ورقة طلاق "قصـــــــة قصيــــــــرة"

ورقة طلاق!

قاعة محكمة وسها كانت قاعدة قلقانة ومتوترة.. بتبص يمين وشمال ومش شايفة المحامي

بتاعها جه لسه..

سها بتوتر:ماما مش شايفة المحامي اتأخر زيادة عن اللزوم!!

الام بطيب خاطر:متعرفيش يا بنتي الغايب حجته معاه..

سها بتوتر:ممش عارفة يا ماما تأخيره كده مش عاجبني ‘ هو امبارح قال انه هيجي من

الصبح!! مجاااش ليه لحد دلوقتي..

الام:نستني كمان شوووية ونشوووف هنعمل ايه؟!

سها:ماما الجلسة هتبتدي بعد نص ساعة والبتاع ده مجاش.. تؤ لا انا هقوم اشوفه هنا

ولا هنا..

تقوم سها تمشي فتناديها الام:خدي يا سها.. تؤ ..يا سها رايحة فين...

تطلع سها من برة قاعة المحكمة تفضل تبص يمين وشمال وتمشي في ممرات المحكمة

وهي مش عارفة هي هتلاقي فين ‘ بس قلبها كان حاسس انها هتشووفه..

وفجأة تلاقيه من بعيد اووي واقف مع المحامي بتاع جوزها ‘ فتقرر انها تقرب منهم ومن

غير ما حد يشوفها عشان تسمع هما بيقولوا ايه..

محامي جوز سها:هندفع 5000 جنيه وتخسرهم القضية دي وده اخر مبلغ ممكن ندهولك..

محامي سها:بب ببس دول برضو يعتبروا ولايا..

محامي جوز سها:بقلك ايه! انت هتعمل شريف ولا ايه !! ما انا عارفك كويس ولو انت

زي ما بتقول كده وصعبانين عليك!! واقف معانا ليه من الاول وعمال تخلينا نساوم فيك؟!

محامي سها:خخ خلاص ماشي.. انا هدخل وهخليها تخسر القضية بس انت زود المبلغ

شوية..

سها بتحس ان راسها بتلف وبتحس ان معدتها مقلوبة ‘ بتجري بسرعة وتخش القاعة

الام بقلق:كنتي فين يا بنتي..

سها بتبص وراها عشان تتأكد ان المحامي مش وراها وتقول:ماما مماما احنا لازم نغير

المحامي ده ‘ انا شفته وهو بيتفاوض مع المحامي بتاع الكلب عشان يخسرني القضية..

الام وهي بتعيط:حسبي الله ونعم الوكيل .. حسبي الله ونعم الوكيل.. خلاص احنا نقله

يطلب تأجيل القضية ونبقى نغيره..

المحامي بيدخل ومرسوم على وشه ابتسامة صفرا..

الام:كنت فين حضرتك؟

المحامي:مفيش يا مدام كنت بشوف قضية كده المفروض اترافع عنها..

الام:طب بقلك ايه حضرتك ‘ معلش احنا عايزينك تتطلب تأجيل القضية..

المحامي:ليه بس يا فندم

الام:زي ما بقول كده لحضرتك بس .. اطلب تأجيل القضية..

المحامي بتردد وبعد تفكير لمدة قصيرة:خلاص ماشي .. هطلب..

بعد ما الجلسة خلصت والقاضي امر بتأجيل القضية..

المحامي للام:طيب حضرتك انا كنت محتاج شوية ورق كده عشان القضية

الام:لا يا بني معلش ‘ انت كتر خيرك لحد كده واحنا هنشوف محامي..

المحامي وشه اصفر وبيقول بقلق:ليه بس كده يا حجه؟؟ هو حصل حاجه مني!

سها ببرود:لا محصلش بس احنا هنجيب محامي تاني وخلاص.. وحقك خدته ..

تمشي سها ومعاها مامتها وهي بتحمد ربنا انها على اخر لحظة قدرت تكتشف المحامي

اللي كان هيبيعهم..

اول ما بتدخل سها البيت بتروح اوضتها وتبص على ابنها ياسر اللي نايم في سريره

وتفضل تبوس فيه كتير وتقوله:

ربنا يخليك ليا يا احلى حاجه في دنيتي..

سها بتقعد على السرير وترجع بذكرياتها لورا..

من سنة فاتت كانت سها بتحضر لفرحها .. سها دكتورة متخرجة من كلية طب بشري ..

بنت هادية وطيبة ورقيقة وبتروح من الشغل للبيت ومن البيت للشغل.. هي اخر العنقود

عندها اخين ‘ هما كمان دكاترة ومتخرجين من طب بشري.. والدها متوفي وهي قاعدة

مع والدتها في البيت..

في يوم بعد ما رجعت من الشغل مامتها بتقلها بابتسامة:

اسكتي مش زينب صحبتي جايبة ليكي عريس

سها:بجد؟مين ده

الام:ادهم اخو مرات جوز بنت خالتها

سها:ايه اللفة دي!

الام:اه وبتقول انه قابل اخوكي في المسجد كام مرة وهو بيصلي عشان كده قال انه يناسبنا

سها:اممم

الام:بس بقلك ايه منقلش لحد دلوقتي لحد ما نشوف الليلة ماشية ازاي..

سها:ممم اوك

وبعد شهر وافقت سها على ادهم وده طبعا بعد ما اهلها سألوا عليه في كل مكان وفي شغله

وفي منطقته والكل شكر فيه وفي هدوءه وطبعا هو كمان كان طبيب..

اتخطبت سها لادهم وبدأوا يروحوا يشتروا حجات البيت عشان فرحهم..

ادهم:بقلك ايه احنا لازم ننجز وكده عشان العقد اللي جالي في السعودية ده!

سها:احنا هنسافر السعودية..

ادهم:اه

سها:بس انا يا ادهم مش عايزة

ادهم:لا بقلك ايه يا ماما انا معنديش الكلام ده! انا ابقى في حتة وانتي في حتة!!

سها:طيب انت في شقة هناك لينا ولا ايه نظام هناك؟؟

ادهم:بعدين بعدين نتكلم في الموضوع ده! ولا هنتناقش هنا في الشارع!!

سها بتسكت وبتكمل خروج مع ادهم عشان يخلصوا حاجات الفرح..

*****************

بعد يومين كانت سها مع بنت خالتها وادهم وكانوا رايحين يشوفوا بردو حاجات للبيت

سها:ادهم هو انا مش هشوف الشقة بتاعتنا اللي هنا ولا ايه؟!

ادهم:ااه ااه هتشوفيها

سها:ايوة امتى؟ عايزين نوضبها وعايزة اشوف ناقصها ايه وكده؟؟

ادهم:طيب طيب

بنت خالة سها مروة وهي سايقة بيهم العربية:هنا ساكنة صحبتي

ادهم:والله؟ فين؟؟

مروة بتشاور على بيت صحبتها وهي ماشية بالعربية:هنا

ادهم:طب ايه ما تعرفينا على صحبتك دي..

وبعد ما اشتروا الحاجات وروحوا..

سها لادهم في التلفون:ادهم انا فيه حاجة انت عملتها النهاردة معجبتنيش..

ادهم:ايه هي؟؟

سها:يعني ايه تقول لبنت خالتي ما تعرفيني على صاحبتك؟!! انت كده مش بتعملي اعتبار!!

ادهم بعصبية:انا يا ماما لو كنت قلتلها كده فانا قلتلها عشان بنت خالتك قليلة ادب ومش

متربية!! يعني ايه تقول صاحبتي ساكنة هنا انا مش فاااااهم ايه قلة الادب دي!!

سها بعصبية:ايه ده ايه ده انت ازاي بتتكلم كده!!

ادهم:بصي يا ماما انا مرضتش احرج بنت خالتك عشان كده قلتلها كده ‘ لكن ياريت

تفهميها مرة تانية ان احنا طباعنا مش زي طباعها..

********************

بعد شهر كانت سها وادهم قاعدين في البيت عند سها وبيتفقوا على العفش بتاع البيت

سها:انا مش هسكن مع مامتك يا ادهم وده مكنش اتفاقنا!!

ادهم:ومي نقالك اننا هنسكن ‘ احنا بس عشان مش هنلحق نوضب لينا بيت دلوقتي وانا

لما هتجوزك هنسافر على طول على السعودية فهنقعد اليومين اللي بعد الفرح في بيت

امي ونطلع على السعودية..

سها:ولما نرجع مصر؟؟

ادهم:هنبقى نوضب شقتنا!!

الام بتيجي وبتحط فلوس لادهم وتقوله:بص يا ابني دول 10000 جنيه حاجة بسيطة كده

عشان اما تسافروا السعودية ولحد ما تقبضوا من الشغل ‘ تعرفوا تدبروا نفسكم..

*******************

قبل الفرح بيومين وبعد كتب الكتاب كانت سها مع ادهم برة عشان يشتروا لبس لسها..

ادهم:بقلك ايه اشتري كله عبايات ونقاب وكده

سها:بس انا مش هتنقب يا ادهم!!

ادهم:مش بمزاجك اصلا يا هانم في السعودية لازم تتنقبي!!

سها:بس انا مش عايزة اشتري لبسي كله عبايات ومش عايزة اتنقب؟!!!

ادهم:بقلك ايه يا ماما انتي هتفهمي في قوانين السعودية اكتر ولا ايه!! انتي هتعملي

اللي انا عايزة ورجلك فوق رقبتك...

سها اتعصبت جدا وحست باهانة فظيعة وفضلت تعيط جامد وراحت طلبت من مامتها:

ماما انا عايزة اطلق

الام:يا بنتي اهدي بس..طلاااااق ايه!! وانتي بعد بكرة فرحك!! انتي عاوزة الناس تاكل

وشنا!!

سها:مامااا مش طايقة الانسااااان ده بجد.. عاااااااايزة اتطلق ارحموووووووني.. ده انسان

مقررررف وبيعمل حاجات مقرفة وعايز يمشي كلامه عليا باي طريقة..

الام بتعيط :مش هينفع يا بنتي الناس هتاكل وشنا ويقووول كلام ميصحش وهيطلعوا فيكي

العيب.. انتي استهدي بالله بس كده وكل حاجة تروق..

سها:ده انسااان كذااااب وانا مش مرتاحاله..

الام:جاية تقولي دلوقتي كده وقبل الفرح.. اهدي بس وكل حاجة هتعدي باذن الله..

********************

اتجوزت سها من ادهم وسافرت معاه السعودية.. هناك اول ما دخلت الشقة لقتها شقة

عبارة عن اوضة ومطبخ وحمام.. حالة الشقة كانت تعبانة جدا ومش نضيفة..

المطبخ كان فيه تلاجة قديمة جدا ومش نضيفة ومليانة حشرات والبوتجاز مقرف

ومينفعش الواحد يشخن فيه اكل ولا يحط عليه حاجة من  كتر ما حالتة وحشة..

سها لادهم:ايه ده!! الشقة وحشة اوووي يا ادهم؟!

ادهم:وهو يعني انتي كنتي فاكرة هتيجي تسكني في قصر مثلا!

سها:لا مش كده؟ بس انت مفهمتنيش ان المكان تعبان اوي كده!!

ادهم:ماهو انتي هتنضفيه ..

سها:ده البوتجاز ده لو عملت فيه ايه مش هيتنضف ده يادوب يترمي!!

ادهم:لا لا يترمي ايه يا ماما وهو انا عندي فلووووس عشان اجيب غيره.. اتصرفي..

وانا هنزل اجيب اكل لينا النهاردة لحد ما توضبي الدنيا هنا..

************************

بعد شهر ادهم  داخل من برة الشغل ومعاه مفتاح غير مفتاح الشقة..

سها:ايه ده مفتاح ايه ده؟!

ادهم:مفتاح العربية الجديدة

سها بضيق:يعني عندك فلوس تجيب عربية ومش عايز تغير التلاجة!! وسايبني في البيت

من غير ولا مصروف ولا حاجة! افرض احتجت اشتري حاجة!؟

ادهم ببرود:تشتري ايه؟!! اللي عايزاه ممكن اجيبه ليكي؟ اسيب معاكي فلوس بتاع ايه!!

سها:يعني ايه تسيب معايا فلوس بتاع ايه!! ازاي تسيبني من غير فلوس!!

ادهم:انت بتعلي صوتك عليا!!

سها:متغيرش المووضووع!! خش شوووف البوتجاز المقرف اللي اتقسم فيه ضهري وانا

بنضفه عشان ينضف ومش عايز ينضف والتلاجة المقرفة اللي مليانة حشرات وقرف!!

وكل ما اقلك نجيب غيرهم تقلي مفيش فلوس ورايح تجبلي عربية!!!

ادهم بيقرب من سها ويمد ايده عليها ويضربها قلم على وشها..

ادهم:لما تتكلمي معايا توطي صوتك..

*************************

شهرين عدوا على سها وهي كل يوم في خناق مع جوزها ادهم واهانة منه وضرب

ويخرج من البيت يقفل الباب عليها بالمفتاح وميسبش معاها فلوس ابدا..

واكتشفت سها انها حامل وعلى اد فرحتها الا انها كانت زعلانة انها هتخلف من راجل

اناني زي ادهم..

*******************

وفي يوم رجع ادهم وقال لسها:هنعمل عمرة ايه رايك؟

سها:انا عاوزة اسافر عند اهلي شوية..

ادهم:اه وماله.. احنا نطلع بس نعمل عمرة

سها:طيب احجزلي تذكرة؟؟

ادهم:طيب طيب

سها:هتحجزلي يعني؟؟

ادهم:ما قلنا طيب!! خلاص بقى!!

***********************

عدى يومين وراحت سها مع ادهم العمرة وهناك حصل اللي مكنتش تتوقع انه يحصل..

بعد ما خلصوا راحت السوبر ماركت عشان تشتري حاجات ليها قبل ما تسافر..

وهي بتختار شوية كريمات على شامبوهات فادهم بيقلها:بتشتري ده كله ليه؟!

سها:عشان اما اسافر مصر ‘ مش بلاقي الحاجات دي هناك

ادهم:لا لا رجعي رجعي انتي جايبة حاجات كتيرة اوووي وانا معنديش فلوس

سها:يعني ايه معندكش فلوس؟! هو انا كل مااطلب حاجة تقلي معندكش؟! وبس شاطر

تروح تشتري عربية وتبعت فلوس لاهلك في مصر وتشتري لاخواتك هدايا وانا؟!

فين من ده كله؟؟؟

ادهم:انتي هتحاسبيني يا ماما ولا ايه!!! رجعي الحاجات دي ويلااااا بينا

في العربية اتخانقت سها مع ادهم جامد اوي وده خلى ادهم يقلها بعصبية وضرب

:ايه رايك اني هخنقك هنا ومفيش سفر وابقي وريني هتسافري ازاييي بقى

سها خافت وهربت بسرعة من العربية وفضلت تصوت في الشارع:الحقووووني

الحقووووووني

وقف تاكسي ليها وكان سوري وقالها :تعالي اركبي وهوديكي اقرب قسم بوليس

هناك اول ما دخلت كانت سها منهارة وبتعيط وبتقول للشرطة انا عايزة اتصل باهلي

في مصر..

اتصلت باهلها في مصر واللي راحواا اتصلوا بجيرانهم لانهم ليهم بنتهم في السعودية

يروحوا لسها في قسم الشرطة ويخلوهم جمبها ويطلبوا انها ترجع تسافر مصر..

وفعلا بعد عناء تلت اشهر كانت كلها ضرب واهانة من ادهم لسها رجعت مصر..

ومن ساعتها مشفتش سها ادهم وفضلت في المحاكم عشان تخلع ادهم وهو يحاول انها

متتخلعش..

خلفت سها من ادهم ياسر بس مخلتهوش يشوفه ولا هو طلب منها انه يشوفه ولا كان

بيصرف عليه..

رفعت سها قضية نفقة فراح ادهم اتفق مع مامته واخواته يرفعوا هما كمان قضية نفقة

عليه عشان لما يتحكم لسها قضية نفقة متاخدش المبلغ كله وتتقاسم مامة ادهم واخته

معاها الفلوووس..

سنة وهي عايشة مع ابنها ياسر وبتشتغل وبتصرف عليه وبتحاول تعوضه عن حنان الاب

وامانه وتكون ليه السند والام والاب في نفس الوقت..

سنة وهي بتجري من قاعة لقاعة في المحاكم عشان يتحكملها بالخلع من راجل اناني

ومعندهوش ضمير وقلبه مات.. راجل اتفنن في اهانتها وضربها..

ومرة وهي في المحكمة وفي جلسة من الجلسات لقت محامي جوزها بيدي للقاضي

ورقة طلاقها!

اكتشفت انه طلقها ومقلهاش.. بس هي مسحبتش قضية الخلع لانها خافت انه يردها تاني..

*************************

فاقت سها من ذكرياتها وراحت لمامتها وقالت:بكرة عندنا جلسة لازم نشوف محامي كويس

وعنده ضمير..

الام:ايوة عمك صلاح هيجبلنا محامي تبعه كويس وشاطر..

*************************

تاني يوم في المحكمة سها قاعدة مع مامتها وجمبهم المحامي وكانت قلقانة ومتوترة..

القاضي بعد ما بدأ الجلسة:مكتوب هنا ان سها رافعة قضية على جوزها بالخلع ومتسجل

كمان ان جوزها طلقها؟

محامي سها وهو بيسلم الورقة للقاضي:اتفضل يا فندم دي ورقة الطلاق اللي المحامي

ادها للمحكمة..

القاضي بيص:ايه ده! الورقة دي مش سليمة!

المحامي:يعني ايه ؟

القاضي:دي متزورة!!

المحامي مصدوم

القاضي:بصي يا بنتي عشان شكلك طيبة وعلى نياتك وعشان الورقة المتزورة دي انا

هحكملك بطلاق بائن لا رجع فيه عشان كمان تقدري تاخدي كل حقوقك ..

سها بتضحك اووووي ومبسوطة وفرحانة:الحمد الله يااااااااااارب الحمد الله

الام:احمدك ياااااااااااااارب احمدك يااااااااااااارب

محامي جوز سها مشي وهو متعصب جدا واتصل بالتلفون وقالهم:للاسف خسرنا القضية!

سها ماشية بانتصار وطايرة من الفرح وبتقول جوة نفسها:هههههههههههههه ورقة طلاق مزورة تحل في ثواني قضية بقالها سنة في ممرات المحكمة!!

النهايــــــــــــــــــــــــــة