الحلقة التانية
لحد ما دخلت ثانوي وهناك اتعرفت على بنات جديدة وبقوا صحابي ..
اماني وعلياء ونهى واشراق ‘ الاربع بنات دول كانوا هما صحابي وكانوا معايا
طول الوقت ..
دخلت علمي علوم يمكن لان كان حلمي اني ابقى دكتورة بس كنت محتارة ادخل طب
بشري ولا طب
اسنان ولا طب بيطري.. المهم مكنتش بفارق الاربع بنات اللي لسه عرفتكم
عليهم..
علياء كانت صحبتي الانتيم ولحد دلوقتي صحبتي الانتيم اما اشراق فهي البنت
الهادية اللي ملهاش
في اي حاجة غير في مذاكراتها وبس وكل همها انها تتفوق ازاي واماني البنت
الرومانسية ونهى
بقى عفريتة الشلة ‘ كانت اجرأ واحدة فينا وكانت شقية اوي وتحب تاخد حقها
وحقنا لو حد داس
على طرفنا بايديها ومكنش بيهمها اي حد!
حتى لو اطرت تدخل نفسها في مشاكل عشان تعرف ترجع حقوقنا..كنا احنا الاربعة
بناخد دروس
مع بعض دايما..
*************************
انا في اوضتي قاعدة بذاكر وفجأة تلفون البيت بيرن ماما بترد وبعدها بشوية
تيجي تقولي:
علياء على التلفون عايزاكي
"مكنش لسه عندي موبايل فاي حد كان بيطلبني على تلفون البيت"
انا:ايوة يا علياء
علياء:ازيك
انا:الحمد الله وانتي
علياء:الحمد الله ‘ بقلك درس الفيزيا الساعة خمسة
انا:هو مش كان ستة؟
علياء:ما مستر حمدي بدَرُه شوية
انا:اممم طيب
علياء:صحيح اماني كلمتك؟
انا:لا ليه!
علياء:هههه هتبقى تقلك بنفسها بقى
انا:فيه ايه؟؟ خوفتييني!
علياء:يابنتي بطلي الخوف بتاعك ده! هيكون فيه ايه يعني وعشان متفضليش
قلقانة لاني عارفاكِ
هي حاجه تخص اماني يعني..
انا:اها طيب وهوشتيني والله..
علياء:شوف بقلها ايه! تقلي اييييه!!! ياباااااي عليكي وعلى جبنك وخووفك ده!
انا:ههه طيب خلاص ‘ اقفلي بقى خليني اروح اكمل مذاكرة
علياء:ماشي..سلام
وبعد ساعة قمت عشان اجهز للدرس وهناك سلمت على البنات وبعدين اماني جت جمبي
وقالت بصوت
واطي:
انا معجبه بواحد هنا
انا:ايه ده؟ بجد؟
اماني:ايووة
انا:ميين؟؟
ولسه اماني هتتكلم دخل مستر حمدي ووراه ولدين معانا في المجموعة هيثم
واحمد..
اماني:بعدين بعدين لما الدرس يخلص
انا:لسه هستنى الدرس ما تقولي بسرعة هو مين؟
اماني:يوووه يا ندى قلتلك بعدين بقى..
وفضلت طول الدرس مش مركزة مع مستر حمدي بيقول ايه وعمالة افكر في كلام
اماني..
واقول لنفسي:يا ترى فيه حاجة اسمها حب في الدنيا دي؟ ومعرفش ليه قلبي كان
عمال يدق جامد
زي ما اكون انا اللي بحب مش اماني! طول عمري بخاف من كل حاجه حواليا حتى
الحب
كنت خايفة منه اوي ومكنتش اصلا مؤمنه بوجوده ولما كنت اسمع واشوف واحده
بتحب
اقعد اقولها:
يابنتي حب ايه! ده وهم اصلا ومفيش حاجه اسمها حب..
يمكن عشان وعيت على الدنيا لقيت ماما متجوزة بابا وهي صغيرة! اينعم جوازهم
مستقر وعايشين
مع بعض راضيين بس مبشوفش في عيونهم الحب اللي بسمع عنه في القصص والروايات!
بشوف دايما في عيونهم الموده وعشرة سنين والتفاهم.. لكن فين الحب اللي
الناس بتتكلم عنه؟
يبقى اكيد مش موجود! ولا موجود؟؟ يووووه مش عارفة بقى..
حرام عليكي يا اماني امتى الدرس ده يخلص بقى عشان اعرف انتي معجبة بمين؟؟
وفجأة وعيت على صوت المستر وهو بيقول:
المهم المرة الجاية اعملوا حسابكوا انه هيبقى فيه امتحان في درس النهاردة..
انا لنفسي:
يادي النيلة! ادي اللي خدته من التفكير في الحب! هعمل ايه دلوقتي
علياء:نددددى
انا بخضة:ايوة
علياء:ايه يابنتي سرحانة في ايه!؟
انا:ولا حاجة ولا حاجة
علياء:ولا حاجه ازاي ‘ انا واخده بالي منك طول الدرس قاعدة سرحانة خالص
انا:لا عادي يعني
نهى:انا مش فاهمة حاجه في درس النهاردة
اشراق:انا هبقى اشرحهولك
انا:واشرحهولي انا كمان
علياء:غريبة يعني! اول مرة متفهميش درس من مستر حمدي
انا:المهم يا اماني مين بقى اللي معجبه بيه ده
اشراق:انا مش فاهمة اعجاب ايه ده واحنا ثانوية عامة ‘ يعني مذاكرة وقرف وهم
هو الواحد هيلاحق
على هم المذاكرة ولا هم الحب وعذابه وسنينه..
اماني:خلينالك هم المذاكرة يا ست اشراق وبعدين الحب ده مش وحش ولا حاجه
بالعكس الحب
ده حاجه حلوة اوووي ‘ بس انتي عشان قلبك بينام ويصحى يحلم بالفيزيا
والكيميا والاحياء
انا:يوووه ما تقووولي بقى يا اماني مين..
اماني بابتسامة : هيثم
انا:هيثم هيثم اللي معانا في الدرس
اماني:ايوووة
انا:بس...
اماني:بس ايه؟
انا:ده لعبي
اماني:لا خالص انا بس عايزة افهم مين اللي قالكم النظرة الغلط دي عنه
علياء:متحاوليش يا ندى معاها اصل انا ونهى قلنا ليه امبارح كده وهي مصدقتش
اماني:ولا هصدق.. بس بزمتك يا ندى مش مسمسم وعسووول كده
انا:اه هو حلوو بس انا بشوفه بيبصبص على نص بنات المجموعة اللي معانا
اماني:يا بنتي بقلك بحبه وهو كمان بيحبني
نهى:وايه عرفك بقى ان شاء الله؟ قالك؟؟
اماني:لا بس مش واخدين بالكم انه مركز اوي معانا عشان انا طبعا معاكم
اشراق:والله؟!
اماني:ايووة
انا:طب انا لازم اروّح عشان متأخرش
اشراق:طب متيجوا نتعشى في مكان
انا:لا انا هروّح اخاف اتأخر
نهى:يا بنتي انتي امتى بقى هتبطلي خووف
انا:معرفش
علياء:سبوها على راحتها الله..
****************************
وبعد اسبوع كنت كل لما اروح الدرس احاول اخد بالي من هيثم اكتر واشوف
حركاته عشان اعرف هل
هو فعلا معجب بأماني زي ما هي بتقول ولا ده وهم منها..
واول ما ابتدى الدرس شلت الافكار من دماغي عشان أعرف أركز وميضعش عليا الدرس زي المرة
اللي فاتت..
بعد ما خلص الدرس وفي اليوم ده اماني كانت غايبة فيه فجأة راح هيثم ليهم
وقال:
سلامو عليكم
علياء ونهى:وعليكم السلام
اشراق:طيب يا بنات انا ماشية ..سلام
انا مردتش السلام لاني كنت مرعوووبة اوي وفجأة لقيت جسمي كله بيترعش جامد ‘
بس فضلت
واقفة مكاني مبتحركش ولا بنطق وبشوف هيثم هيقول ايه..
هيثم بيبص ليا ويقلي:مش تردي السلام ده حتى السلام لله
انا بصوت مرعوب وواطي جدا:وعليكم السلام
هيثم:ممكن اخد الملزمة اللي انتي عملاها للمراجعة عشان اصورها بعدين
ارجعهالك
فضلت باصة ليه من غير ما اتكلم وبعدين قالي:
ممكن؟
انا بصوت واطي:اه ممكن
هيثم:طب هي فين عاوزها..
انا بمد ايدي وهي بتترعش اوي وبديله الملزمة..خدها وقال:شكرا ومشي
بعد ما مشي علياء ونهى بيبصوا ليا ‘ علياء بتقولي:
مالك يا ندى؟ بتترعشي ليه كده
انا:مم مش عارفة بس انا خفت اووووي
نهى:يا دي النيلة عليا وعلى سنيني يا بنتي ليه هو كلك مثلا! ده كل اللي
قاله هاتي الملزمة
وبهدوء وبأدب..
انا:مش عع اارفة بب بس ااا انا عمري مما مما ككلمت ولاد! وطول عمري في
المدرسة
مم ع بنات
علياء:واحنا كمان كلنا في مدارس بنات ‘ بس الفكرة انتي الخوف جواكِ بزيادة
انا:اا ااه..طط طب ت تت تفكتروا اماني هتزعل مني؟
نهى|:ليه؟
انا:يي يعني عع عشان هو طلب مني م الم م لزمة
علياء:لا طبعا وهو بمزاجك يعني! ولا انتي اللي قولتيله مثلا!!!!
نهى:يلا نمشي طيب
انا:مم مش قادرة رجلي كلها بتترعش ‘ مش عاا اا عارفة تهدى
علياء:طيب اهدي يا ندى وبراحة ‘ خلاص محصلش حاجه
**************************
روّحت البيت وكنت عايزة اتكلم مع ماما في الحوار اللي حصلي وليه لما هيثم
قرب مني وكلمني
انا كنت بترعش اووي كده بس خفت اتكلم معاها وتقول لبابا .. ماما مكنتش
بتخبي حاجة على بابا
عشان كده محبتش اروح اقولها حاجه ...
في اليوم التاني لما روحت المدرسة وحكيت لاماني على الموقف اتضايقت جدا بس
نهى زعقتلها
وقالتلها:
وهو بمزاجها يعني يا ااماني الولد جه وطلب منها الملزمة!
اماني بغيظ:واشمعنى طلبها من ندى؟
اشراق:الله واحنا ايش عرفنا يعني!
علياء:لا معلش معلش ثواني يعني ايه اشمعنى طلبها من ندى؟!
اماني:ايوووة يعني اشمعنى ندى؟ اكيد فيه سر
انا بخوف:سر ايه؟ انا مش عندي اسرار من وراكم
نهى:فكك يا ندى وانتي يا اماني متغاظة بقى انه اصلا مش معبرك واختار اليوم
اللي انتي غايبة فيه
مخصوص وكلم ندى فده عشان انتي غيرانة منها..
اماني بغيظ وعصبية:والله ! وهغير منها في ايه اصلا! دي حتى لما هيجي يكلمها
تاني هتفضل تترعش
زي عادتها ومش هتعرف تقوله كلمتين على بعض وهيزهق منها..
انا بضيق:شكرا يا ستي وربنا يسامحك
علياء:عيب عليكي يا ااماني كده...
ومن يومها وانا عرفت ان اماني بتغير مني وعندها حق اصل هي كانت معجبة بهيثم
واللي اتفجأت
بيه لما رجعلي الملزمة ولقيت فيها.........
استنوني الحلقة اللي جاية........
