الحلقة السادسة من قصة " الحُب خلف الأسلاك الشائكة"

الحلقة السادسة

وفعلا روحت اول يوم عشان استلم وكنت هطير من الفرحة وهناك اتفاجئت لما دخلت وشوفت أحمد

اللي كان بياخد معايا دروس زمان . واول ما شوفته فرحت اوي ‘ بس هو مخدش باله وجت

دكتورة منال تستقبلني من قريبها اللي هو من معارف بابا..

منال:ازيك يا ندى

انا:الحمد الله

منال:بصي يا ستي انا سمعت انك في تانية؟

انا:اه طالعة ان شاء الله

منال:تماام وانتي هتيجي تتدربي عندي في الاجازات بس صح؟

انا:اه اصل انا جامعتي في القاهرة وكده

منال:حلو اووي ‘ عمتن انا هخليكي دلوقتي السنادي كلها تتفرجي الشغل ماشي ازاي وده لانك

لسه صغيره ولسه مخدتيش حاجات كتيرة في الجامعة واول ما تخلصي تانية وتروحي تالتة

ان شاء الله هبتدي بقى اخليكي تتدربي..

انا:ماشي ‘ بس هاجي في مواعيد الشغل صح؟

منال:اه طبعا عشان تكتسبي مهارة اكتر وتستفيدي وطبعا لو حبيتي تروّحي بدري ممكن لانك

مجرد بتتعلمي لسه..

انا:تمام يا دكتورة

منال:تعالي بقى يا ستي اعرفك على الاتنين اللي بيشتغلوا معايا ويعتبروا مساعدين ليا..

وبعدها نادت دكتورة منال على احمد وبنت تانية..

منال:ده احمد المساعد بتاعي ودي دكتورة سارة

انا بابتسامة كبيرة وفرحانة:اهلااا بيكم

سارة بابتسامة سعيدة:اهلا بيكِ انتي

احمد من غير اهتمام:اهلا

منال:طيب يا سارة خدي ندى معاكي وعرفيها النظام هنا ماشي ازاي

وفعلا خدتني سارة جوة على الاوضة اللي بيقعدوا فيها وراح احمد قعد على المكتب اللي برة

اللي بيستقبل فيه المرضى اللي بيجوا العيادة...

استغربت اوي من جوة نفسي هو ليه لما دكتورة منال عرفتني عليهم قالت لسارة الدكتورة وقالت

لاحمد المساعد بس من غير دكتور! كان نفسي اروح اكلم احمد اوي بس طبعا مكنش ينفع عشان

محدش يفتكر حاجه غلط..

ودخلت الاوضة اللي بتقعد فيها سارة وقالتلي:

بصي يا ست يدي الاوضة بتاعتي والاوضة التانية بتاعت الدكتورة منال وفيه اوضة تالتة فيها

المخزن وده اللي فيه الادوات الطبية اللي بنحتاجها هنا في العيادة..

انا لسه خريجة جديدة والحمد الله عشان كنت بتدرب عند دكتورة منال من زمان فأول ما اتخرجت

شغلتني معاها لانها محتاجة دكتورة تانية معاها ‘ اصل ماشاء الله عيادتها معروفة اووي وهي شاطرة

عشان كده برافو عليكي انك جيتي تدربي هنا..

انا:ااه هو انتي عندك كام سنة؟

سارة:24 سنة

انا:اه

سارة:وانتي؟

انا:19 سنة

سارة:ههههه لسه صغيرة

انا باهتمام:هوو هو احمد هنا شغال ايه؟

سارة باستغراب:انتي تعرفي احمد؟؟

انا بخوف وارتباك:اا اه ك كان معايا في دروس الثانوية زمان

سارة:بصي يا ستي هو هنا يعتبر مساعد

انا:هو بيتدرب زيّ؟

سارة:لا ده بيشتغل!

انا:ايه ده ازاي بيوفق بين دراسته وشغله

سارة:ماهو معهد

انا باستغراب كبير:ايه!!! معهد؟!!!!

سارة:اه معهد علوم صحية

انا باندهاش:ازاااااي!! ده كان في ثانوية جاب مجموع كبير اووووي ‘مجموع يدخله اي حاجة اصلا؟!

يقوم يدخل معهد!! سنتين!!

سارة:اه وفضله سنة ويتخرج

انا بعدم فهم:انا مش فاهمة حاجة!!

سارة:اقلك يا ستي ‘ بصي هو فعلا زي ما بتقوولي كده مجموعه كبير ويدخله اي كلية بس يوم نتيجته

في الثانوية يعيني بابا اتوفى..

انا بحزن شديد:لا حول ولا قوة الا بالله.. وبعدييين؟؟

سارة:قام ايه بقى عشان هو عنده اخوات بنات واخوه الكبير مسافر برة فقال يدخل اي معهد سنتين

وفي نفس الوقت يشتغل عشان يصرف على البيت واخواته البنات اللي على وش جواز..

انا:طيب ما يدخل اي كليه وفي نفس الوقت يشتغل

سارة:ماهو اي كلية يا ندى محتاجة مصاريف وكتب وحاجات اد كده وده عنده اخوات بنات على

وش جواز وكل وحدة محتاجة تتجهز..

انا:اصله في ثانوي يا سارة كان بيزاكر جامد عشان يجيب مجموع عالي اوووي فصعبان عليا

سارة:ماهو عشان هو ولد محترم وشهم وجدع وراجل اد المسؤولية دكتورة منال وافقت تشغله

هنا معاها في العيادة..

انا بحزن:ايووة

سارة:والله احمد ده بجد محترم وصعبان عليا انا كمان وكلمته كتير في انه بعد ما يخلص المعهد ‘ يدخل

كلية بس كان بيقولي دايما اي قرش بجيبه عشان اخواتي وامي يقدروا يعيشوا زي ما كان بابا معيشهم

وميحسوش بالنقص..

انا:طيب ما عنده اخوه الاكبر منه كمان؟

سارة:قلتله بردو قبله كده بس بيقول ان اخوه متجوز جديد ومراته حامل ويدوب بيكون نفسه..

انا بغيظ وحاولت اداريه:اممم ده انتي تعرفي حاجات كتيرة عنه ..

سارة:اه يا بنتي ما احنا اتكلمنا كتيييير..

سكت واتغظت اووووي من سارة ‘ اتغظت انها تعرف كل الحجات دي عن احمد وانا مكنتش اعرف

نصها وكان قلبي محروق عليه وفي نفس الوقت كبر في عيني اوووي.. كبر في عيني لانه فعلا

راجل اد المسؤولية ‘ واحد غيره بالمجموع الكبير اللي كان جايبه كان قال يلا نفسي وانا اهم!

بس هو ضحى عشان مامته واخواته البنات...

بعدها قمت استئذنت سارة اروح اشرب مية من المطبخ بتاع العيادة..

وعشان اروح المطبخ بشوف مكتب احمد بس ملقتهوش قاعد فزعلت لان المطبخ دي كانت حجة

عشان اشوفه وروحت المطبخ عشان اشرب وارجع.. ولما روحت هناك لقيته بيعمل كوباية شاي

انا باحراج:ازيك يا احمد

احمد بيكمل عمل كوباية الشاي وبعدم اهتمام:الحمد الله

انا:انت مش فاكرني؟

احمد بعدم اهتمام:لا فاكرك ‘ كنتي معايا في الدروس زمان

انا بفرحة:اااه ‘ انا افتكرت انك ناسيني

احمد:لا عادي

انا:اا انا سم سمعت ان باباك اتوفى الله يرحمه

احمد كان بيقلب في كوباية الشاي وبعدها وقف شوية وكان باصص فيها وبعدها قال: الله يرحمه

انا:اا انا اسفة لو ضيقتك بس بب بس كنت عايزة اعزيك فيه

احمد:شكرا.. عن اذنك

وخد بعضه ومشي من المطبخ..

اضايقت جدااا وحسيت اني احرجت نفسي وانه مش مديني الاهتمام خالص..

رجعت البيت يومها وطول اليوم وانا بفكر في احمد واستغربت اوووي ‘ هو انا بفكر فيه اوي كده ليه!

وقمت كلمت علياء كالعادة عشان احكيلها..

علياء:احمد احمد!! احمد بتاع الثانوية؟؟

انا:ايوة

علياء:يا حراااام ‘ ده احنا لما عرفنا مجموعه من اخو اشراق قلنا وش هيدخل طب ولا هندسة!!

انا:تخيلي بقى باباه يموت في نفس اليوم وميحلقش يفرح بيه ويقوم داخل معهد

علياء:ااه وهو قعد يرغي في دي كله مع سارة؟

انا بضيق:تخيلي بقى يتكلم مع ساااارة في ده كله وانا اللي هو اعرفه من قبلها ما يتكلمش معايا

كلمتين على بعض!!!

علياء باستفسار:وانتي مالك مضايقة ليه يا ندى؟

انا بارتباك:اا ااصل اصل غاظني اوووي ‘ يعني انا اروح اعزيه ويقوم ممش مديني اهتمام!!

علياء بسخرية:اه لا ازاي! ده كان حقه اول ما شافك يقوم يضربلك سلام تعظيم وياخدك بالاحضان

انا بضيق اكتر:انتي بتترييييقي عليااااااا.. انا غلطانة يا علياء اني بتصل بيكي..

علياء:هههههه طب خلاص خلاص حقك عليا يا ستي انا بس شايفة انك مهتمة اووي بيه ومش بس

من دلوقتي لا ده من زمان يا ندى..فعايزة اعرف ده اسمه ايه بقى؟؟

انا بارتباك:عادي يعني زميلنا وكده

علياء:زميلنا!!! وده من امتى يا بنت الشيخ عبد الكريم!!

انا بارتباك:يووه بقى عادي ..

علياء:ماشي نمشيها عادي ..

انا:المهم ‘ العريس المتقدملك ده ايه نظامه؟

علياء:مش عارفه ‘ انا هرفضه وكده

انا:ليه؟

علياء:مش حاسة بتوافق فكري يا ندى

انا:اه انتي من بتوع التوافق الفكري والمجتمعي وكده؟

علياء:لا انا مبيهمنيش حوار التوافق الاجتماعي ده وانه لازم مستواه ومستوى عيلته يبقى ادنا

وكده لكن المستوى الفكري يهمني ‘ عقله وافكاره تهمني لان هما دول اللي هعيش معاهم بقية حياتي..

انا:اه صح عندك حق ‘ انا كمان ميهمنيش اخد واحد اقل مني في المستوى المهم افكاره تبقى موافقة

افكاري..

علياء بسخرية:زي احمد مثلا

انا:يوووووه عليكي ‘ اقفلي يا علياء

علياء:هههه ماشي سلام

وبعد ما قفلت مع علياء ‘ رجعت افكر تاني في احمد..

****************************

عدت شهور الاجازة زي الهوا وانا كل يوم بروح العيادة واضيع وقتي فيها وبقيت انا وسارة صحاب

اوي وحاولت كتير اقرب من احمد الا انه كان دايما بعيد عني وده كان بيخليني ارجع كل يوم مضايقة

جدا...

وفي يوم واحنا قاعدين زي عادتنا في العيادة ‘ كنت انا وسارة في اوضتها.. الباب خبط واحمد دخل

احمد:سارة انا تحت هشرب سيجارتي وراجع بسرعه

سارة:ماشي

بعد ما مشي

انا:بيشرب سجاير كتير اوي صح؟

سارة:يااااه ده حريقة سجاير يا بنتي والله

انا:يااه ليه كده

سارة:مش عارفة والله! تلاقيه بيحرق فيها

انا:بس كده خطر على حياته

سارة:دكتورة منال تعبت من كتر ما قلتله وهو مفيش فايدة برضو ‘ حاول كتير يقلل منها وبعد كده

يرجع ليها تاني..

انا:اهااا

سارة:خلاص بكرة راجعة القاهرة؟

انا بحزن:اااه للاسف

سارة:ومالك زعلانة ليه؟

انا:اصل هناك في المدينة فيه بنات اعوووذ بالله

سارة:هههه معلش الايام هتفوت بسرعة وترجعي تاني هنا

انا لنفسي:ايوة ياريت بقى لحسن انا بقيت احب هنا اووووي....

*************************

تاني يوم سافرت وقبل ما اسافر عديت على العيادة سلمت على دكتورة منال وسارة واحمد..

احمد:تروحي وترجعي بالسلامة

انا بابتسامة:ياه اخيرا قلتلي حاجة عدلة

احمد:ههه اشمعنا يعني هو انا بقلك كلام وحش ولا ايه؟

انا بفرحة:لا اصل انت عمرك ما كلمتني كويس ودايما ترميلي كلمة ولا اتنين وتمشي

احمد:هههه يا ستي حقك عليا.. المهم خدي بالك من نفسك

انا بفرحة:وكمان بتضحك لا والله ده كتير علينا

احمد كشر:طب ايه كده كويس

انا:لا والنبي ‘ خلاص انا مسافرة

احمد بابتسامة:ربنا معاكِ

انا:ومعاك..سلااام

احمد:سلام

ونزلت من العيادة وانا مبسوطة اوووي انه اخيرا اتكلمت مع احمد كلمتين على بعض وضحك.. اول

مرة اشوفه بيضحك معايا كده.. ورجعت تاني على القاهرة وزحمتها وللمدينة وخناقتها..

سلمت على اسراء ونورة وشيماء وطبعا طنشت وفاء بس هي مينفعش تتطنشني...

وفاء:بقلكم ايه يا بنات عشان نبقى على نور كده من بداية السنة ‘ عشان انا السنة دي صعبة

عليا فياريت مكالمات بليل دي والودودة في التلفون وحكايات عشاق الليل واخره تبقى برة

الاوضة.. اذا انتوا مش خايفين على مستقبلكم فغيره خايف بقى..

انا بعصبية:اولا كلنا هنا محترمين ومفيش حد بتاع الليل واخره ماشي!!! ولما تطلبي بادب

ساعتها هنفذ ليكي غير كده انتي ملكيش حاجة عندنا وقلة ادب بقلة ادب!! ولو زودتي في قلة ادبك

دي هتلاقيني بتكلم فوق ودانك واضحك واوريكي الودودة ايه ظروفها معاكي....

وفاء:ايه ده انتي مالك خدتي الكلام عليكي اوي ‘ انا كلامي كان لكل

انا:لا انا عارفة كويس كلامك ده كان لمين....

***********************

وزي سنة اولى قضيت التيرم الاولاني كله مذاكرة وحفظ عشان اقدر اجيب امتياز في كل المواد ولما

قربت اجازة نص السنة كنت فرحانة اوي وجريت اخد قبلها استئذان عشان اول ما الاجازة تيجي

اسافر تاني وارجع البيت..

وهناك لما رجعت ‘ رجعت للعيادة وشوفت دكتورة منال وسارة واحمد وبقيت احس انهم عيلتي

التانين..

وفي يوم كنت قاعدة واحمد دخل المخزن عشان يعمل جرد فنادت عليا دكتورة منال وقالتلي:

ندى روحي اجردي مع احمد

انا:حاضر يا دكتورة

وروحت المخزن فعلا وهناك بقول لاحمد بابتسامة:دكتورة منال قالتلي اساعدك

احمد بتكشيرة:مش عايز

انا بضيق:ليه كده؟

احمد بتكشيرة:يا ستي انا مش عايز ايه ده!!!!

انا:ماشي..انا اسفة وروحت وقفت عند اول المخزن وفضلت اعيط من المعاملة الوحشة اللي

كان احمد بيعاملها ليا..بحيث انه ميشوفنيش وبعدها مسحت دموعي وخرجت قعدت برة..

خمس دقايق ولقيته بيقولي :

تعالي معايا جوة

انا:ليه؟

احمد:ياستي تعالي ..

قمت معاه ودخلت المخزن وقالي:

انا اسف معلش وهخليكي تساعديني المرادي وبس بعد كده متجيش تاني وتقوليلي اساعدك

انا:ماشي

احمد:هو انتي ........

استنوني الحلق اللي جاية....