الحلقة السابعة
احمد:هو انتي هترجعي القاهرة امتى؟
انا بضيق:هو انت لدرجادي مش طايقني!
احمد:لا انا بس حبيت اعرف مش اكتر.. انتي اللي بتسوئي الظن بيا مش عارف ليه
انا:انا بردو؟
احمد:طيب احنا كده تقريبا خلصنا جرد ..
انا:تمام بعد اذنك
*****************************
وبعد يومين كنت رايحة ازور هدى اختي في بيتها وفجأة لقيت رقم غريب بيرن
عليا..
انا باستغراب:الو؟
احمد:ايوة يا ندى .. انا احمد
فرحت وقتها اوي وكنت طايرة من الفرح بس بعد كده لقيته بيقلي:
خدي سارة معاكي اهي..
سارة:ايوة يا ندى ‘ معلش انا خليت احمد يكلمك من عنده ‘ عشان انا مش معايا
رصيد وكنت عايزة
اعرف انتي جاية النهاردة العيادة ولا لا؟
انا:لا مش هاجي يا سارة‘ عشان رايحة لهدى اختي وكده معلش.. ليه فيه شغل
كتير ولا ايه؟
سارة:لا لا انا بس بتأكد
انا بضيق:اممم تمام ابقي سلمي على احمد
سارة:حاضر
وبعد ما قفلت لقيت شذى اختي بتقولي:
مين دول؟
انا:اللي معايا في الشغل
شذى:وهو انتي مدية رقمك لاحمد ده اللي سمعتك بتكلميه!!
انا:لا ده سارة كانت عاوزة تكلمني ومعهاش رصيد عشان كده كلمتني من عند احمد
شذى:امم طيب‘ بس انتي مالك قلبتي خلقتك كده ليه؟
انا بعصبية:يوووه هو انتي بقيتي بتحققي معايا كتير كده ليه! وبعدين هقلب
خلقتي ليه؟؟؟
شذى:بصي اهي عصبيتك دي اكبر اثبات اصلا!!
انا:طب مدي وخلصي خلينا نروح لاختك افففف
فعلا وقتها كنت مضايقة ان احمد معبرنيش ولا فكر يسلم عليا لا ده قالي على
طول خدي سارة
بعد ما اتأكد انه طلب الرقم صح واني ندى!! وحسيت اني غيرانة من سارة انها بتتعامل
بتلقائية
مع احمد وانا مش عارفة..
**************************
ورجعت تاني للقاهرة وقضيت التيرم التاني كله مذاكرة بردو لحد ما الصيف جه
ورجعت تاني للتدريب
في العيادة..
وفي يوم لقيت دكتورة منال خارجة من مكتبها بعد ما زبونة مشيت عندها
وقالتلي:
ندى تعاليلي
انا بخوف ببص على سارة واحمد وقلتلهم:هو انا عملت حاجة غلط
سارة:ليه يا بنتي! هو عشان ندتك يبقى لازم تكوني عملتي حاجه غلط
انا:مش عارفة!! اصل انا بترعب لما حد يناديني
احمد:ادخلي وشوفي ‘ الدكتور بقالها دقيقة مستنية دلوقتي
انا بارتباك:اه اه
ودخلت ليها فقالتلي: انتي دلوقتي طالعة تالتة ان شاء الله صح؟
انا:ايوة صح
منال: حلو يبقى انا هستنى نتيجتك تطلع ولو طلعت النتيجة حلوة هتبتدي تدربي
تحت ايدي وتشوفيني
وانا بعالج المرضى بتوعنا وابتدي اخليكي كمان تعالجي الحالات الخفيفة جدا..
انا بسعادة:بجد يا دكتورة
منال:اه طبعا انتي دلوقتي طالعة تالتة ومينفعش تفضلي بس تتفرجي ‘ لازم
تبدئي تدربي اكتر
انا:وانا ان شاء الله هكون عند حسن ظن حضرتك باذن الله
منال:خلاص انتي نتيجتك امتى؟
انا:يعني كمان اسبوعين ولا حاجة
منال:ماشي حاولي بقى تلحقي تتبسطي في الاسبوعين دول عشان مجرد ما النتيجة
تطلع هيبتدي الشغل
الجامد..
انا:حاااضر
وطلعت وانا مبسوطة اوي فاحمد قالي:خير؟
انا بفرحة كبيرة:دكتورة منال هتبتدي تخليني اتدرب تحت ايدها شخصيا ولو فيه
حالات خفيفة انا اشوفها
بنفسي بس بعد ما نتيجتي تطلع..
سارة:طب كوويس
احمد ببرود:مبروك
انا وابتسامتي بدات تروح:الله يبارك فيك
وقمت دخلت المكتب عند سارة وانا مستغربة من ردة فعل احمد!!
***********************
بعدها بأسبوعين النتيجة كانت طلعت والحمد الله جبت معظم المواد امتياز
ومادتين جيد جدا وطبعا
كنت طايرة من الفرح عشان اخيرا هتدرب تحت الدكتور منال.. في الاسبوعين دول
كان جه
واحد واتقدم لاختي اللي اصغر مني شذى وحصل بينهم قبول وحدد انه يتجوزها على
اخر الصيف
تكون جهزت نفسها لانه كان مستعجل عاوز يتجوزها ويسافر لبرة عشان عقد العمل
اللي جاله..
وفعلا بدأنا نجهز شذى واللي كانت طايرة من الفرح انها اخيرا هتتجوز زي يا
هدى..
الصيف ده كان مختلف عن كل صيف قبل كده ‘ يمكن لاني كنت بدأت اتكلم شوية انا
واحمد والحواجز
اللي بينا بدأنا نفكها شوية..
بس هو كان مرة يبقى كويس في التعامل معايا ومرة يديني الوش الخشب..
انا لعلياء في قعدة من قعداتنا:انا خلاص بقيت محتارة بجد!!
علياء:ليه؟
انا:يابنتي مرة يعاملني حلووو اوووي ومرة يعاملني زي ما يكون مش طايقني!!
علياء:يمكن عنده انفصام!
انا:انفصام ايه انتي راخره.. انا بجد مش قادرة افهمه يا علياء
علياء:يعني بتحبيه؟
انا:ايوووووة يا ستي انا متزفتة على عيني وبحبه خلصنا بقى الله
علياء:هههه طب اهدي اهدي ليطقلك عرق.. طب وبعدين؟
انا:يا سلام يعني انا بقلك عشان تقوليلي وبعدين!!
علياء:اصل باين عليه من كلامك كده راجل ناشف اوي ..
انا:مش عارفة معايا انا بس بيصدرلي الوش الخشب ليه!!
علياء:طب بقلك ايه ما تعزميه في فرح اختك؟؟
انا:تفتكري
علياء:اه انتي اعزمي دكتورة منال وسارة واعزميه هو كمان
انا:ماشي اما نشووف
وفعلا عزمتهم كلهم بما فيهم احمد.. ويوم الفرح عيني كانت على المعازيم اللي
عمالة تيجي وخصوصا
على المكان المخصص للرجالة عشان اشوف احمد هيجي فعلا ولا..
وجه احمد وراح عند الرجالة وقعد شوية وبعدين باركلي من بعيد ومشي..
ومستفدتش اي حاجة لما
عزمته..
*************************
وفي يوم قبل ما ارجع القاهرة بيومين دخلت العيادة الصبح لقيتهم جايبين فطار
وعمالين يفطروا
فاحمد اول ما شافني قالي:
بنت حلال تعالي افطري معانا
انا بجرأة :طيب وسعلي كده لحسن انا هموت من الجوع
وفعلا وسعلي احمد جمبه وبعدها قام يشتري فطار عشان خاف الفطار ميكفيناش
ورجع حطه قدامي
وقالي:
اتفضلي يا ستي ‘ عشان تفطري براحتك
انا:هههه شكرا
احمد:هترجعي بعد بكرة الجامعة؟
انا:ايوووة وهرجع تاني لوفاء
احمد:وفاء مين؟
انا:ههههه دي البنت اللي مطلعة عيني هناك في الاوضة في المدينة
احمد:طيب مينفعش تنقلي اوضة تانية؟
انا:لا عادي بقى اصل انا بحب بقية البنات اللي معايا شيماء ‘ اسراء ونورة
احمد:اه
سارة:بقلكم ايه انا هروح المكتب بتاعي عندي ورق كده هخلصه
انا:سارة فيه حاجة ليا اعملها
سارة:لا لحد دلوقتي لا ودكتورة منال مش جاية النهاردة
انا باستغراب:ليه؟
احمد:عندها زيارة مهمة
انا:اها
وقامت سارة دخلت وفضلت انا قاعدة مع احمد..
حسيت باحراج ومبقتش عارفة اقول ايه ولقيته بيقولي:
انتي دخلتي طب اسنان عن حب ولا عشان المجموع
انا:
لا عن حب الحمد الله
احمد:
عشان كده ماشاء الله انتي شاطرة فيها
انا:
وانت مم مش انا اسفة يعني في السؤال بس مش ناوي تكمل دراسة؟
احمد :
مش هينفع
انا:ليه؟
احمد:عشان انا بصرف على البيت
انا:طيب واخوك؟
احمد:انتي عرفتي منين حوار اخويا؟
انا بارتباك:مم مش فاكرة بصراحة
احمد:يعني انا حكتلك؟ ولا مين
انا:ااه يمكن انت مش فاكرة
احمد:اخويا بردو عنده بيت وكده ومحتاج مصاريف..
انا:اها
احمد:طيب انا مش عايز اعطلك اكتر من كده
وقمت وانا حاسة انه بينهي الكلام بينا بطريقة شيك...
وفي اليوم اللي كنت هروّح فيه تاني للمدينة فقلت اعدي على العيادة الاول
اشوف احمد قبل ما اسافر
وفعلا سلمت عليهم كلهم وبعدين لقيت احمد بيقول:
انا نازل اشتري حاجة
فحسيت انه بيتهرب مني وبعدين نزلت من العيادة وانا مضايقة اوي ولقيته واقف
على اول الشارع
بيقولي:
ايه يا بنتي كل ده بتنزلي من العيادة ‘ انا واقف مستنيكي هنا عمال اقول
امتى هتنزل
انا بفرحة واندهاش:ايه ده انت مستنيني هنا؟ انا؟؟؟
احمد:ايوة قلت هوصلك لحد المحطة
انا:بجد
احمد:اه يلا بينا عشان متتأخريش
وقرب ما وصلنا لقيته بيقولي:
انا كنت عاوز اقلك حاجة
انا باهتمام وقلبي بيدق بسرعة:ايييه؟
احمد:مش عارف بصراحة اقلهالك ازاي
انا:قول؟؟
احمد:بصراحة انا مش عايزك تفتكري حاجة اكبر من اننا مجرد اخوات
انا بصدمة:نعم؟؟ مش فاهمة؟
احمد:يعني احنا مجرد اخوات وبس ‘ مفيش حاجة اكتر من كده ولو انتي حاطة في
بالك اي حاجة
من ناحيتي شيليها انا بتعامل معاكي على انك اختي وانا اخوكِ..
انا من غير صوت هزيت راسي وخدت منه شنطتي وسبته ومشيت بسرعة عشان اركب
وابعد عنه
وفضلت طول الطريق لحد ما وصلت المدينة وانا عمالة اعيط من الكلام بتاع
احمد..
وقلت لنفسي: ما هو انا اللي غبية عشان افتكرت انه هيقلي انه معجب بيا بس
شكله حب بطرف واحد
واول ما وصلت المدينة دخلت انام....
**********************
عدى عليا اسوع وانا بحاول اشيل الموقف اللي حصلي وانا رايحة المحطة وكلام
احمد ليا بس
مكنتش قادرة وكنت على طول قاعدة في حالي ومضايقة..
شيماء:مالك يا ندى؟
انا:مفيش
شيماء:اصلك من ساعة ما رجعتي وانتي قاعدة زعلانة
انا:لا عادي مفيش
شيماء:يابنتي فضفضي معايا‘ ومتخافيش؟؟
انا:صدقيني يا شيماء خليني ساكتة احسن لان الكلام في الموضوع بيوجعني
شيماء:ايوة بس لما تتكلمي هترتاحي؟
انا:هه لا ماهو مبينهاش راحة..
شيماء:خلاص براحتك بس لو احتاجتي تتكلمي انا موجودة
ومشيت شيماء وبعدها بخمس دقايق لقيت تلفوني بيرن ببص على الشاشة لقيت اسم
احمد مالي
الشاشة!!
...............
استنوني الحلقة اللي جاية...........
