وانتهـــى موسم الحب ! قصــــــــة قصـــــيرة

وانتهى موسم الحب!

في جامعة القاهرة تحديدا عند كلية تجارة فريدة كانت لسه خارجة من محاضراتها ولقت

خطيبها سامح واقف مستنيها..

فريدة بابتسامة:موحا انت واقف بقالك كتير؟

سامح:لا لسه جاي من خمس دقايق

فريدة:طب يلا بينا لحسن هموت واكل اي حاجه..

تروح فريدة مع سامح للكافتيريا ويطلبوا سندويتشات وعصاير ويقعدوا يتكلموا لحد ما

يجي وقت محاضرة فريدة التانية..

فريدة قبل ما تدخل المحاضرة بتقول لسامح:ممكن حبيبي انت تروّح ومتستنانيش.. انا

ممكن اخرج شوية مع البنات بعد المحاضرة..

سامح:امممم.. هتخرجي مع مين؟

فريدة:مع هبة ومنة وليلى وندى!

سامح:هتروحوا فين؟

فريدة:مش عارفة لسه

سامح:طيب اما تعرفي قوليلي وياريت تقوليلي قبل ما تتحركي مش لما توصلي المكان!

فريدة:حاضر يا موحا..

************************

بعد ساعة خلصت فريدة محاضرتها وخرجت هي وصحابتها من السيكشن..

هبة:ها نروح الكافيه

فريدة:طب قولوا هنروح فين عشان اقول لسامح الاول

هبة:اففف على فكرة سامح خطيبك ده خنييق

فريدة:ليه بس حراااام عليكي يا هبة

منة:ليه بقى ان شاء الله!! عشان راجل!

هبة بغيظ:وهو الرجوولة بقى انه يفضل يعمل سي السيد ويخنقك رايحة فين وجاية منين!!

ده على فكرة اسمه شك..

فريدة:يوووه انتوا هتتخانقوا ومتقولوش ليا هنروح فين عشان الحق اقول لسامح..

هبة:افف قوليلوا هنروح الكافيه اللي جمب الجامعة..

وبسخرية تكمل وتقول:وابقي خليه يجي يتأكد!!

ندى:ايه يا هبة ده!! هي وخطيبها واحرار مع بعض.. ملناش دعوة بيهم..

فريدة بتبعد شوية وتكلم سامح:ايوة يا سامح انا هروح مع البنات الكافيه اللي جمب

الجامعة..

سامح بضيق:ولو اني مش بحب الكافيه ده بس روحي وحاولي يا فريدة متتأخريش

عشان متمشيش في الشارع بليل..

فريدة:حاضر يا سامح..

*************************

البنات في الكافيه قاعدين..

ليلى:يا جماعة انا تعبت بقى ما تيجوا نروّح

فريدة:اه احسن نروّح عشان منتأخرش وسامح يقلق عليا اكتر..

هبة:يااااربي مش كفاية اصلا اننا حاسين انه كانه خارج معانا! ده كل نص ساعة

يتصل بيكي انتي فين وبتعملي ايه؟!!! يا بنتي ده مش حب ده خنقة وشك وقرررف!

فريدة بضيق:هبة لو سمحتي انا بحب سامح وبحب طريقة حبه ليا..

هبة:انا قلبي عليكي يا فريدة ‘ بصراحة انتي اموووورة اوي وهو جماله عادي! وخلاكي

تلبسي الحجاب ساعة ما خطبك وكل ما نيجي نخرج معاكي يفضل يتصل بيكي كل

شوووية!! احنا مش بنعرف نستمتع معاكي ساعة على بعض! ده غير اي مكان لازم

تخدي الاذن!

فريدة:طبيعي عشان هو خطيبي!!!!

هبة:يا سلااااام ! ما انا اخويا خاطب ومش بيعمل كده

منة:يبقى اكيد مش بيحبها اصلااااا ولا هي فارقة معاه

هبة:على فكرة بقى انتوا فاهمين الحب غلط! الحب اه اهتمام بس مش خنقة وشك!!

ليلى:يلاااااا نروّح بقى..

ندى:اه يلا بينا.. وخفي يا هبة على البنت واطلعي من دماغها..

هبة:ده عشان انا بحبها وخايفة على مصلحتها... وعارفة انها هبلة وعبيطة..

*********************

فريدة لما روحت البيت ودخلت اوضتها ولسه هتتصل بسامح قعدت تفكر في كلام هبة

لحد ما سامح اتصل بيها..

فريدة بضيق:ايوة يا سامح

سامح باندهاش:مالك يا فريدة؟

فريدة بضيق:مفيش

سامح:لا بجد حبيبتي مالك؟

فريدة:يووووه يا سامح! عايز تعرف!!

سامح:اه ياريت..

فريدة:بدأت اتخنق منك يا سامح! انت عارف انت كام مرة اتصلت بيا وانا مع صحابي؟!

انت لو شاكك فيا مينفعش على فكرة!!

سامح:ايه الهبل ده يا فريدة؟! شك ايه وبتاع ايه!! انا بحبك وبخاف عليكي اووي وبعدين

الكافيه الزفت اللي انتي روحتي ده بيبقى مليان شباب وممكن اي حد يضايقكم ‘ عشان

كده كنت قلقان فكل شوية بتصل بيكي!!!

فريدة:طيب يا سامح ‘ انا تعبانة وعاوزة انام دلوقتي

سامح:انا اسف يا فريدة والله لو مكنتش خليتك تستمتعي بالخروج مع صحابك بس انا فعلا

كنت قلقان عليكي.. تصبحي على خير

فريده:وانت من اهله..

****************************

تاني يوم فريدة مع هبة قاعدين لوحدهم ..

هبة:غريبة يعني!! موبايلك مش بيرن كل شوية هو سامح مات ولا ايه!!

فريدة:لا بس...

هبة:بس ايه؟

فريدة بتردد:يعني اتخانقت معاه امبارح

هبة بفرحة:ليه؟!

فريدة:يعني قلتله انه شكاك وكده

هبة:ايوووة كده برافو عليكي..

بعد خمس دقايق..

هبة:الحقي الحقي ده واقف هناك اهو

فريدة:اكيد جاي يصالحني

هبة:يصالحك ولا بيراقبك من بعيد! عموما انا ماشية واوعي تخليه يستغفلك بكلمتين حب

عشان انا عارفاكِ هبلة وما بتصدقي..

فريدة:طيب...

سامح بيجي يقعد مع فريدة بعد ما هبة تمشي..

سامح:ازيك؟

فريدة:كويسة

لحظة سكوت وبعدها فريدة بتتكلم بعصبية:سامح انت كنت واقف بعيد ليه بقى! كنت

بتراقبني!

سامح بعصبية:انا مش عارف من امتى اهتمامي بيكي اتحول لشك؟! مين اللي زرع الافكار

الزبالة دي في دماغك؟!!!

فريدة:سامح انت مستوعب انت بتحبني ازاي؟؟

سامح بيرفع حاجب ويقول:لا؟! قوليلي انتي؟؟

فريدة:من اول ما تصحى تفضل تتصل بيا حتى لو انا نايمة! ولازم تقعد تسألني هعمل ايه

طول اليوم وياااه لو عملت حاجه ونسيت اقولها ليك! كده تبقى كارثة!!!

سامح يقاطعها:بعمل كده عشان ابقى عارف انتي فين؟؟ وعشان لو حصلك حاجه لقدر الله؟!

عشان متصلش بيكي الاقيكي فجأة في مصيبة؟!!

فريدة:وانا تعبت وزهقت وقرفت بصراحه

سامح:نعم؟

فريدة:حتى الحجاب لبسته مش عشان انا مقتنعة اوي! لا عشان انا بحبك وعشان حضرتك

بتغير عليا وعايزني اتحجب!!

سامح:فريدة فريدة انتي عايزة ايه؟؟

فريدة:عايزاك تحبني بعقل يا سامح

سامح:ماشي يا فريدة وانا هعملك اللي انتي عاوزاه ونشووف..

**********************

بعد يومين فريدة بتخرج من المحاضرة...

ليلى:غريبة يا فريدة مبقناش نشوف سامح مستنيكِ

فريدة:اه منا قلتله يبطل بقى الحركات دي

هبة:والله برافو عليكي

ندى:لا بالعكس بقى! دي كانت اجمل حاجة انا في نظري انه تطلعي وتشوفيه هنا

قاعد مستنيكِ!

فريدة:لا يعني ما هو مش حرس يعني..

هبة:بالظبط وبعدين هو لو كان بيستناها حب كان ماشي انما ده بيتسناها شك!

منة بعصبية:انتي بتخرفي تقووولي ايه

هبة:بصوا البنت عقلت ومتحاولوش بقى تبوظوا عقلها

ليلى:والله ما في حد هيبوظها الا انتي!!

**********************

فريدة بتتكلم مع سامح في التلفون..

فريدة:عملت ايه النهاردة؟

سامح:مفيش عادي بعد ما خلصت جامعة ‘ خرجت مع صحابي وكده

فريدة:ايوة يعني خرجت مع صحابك فين؟

سامح:ده شك؟!

فريدة:لا عايزة اعرف

سامح:يهمك؟

فريدة:طبعا؟

سامح:منا كان بردو بيهمني اعرف انتي رايحة فين ومع مين؟؟

فريدة:يووووه يا سامح انت خنيييق على فكرة

سامح:لاااا انتي اللي مش ملاحظة يا فريدة ان العلاقة بنا بقت باردة اووووي!!! ومبقاش

ليها طعم وكل واحد في ناحية ومحدش فينا يعرف عن التاني اووي..

فريدة:والله كل ده عشان بطلت تستناني على المحاضرة وتتأكد انا كلت كام مرة في اليوم؟!

سامح:فريدة انا مبقتش طايق الاسلوب ده بينا ولازم بكرة اشوووفك

فريدة:اوك..

*********************

تاني يوم فريدة مع هبة قاعدين...

هبة:لو عايزة رايي بصراحة انتي تفسخي خطوبتك منه والمفروض تتجوزي واحد مخه

مش مقفل كده زيه..

فريدة:بس انا بحبه يا هبة

هبة:حب ايه يا بنتي! منا لو شايفاه بيحبك فعلا هقلك ماشي.. واحد غيره كان يتمنالك

الرضى ترضي! انما ده حابسك بين غيره وقرف ونكد وشك..

فريدة:صح انتي صح

هبة:المهم اول ما يجي تقلعي الدبلة ومن غير تردد مفهووم..

فريدة:ماشي..

******************************

بعد شهر البنات في بيت فريدة بيحاولوا يخرجوها من الكأبة اللي هي فيها..

ليلى:يافريدة انتي زعلانة ليه دلوقتي! مش ده قرارك؟؟

فريدة:مكنتش اعرف انه قرار صعب كده

هبة:ولا صعب ولا حاجة .. الصعب اللي انتي عملاه في نفسك ده!

منة بضيق من هبة:ما هو ربنا يهديكي يا فريدة ويبعد عنك الشياطين

هبة:قصدك ايه بقى يا ست منة؟؟؟

منة:وانا جيت جمبك ولا كلمتك

هبة:باين اووي انك بترمي كلام عليا

منة:ده اللي على راسه بطحة بقى ولا ايه..

**********************

وبعد ساعتين كل البنات بيمشوا ماعدا هبة بتفضل مع فريدة..

هبة:بقلك ايه يا فيري ما تيجي نخرج النهاردة

فريدة:لا مليش نفس وبعدين الساعة 9 بليل؟

هبة:بصي احنا هنقول لاهلك انك هتباتي معايا وتيجي معايا نخرج ونقضيها

فريدة:لا انا اخاف

هبة:تخافي من ايه بس! اوعي تكوني فاكرة نفسك لسه مخطوبة لسامح بقى وكده..انتي

دلووقتي حررررة يا بنتي..

فريدة:طيب

*******************

بعد ساعتين هبة في العربية ومعاها فريدة..

فريدة بسذاجة:هنروح فين؟

هبة:هنروح الديسكو

فريدة بخوف:ايه؟؟

هبة:ايه عمرك ما روحتي هناك؟

فريدة:لا طبعا!!

هبة:فاتك نص عمرك.. بس هو فيه حاجة كده

فريدة:ايه؟

هبة:هنروّح عندي وتقلعي الحجاب والبسك لبس من عندي ما هو مش معقول هتروحي

الديسكو كده؟؟

فريدة بخوف:بس انا خايفة اوووي

هبة:يابنتي عيشي بقى حياتك..

وفعلا بعد ساعة تروح هبة ومعاها فريدة الديسكو بعد ما قلعت الحجاب ولبست فستان

قصير وضيق جدا على جسمها ويبرز مفاتنها ..

هبة:هاني اخويا اهو هناك واقف مع صحابه

فريدة باندهاش:طب نعمل ايه ؟ نجري نستخبى؟

هبة:ههههه نستخبى ليه؟!! ما هاني مستنيني اصلا

فريدة:ايه ده!! اخوك عارف انك جاية هنا

هبة:طبعا يا بنتي انا اخويا فرررري

وتروح هبة لاخوها وصحابه..

هبة:هاني دي بقى فريدة صحبتي اللي حكتلك عنها كتير

هاني باعجاب:يااااه دي طلعت احلى بكتير مما كنت متخيل

فريدة بكسوف:شكرا

هاني:تحبي نرقص سوا؟

فريدة:اممم مبعرفش

هاني:ايه ده!!! معقوول مبتعرفيش ترقصي؟

فريدة:اه

هاني:خلاص هعلمك انا

ويبدأ هاني يمسك ايد فريدة ويعلمها الرقص..

ترجع فريدة وهبة الساعة 3 بليل البيت..

فريدة بفرحة:انا مش مصدقة اني عملت كده النهاردة! ده انا حياتي كانت مملة اووي

هبة:مش قلتلك يابنتي انتي اللي مقفلة على نفسك

فريدة:قال وانا كنت زعلانة على سامح ههههههههه

هبة:بقلك صحيح هو فيه موضوع كده بس خايفة اقوله ليكي

فريدة:ايه؟

هبة:هاني عايز يتجوزك

فريدة بصدمة:ايه؟! هو مش خاطب؟

هبة:لا ما هو فسخ يا بنتي

فريدة:وهو لحق يحبني امتى؟؟

هبة:ههههههههه لا يحبك ايه يا بنتي!! هاني اخويا بيقدر الجمال اووي وهو شافك جميلة

وقال انه عايز يتجوزك

فريدة:انا مش عارفة اقووول ايه!! انا متلخبطة اوووي

هبة:متبقيش هبلة وترفضي

فريدة:بصراحة واحد زي هاني اخوكِ ده لقطة اوووي..

هبة:واهم حاجه انه مخه متفتح مش زي مخ الغبي اللي كنتي خطباه..

فريدة:امممم

**********************

بعد شهرين فريدة في بيتها بعد ما اتجوزت هاني ...

فريدة بتتصل على هاني كتير ومبيردش.. وبعد المحاولة العاشرة..

فريدة بعصبية:ايييه يا هاني!! مش بتصل بيك كتيير

هاني بغضب:عايزة ايه!!

فريدة:عايزة اخرج يا هاني

هاني:طب ما تخرجي

فريدة:الله مش انت جوزي ولازم اخد رايك

هاني:لا عادي .. ميفرقش

فريدة:ايه؟! ميفرقش

هاني:يوووه انتي فاضية اوي كده ليه

فريدة:انت فين كده اصلا؟

هاني:انتي مالك؟

فريدة:يعني ايه مالي؟ مش انا مراتك ولازم اعرف؟؟؟

هاني:لا بقلك ايه انا من اول يوووم قلتلك الحجات الخنيقة دي مش عندي انا.. بااااي

دلوقتي مش فاضي ويقفل السكة...

ترجع فريدة بذكرياتها لورا لاول يوم جواز ليها مع هاني..

هاني لفريدة:بصي بقى يا فيري من هنا ورايح اسم فريدة ده تنسيه انتي اسمك فيري هانم

والحجاب يتقلع بصراحة انا حابب مراتي تكون مزة وشيك ولما نروح حفلة تبهر الناس

بلبسها وده مش هينفع مع الحجاب..

واه لازم تتعودي على السهرات الكتيير ‘ عشان انا هعزم ناس كتير وناس مهمة اوووي

والغيرة دي ملغية من حياتنا سواء مني او منك! احنا بنتعامل مع ناس هاي لفل

وارستقراطيين يعني احيانا عشان نجامل ممكن تلاقي سفير مهم بيحضنك او بيبوس ايدك

فعاااادي جداااا وانا عشان اجامل ممكن ابوس مرات رجل مهم وده بردو عادي جدا..

فريدة بخوف:بس انت جوزي يا هاني ومش هبقى مرتاحة وانا شايفاك بتحضن ست

تانية على حساب المجاملات زي ما بتقول!

هاني بكل برود:طب ما انا راجل وهسمحلك انك تقضي سهرة لطيفة مع رجل اعمال

ابقى عايز اخلص منه وانتي تبقي العمولة اللي هو عايزاها.. دي الحياة يا فيري

وحاولي بقى تنسي البيئة اللي انتي جيتي منها عشان تتبسطي هنا معايا..

فريدة بتفوق من ذكرياتها وبتمسح دموعها وتخرج تروح الديسكو وتفضل تشرب

سجاير كتير وبعصبية...

يجي هاني من وراها فجأة:ايه حبيبتي مالك؟

فريدة:مفيش

هاني:طب بقلك ايه ‘ اعملي حسابك بكرة هتروحي مع الخشاب بيه شرم يومين

فريدة بقرف:ايه؟

هاني:يعني يا روحي لو فرفشتيه هيعقد معايا صفقة هتعيشنا ملوووك..

فريدة:وانت عندك عادي؟

هاني:اذا كان انا اللي بقلك روووحي!! وهوصلك بنفسي طبعا

فريدة بسخرية:هه والله! لا كتر خييييرك!! هاني انت مبتغرش عليا؟؟ انت عمرك سألتني

انا بروح فين ولا باجي منين؟؟ انت عمرك قلبك ده اتحرق عليا؟؟؟ انت عمرك اهتميت

بيا؟؟ انت بتحبني اصلااااا!!!

هاني:تؤ اففف ايه الدراما اللي على بليل دي! شكلك تقلتي في الويسكي شوووية

فريدة:لااااا انا اللي استغبيت لما سبت الحب ورميته وافتكرته في يوم خنقة وغيرة وشك!!

انا الغلطانة لما سمعت كلام اختك ورضيت بالحياة المقرفة دي!!!! انا مراتك يا بني ادم

مش سلعة بتعرضها لرجال الاعمال واللي يدفع فيها اكتر يبقى هو الكسبان!!!!!

انا ازي رضيت بحياة زي دي!!!! انا كان المفروض اعرف ده من اول يوم طلبت

فيه مني اني اقلع حجابي واتعرى للي يسوى واللي ميسواش!!! لا انا اللي غلطانة

لما سبت اختك تتحكم فيا من الاول ودوست على قلب سامح وعلى حبه عشان الحياة

المقرفة اللي انا عايشها معاك دي!!!

هاني:حب اييييه اللي انتي بتتكلمي عنه ده؟! موسم الحب انتهى من زمان

فريدة وهي بتعيط والسجاير في ايدها وبتترعش:فعلا موسم الحب انتهى من ساعة ما

رميته في الارض ومقدرتش اهتمام سامح بيا ولا خوفه وافتكرت انه بيتحكم فيا لمجرد

انه راجل وجيت ليك انت.. انت مش راجل! انت زبالة... اتفوووو عليك

هاني بيضرب فريدة بالقلم:انتي اللي غبية ومقرفة وانا غلطان اني لميتك من الشوارع

وعملت منك هانم وبرنسيسة! بكرة تروحي للخشاب غصبن عنك وهتعملي اللي يعوزه منك

وبعدها هرميكي تاني للكلاب السعرانة اللي في الشارع.. عشان اللي زيك لحم رخيص

بيترمي للكلاب وبس...

***************************

تاني يوم البوليس بيلاقي جثة فريدة مقتولة منتحرة في الفيلا وجمبها ورقة مكتوب فيها:

لكل بنت قبل ما يفوتها موسم الحب وينتهي .. اوعي تفتكري ان اهتمام حبيبك او خطيبك

او جوزك خنقة وحبل رابطك وطوق ملفوف حواليكي عشان يخنقك.. بالعكس الحب ده

هو اللي بيحميكي من شتا ممكن يعريكي ويخليكي مُجردة من كل حاجة الا عيوبك..

ويخليكي رخيصة في عيون حيوانات مفترسة تبيع وتشتري فيكي... لكل بنت قدري

النعمة اللي في ايدك ومتشوفيش ان الحرية والتحرر هما النجاة! الحرية هو انك تكوني

معززة مكرمة ومتصانة في عيون حبيبك والتحرر هو انك تتحرري من قيود الظلام

اللي بتجرك للرذيلة..

النهايـــــــــــــــــــــة