الحلقة
الثانيــــة
ولسه فريدة بتقوم
يجيلها صداع فتغمض عينها من شدة الصداع وتشوف قدامها مشهد عبارة
عن بنت بتجري
وخايفة وبتبص وراها وحد بينادي بصوت عالي وبيقول :فرررريدة فررريدة
تفتح فريدة عينها
وتلاقي مامتها ومامة العريس جايين عليها ومامتها بتقولها:فريدة!!
فريدة بتبص يمين
وشمال وكأنها بتدور على حد
مامة فريدة:مالك
يا بنتي؟! كنتي واقفة كده ليه!!
فريدة ولسه بتدور
بعنيها:ماما كان فيه بنت هنا بتجري؟
مامة فريدة:لا!!
فريدة:متأكده!!
مامة فريدة:ايوة
يا بنتي مفيش حد بيجري!!
فريدة:ماما انا
ماشية
مامة فريدة:ايه!
والعريس؟
فريدة:ده عايز
امينة وانا مش هكون امينة لسي السيد بتاعكم ده..
مامة العريس بقرف
لفريدة ومامتها وقالت:ايه ده فعلا صدق اللي قال بنات الزمن ده مش
متربيين..
فريدة :بسم الله
ماشاء الله على ابنك اللي متربي!
مامة فريدة
بتعيط:يابنتي حرام عليكي ده خامس عريس يجي وترفضيه وتطفشيه بالمنظر ده!!
كده هيقولوا انك
ملكيش جواز..
فريدة بتنهيدة:تؤ
يا ماما يا حبيبتي انتي بتعيطي ليه دلوقتي؟؟!
مامة فريدة:يا
بنتي انتي بتعملي حجات غريبة وتصرفاتك غريبة والناس لما يشوفوكي كده
هيقولوا انك
مجنونة ولا راكبك عفريت..
فريدة بسخرية:ما
عفريت الا بني ادم ‘ وبعدين يا ماما بذمتك ده منظر واحد ارتبط بيه
العمر كله؟
مامة
فريدة:بصراحة لا ‘ ده حتى دمه تقيل وتنك وراسم نفسه هو وامه...
فريدة:شفتي بقى ‘
امال كنتي عايزة تدبسيني ليه بقى
مامة فريدة:يا
بنتي بقى عندك 26 سنة ولسه متجوزتيش! الناس تقول ايه؟ عانس لا قدر الله
فريدة:ماما
حبيبتي الافكار دي خلاص قدمت وبعدين ريحي دماغك بقى ‘ انا مش هتجوززز
الا حد بحبه
ويكون شايف فريدة صح! مش تقوليلي سي السيد ده!
وبعدين ترجع تبص
فريدة يمين وشمال وترجع تقول:متأكدة يا ماما ان مكنش فيه بنت بتجري؟
مامة فريدة:والله
لا! هكذب يعني عليكي..
****************************************
ترجع فريدة وتفكر
في اوضتها:ياترى البنت اللي شفتها بتجري دي؟! يكون ايه؟ معقول وهم؟؟
لا بس وهم يتكرر
كذا مرة!! انا البنت دي نفسها اللي شفتها في الحلم؟ ايه حكايتها؟
وليه انا بالذات
بشوفها!!
وترجع فريدة بذاكرتها
لورا لايام ما كانت في الجامعة
لما كانت بتشوف
ولد صغير مع مامته وباباه من فترة لفترة ومكنتش عارفة ده ايه..
فريدة:روجينا فيه
ولد صغير دايما بيجي في احلامي
روجينا:طب وفيها
ايه يعني يا فريدة؟ ما احنا في احلامنا ياما بنشوف حجات غريبة!!
فريدة:لا يا
روجينا الحلم بيبقى غريب اوي
روجينا:ازاي؟
فريدة:بحس كاني
عايشة مع الولد ده!! وبعدين امبارح حلمت ان اهله عملوا حادثة وعارفة
الولد الصغير لما
كبر بقى مين؟
روجينا:مين؟؟
فريدة:بقى صاصو ‘
..
روجينا:صاصو!! هو
انتي عشان معجبة بيه تقومي تحلمي بيه! بس غريبة!!
فريدة:هما اهله
ماتوا؟
روجينا:اه اللي
اعرفه انه عايش مع جده ابو امه من زمان اووي!!
فريدة:غريبة !!
روجينا باستغراب
واندهاش شديد:اوووي
وبعد يومين راحت
فريدة لصاصو وقالتله:ممكن اسألك حاجة؟
صاصو:اتفضلي؟
فريدة:هو انا
اسفة في السؤال بس محتاجة اسأله ضروري
صاصو:اسألي يا
فيري ‘ ولا يهمك ومتخافيش من حاجه
فريدة:هوو هو انت
اهلك يعني الله يرحمهم ماتوا ازاي
صاصو:حادثة عربية
فريدة وصاصو في
نفس الوقت بيقولوا:كانوا ماشيين على الطريق الصحراوي وبابا مخدش باله
من التيرلا اللي
جاية بسرعة من الناحية التانية وفجأة حودت عليهم ودخلت فيهم..
صاصو بخوف
واندهاش:ايه ده؟ انتي عرفتي منين؟؟
فريدة بخوف
اكتر:مم مش عارفة بس حسيت بده!!
وفضلوا ساكتين
دقيقة وبعدين فريدة قالت:شكرا على الاجابة.. انا هقوم عن اذنك
صاصو بيمسك ايدها
ويقلها:فريدة استني ‘ انا محتاج اقلك حاجه؟
فريده:ايه؟
صاصو بتردد:ب
ببصراحة اا انا معجب بيكي
فريدة وشها يحمر
وتتكسف
صاصو:ايه يا
فريدة؟ ساكتة ليه؟
فريدة:يعني ...
صاصو:اعتبر كسوفك
ده ‘ انك انتي كمان بتحبيني بس مكسوفة؟
فريدة بتهز راسها
صاصو:وانا بحبك
اوي ومن زمان ولما جيتي النهاردة قولتيلي عايزة اسألك ‘ كان نفسي اقلك
انتي تسألي طول
العمر وانا اجاوبك بردو..
فريدة بكسوف:بس
يعني انا خفت وكده افكرك بحاجة متحبش تفتكرها
صاصو:بس غريب اوي
انك تحلمي بالحادثة ‘ رغم اني محكتهاش لحد من صحابنا؟؟
فريدة:مش عارفة
انا بقالي فترة بحلم بيك وانت صغير
صاصو:يمكن عشان
بتفكري فيا كتير وعقلك الباطن صورلك الحادثة وخيالك طلع صح
فريدة بعدم
اقتناع:امم ممكن
صاصو:المهم انا
هدخل المحاضرة واخرج منها ‘ نتغدا سوا ماشي
فريدة
بفرحة:مااشي
**********************************************
بسنت جاية لفريدة
في المكتبة وبتقولها:صحيح اللي سمعته ده؟؟
فريدة:ايه؟
بسنت:انتي وصاصو
بتحبوا بعض
فريدة
بفرحة:ايوووة يا بسنت ‘ طلع هو كمان معجب بيا
بسنت:ياسلااام!!
بقى انتي تسيبي كل الولاد الكويسة اللي في الجامعة وتمسكي في غريب الأطوار
ده!
فريدة بضيق:عشان
غريب الأطوار ده هو اللي حس بيا اوي من جوة وفاهمني ..
بسنت:بس يا فيري
صاصو مريب اوووي! هتتأقلمي على شخصيته؟ ده مرة يظهر وعشرة لا!!
فريدة:ايوة يا
ستي .. هو عشان اكيد ملقاش حد يفهمه فبعيد ومنطوي شوية على نفسه..
بسنت:روجينا اما
تعرف هتموت فيها
فريدة:روجينا
عرفت
بسنت:وقالت ايه؟!
فريدة:انصدمت زيك
بس الحلو في روجينا انها بتقلي رأيها وتسكت..
بسنت:اممم يعني
انا اسكت ‘ ماشي يا ستي ربنا يوفقك معاه ..
***********************************
وبعد ساعتين
بتخرج فريدة مع صاصو يتغدوا في مطعم..
صاصو:عارفة يا
فريدة ‘ انا عمري ما تخيلت اني ممكن في يوم احب
فريدة:ليه كده؟
صاصو:طول عمري
عايش لوحدي وكأني في دنيا غير الدنيا
فريدة:عارف انا
كمان كنت فاكرة كده
صاصو:اول ما شفتك
حسيت في عنيكي كل الكلام اللي محتاج اقوله
فريدة بتبتسم
صاصو: انا مفتقد
الحنان اوي ‘ رغم ان ربنا عوضني بجدي واللي بقى كل حياتي ودنيتي ‘ بس
عندك حسيت بحنان
ودفا غريب اووي.. واللي أغرب اني بحس ان انا وانتي بنفكر بنفس الطريقة..
فريدة:عارف نفسي
في ايه دلوقتي؟
صاصو:خليني اخمن
فريدة:هههه خمن؟
صاصو:نفسك تاكلي
غزل بنات؟ وتلعبي في الملاهي
فريدة
بانبهار:ايوووة
صاصو:توارد
أفكار..
فريدة:بس ازاااي
كده؟!
صاصو:ما هما
بيقولوا اللي بيحب بيعرف يقرا حبيبه
*************************************
ترجع فريدة
للحاضر تاني ويدخل باباها عليها الاوضة..
بابا فريدة:ايه
يا فيري؟ قاعدة زعلانة ليه؟
فريدة بسرحان:ها؟
زعلانة! لا
بابا فريدة:امال
مالك يا حبيبتي من ساعة ما جيتي من برة وانتي قافلة عليكي الباب ومخرجتيش!
مش عوايدك؟
فريدة بسرحان:لا
لا عادي يا بابا ‘ جايز اكون تعبانة من الصداع اللي عندي
بابا فريدة طيب
يا حبيبتي هديكي دوا واشربي حاجه دافية ونامي من غير تفكير ‘ واعرفي انك
طالما عملتي اللي
يريحك يبقى خلاص.. وعريس راح ‘ هيجي غيره..
فريدة بسرحان:ها
اه اه صح يا بابا..
وبعد ما تشرب
فريده الدوا وتشرب حاجه دافية تنام ....
***************************************
فيلا كبيرة وصورة
لراجل باين عليه باشا من باشوات زمان ‘ شنبه كبير ومكشر ونظرته باين
جواها السلطة
والنفوذ..
بيفطر ومعاه نفس
البنت الشابة اللي بتشوفها دايما فريدة..
الراجل: من بكرة
لازم تتعلمي دروس بيانو ‘ انتي هتبقي هانم من هوانم المجتمع
البنت في
خضوع:حاضر يا بابا
الراجل:عاملة ايه
في دروس الفرنساوي
البنت:الحمد الله
‘ بابا كنت عايزة اتكلم معاك في موضوع
الراجل:خير؟
البنت:رؤوف جالك؟
الراجل:ابن خالك؟
البنت:ايوة يا
بابا
الراجل:اه جالي
واتكلم معايا بس انا مش موافق
البنت بحزن:بس
انا يا بابا مش هتجوز غيره
الراجل:فرررررريدة!!
وتصحى فريدة
مفزوعة من النوم ‘ تبص في الموبايل تلاقي الساعة 3 الفجر
تبص يمين وشمال
حواليها ‘ زي ما تكون عايزة تتأكد انها في اوضتها وتقوم تشرب مية
وتفضل تفكر في
الاحلام اللي بتجيلها..
**********************************************
تاني يوم صحيت
فريدة وتفكيرها مشوش ‘ اتوضت وصلت كعادتها وبعد ما فطرت نزلت على
الشغل..
فريدة:صباح الخير
يا جماعة
واحدة من
زميلاتها:فريدة ‘ المدير عايزك
فريدة:من الصبح
كده! خير
زميلتها:مش عارفة
والله بس اكيد مش في حاجة وحشة لانه مش مضايق ولا متعصب وطلبك
وهو كان مبتسم
فدي بشارة خير..
فريدة:اممم طيب
الله يبشرك بالخير
راحت فريدة لمكتب
المدير وخبطت وبعدها دخلت ..
المدير:صباح
الخير يا فريدة
فريدة:صباح الخير
يا فندم
المدير:بصي بقى
انا عندي ليكي فرصة شغل كويسة اوي بس هي فيها مشكلة بسيطة
فريدة:خير؟
المدير:انا قررت
افتح فرع جديد لشركتنا في شرم الشيخ ومحتاج الناس الشاطرين اللي هنا
يروحوا هناك ‘
لاننا محتاجين نكسب سمعة هناك كويسة.. واختياري تم عليكي
فريدة
بفرحة:اناااا ‘شرم!! حضرتك بتتكلم بجد
المدير:امال هكون
بهزر مثلا
فريدة:لا اسفة مش
كده حضرتك بس يعني من امتى هنروح شرم؟
المدير:انا اخترت
مقر الشركة هناك ويعني شهر كده وننقل الشغل هناك.. فحبيت اقلك ولو
معترضة ليكي كامل
الاحترام..
فريدة:لا طبعاا
معقول اعترض! انا بس عايزة اعرف السكن هيبقى ايه وضعه؟
المدير:فيه
شاليهات انا خدتها هناك عشان اللي هيروحوا يشتغلوا وطبعا لازم تروحوا بنفسكوا
تشوفوها عشان لو
مش عاجبكم حاجه من حقكم عليا اوفرها ليكم..
فريدة:تماااام ‘
انا بس هقول لاهلي وكده وابلغك القرار الاخير حضرتك..
************************************
رجعت فريدة البيت
ولما قالت الخبر ردت مامتها وقالت:
اييييييه!! انتي
اكيد اتجننتي!! شرم ايه دي اللي تروحيها دي
فريدة:والله بقى
انا شايفة ان ده بقى كووويس اوي لشغلي
مامة
فريدة:وهتقعدي لوحدك!! الناس تقول ايه
فريدة:يا ماما ‘
الناس بيتكلموا كده كده حتى لو انا قاعدة معاكم انتم الاتنين فكبري بقى
مامة فريدة لبابا
فريدة:ساكت ليه!! ما تتكلم ؟ عجبك اللي بنتك بتقوووله ده!!
فريدة:ماما من
الاخر انا شايفة ان دي فرصة مش هتتعوض
مامة فريدة:وانا
مقدرش اسيب ابوكِ لوحده واجي معاكي
فريدة:وهو انا
قلتلك سبيه! انا هروح لوحدي وانتم بقى لما بابا ياخد اجازة تبقوا تيجوا ليا
مامة فريدة لبابا
فريدة:سامع كلااااااام بنتك!!! ما تنطق يا راااااااجل
بابا فريدة:والله
انا شايف انك محبكاها اوووي ‘ ما تسبيها تروح وتكبر نفسها ‘ هتفضلي خنقة
عليها لحد امتى!
بعدين احنا مربينها وعارفين اخلاقها.. ومن فترة لفترة نبقى نروح نقعد معاها
مامة
فريدة:اااااااااخ يااااااني منكم !! ربنا رزقني باتنين مجانين وهيطيروا البرج اللي
فاضل
*******************************************
فريدة في اوضتها
بتكلم بسنت وروجينا عشان تقلهم انها مسافرة شرم وكانوا التلاتة مع
بعض على نفس
الخط..
بسنت:وااااو يا
بنت الايــــــه ‘ شرم مرة واحدة
فريدة:اه ‘ انا
والله فرحت اووي
روجينا:بقلك ايه
يا فيري ‘ انتي مش هتنزلي الاول تشوفي الشاليه وكده
فريدة:اه
روجينا وبسنت مع
بعض:معااااكي ووووش
فريدة:ههههههه
ماشي يا مجانين!
بسنت:مين ده اللي
مجنون يا سايكووو!!
فريدة:يوووه
بقلكم ايه ‘ غوروا بقى .. سلاااام
بسنت:استني بس
كنا عايزين نعرف ......
توت توت توت توت
روجينا:هههههه
شكلك ووحش اووي يا بسنت ‘ قفلت في وشك
بسنت:يا بنت الــ
.... ما هقول ايه بقى! ضاربة!! وبعدين مش انا بس اللي شكلي وحش
ما هو وشك انتي
كمان اتقفل عليه يا ظررريفة
روجينا:ههههههه
ماشي يا بايخة ..سلام
بسنت:سلام
************************************
تاني يوم صحيت
فريدة وراحت الشغل وبعد ما خلصت شغل راحت محل اللوح بتاعها..
فريدة:ازيك يا
راجل يا طيب
عم صابر:ازيك
انتي يا بنتي
فريدة:ها كلمت
ادم بتاعك ده!
عم صابر:استاذ
ادم هنا بنفسه
فريدة:والله!!
النهاردة عيد ولا ايه؟ وانا مش واخده بالي!!
ادم شاب في اخر
العشرينات شعره ناعم وبني غامق وعينه عسلي على اخضر فاتح ولابس
نضارات طبية
وعنده غمزة يتيمة من الجهة اليمين ومتوسط الطول..
ادم:خير حضرتك؟
فريدة بتحس بشعور
غريب مش قادرة تفسره وبعدين تقول:انا كنت جاية اسأل عن اللوحة ......
وتبص على مكان
اللوحة عشان تشاور عليها فتلاقي لوحة تانية مختلفة.. فترجع تقول:
ايه ده؟؟ هي راحت
فييين!!
ادم باستغراب:هي
ايه دي اللي فين؟
فريدة
بعصبية:اللوحة اللي كانت هنا وقلت لعم صابر اني عاوزة اشتريها ورفض وقال انها تخص
مش عارف مين من
اهلك!!
ادم:مش فاهمك!!
فريدة:لااا بقى
انت فاهمني وبعدين لو كنت عايز تبيعها من الاول ‘ عم صابر رفض يبيعها ليا ليه!
ادم:يا فندم انا
حقيقي مش فاهم انتي بتتكلمي عن ايه!
فريدة:اللوحة
اللي مرسوم فيها بنت حزينة؟!
ادم:مفيش لوحة
بالمواصفات دي
فريدة:انت كذاب!
ادم:نعم!!
فريدة لعم
صابر:عم صابر فين اللوحة اللي سألتك عليها من اسبوعين!
عم صابر:حضرتك
مسألتنيش عن اي لوح!!!!!!
.................................
استنوني الحلقة
اللي جاية..........
