الحلقة السابعة عشر من قصة " الحُب خلف الأسلاك الشائكة"

الحلقة السابعة عشــــــر

ولأن المكالمات كانت صعبة قررت انا وأحمد نعمل ايملات على النت ‘ عشان نقدر نكلم بعض

لان عملية الكلام في التليفون كانت صعبة اووي.. وفعلا بدأنا نعمل ايميلات ونكلم بعض ومش بس

كده وكمان عاملنا جروب على الفيس بس كنت مغيرة اسمي عشان محدش يعرفني وكل اللي كانوا

في الجروب كانوا عارفين ان انا واحمد بنحب بعض بس طبعا باسامينا المستعارة مش اسامينا

الحقيقية.. بس الغريب اني بدأت اكتشف ان احمد بيكلم بنات كتيرة اووي على النت وكان

بيقعد يقولهم كلام حب وهما كمان يبادلوه ولما كنت اساله يرد يقول:

يا ندى انتي غير!

انا:ايوة يعني ايه؟ مش قادرة افهمك منين بتحبني؟؟ ومنين قاعد بتتسلى بالبنات اللي على النت

دول؟؟

احمد:بضيع وقت ‘ بتسلى ‘ قووولي اي سبب ‘ فرااااغ لكن انتي اللي في القلب

ندى:بس انا بغير عليك يا احمد وبصراحة بقى انا مضايقة من حكاية التسلية دي!!! والا بقى

هفهم من كده اني انا كمان لعبة!!

احمد:بعد الحب ده كلللله جاية تقوليلي انك لعبة في حياتي!!!

انا بعصبية:ماهو مينفعش حد يحب واحدة ويروح يلعب مع عشرة على النت!! ما تقووول كلام

معقووول يا احمد..

احمد بنرفزة:بحااااااول يا ستي اطلع غضبي فيهم ‘ ما انا مستحمل وانتي مع راجل غيري!!

انا: وهووو كان بمزااااااجي

احمد:ولاااااا انا كمان بمزااااااجي..

*****************************************

وفي يوم كنت عايزة اروح اقدم على ورق لشغل فطلبت من حسام..

انا:حسام عايزاك تيجي معايا عشان نقدم ورقي في شغلانة كده

حسام:مش فاضي ‘ خدي اي حد من اخواتي

انا:يعني هتسبني يا حسام وانا حامل كده اروح اعمل الحاجة بنفسي

حسام:وهو يعني انتي اول ولا اخر واحدة تكون حامل!!

انا:ما انا بردو اخاف اروح اي مكان لوحدي وعايزاك تكوون معايا يا اخي

حسام:قلتلك مش فاضي ايييه مبتفهميش

وعصرت على نفسي لمونة وروحت اطلب من اخوه فردت مامته وقالت:

وانتي ياحبيبتي صغيرة ولا ايه! بعدين هو مش فاضي وراه مراته ومشاغله بردك

انا:ايوة بس انا

مامته وهي بتقاطعني:يختي انا مش عارفة انتي متدلعة اوووي كده على ايه!!

وخرجت من عندهم واتصلت بأحمد على طول..

انا:احمد انا محتاجة ليك

احمد:اؤمريني

انا:كنت عايزاك معايا عشان هروح اقدم ورقي في شغلانة كده

احمد:حاضر عايزاني امتى؟

انا:بكرة ان شاء الله

احمد:من النجمة هكون عندك

وبقيت في كل مشوار اطلب من حسام يجي فيه معايا ويرفض ‘ اروح اتصل بأحمد ويجي

هو معايا.. كنت في كل مرة اتصل بأحمد ابقى عارفة اني بغلط بس كنت محتاجة احمد

اووي ومكنتش اقدر استغنى عنه ولا احرم نفسي من حبه ومن السعادة اللي قلبي كان بيحسها

والاقي انعكاسها في عيون أحمد..

***************************************

كنت لما بخرج مع احمد كنت بحس ان لكل حاجة ليها قيمة ‘ حتى انا كنت بحس بقيمتي وانا معاه..

كان بيغديني في احسن المطاعم وميخليش في نفسي حاجة وكانه هو جوزي والمسؤول الاول

عني..

وفي يوم بعد ما خرجت مع احمد رجعت البيت وعلى بليل لقيت حسام جاي وبيقلي:

يلا حبيبتي هفسحك النهاردة حتت فسحة بصي هتحلفي بيها

انا حسيت بتأنيب ضمير اوووي جوايا ‘ انه لسه الصبح كنت خارجة وحسام دلوقتي جاي يقلي

عاوز يخرجني ودي مكنتش بتحصل الا كل فين وفين ولما كانت بتحصل كنت بحس ان العيد

جه!

وفعلا خرجت معاه ولقيته بيوديني عند كشري التحرير وجايبلي كشري  بـ 7 جنيه وبيقولي:

مش حارمك من حاجه اهوو وجايبلك كشررري ‘ شفتي بقى فسحة جامدة يعني مش اي كلام

انا بسخرية:هه اااه فعلاااا جامدة اووي! جايبلي كشررري!! هو ده معنى الخروووج عندك!

انك تخرجني من بيتي عشان تجبني لكشري التحرير وتعزمني عليه!

حسام:هو انتي مبتقدريش اي نعمة كده خالص ‘ غيرك مبيتفسحش خالص

وفعلا حسام كان عنده حق غيري ممكن يكون مبيتفسحش خالص ‘ بس اكيد عنده الحب والحنان

اللي انا محرومة منه.. يعني انا لو كنت مع احمد وكان جوزي ومبيخرجنيش خالص ‘ مكنتش

اصلا هضايق ! بالعكس ده انا يمكن كنت مش هحب اخرج من بيتي .. الفكرة كلها مش في

الخروج اد ما هو بتخرج مع مين.....

***********************************************

وفي يوم كنت قاعدة مع حسام بنتفرج على التلفزيون وكانوا جايبين فيلم رومانسي..

حسام:اييه الافورة اللي في الفيلم دي!!

انا:ليه بقى افورة عادي يعني شووف البطل بيعمل ايه للبطلة عشان يحسسها بالحب والامان

حسام:يا بنتي دي كلها افلام بس ومفيش حد بيعمل كده على الحقيقة

انا:حسام هو انت ليه بتحبني؟!

حسام:هه يعني هيكون ليه عشان مراتي واكيد لو كنت اتجوزت اي حد غيرك هحب نفس الحب ده

انا:هو ده الحب في نظرك؟ اني عشان مراتك؟؟

حسام:واضح انك لما بتتفرجي على افلام يا ندى بتقلبي على مود حزايني وبتبقي غاوية نكد

انا:لا بجد يا حسام خلينا نتكلم مع بعض شوية ‘ يعني نحاول نفهم بعض شوية

حسام:اتفضلي خلصيني وقولي اللي عندك ‘ عشان عارف لو متكلمتيش ولسانك وجعك من كتر الكلام

ممكن تطبي ساكتة فيها..

انا:بغض النظر عن التريقة اللي ملهاش لازمة بس يعني يا حسام انت شايف ايه فيا حلو انت حابه؟

حسام:امممم سؤال صعب بصراحة

انا:لدرجادي؟

حسام:اصلك يعني هيكون فيكِ ايه مميز!! انتي زوجة عادية يعني

انا:يا بني ده انا وووردة

حسام:هه ويا ترى كام واحد شمك قبلي!

صدمتني الكلمة اوي وجرحتني ووجعتني فبصيت ليه جامد وقلتله بنرفزة:

انت شفت بنفسك كام واحد شمها قبلك وكتر خيرك اوووي

حسام:ايه يا بنتي انتي زعلتي؟؟ انا بهزر

******************************************

لما كنت بحب اتناقش مع حسام كنت بلاقي دايما صد واستخفاف بالكلام اللي بقوله مع اني حاولت

اكتر من مرة اني اقرب لعقليته واحاول افهمه بس فشلت في ده ويمكن لان زي ما علياء قالت

عشان احمد في النص بينا!! بس اعمل اييه وانا شايفة واحد مقدرني في كل حاجة وواحد مش واخد

باله مني حتى في عيوبي؟!

اليوم التاني بعد ما سألت حسام انت بتحبني ليه استنيته يخرج يروح الشغل وكلمت احمد وسألته

نفس السؤال..

انا:احمد انت بتحبني ليه

احمد:ياااه يا ندى عشان حجات كتيرة اووي ولو قلتلك على حاجة واحدة بس يبقى اكون بظلمك

او اكون مش بحبك صح..

انا:طيب قولي يا سيدي على شوية حجات

احمد:بصي يا ستي بحب فيكي حنيتك ورقة شخصيتك وطيبتك اللي مش موجودة اوي في الزمن ده

انا:يااه انا فيا كل الحجات الحلوة دي ؟

احمد:وفيكي اكتر من كده كمان ‘ بحب صبرك وتضحيتك ‘ بس بكره فيكي اوي خوفك اللي ضيعك

وضيعني معاكِ..

احمد بالنسبة ليا كان المراية اللي بشوف فيها نفسي وهو كان عنده حق لما قال ان خوفي ضيعني

وضيع كل حاجة حلوة في حياتي...

***************************************

في يوم كنت عايزة اروح اشوف نتيجة الدراسات العليا اللي كنت بمتحنها فطلبت من حسام كالعادة

حسام:مش فاضي يا ندى

انا:وهو انت من امتى بتفضالي اصلااا!!

حسام:طب ياستي اتريقي اتريقي ‘ اهو انتوا الستات كده عمركم ما تفتكروا الحاجات الحلوة اللي

بيعملها الواحد ليكم..

انا:وهي فيييين دي يا حساااام!! فييييين؟؟؟ قووووولي؟؟؟

حسام:سلااااام يا رغاية انا نازل..

وكالعادة بردو طلبت من احمد لان محدش من اهل حسام وافق يجي معايا..

انا مع احمد في الطريق للكلية..

انا:انا قلقانة اوووي

احمد:ان شاء الله ناجحة

انا:ياااارب

احمد بضيق:انا مش عارف ولا قادر افهم جوووزك ده ايه؟! سايبك واحدة حامل وبقيتي في الشهر

التامن ومش هاين عليه يجي معاكِ؟ هو قلبه ده ايييه؟؟

انا بيأس:هه ده ربع اللي بشووفه منه وساكته .. تخيل كل ما اقله عايزة اشتري لبس للبيبي اللي

هيجي يقلي اما يجي الاول نبقى نشتريله!!

احمد:معقوول!! فيه اب كده؟؟؟ بس ولا يهمك انزل انا وانتي نشتري كل الحجات اللي انتي

عايزاها.. بس بكرة ..

ونزلنا وروحنا الكلية والحمد الله شفت النتيجة وكنت ناجحة وفجأة جالي تلفون من ماما فبعدت عن

احمد شوية عشان اكلمها ولما خلصت معاها برفع عيني شفت اخو حسام واقف بعيد ‘ بس عمل

نفسه مشفنيش !! قلبي وقع في رجلي وروحت ناديته عشان احمد يبعد خالص عني وعملت نفسي

مش مع احمد ومشيت مع اخو حسام وياريت الموقف ده مجاااااش!!

**************************************

ورجعت البيت مع اخو حسام وكأن مفيش حاجة حصلت ولا كنت واقفة مع احمد وكنت فاكرة انه

مخدش باله من احمد لانه مجبش سيرته معايا ولا سألني عنه ولا اي حاجة...

تاني يوم كلمني احمد وقالي:ها مش هنخرج نشتري حاجات للبيبي

انا:خايفة يا احمد

احمد:ليييه يا بنتي مش بتقوولي هو مشفنيش وبعدين انا فهمت لما ناديتي عليه انه اخو جوزك فعملت

نفسي اني مش تبعك اصلااا ...

انا:مش عارفة انت عارفني بقى خوافة اوووي

احمد:براحتك يا ندى ‘ لما تحبي تشتري الحاجات اللي انتي عايزاها ابقي كلميني

وفضلت اسبوع متكلمش مع احمد خالص لاني كنت خايفة جدااا ان يكون حسام عرف حاجه

وكنت براقبه طوول الوقت عشان اقدر اعرف هل هو عارف اي حاجة ولا لا؟ بس لقيته عادي

جداااا ومفيش اي حاجة..

انا لحسام:حسام انا في الشهر التامن دلوقتي

حسام:ايه حاسة انك هتولدي؟

انا:لا محتاجين يا حسام ننزل نجيب حاجات للبيبي

حسام:مش قلتلك اما يجي!! ايش عرفنا هيجي بنت ولا ولد!!

انا:الله مش شفنا انها بنت!!

حسام:يا سلاااام انتي متعرفيش يا هانم ان السونار احيانا مبيشوفش عدل!! وياما ناس اتقالهم

هتجيبوا كذا وجه العكس!!

انا:بس ده قليل اوووي ولا انت عايزني لما اروح اولد في المستشفى ملقيش حاجة البسها للبيبي؟

حسام:اختي هتبقي تديكي وقتها لبس من بناتها ‘ تستري بيها البنت لو طلعت فعلا بنت وبعدين

نكون ضمنا انها بنت بقى وننزل نشتري ليها الحجات بتاعتها..

انا:انت بتهزززر صح؟؟

حسام:لا والله بتكلم بجد

انا:ماشي انا هنزل واجيب بفلوووسي وربنا ما يحوجني ليك يا اخي

وفعلا تاني يوم نزلت مع احمد واشترى ليا هو بفلووسه كل اللبس اللي انا كنت عايزاه..

احمد:ها ناقص ايه كمان؟

انا:لا يا احمد كفاية كده ‘ انا اصلا بقيت بتحرج اوي منك ‘ لما تشتري حاجات ليا

احمد:ليه يا ندى بتقوولي كده ... هو مش انا المفروض كنت ابقى.... اا ابقى جوزك يعني

انا:يااااريتك كنت

احمد:خليني بقى احس ولو شوووية باحساسات كان المفروض احسها معاكي..

انا:ماااشي

***************************************

عدى شهر وجت نسمة للدنيا والكل كان فرحان بيها ‘ اما انا فكان جوايا الف احساس مختلف عن

التاني .. مكنتش عارفة افرح بالبنت اللي هتملى عليا الدنيا ؟ ولا ازعل منها انها جت في الوقت

اللي مش مناسب عشان هتربطني بابوها اكتر ولا ازعل عليها عشان جت لام الخوف اكل منها

كتير ولاب مهمل ومش بيحس الا نفسه وبس!!

بس الفطرة اللي جوة اي ست غلبت اكتر ونسمة بقت كل دنيتي وحياتي...

وفي يوم كلمت احمد ولقيته متغير في كلامه معايا ‘ مش بيتكلم معايا بنفس الاهتمام اللي كل

مرة بنتكلم بيه..

انا:مالك يا احمد؟؟

احمد:مخنوق

انا:من ايه؟

احمد:الدنيا بتجري بينا يا ندى واحنا مبنتقدمش خطوة في حكايتنا ‘ بالعكس احنا كل شوية الامور

بتتعقد ما بينا

انا:يعني ايه مش فاهمة؟؟

احمد:انتي دلوقتي بقى عندك بنت وانا لسه زي ما انا ‘ لوووحدي

انا:يعني المفروض اروح اقولهم اني عايزة اتطلق؟

احمد:لا

انا:اماااال؟؟

احمد:ندى انا قررت اني هخطب...

...................................

استنوني الحلقة اللي جاية