الحلقة التاسعة
انا:ها احكيلي بقى اول
مرة روحتي جلسات زمالة المدمنين المجهولين كان ازاي شعورك؟؟
والجو هناك عامل ازاي؟؟
دينا:طبعا انا زي ما
قلتلك اللي عرفنا على المكان مرات عمي ومهند كان بيروح الجلسات
بتاعت الناس اللي عايشة
مع المدمنين وماما داومت فترة بسيطة وبعدها بطلت..
انا:طيب في الفترة اللي
داومت فيها كانت بتقلل؟؟
دينا:بصي اول مرة روحت
بيها انا ومهند كنت طاااااايرة من الفرح ‘ وكنت حاسة انه ياه
اخيرا خلاص بدأنا نمشي في
مشوار علاجها والدنيا هتبقى بمبي واخر حلاوة..
انا:طيب اومال ايه بقى
اللي حصل؟؟
دينا بيأس:اللي حصل يا
ستي انها لما راحت اول مرة واحنا كنا معاها متكلمتش في الجلسة
يمكن عشان كانت مكسوووفة
مننا ويمكن عشان مكنتش هتاخد راحتها في الكلام ! الله اعلم
بس هي متكلمتش بس فضلت
تسمع وروحت البيت مشربتش..
انا:حلووو وبعدين؟؟
دينا:بعدين بقى تاني يوم
لما صحيت سألتها ها يا ماما شربتي؟؟ قالتلي لا
انا:طيب كويس اهووو
دينا:لا كانت بتكذب عليا
انا:ايه ده!! فعلا؟!
دينا:ايوة بس انا عملت
نفسي مصدقاها ومشيت معاها الموضوع ‘ هي كانت بتشرب من ورانا
وتقوول انها مشربتش وتروح
الجلسات وترجع تشرب بليل بعد ما ننام ونصحى نسألها ها
يا ماما بتشربي؟ تقووول
لاااااا...
انا:وبعدين؟؟
دينا:لحد ما في يوم
اتخانقت جامد مع بابا وقامت خدتها حجة وقالت شررررب مش هبطل
شررررب وهفضل اشرررب
واكتررر من الاول كماااان وقعدت تزعق لبابا جامد اوي
وبابا وقتها قالها ابقي
وريني بقى مين اللي هيجيبلك الشرب..
انا:طيب ومامتك عملت ايه
ساعتها؟؟
دينا:عادي اتصرفت
لوحدها..
انا:ازاي؟؟
دينا:خدت تاكسي تحت الطلب
وراحت مكان معين بيبيع خمور واشترت اللي هي عايزاه
ورجعت البيت.. ومن ساعتها
وهي مراحتش تاني الجلسات دي..
انا:طيب انتي اول مرة
قلتي ايه؟! انتي هربتي من السؤال فوق ولا ايه
دينا:لا مهربتش بس حكيت
الموقف اللي افتكرته.. المهم اول مرة روحت كنت مع مهند
كان الجلسة بتاعتنا
المخصصة لينا..اتكلمت عن ماما ومقدرتش قعدت اعيط واعيط بحرقة
اووووي ومهند كمان عيط
لما لاقاني بعيط .. كان احساس وووووحش اووووووي
عشان كده محبتهوش وفضلت
سنتين مروحش ..
انا:يااه سنتين!!
دينا:الاحساس اللي حسيته
وقت ما روحت كان بشع اووووي والنكد والاكتئاب اللي جالي
خلوني مكنتش عايزة اروح
تاني واقعد كل مرة انكد على نفسي.. وكنت بقول بدل ما اروح
للهم ده خليني اخرج مع
اصحابي.. بس انا كنت بهرررب من الواقع وكنت بهرب من نفسي
عشان كنت بحس ان الجلسات
دي بتقلب عليا الواقع بتاعي اللي بحاول احيانا اني اعمل نفسي
ناسياه..سنتين كنت بقنع
حالي ان الموضوع ده مش ماشي معايا وانه مجرد اي كلام .. لحد
ما كل حاجة اتراكمت
جوايا.. خناقات البيت ‘ وبُعد أحمد عني فقلت لنفسي ليه مروحش واجرب
مش هخسر حاجة اكتر من
اللي خسرتها.. بس المرادي روحت الجلسة اللي المفروض بتاعت
ماما وهناك قعدت اتكلم
واقلهم انا بكرهكم اوووي ‘ بكره كل حد مدمن ومش بيفكر في عياله
ولا بيفكر الا في نفسه
وانتوا ناس انانية..
انا:طيب وردة فعلهم كانت
ايه؟
دينا:في الاول افتكرت
هيكرهوني بس بالعكس حبوني اوووي وكلهم حضنووني وحسسوني
بالامان.. كلامي ليهم كان
بيشجعهم عشان يبطلوا شرب ويفكروا شوية في عيالهم وفي نفسهم..
انا:ارتحتي في الكلام
ساعتها صح؟؟
دينا:جداااااا.. على فكرة
لو عايزة تحضري مرة معايا ‘ تعالي احضري معايا..
انا:ايه ده؟! هو انا ينفع
اجي معاكي؟
دينا:اه ينفع اي حد يحضر
انا:اااه حلووو ‘ عايزة
اجي معاكي واشوووف المكان عامل ازاي..
دينا:خلاص تعالي بكرة
معايا..
انا:تمام يبقى بكرة باذن
الله نروح
**************************
*************************
في اليوم التاني قابلت
دينا وخدتني بعربيتها وروحنا مستشفى...
انا:هو الجلسات هنا في
المستشفى دي!
دينا:اه في اوضه مخصصة ‘
بصي هو احنا بنبتدي الساعة 7 بس احنا جايين بدري شوية عشان
نقعد شوية براحتنا يعني
وبعدين هما كلهم هيجوا .. هتحبي الاشخاص اللي هنا .. انا بحبهم اوي
وبحس معاهم براحة كبيرة ‘
مش بحس اني غريبة واصلا اللي بيدير الجلسة دي كان واحد
مدمن من 22 سنة تخيلي!
انا:واااو 22 سنة..
دينا:ايووووة
ركنا العربية في باركات
المستشفى ورحنا على اوضة صغيرة كده بس مكنتش جوه المستشفى
لا كانت ملحقة بالمستشفى
من برة.. دخلنا الاوضة ودخلت دينا قبلي طبعا وفتحت الانوار
بتاعت الاوضة..
الاوضة عبارة عن كذا
مكتبة صغيرة مليانة كتب كلها بالانجليزي في اخر الاوضة وفي النص
طرابيزات كتيرة مصفوفة
على حرف الــ U بحيث ان الكل يقعد متواجه مع التاني.. وبعدين
فيه اوضتين صغيرين ملحقين
بالاوضة نفسها .. واحده حمام والتانية مطبخ عشان اللي عايز
يعمل اي حاجة يشربها..
اما بقي على الحيطان فكان
متعلق زي لوح كده كان مكتوب على واحدة من اللوح:
زمالة المدمنين المجهولين
ترحب بكم في اجتماعات التعافي.. ولوحة تانية مكتوب عليها
الاتناشر خطوة للاجتماعات
دي ولوحة تالتة مكتوب عليها التقاليد الاتناشر لزمالة المدمنين
المجهولين..
وحيطة تانية عليها كذا
لوحة صغيرة مكتوب عليها جمل مفيدة اوي وممكن تفيد اي حد مش
لازم يكون مدمن او عايش
في اسرة فيها مدمن..
المهم قعدت انا ودينا
نتكلم شوية وبعدين انا قعدت اصور اللوح دي لان الكلام اللي فيها كان
عاجبني جدا لحد ما بدؤا
بقية الناس تيجي..
على الساعة 7 كان جت ست
هندية طيبة وتحسها قريبة من القلب وهي ابنها مدمن ‘ سلمت
على دينا وسلمت عليا
فقامت دينا قالتلها:دي صاحبتي جاية تساندني النهاردة وتشجعني
فالست قالتلها:حلو لما
يكون عندنا اصدقاء كده يشجعونا
وقعدوا يتكلموا شوية عن
الجو في البحرين وعن يومهم العادي قضوه ازاي وبعد كده
جه الراجل الامريكي اللي
بيدير الجلسة واسمه ويليم بس هما بينادوه ويقولوله ويلي...
وجم كمان بنتين وبدأت
الجلسة..
طبعا الجلسة كلها بتبقى
بالانجليزي واللي بيتكلم بيتكلم بالانجليزي..
كل حد كان بيدخل لما كان
بيسلم عليا فكانت دينا بتقله:دي صاحبتي وجاية تساندني النهاردة
وتشجعني وكنت بشوف في
عينهم فرحة انه في حد جاي يشاركهم اللحظات الحزينة اللي هما
بيعشوها..
طبعا عرفني الراجل
الاميركي على النظام بيمشي ازاي وانهم بيقروا دعاء في الاول وبعدين
يقروا الاتناشر خطوة وبعدين
اللي حابب يفضفض بيقوم يفضفض...
كلهم مرة واحدة نطقوا
وقالوا الدعاء سوا واللي كان عبارة عن:
اللهم امنحني السكينة
لاتقبل الامور التي لا استطيع تغييرها والشجاعة لاغير الامور التي
استطيع تغييرها والحكمة
لاعرف الفرق..
وبعدها قامت الست الهندية
تقرا الاتناشر خطوة واللي كانت عبارة عن:
1 اعترفنا اننا بلا قوة
تجاه ادماننا. وان حياتنا اصبحت غير قابلة للادارة.
2 توصلنا الى الايمان بأن
قوة أعظم من انفسنا باستطاعتها ان تعيدنا الى الصواب.
3 اتخذنا قرارا بتوكيل
ارادتنا وحياتنا لعناية الله على قدر فهمنا.
4 قمنا بعمل جرد اخلاقي
متفحص وبلا خوف عن انفسنا.
5 اعترفنا لله ولانفسنا
ولشخص اخر بالطبيعة الحقيقية لاخطائنا.
6 كنا مستعدين تماما لان
يزيل الله كل هذه العيوب الشخصية.
7 سألناه بتواضع ان
يخلصنا من نقائصنا الشخصية.
8 قدمنا بعمل قائمة بكل
الاشخاص الذي اذيناهم واصبح لدينا نية بتقديم اصلاحات لهم جيمعا.
9 قدمنا اصلاحات مباشرة
لهؤلاء الاشخاص كلما امكن ذلك الا اذا كان ذلك قد يضر بهم او بالاخرين.
10 واصلنا عمل الجرد الشخصي
لانفسنا واعترفنا باخطائنا فورا
11 سعينا من خلال الدعاء والتأمل
الى تحسين صلتنا الواعية بالله على قدر فهمنا داعين لمعرفة مشيئته لنا والقوة على
تنفيذها.
12 بتحقق صحوة روحية
لدينا نتيجة تطبيق هذه الخطوات حاولنا حمل
هذه الرسالة للمدمنين
وممارسة هذه المبادىء في
جميع شئوننا.
وبعد ما قرت الخطوات دي
كلها بصت ليهم كلهم وقالت : هاي انا انجينا
فكلهم ردوا عليها مرة
واحدة:هاي انجينا
انجينا:انا الويك اند
اللي عدى عليا ده كان ابشع ويك اند ‘ كنت مخنوووقة فيه اوي ومضايقة..
المفروض عيد الام عدى
ومحدش عندي في البيت افتكر اني ام حتى ابني مفتكرنيش ولا قالي
كل سنة وانتي طيبة يا
امي.. حسيت اني بعد العمر ده كله ابني ضايع وتايه ومش حاسس ولا
واعي بالايام ولا بنفسه..
بعدها سكتت عشان تدي فرصة
لحد تاني يتكلم .. فقالت دينا:هاي انا دينا
كلهم ردوا في نفس
الوقت:هاي دينا
دينا: اولا بمناسبة عيد
الام كل سنة وانتوا طيبين انا النهاردة حاسة اني فرحانة وعندي طاقة
ومبسوطة ‘ مبسوطة لان
صحبتي جت معايا وحبت تشاركني الجزء ده في حياتي..
وفجأة.......
استنوني الحلقة اللي
جاية.....
