قصة "حلـــم عانـــس " قصة قصيرة لفاطمة طلال

                                                              حلــــم عانــــــس "قصـــــة قصيـــــــرة"

اول مرة تشوفه كانت واقفة مستنية المترو ‘ و اول ما جه المترو دخلوا بسرعة

هما الاتنين..

كانت واقفة عمالة بتفكر في خطوبة صاحبتها يوم الخميس.. وكانت بتقول لنفسها:

تؤ النهاردة الاحد وانا لسه معرفتش هلبس ايه في يوم خطوبتها!! ومش عارفة

اذا هلحق اصلا النهاردة ادور في المحلات ولا هيضيع عليا كمان..

فضلت سرحانة بتفكر في خطوبة صحبتها ومخدتش بالها منه وهو عمال بيبص

كل شوية عليها..

اتعودت انها كل ما تركب المترو تفضل سرحانة عشان متحسش بالوقت ‘ ولما

فاقت من سرحانها وجت تبص على المحطة عشان تعرف فاضلها اد ايه عشان

تنزل لمحت الشاب اللي كان واقف معاها مستني المترو بيبص عليها..

قالت لنفسها:ايه ده؟ هو انا في شكلي فيه حاجة غلط ولا ايييه!! هو بيبص عليا

كده ليه؟؟ ليكون شعري منعكش ولا حاجه؟؟ ولا تلاقيه بيضحك على وشي

اللي شكله مضروب ميت قلم على الصبح كده! ما هو ميعرفش اني كنت

سهرانة امبارح بليل!

بليييييل ياااااااه ده انا افتكرت تؤ الله يسامحك يا اخينا انت خلتني افتكر خناقة

ماما ليا..

ترجع تفتكر ..

الام:يا بنتي انتي بقيتي 28 سنة ولسه متجوزتيش!! هتفضلي كده لحد امتى؟!

دانة:ماما ارحميني بقى .. مش موال كل يوم ده! يعني اعمل ايه مثلا؟؟!

الام:يابنتي اللي في سنك كلهم اتجوزوا وانتي لسه

دانة:لو طلبت افضل كده هفضل عادي..

الام:يا بنتي نفسي افرح بيكي ‘ ما تسمعي الكلام بقى وتشوفي العرسان اللي

بجيبهم ليكي..

دانة:مبحبش الطريقة بتاعتك دي وبعدين جربتها مرة وحسيت اني سلعة في

فاترينة!!

عارفة هتقولي الموضوع ميتاخدش بالمقياس ده بس انا يا ستي ده اللي حسيته

الام:يووووووه انتي هتتعبيني معاكي لحد امتى.. بكرة اما تشوفي كل صحابك

البنات متجوزين ومخلفين وانتي لوحدك هتندمي..

دانة والدموع في عينها:مش هندم ! عارفة ليه!! عشان هبقى عارفة ان الراجل

اللي يستاهلني وانا استاهله حظي الجميل مأسعفنيش اني الاقيه!!

دخلت دانة الاوضة وسابت مامتها وقفلت نور الاوضة وحاولت تنام ‘ بس

كلام مامتها قلب عليها الذكريات.. افتكرت اد ايه كانت بتحب ايمن وهو

مقدرش قيمتها.. افتكرت ازاي هو وهمها بالحب وهي ادته كل احلامها

وامانيها اللي في الدنيا وبعدين اختفى ورمى كل حاجة تخصها ورا  ضهره..

غصبن عنها لقت دموعها بتنزل انها خدت فترة كبيرة عشان تفوق من وهم

كانت حابسة نفسها فيه.. بس هي قررت انها مش هتبيع قلبها لاي حد تاني

ولا هتتجوز اي راجل لمجرد الجواز وانها هتدي قلبها لراجل هي تحس

انه فعلا يستاهل انها تكمل بقية حياتها معاه..

فاقت دانة من الذكريات دي كلها لما المحطة بتاعتها جت ونزلت ونزل الشاب

وراها..

الشاب: يا فندم .. يا فندم

دانة لنفسها:ايه ده ايه ده ايه ده بقى!! ده بيعاكس ولا ايه؟!

دانة بتلف بكل غرور وبترفع حاجب وتقول للشاب:بتناديني؟!

الشاب:اه ‘ بس حضرتك وقع منك الكتاب ده..

دانة لنفسها:احم يلااا يا موكوووسة قال يعاكسك قال ‘ باين كده خناقة ماما

اثرت على مخي..

دانة:ايوة ‘ صح ده كتابي.. معلش والله انا اسفة..

الشاب:لا ولايهمك.. انا اصلا نزلت مخصوص ‘ دي مش محطتي بس عشان

ادي لحضرتك الكتاب اتفضلي..

دانة جوة نفسها:يا جماااالك.. ايه الابتسامة الحلوة دي...

الشاب:حضرتك معايا؟

دانة:اه اه ‘ معلش اصل الشغل عملي رابكة في دماغي..

دانة لنفسها:الرابكة برضو يا موكوووسة.. اتعدددلي بقى للولد يفتكر انك واقعة

بعدين اخلصي ..اتاخرتي على الشغل..

دانة:شكرا حضرتك..

خدت الكتاب ومشيت وهي كان نفسها تفضل واقفة اكتر..

خلص اليوم وكانت دانة نسيت موقف الشاب وانشغلت بروتين يومها العادي..

واول ما خلصت الشغل جريت دانة على المول عشان تدور على فستان تروح

بيه خطوبة صاحبتها..

دخلت محل واتنين وتلاتة ‘ في الرابع دخلته وكان محل مخصص

لفساتين السهرة .. كانت واقفة وفجأة شافت بنوتة صغيرة

قاعدة في عربية الاطفال بتاعتها ومتسابة في نص المحل لوحدها..

قربت دانة ليها وابتسمت ليها وقالتلها:خلاااصي انتي كميلة سايبينك لوحدك كده؟

الطفلة بتضحك ليها بكل ببراءة...

دانة:مامي سايبة الكميلة ده لوحده؟ معلش تلاقيها بتقيس فستان ولا حاجة

الطفلة بتلعب في اللعب اللي في ايدها وبتبص لدانة بكل براءة..

دانة بتوري فستانين للطفلة وبتقولها:بقلك ايه؟ انا محتارة ‘ اختار ده ولا ده؟!

الطفلة بتبص بكل سذاجة لدانة وبتكمل لعب..

دانة:هااا قوليلي؟؟ شكلك انتي كمان محتارة؟! طيب اخد الفستان الاحمر ولا

البنفسجي؟

الطفلة بتبص يمين وشمال ..

دانة:تؤ انتي كمان محتارة؟؟ طب انا اخد راي مين دلوقتي؟ وبعدين هما ازاي

سايبينك كده لوحدك يا كوكو انت يا صغنن..

وفجأة تسمع صوت من وراها يقولها:متهيألي الاحمر عليكي هيبقى احلى..

تبص  وراها على طول تلاقي نفس الشاب اللي شافته في محطة المترو بيقرب

على الطفلة وبيشيلها يبوسها ويحضنها ويقولها:ايه يا ميمو مش تقولي لطنط

انها تختار طبعا الفستان الاحمر..

دانة وشها بيحمر من الكسوف وتقول:ايه ده هي دي بنت حضرتك

الشاب:لا بنت اختي ‘ بس هي تلاقيها جوة بتقيس عشان تجيب فستان

دانة باحراج شديد:احم اااه..

الشاب:صدفة حلوة اني اشوفك تاني..

دانة:احم..شش ششكرا ..انا عن عن اذنك

الشاب بيبتسم ويقولها:هتشتري الفستان؟

دانة:ها! اي فستان؟

الشاب:الاحمر اللي في ايديكي وكنتي محتارة تشتري مين فيهم

دانة بخجل:ااه مم مش عارفة ..عن اذنك ..

تاخد دانة الفستان بسرعة وتروح تشوف المقاس بتاعها منه وتروح تشتريه

وتطلع جري من المحل وهي بتقول لنفسها:

يااااااااربي ‘ ايه الحلاااااوة دي! هو ازاي جميل كده ورقيق! ولا بنت اخته زي

العسل تتاكل.. بس ايه الصدفة دي! مرتين وفي نفس اليوم!!

يوووه انا نسيت اكلم اختي.. تدور دانة على التلفون ومتلاقهووش..

دانة لنفسها:اوبااااااااا ده انا نسيته في المحل!! يالهوي لازم اطلع جررررري

لحسن يتسرق..

ترجع دانة بسرعة للمحل وتلاقي الشاب واقف مع اخته وبنتها واول ما شافها

قالها:نسيتي الموبايل بتاعك صح

دانة باحراج شديد:ااه

الشاب:هو انتي بتنسي كل حاجه كده

دانة:لا والله بس بب مم مش عارفة مالي النهاردة! يومي ملخبط خالص

اخت الشاب بابتسامة:كلنا والله كده ‘ الواحد مبقاش عقله فيه خلاص..

بعدين تبص لاخوها وتقوله:يلا يا محمود يا حبيبي عشان ورانا حجات كتير

لسه..

محمود بيدي الموبايل لدانة وبابتسامة:انا لقيته واقع جمب عربية مريم فقلت

انه اكيد بتاعك..

دانة:شش ششكرا ..

وبعد يومين كانت دانة مخلصة شغل ورايحة تركب تاكسي عشان تروح

مكتبة تشتري رواية جديدة ‘لانها بتحب قراءة الروايات..

وصلت المكتبة ودخلت وفضلت تدور على رواية رومانسية لحد ما شافته..

اول ما شافته قالت جوة نفسها:اييييه ده بقى!! لا كده كتييير... دي تالت مرة

اشووفه صدفة! ده انا لو اعرفه مش هشوفه كتير صدف كده!!

طب اعمل ايه ‘ اعمل ايييه ‘ اعمل ايييييه بقى .. يعني اروح اعمل نفسي

مشفتووش وامشي قدامه عشان يشوفوني! ولا افكني منه وعادي بقى؟؟

تؤو اروح اخليه يشوفني ليه اصلا!! هو انتي اتهبلتي يا دانة ولا ايه؟؟

تقوم دانة تطلع فوق الدور التاني عشان تبعد عنه خالص وفي نفس الوقت تدور

على رواية تشتريها..

بعد خمس دقايق تسمع صوت بيقول:انا لما شفتك من بعيد مصدقتش نفسي

دانة بتبتسم قبل ما تلف لانها عرفت الصوت وتقوم تلف عليه وتقول:

ايه ده!

محمود:صدفة حلوة صح

دانة:اه انا لو كنت شفت الحوار ده في الافلام مكنتش هصدق!

محمود:بس فيه صدف بتتأخر اوووي

دانة باستغراب:مش فاهمة؟

محمود:يعني انا شايف انك صدفة حلوة اوي بس متأخرة

دانة بخجل:احم..

محمود:بتعملي ايه هنا؟

دانة:مفيش اصل انا متعودة اشتري رواية كل فترة كده واقرا ‘ فانا بدور على

رواية عشان اقراها..

محمود:انا كمان جاي عشان اشتري كتاب.. بحب القراءة برضو

دانة:اممم حلو

محمود:ممكن ابقى جريء شوية واطلب اننا نروح نشرب عصير في اي مكان

دانة لنفسها:اوباااااا انا الامور ده بيطلب يشرب معايا حاجة!! بس تؤ خايفة

يكون فاكر اني سهلة وبعدين انا عمري ما عملت كده مع ولد بس مع ده مش

عارفة ليه حاسة اني عاوزة اسمعله..

محمود:انا عارف ان طلبي جريء شوية ‘ بس مش عارف!! انا حاسس اني

محتاج اتكلم معاكي اكتر.. ومش عاوز اضيع الصدف دي مني كلها...

دانة باحراج شديد:اممم اا اصل بصراحة انا عمري ما روحت مكان مع

حد غريب..

محمود:عارف والله ولا انا تخيلي!! بس زي ما قلتلك محتاج اتكلم معاكي اوي

دانة بتردد:ممماشي..

محمود:طيب نركب تاكسي.. معلش انا عربيتي عطلانة والله بقالها اسبوع

بس دي احلى حاجة عملتها لان لولاها مكنتش فكرت اركب المترو واشوفك

لاول مرة..

دانة ابتسمت باحراج شديد..

راحت دانة مع محمود كافيه قريب من المكتبة وقعدوا يتكلموا كتير.. هو حكالها

عن نفسه وعن صدمته في الحب الاولاني واللي عشان كده مجربش الحب تاني

وبدأ يقتنع بكلام مامته عن الجواز التقليدي.. ودانه كمان حكت ليه عن اول

تجربة ليها في الحب وبردو صدمتها منه..

دانة:بس انا بقى مختلفة عنك باني مؤمنة جدااا باني مش هتجوز الا واحد

يستحقني ومش هتجوز بالطريقة اللي مامتي ومامتك عايزاها..

محمود :مش بقلك يارتني كنت قابلتك من زمان

دانة اكتفت بابتسامة.. وبعدين بصت على الساعة وقالت:يااااه ده احنا بقالنا

تلت ساعات مع بعض!!

محمود:محستش بالوقت

دانة:ولا انا.. بس انا لازم امشي دلوقتي

محمود:بدعي اني اشوفك تاني

دانة:سيبها صدفة..

محمود:يا عالم الصدفة اللي جاية هيكون ايه تغير وقتها..

مشيت دانة وهي حاسة باحساس غريب .. قالت لنفسها:انا مالي متلخبطة كده

ليه؟؟ هو انا ازاي اروح واقعد معاه واسمع كل الكلام منه كده واحكيله كمان

عن نفسي زي ما اكون اعرفه من سنين!!

************************

يوم الخميس جه وكان خطوبة صاحبة دانة .. لبست دانة الفستان الاحمر اللي

اشترته من المحل اللي شافت فيه محمود بالصدفة واللي شجعها اكتر في انها

تشتريه..وفضلت تفتكر كل الكلام اللي دار بينهم وبعدين ابتسمت ابتسامة خفيفة..

دخلت عليها اختها وقالت لها:داااانة اخلصي!!! هنتأخر على الكوافير

دانة:حلو فستاني؟

اختها:اوبااا ايه الحلاوة دي.. هتقطعي على صاحبتك واحتمال خطيبها يسيبها

ويجي يطلب ايدك..

دانة:هههه طيب يلا يا ختي..

وبعد ساعتين يروحوا الفيلا اللي معمول فيها الخطوبة..

اخت دانة:هي مأجرة الفيلا دي عشان تعمل خطوبتها فيها؟

دانة:لا بتقول انها فيلا بتاعت خطيبها..

اخت دانة:اسمه ايه؟

دانة:معرفش!! يلا تعالي ندخل..

تدخل دانة ويكون فيه معازيم كتيرة في الحديقة بتاعت الفيلا والاغاني شغالة..

اخت دانة:فين نانسي؟

دانة:اكيد يعني مش هتقفلنا على الباب تستنانا .. اكيد هتظهر بعدين..

اخت دانة:علياء و ميريام هناك اهم ‘ تعالوا نروح نقف معاهم..

تروح دانة ويسلموا على صحابها وبعدين تقول ليهم:بقلكم ايه انا عطشانة

ميريام:هناك هتلاقي عصاير وبيبسي ومية ‘ روحي خدي اللي انتي عاوزاه

دانة:طيب حد يجي معايا؟

كلهم:لا

دانة:ندالة ندالة اصلي..

تروح دانة عشان تجيب حاجة تشربها وبعدين تشتغل اغنية...

واول ما الاغنية اشتغلت كانت دانة بتشرب المية وفجأة لقيته جاي من بعيد عليها

محمود بيشاور ليها على الاغنية ويقولها:سامعة؟!

دانة وهي مش مصدقة نفسها وبتبتسم جامد ليه: كمان النهاردة صدفة

محمود بحزن:تخيلي..! تسمحي ليا بالرقصة دي؟

دانة باحراج:بب بس

محمود:لو سمحتي؟ ارجوكِ..

تمد دانة ايدها لمحمود وتبدأ ترقص معاه على الاغنية

محمود يهمس في ودانها ويقلها:رغم اني عارف انك حلم هصحى منه بدري

اوي الا انه احلى حلم في حياتي..

دانة:مم مش فاهمة؟

تيجي فجأة اخت محمود وتقوله:محمووود يلا عشان تاخد عروستك من جوه

دانة تتصدم وتبص على محمود وعلى دانة وهي مش قادرة تستوعب ايه اللي

اتقال ده وفضلت تبص كتييير على محمود عشان يفسر ليها..

محمود:روحي انتي دلوقتي يا سلوى وانا جاي وراكي..

اول ما تمشي سلوى يبص لدانة ويقلها بحزن:انا عارف انك ممكن تكوني

عاوزة تشتميني بس انا فعلا مكنتش اقصد اي حاجة او اتسبب ليكي في

حزن وجرح ‘ بس انا زي ما حكتلك لما شفتك في المكتبة انا حبيت مرة

واحدة في حياتي ومن بعدها انا اتصدمت واتجرحت اووي وبقيت عايش

يومي بيوم ‘ اصرار امي اني اتجوز واحدة من معارفها مكنش بيفارقني

ومكنتش عارف اني هقابل حلم افتكرته ضاع مني.. اول ما شفتك كنت

عايز ارجع في كلامي بس مقدرتش.. صدقيني انا مكنتش اقصد اني ادخل

حياتك والخبطها بس انا كمان اول ما شفتك حياتي اتلخبطت.. انتي طلعتي

احسن مني لما قولتيلي انك قررتي تقفي قدام العالم كله عشان تتجوزي

اللي هيختاره قلبك وبس.. لكن انا... انااا ... انا جبان اووووي يا دانة..

ومش راجل لاني بتجوز واحدة قلبي مش ليها ولا عمره هيكون ليها

وهسيب حلمي بكل سهولة كمان يضيع من قدام عيني..

دانة وهي بتدمع:هههه اغرب صدفة في حياتي.. ههه .. هه.. هه اناا انا بجد

مش عارفة اقوول ايه .. ههه .. انت ليه مقلتليش انك خاطب!!هه .. انا

لازم امشي..

تجري دانة من قدام محمود وتقابل في وشها اختها فتسألها:مين ده يا دانه؟؟

دانة جوة عقلها جزء من الاغنية بيتردد جواها واللي كان:

وفجأه فجأه افترقنا وياريت الخلاف بنا والناس غدرت بينا..

حبيبى مهما ابتاعدنا مسيرنا ف يوم نتلاقى
العقل غايب والقلب صاين للعهد صاين..

وحكايتنا زى حكايت الاحبه لادموع ولا خصام يفرق قلوبنا
ولو اقابلوا اقابلوا تانى صدفه اغنى لحكايه اغنيها من اولها..

دانة والدموع في عينها وبابتسامة مكسورة: ده؟! ده حلم عانس....

النهايــــــــــــــــــة