"سايكــــــــــــو " الحلقـــــــــــة الأولـــــــــــى

سايـــــــكو

لفاطمــــــة طلال

الحلقة الاولى

فريدة نايمة وبتحلم وفجأة يرن جرس المنبة فتقوم مفزوعة

فريدة لنفسها:تؤ استغفر الله العظيم! حتى الحلم مخلتنيش اكمله

مامة فريدة من برة الاوضة:

يلاااا يا فيري اصحي بقى هتتأخري على شغلك

فريدة بصوت مليان نوم:حــ حـ اضر يا ماما نام بس خمسة و اصــ .....

وترجع فريدة تاني تنام وتحلم بممر وبنت عمرها 17 سنة رايحة تقابل ولد وبتقله

طب هنعمل ايه؟

الولد للبنت اللي في الحلم: لازم نسافر سوا

البنت:مش هقدر دلوقتي ‘ انت عارف بابا وعقله

الولد بيمسك ايدها ويقولها:انا بحبك يا فريدة

وفجأة تزعق الام وتقول:الله ما تصحي بقى يا فرييييييييدة

فريدة وهي مفزووعة:ليييه لييييه حراااام عليكي ليييييييه

الام:هو ايه اللي ليه!!

فريدة:كنت عايزة اعرف هيعملوااا اييييه ‘ يا شيخة حرام عليكي

الام:هما مين دووول؟!! بسم الله الرحمن الرحيم؟!! انتي بتخرفي يا فريدة

فريدة:الغريب انه قالها يا فريدة بس هي مش انا؟!!!

الام:قلتلك ميت مرة ابقي اتغطي وانتي نايمة عشان احلامك الغريبة دي

فريدة:يا ماما احلامي بتبقى غريبة فعلا بس بتبقى واقعية

الام:بس بس بطلي كلام فارغ ‘ قال واقعية قال.. يا بنتي الناس كلها بقت تتعامل معاكي على انك

مجنونة!! اه ياااااني منك سوووقك يا  عبيطة هيقف..

***************************************

تقوم فريدة وتغسل وشها وتصلي ركعتين وبعدين تفطر وتغير لبسها بسرعة عشان تنزل الشغل..

فريدة عمرها 26 سنة ‘ شعرها لونه بني وعينها لونهم اسود وجميلة بس معروف عنها انها غريبة

الاطوار ومعندهاش صحاب كتير..صحبتها الانتيم روجينا وبسنت..وهي البنت الوحيدة لأهلها..

********************************************

مامة فريدة للاب:بنتك احوالها مش عجباني

الاب:ليه بس ما هي زي الفل اهي!!

مامة فريدة:منتا مشوفتهاش لما جيت اصحيها!!

الاب:ايه؟! نفس الاحلام؟؟

مامة فريدة:باين كده بس هي مش راضية تتكلم!!

***********************************************

فريدة بتشتغل مصممة ديكور وبترسم حلو ودايما بتحب تروح معارض للفن وتشتري لوحات ‘

وعندها ولع بكل تحفة فنية..

وفي يوم راحت معرض دايما بتروح ليه وبتحب اللوحات الفنية اللي فيه وكتير تشتري منه كمان.

اول ما دخلت جالها راجل عجوز وبيبتسم ويقولها:

اهلااا اهلااا بست فريدة ‘ ازيك يا بنتي؟

فريدة بابتسامة سعيدة:ازيك انت يا راجل يا طيب؟ عامل ايه؟

الراجل العجوز:الحمد الله ‘ بقالك فترة مبتجيش المحل يعني ولا بتعدي

فريدة بضحك:ههههه ‘ اخر مرة اشتريت من عندكم لوحة ماما مبطلتش تهزيق وما ادراك بقى بكلام

الامهات: يا بنتي حرام مرتبك ضايع على الهبل ده ‘ يابنتي انتي اوضتك بقت مليانة تحف وانتيكات

ملهاش لازمة ‘ يارب صبرني عليكي ويهيديكي .. فتقوم فريدة تعمل ايه بقى يا راجل يا طيب؟!

تقوم تهدى كده شهر ولا اتنين وترجع تاني تشتري لوحات هههههه هو انا هغلب..

الراجل العجوز:هههه ربنا يحميكي يا بنتي لشبابك..

فريدة بتقف قدام لوحة لست عجوزة اوي بس جميلة وعينها مليانة حزن ‘ الصورة بالاسود والابيض

 بعدين تقول:عم صابر اللوحة دي بكام؟ دي جديدة؟

عم صابر:لااا ولا جديدة ولا حاجة بس الااا اللوحة دي

فريدة باستغراب:اشمعنا؟؟ ملعونة؟؟

عم صابر:ههه ملعوونة ايه يا بنتي ‘بس ادم باشا مش عارضها للبيع

فريدة:ليه بقى ان شاء الله؟؟ هو اللي راسمها بنفسه؟ وبعدين انا اصلا عمري ما جيت المحل ولقيت

ادم بيه بتاعك ده قاعد! هو ده مش اكل عيشه؟؟ ولا هو مستهتر ولا ايه؟؟

عم صابر:ما هو بيجي في اوقات انتي مش بتيجي فيها

فريدة وهي بتتمشى في المحل وبتتفرج على بقية اللوحات ‘ وبعدين نظرها يروح للمكتب بتاع

صاحب المحل وتشوف صورة لشاب وتلف عينها بسرعة وتكمل:

المهم يا عم صابر ‘ ادم بيه بتاعك ده مش عايز يبيع اللوحة ليه؟

عم صابر:اللوحة دي بتاعت جدته الله يرحمها

فريدة:هي اللي راسمها يعني؟؟

عم صابر:لااا هدية ليها

فريدة:عمتن انا مفيش ولا لوحة النهاردة داخلة مزاجي ‘ فانت بقى قول لادم ده اني عايزة اشتري

اللوحة دي بالزاااات فيخلصني ويقولي هيبيعها بكام..

عم صابر:يابنتي صدقيني مش هيبيعها

فريدة بسرعة شديدة:يااا راجل يا طيب قوله انت بس وبعدين هبقى اعدي عليك المرة اللي جاية

يلا سلااام ..

*************************************

تخرج فريدة من المحل وتركب عربيتها بسرعة وتروح عند كافيه معين متعودة تقعد هي وصحابها

فيه..

تدخل فريدة الكافيه وتقابل روجينا..

روجينا:امووت واعرف امتى مواعيدك تتزبط؟!

فريدة:تؤ ما انتي عارفة بقى يا جيجي يا دوب خلصت الشغل وعديت على معرض اللوحات وجيت

روجينا:ايه ده غريبة!! مش شايفة في ايدك لوحة يعني؟ مش عادتك يا سايكو؟؟

فريدة وهي بتجز على سنانها:تؤ بطلي تقولي سايكو سايكووووو الله

روجينا:ما ده لقبك من اول ما عرفتك وبصراحة مينفعش يتغير! اصل بالعقل كده لو مش انتي

اللي اقولها سايكو اقوول لمين.. انتي يا فريدة حالة كده غريبة ‘ مريبة ‘ غامضة وساعات

مخيفة! مجنووونة تبقي ايييه!! تبقي ساااااايكوووو..

فريدة:افف ما علينا ‘ طلبتيلي العصير بتاعي؟

روجينا:اه

فريدة:اخبار جيمي معاكي ايه؟

روجينا:اهو هيشلني هو التاني.. صحيييح عارفة مين سأل عليكي؟

فريدة:مين؟

روجينا:هههههه مش هتصدقي

فريدة:ايييه بقى الله .. قوووولي وخلصيني

روجينا:هشام هههههه سأل جيمي عليكي

فريدة تكشر وتقول:متجبيش سيرته البني ادم ده ‘ عشان بيعصبني

**********************************************

ترجع فريدة بذكرياتها لورا

في نفس الكافيه بس كان بليل كانت فريدة قاعدة مع روجينا وحبيبها جيمي وبسنت وهي وهشام

وكانوا كلهم بيتكلموا ما عدا فريدة قاعدة تلعب في الموبايل

هشام:هو انتي ليه مش بتتكلمي معانا؟

فريدة:يعني ملقتش حاجة في كلامكم تشدني ‘ تخليني اتكلم وكده

هشام:طب قوليلي بقى انتي بتحبي تعملي ايه في يومك؟او يعني بتقضيه ازاي

فريدة:عادي يومي روتيني جدا ‘ اصحى ‘ شغل ‘ الكافيه ده او النادي ‘ معرض اللوح اشتري لوح!!

يعني كده يعني..

هشام:امم لوح! فنانة يعني

فريدة:ممم مش بالزبط

هشام:انا بقى بصحى زيك واروح الشغل ههههه

فريدة بسخرية:ههه والله سبحان الله

هشام:ههههه تخيلي بصرة

فريدة لنفسها:يا تقل دمك

هشام:المهم بقى يا ستي بعد ما اخلص شغل ‘ بحب اتغدا بس مبحبش اتغدا لوحدي فاختار اي بنوتة

لذيذة كده يا من الشغل او صحابي تيجي تتغدى معايا وتونسني.. فايه رايك في بكرة؟

فريدة:ايوة يعني نعم؟

هشام:يعني لو معندكيش مانع تونسيني بكرة في الغدا

فريدة بضحكة صفرا:هه على اساس اني البنوتة اللذيذة القطقوطة اللي هتيجي تسلي حضرتك على

الغدا

هشام بيكشر: عادي يعني؟ ولا انتي شكلك بدقة قديمة

فريدة:لا هي حضرتك الفكرة مش في دقة قديمة ولا اسبور وكده ‘ الفكرة نفسها في الفكرة! واخد

بالك انت.. وانا بقى بستتقل الجو الحمضان بتاعك ده! ما اصل انا هقلك انا مش باربي هتطلبها

بكرة عشان تسليك وبعده تدور على غيرها. تؤ لا لا لا الجو ده مش سكتي..

هشام:انتي مجنونة لا مؤاخذة!!

فريدة بعصبية:لا انا مجنونة لو معملتش اللي في بالي دلوقتي!

هشام بسخرية:اللي هو؟

تقوم فريدة دلقة العصير عليه وتبص لجيمي وتقوله:ابقي استنضف صحابك اللي هتجبهم

في الخروجات بعد كده.. قال مجنونة قااال..

******************************************

ترجع فريدة تاني للواقع على صوت روجينا:ايييه روحتي فين

فريدة بتضحك:مفيش افتكرت لما دلقت العصير عليه

روجينا:يخربيتك يا سايكووو ‘ ده انا فضلت اعتذر طول اللليل ليه على اللي عملتيه فيه

فريدة:يعني كنتي عايزاني اعمل ايه في واحد بيقلي انا كل يوم بدور على بنت تيجي تتغدى معايا

والبجح البجححح يقلي ايه رايك في بكرة!!! هو اييييه ده

روجينا:هههه هو هشام كده

فريدة:والله كده ولا مش كده ‘ هو يستاهل

روجينا:ههههه بس بصراحة هو مقلش حاجة مش موجودة! ما انتي فعلا مجنونة

فريدة:تؤ شووف اقولها ايه؟! تقووولي ايه!!

روجينا:المهم كان بيسأل عنك جيمي بقى

فريدة:ليه؟

روجينا:بيقول ان هو من ساعتها مشلكيش من دماغه وانه متغاظ جداااا

فريدة:طب وانا مالي!!

روجينا:انا قلت اغيظك بس

فريدة:ياشيخة اتلهي

روجينا:بس بجد يا فيري انتي هتفضلي كده لحد امتى؟

فريدة:كده ازاي؟

روجينا:يا فريدة انتي مفيش ولد نقلك تعالي شوفيه يمكن ربنا ينفخ في صورتك وتتجوزيه الا

لما تعملي مشكلة معاه!! ولا انتي بقى مش قادرة لسه تنسي صاصو؟!

فريدة بابتسامة هادية:صاصو!! الموضوع مش موضوع حب قديم وكده  وبعدين بتفكريني بيه ليه؟

روجينا:على اساس انه اتنسى؟

فريدة:لا صاصو خلاص صفحة قديمة واتقفلت

روجينا:امممم واضح!!

فريدة:وبعدين هما  اللي تفكيرهم غررريب!!

روجينا باستنكار:هما بردوووو!!!!!

فريدة:ايوووة ‘ انا مش عايزة كده يا جيجي ‘ انا عايزة واحد يشوفني صح! واحد ميشوفنيش سايكو

زي ما كل الناس شايفني ! واحد رومانسي ويحبني واحبه من غير تدخل البشر..

روجينا:الله وهو احنا بنقلك متحبيش! بس مفيش مرة نجيبلك حد من صحاب جيمي ولا حد

من صحاب خطيب بسنت الا وبتطفشيهم بمخك الطاقق ده!!

فريدة:عارفة ليه؟ لان ولا واحد فيهم كان بيشوف فريدة من جوة ‘لا دول كانوا بيشوفني من

برة وبس..

روجينا:يااااااارب صبرررررني

فريدة:تؤ بقلك ايه ‘ انتي خدتي اكتر من وقتك النهاردة .. انا ماشية

************************************

تفضل تتمشى فريدة شوية بالعربية وبعدين تروح تقعد على كورنيش النيل شوية وتتفرج على

الغروب وتاكل حمص الشام وترجع البيت..

بابا فريدة:ايه يا بنتي؟ اتأخرتي ليه؟

فريدة:انا؟لا ولا اتأخرت ولا حاجه ‘ وبعدين انا قلت لماما اني هخرج بعد الشغل.. ليه فيه

حاجه؟

بابا فريدة:اه‘ امك جايبة ليكي عريس

فريدة:اففف مبتزهقوش بقى.. عن اذنك يا بابا

بابا فريدة:يا بنتي ‘ شووفيه ومش هتخسري حاجه؟

فريدة:يا بابا يا حبيبي ‘ انا حفظت زوق ماما في العرسان اللي كل شوية بتجيبهم ليا

بابا فريدة:معلش تعالي على نفسك وقابليه ولو معجبكيش ارفضيه ببساطة..

فريدة:عشانك انت بس

***********************************

وبعد اسبوع تكون فريدة قاعدة مع مامتها في النادي ومع العريس ومامته..

مامة العريس لمامة فريدة:بقلك ايه ما تيجي نتمشى شوية في النادي ‘لحسن زهقت من القاعدة

وبعد ما يمشوا فتفضل فريدة تبص يمين وشمال وساكتة

العريس:ايه؟

فريدة:ايه؟

العريس:ههه يعني اصل شايفك قاعدة مش على بعضك

فريدة:اممم

العريس:قوليلي بقى انتي بتشتغلي ايه؟

فريدة:مصممة ديكور

العريس:اممم يعني بتختلطي بشباب كتير وكده

فريدة:لا انا احيانا بروح اصمم ليهم بنفسي كمان

العريس:اممم بس احنا لو حصل نصيب مش هينفع

فريدة بابتسامة صفرا:هو ايه اللي لامؤاخذه مش هينفع؟

العريس:يعني شغل واختلاط كتير وكده بقى ‘ بيتك اولى وجوزك طبعا

فريده:ههههههههههه معلش سوري ههههههههههه لا لا لا هههههههه

العريس باندهاش:ايه؟

فريدة:سي السيد يعني؟

العريس:افندم؟

فريدة:جو سي السيد وامينة وترجع تلاقيني قاعدة في البيت لا شغل ولا مشغلة الا بحضرتك!

العريس باستغراب:نعم!!

فريدة:ايوووة سي السيد!! ايه مستغرب ولا مندهش؟!

العريس:وهو انا مش من حقي كراجل ابقى عايز ارجع من الشغل ‘ الاقيكي موضبالي كل حاجة

في البيت وبعدين بصراحة انا مبحبش مراتي تكون مع رجالة كتير..

فريدة:وهو انا بقلك بشتغل في كباريه!! انا بشتغل مصممة ديكووور! يعني ممكن اصمم شقة

او شركة او مكتب لاي راجل بس الرك على البنت بقى يا استاذ .. هي اللي بتعرف تحط

الحدود بينها وبين اي حد..

العريس:مقتنعتش

فريدة:لا احنا مش هينفع سووري ‘ بعد اذنك واه لما ماما ترجع قولها اني روّحت..

ولسه فريدة بتقوم يجيلها صداع فتغمض عينها من شدة الصداع وتشوف قدامها مشهد عبارة

عن بنت بتجري وخايفة وبتبص وراها وحد بينادي بصوت عالي وبيقول....

استنوني الحلقة اللي جايـــــــة

...............................