفجووعة..
وبعد ساعتين ..
ايمان:ده شريف عرف واحد معانا في امريكا يا ياسمين والله محترم جدا وطيب
وجدع وشهم اووووي
وبصراحه انا منمرة عليه ليكي يا ياسمين..
ياسمين بخوف:ايه! لا
ايمان:ليه بس يا ياسمين؟ هتفضلي كده لحد امتى؟!
ياسمين بضيق:ايمان لو سمحتي! انا هفضل كده وخلاص..
انجي:ايوة يا ياسمين لحد امتى يعني!! لحد ما تكبري وتحتاجي حد جمبك
ومتلاقيش!!! وتموووتي
لوحدك!!!!
ايمان :بعد الشر يا حماااارة ايه الكلام الدبش ده
انجي:الله ما دي الحقيقة! يعني هي هتفضل متعلقة بعمنا رامي ده وهو تلاقيه
اتجوز وخلف ونسيها
اصلاااا!!!
ياسمين والدموع في عينها:كفااااية بقى لو سمحتم..
ايمان:يا بنتي شوووفيه والله ده راجل طيب ومحترم اوووي ‘ ده حتى ياعيني هو
كمان زيك متعقد
من الحب وسنينه..
انجي بفضول :ليه يا ايمي؟
ايمان:والله شريف حاول يعرف منه كذا مرة بس هو عمره ما قال.. ده حتى اسمه
زي اسم رامي
بتاعك.. شوفيه ومش هتخسري حاجه..
وفجأة يرن تلفون البيت..
تروح ياسمين ترد وتقول الو...
وفجأة تشتغل اغنية
انجي وايمان بيبصوا على ياسمين اللي ماسكة سماعة التليفون بتسمع ودموعها
نازلة بغزارة..
ايمان بقلق:في ايه يا ياسمين؟؟؟
ياسمين بتشاور ليهم يسكتوا
وبعد دقايق ياسمين بتقفل سماعة التلفون وبابتسامة بتقلهم:ده رامي
انجي وايمان بيبصوا لبعض في استغراب واندهاش:نعم!!!
ياسمين بضحك هستيري ودموع نازلة بغزارة:اه والله ده رامي!!
ايمان:كلمك؟؟
ياسمين:لا بس شغلي الاغنية للي كنا بنحبها..
انجي:اه شغل جنان ده بقى!
ياسمين:لا والله..هوو..هووو رامي!!
**************************
بعد شهر ايمان كانت عازمة ياسمين عندها في بيتها على الغدا.. ياسمين كانت
قاعدة بتلعب مع فارس
ايمان جت وقالت ليها:ها يا ياسمين تشوفي رامي صاحب شريف
ياسمين بعند:لاااااا يا ايمان وارجوك بقى عشان متكسفنيش ولا تكسفيه ‘ شيلي
الموضوع ده من
دماغك بقى
ايمان:ايوة بس...
ياسمين:لااااا
ايمان:ماهو اللي انتي بتقوليه ده جنون برضو؟! يعني مش عشان مكالمة تلفون
وسمعك اغنية كنتم
بتحبوا تسمعوها يبقى خلاص هو كده رجع لحياتك!!!!
ياسمين:لو اقلك اد ايه الاغنية دي ادتني روح جديدة اعيش بيها من تاني مش
هتصدقي.. يا ايمان
حبي لرامي ده مش حب عادي.. فليه لما هو يرجع ويديني ولو اشارة من بعيد مش
عايزاني
استناه بعد ما استنيت كل السنين دي!
ايمان:اشارة ايه يا ياسمين!!!! باغنية!!!! من غير حتى ما يتكلم؟!!! طب كان
فين السنين اللي فاتت؟؟
مشي ليه لما هو هيرجع تاني؟؟؟ انا مش فهماكم بجد..
ياسمين:معرفش يا ايمان صدقيني.. سبيني بقى العب مع فارس براحتي...
***********************
ايمان مع شريف في اوضتهم..
ايمان بتعب:والله يا شريف انا حاولت اقنع ياسمين انها تشوف رامي بس رافضة
شريف:وانا كمان تعبت مع التاني ده راخر وكل اللي عليه انا حبيت وخدت فرصتي
خلاص في الحب
ايمان:بقلك ايه؟ ما تيجي نخليهم يتقابلوا صدفة عندنا واهو لو حصل قبول يبقى
الحمد الله ولو محصلش
يبقى ادينا عملنا اللي علينا وخلاص هما احرار ان شاء الله يفضلوا كده..
شريف:فكرة والله.. خلاص نخليها يوم الخميس اللي جاي..
*********************
ياسمين في البيت عند ايمان وبتقولها وهي فرحانة اوي:كلمني تاني وسمعني نفس
الاغنية وانا فضلت
اقول الو كتير بس برضو مردش ‘ واول ما خلصت الاغنية قفل السكة..
ايمان:امممم حلو الجنان اللي انتوا فيه ده..
ياسمين بابتسامة واسعة:متتخيليش اد ايه بقيت استنى مكالمته دي
ايمان:على فكرة انتي ممكن تقوليله انك تقدري تسمعي الاغنية ويوفر مكالمات
طالما مبيتكلمش
ياسمين:اففف يباااي عليكي بقيتي شبه انجي على فكرة
ايمان:اه صح
وفجأة يرن جرس الباب
ياسمين:دي اكيد انجي
ايمان بتوتر:لا ده شريف.. اما اقوم افتحله
تفتح ايمان لشريف الباب وتقول بابتسامة واسعة: اتفضلوا
شريف بصوت عالي عشان ياسمين تسمع:معلش بقى يا ايمي انا ورامي مخلصناش الشغل
في المكتب
فقلتله يجي معايا نكمل هنا..
ايمان:عادي يا حبيبي ‘ ادخلوا
شريف يدخل:ايه ده ياسوو هنا وانا اقول البيت منور ليه
ياسمين:هههه ده نورك
واول ما يدخل رامي كان فارس هيقع من ايد ياسمين لولا ان شريف لحقه..
شريف بقلق:في ايه يا ياسمين
رامي واقف مصعوق في نص الصالة اول ما شاف ياسمين..
ياسمين بصوت خفيف جدا:رامي!
ايمان بتبص لشريف بخوف واندهاش بعدين تسأل ياسمين:رامي مين يا ياسمين؟؟
رامي اللي كنتي
بتحبيه؟؟
ياسمين بتهز راسها بمعنى انه اه
شريف:طيب ايمان تعالي احنا جوة..
*********************
رامي قاعد وياسمين قاعده قدامه وكل الذكريات عمالة تعدي من قدامهم هما
الاتنين زي شريط سينما
لحظة سكوت طوووويلة اوي وبعدها رامي قال: عاملة ايه
ياسمين من غير ما تبص في عينه:الحمد الله..
رامي:مم مش عارف اقول ايه.. هه صدفة غريبة انك تطلعي انتي قريبة ايمان وان
يطلع انتي
اللي كانت بتكلمني عنك دايما..
ياسمين بابتسامة مكسورة:اممم
رامي:اتجوزتي؟
ياسمين:كنت فكراك اذكى من كده
رامي باستغراب:مش فاهم؟
ياسمين بعصبية:اصل انا العروسة اللي كان عايزين يجوزوك ليها.. بس شايفة بسم
الله ماشاء الله
بقيت قادر تتجوز دلوقتي وتخلي الناس تدورلك على عرايس اهوووو....
رامي:انتي اكيد فاهمة الموضوع غلط ‘ انا فعلا شريف كلمني عن قريبة ايمان بس
انا قلتله مش عاوز
ياسمين بعصبية:ليييييه!!! ايه معقوووول تكون لسه مكونتش نفسك؟!
رامي:لا كونت الحمد الله
ياسمين:والله مبرووووك!!
رامي:ياسمين انا عارف اني غلطت في حقك زمان ومن ساعة ما رجعت مصر وانا هموت
واكلمك
بس كنت خايف
ياسمين مقاطعة لكلامه:عشان جبااااااان.. هرررربت زمان ومقدرتش حتى انك
تكلمني تاني!! انا من
اول مرة سمعتني فيها الاغنية وانا عارفة ان ده انت وكنت بقول الوو كتير
عشان ترد عليا.. كنت
عايزاك تبقى شجاع ولو مرة وتعمل الصح..
رامي:كنتي عايزاني اعمل ايه يعني زمان؟؟ اتحدى العالم واعمل فيها الواد البرومبو
وسبع رجالة
في بعض واقلك يلااااا هيا بنا نشد الرحال واخدك اسفرك من بلد لبلد واشحططك
معايا عشان ابني
نفسي وابنيلك مستوى زي اللي كنتي عايشة فيه؟؟؟
ياسمين والدموع نازلة:لا سبني وعذبني وعذب نفسك معايا واهرب يا رامي..
رامي:انا فعلا كل يوم وكل ليلة كنت بموت من حيرتي وخوفي عليكي ‘ اكتر حاجة
كنت خايف منها
لما اتصل بيكي اما ارجع مصر الاقي صوت راجل غير باباكِ يرد ‘ كنت همووووت
لو اتجوزتي
ياسمين:انت اناااااااني
رامي بيقرب منها ويمسح دموعها:لا انا بحبك
ياسمين:انت هربت في اكتر وقت كنت محتاجاك فيه وفاتت الاياااام وانا مستنياك في كل لحظة ترجعلي!!
رامي:انا هربت حتى من نفسي عشان اثبت اني هقدر اكون حاجة كبيرة واثبت للكل
اني جدير بيكي
ونسيت اني مجرد وجودي جمبك ده اثبات فعلا اني حاجة كبيرة..
ياسمين بتعيط وبتضحك في نفس الوقت:ههههه واتعلمت كمان تقول كلام حلو
رامي:ياسمين انا مش عايز اضيع وقت اكتر من كده
ياسمين:ياه ! وانت بقى واثق اني وافق؟
رامي:لا ما هو لازم توافقي معلش يعني.. يا توافقي يا توافقي مفيش خيار
تالت..
ياسمين:....
رامي:ياسمين ساكتة لييييه؟؟
ياسمين:مش عايزة اجرحك يا رامي بس انا منكرش اني فرحت بيك اول ما شفتك بس
بجد
معدش ينفع
رامي:هو ايه اللي معدش ينفع؟
ياسمين وهي باصة في الارض وبعدين بترجع تبص في عينه:معدش ينفع نبعد عن بعض
رامي لثواني قعد يفكر وبعدين قال:ووووووقعتي قلبي!
ياسمين:هههههه امال عايزني اوافق بيك بكل سهوووولة كده
شريف يخرج ووراه ايمان وهي شايلة فارس ويقول:طب احنا يدوووب نقول مبروووك
بقى
ونجيب المأذون..
ياسمين:ايه ده ايه ده لااااا!! انتوا عايزين تخموني ولا اييييه!! احنا
هنعمل فرح
رامي:واحلى فرح فيكي يا مصر
ياسمين وهي رافعة حاجب وبتقول بهزار:اه ده انت كونت نفسك جامد اووي
رامي بضحك:هههه مش هتنسهالي ههههه.. امال يا ماما سبع سنين غربة
ياسمين:مفيش سفر بعد كده الا وياسمين في ايدك
رامي بحنية:مفيش ولا يوم تاني في بُعدك وهفضل لاخر عمري باذن الله معاكي
ومش هسيب
لحظة تاني تضيع من غيرك..
النهايـــــــــــــــــــــــــــــــــة
