الحلقة الثامنة
لقيت تلفوني بيرن ببص على الشاشة لقيت اسم احمد مالي الشاشة!!
رديت وانا مرتبكة اوي:الو؟
احمد:ايوة ‘ انا اسف لو بتصل بيكي بس انا كنت عاوز اطمن عليكي
انا:انا الحمد الله
احمد:مش محتاجة اي حاجة عندك؟
انا:لا شكرا
احمد:ماشي مش عايز اعطلك عن اي حاجة انا بس قلت اسأل عليكي
انا:شكرا يا احمد
احمد:طيب مع السلامة
انا بحزن:سلام
وحسيت وهو بيقفل ويروح ان قلبي انا كمان بيروح معاه وكان نفسي اقله خليك
معايا وكلمني اكتر..
بس المكالمة دي ادتني امل وطاقة شوية وخلتني بقية الاسبوع اذاكر بحماس
اكتر..
***********************
في يوم نسيت تلفوني في الاوضة وروحت الجامعة ولما رجعت لقيت وفاء ماسكة
تلفوني وعمالة
بتلعب فيه..
انا بعصبية جريت عليها وخدته منها جامد وزعقت ليها:انتي ازاي تخدي حاجة مش
حاجتك!!
وفاء:انا اصلا معرفش انه بتاعك ولقيته عمال يرن يرن من واحد اسمه احمد فقلت
اشووف في ايه!
يمكن اعرف بتاع مين!
انا بزعيق:انتي ماااااااااااااالك!!! تلفوووووني وعلى الكومدينو اللي جمب
سريري يعني هيكون
بتاع مييييين!! تشوووووفي بتاع مين اللي بيتكلم ليه اصلا!!
وفاء:ومالك خايفة اوي كده ليه! ها عشان احمد؟! مين احمد ده
ومن كتر عصبيتي لقتني بزق وفاء جامد وبقلها:
لو اتدخلتي تاني ولقيتك بتقربي لحاجة من حاجتي هتشوووفي حاجه عمرك ما كنتي
تتوقعيها مني!
وخدت الموبايل وروحت اكلم احمد عشان اشوفه كان بيكلمني ليه..
احمد:ازيك يا ندى؟
انا:الحمد الله ‘ معلش الموبايل كنت ناسياه فمشوفتش انك كلمتني الا دلوقتي
احمد:ولا يهمك ‘ انا بس كنت عاوز اطمن عليكي
انا:شكرا يا احمد ‘ اخبار سارة ايه؟ ودكتورة منال؟
احمد:كلهم كويسين ومستنيينك..
انا:ان شاء الله في الاجازة بقى
احمد:هي امتى؟
انا:ههه اكيد في نص السنة
احمد:يارب تيجي بسرعة بقى
انا احرجت جداااا ومبقتش عارفة اقول ايه وكنت فرحانة على مستغربة ومش فاهمة
هو طريقته
اتغيرت معايا كده ليه وخفت اووووي..
احمد لما لاقاني ساكتة:طيب انا مش عايز اطول عليكي روحي زاكري بقى وعايزك
تجيبي درجات
عالية ‘ انتي شاطرة يا ندى ماشاء الله عليكي وانا واثق ان مستقبلك هيبقى
عظيم باذن الله..
انا:شكرا ليك اوي يا احمد..مع السلامة
قفلت معاه وروحت اتصلت بعلياء بسرعة وحكيت ليها على اللي حصل فقالتلي:
اممم مش يمكن حس انه ضايقك اخر مرة وعشان كده بيكفر عن احساسه بالذنب؟
انا:مش عايزة اكون شفقة ليه
علياء:بصراحه انا عشان معرفهوش فمش قادرة افهم يا ندى ايه حكايته
انا:تفتكري يا علياء فيه حاجة اسمها حب اصلا؟!
علياء:نعم؟! امال اللي انتي بتحسيه ناحيته ده ايه ان شاء الله؟؟ مش حب؟
انا:مش عارفة طول عمري اصلا بحس ان الحب ده حاجه مش موجوده وبخاف اصدق
الاحاسيس
دي!!
علياء:بصي يا ندى الحب موجود بس الاهم انه ميكنش بيضر الواحد وفي النور
وبالحلال
انا:بس انا بخاف منه اوووي
علياء:انتي طول عمرك يا ندى حابسة نفسك جوة الخوف وده للاسف من تربيتك
وتربية باباكِ الغلط
انا:طب اعمل ايه؟؟
علياء:بكرة الايام هتبين كل حاجة ليكي..
انا:صح ويا عالم الايام شايلة ايه..
*************************
عدت شهور الترم الاول واحمد من فترة لفترة بيتصل بيا يطمن عليا وعلى
مذاكرتي ونقعد نتكلم
شوية وبعدين يسيبني عشان اذاكر وميعطلنيش..
وفي يوم قبل ما انام لقيته بعتلي رسالة مكتوب فيها: وحشتيني
اول ما شفت الرسالة كنت عايزة اتنطط من فرحتي واصحي المدينة كلها ‘ ده انا
كنت عايزة اروح
ابوس وفاء شخصيا!! بس كالعادة بعد ما بفرح اووووي برجع اخاف اوي...
خلصت التيرم الاولاني من سنة تالتة وبعد اخر امتحان طلعت اجري عشان احضر
نفسي واسافر
وارجع تاني البيت..
ورغم اني كنت ببقى زعلانة اني هسيب حريتي اللي بحس بيها في المدينة الا اني
بفرح في نفس
الوقت لاني هشوف احمد..
*******************************
وبعد ما ارتحت في البيت يومين رجعت العيادة تاني بس المرادي كنت مشغولة جدا
في التدريب
مع دكتورة منال فكنت مش بقدر اشوف احمد كتير..
وبعد اسبوع دكتورة منال خدت اجازة وقلتلنا ناخد بالنا من العيادة في غيابها
عشان راحت تصيف
مع اهلها فكنت فرحانة انه اخيرا هقدر اقعد مع احمد من غير ما يكون ورايا
ضغط الشغل..
وفي مرة دخل احمد من برة جايب لينا اكل ..
سارة:ياااه تصدق كنت جعانة
احمد:ههه طيب يلا ناكل..
انا:انا مش هاكل مش جعانة اوي
احمد:متبقيش رخمة يلا انا جايب الاكل عشان ناكل كلنا
انا:مش جعانة اوي بجد
احمد:كده تكسفيني
انا:خلاص ماشي
احمد:بس والله يا سارة ليكي وحشة
انا قمت بصيتله فلقيته بيغمزلي
سارة بعدم فهم:وحشاك ايه يابني! ما احنا كل يوم مع بعض
احمد:مش عارف والله يا سارة بقيتي بتوحشيني اوي كده ليه
بقيت باكل وانا متغاظة وكل ما ابص عليه الاقيه بيغمزلي!!
************************
وفي يوم بعد ما خلصنا شغل لقيت سارة بتقول لاحمد:
احمد ايه رايك توصلني لحد البيت
فاتغظت جدا واضايقت وقلت بسرعة:انا ماشية يا جماعة سلااام
ومفيش دقيقتين لقيت حد بيناديني: يا ندددى يا نددددى
ببص لقيته احمد بيقلي:ايه يا بنتي نفسي اتقطع وراكِ وانا بجري
انا بغيظ:غريبة يعني! مروّحتش سارة ليه؟! لحسن تكون خايفة تروّح لوحدها ولا
حاجة
احمد:لا منا اتحججت بمشوار
انا:والله! طيب روح مشوارك بقى لحسن اعطلك
احمد:استني هنا يا ندى
انا:انت عايز ايه يا احمد؟ انت بتلعب بينا احنا الاتنين؟!
احمد:كنت فاكرك اذكى من كده
انا بعصبية:ازاي يعني؟؟ مش فاهمة؟؟؟؟؟
احمد:انا لما بقول لسارة كلام واغمزلك بعدها ببقى قاصدك انتي بس مش بقدر اقولك
كده قدامها
فبعمل نفسي بكلمها هي لكن انا بكلمك انتِ..
انا:احمد خليني اروّح الله يخليك
احمد:ندى انا عاوز اقلك حاجة
انا بنرفزة:ايوووة اتفضل!!
احمد:انا بحبك ومن زمان كمان ‘ من ايام ثانوي يا ندى لما كنت بشوفك بتراقبي
هيثم ومش واخده بالك
مني!
انا باندهاش واستغراب:انا كنت براقب هيثم؟؟
احمد:ايوة ولما عرفت انه معجب بيكي انا بعدت خالص وبعدين بصراحة وقتها كان
كل همي
المزاكرة عشان اجيب مجموع ولما شفتك تاني كنت طاير من الفرحة وفي نفس الوقت
مضايق
ومخنوووق اوووي..
انا:ليه؟
احمد:عشان الفرق بينا بقى كبير اوي يا ندى ولا انتي مش واخده بالك؟
انا:ازاي؟
احمد:انتي بقيتي دكتور وانا مجرد بشهادة من معهد وعلى اد حالي واللي بجيبه
بصرفه على اهلي
وعلى اخواتي اللي عايزين تعليم وجواز وامي...
انا:بس هو انت مفيش امل تكمل تعليمك؟
احمد:ممكن وهيبقى عشانك يا ندى بس هو انتي اهلك مش هيوافقوا بيا كده؟
انا باحراج:انا لازم اروّح معلش يا احمد عشان اتأخرت وخايفة بصراحة لحد
يشوفنا كده
ويقول لبابا..
احمد:طيب ‘ هبقى اكلمك تلفون
انا بخوف:لا بلاش معلش
احمد:ليه!
انا:بلاش يا احمد مكالمات وانا في البيت‘ ظروفي كده
احمد:طيب هستنى اما تيجي ويارب اعرف اتكلم معاكِ..
************************
رجعت البيت وانا فرحانة جدا انه اخيرا قالي بحبك بس انا مقلتلهوش وانا كمان
ولا سمعته
كلمة بحبك على طول..
وحكيت لعلياء وقالتلي:
طيب وانتي اهلك يا ندى هيوافقوا عليه؟
انا بخوف:مش عارفة وده مخوفني اووي يا علياء
علياء:طب هتعملي ايه؟ ولا ناوية على ايه؟؟
انا:مش عاااارفة.. محدش هيعارض غير بابا
علياء:وانتي هيبقى ايه موقفك؟
انا:انتي عارفة يا علياء اللي فيها
علياء:بس يا ندى المرادي القرار مصيري؟!
انا بحزن:مش عارفة هعمل ايه بقى..
*****************************
ولما رجعت تاني المدينة وخلصت اجازتي احمد بقى يكلمني كل يوم ونقعد
بالساعات نتكلم عن
كل حاجة وحكيتله عن نفسي اكتر وعن حياتي من وانا صغيرة وعن خوفي من بابا
والمسافة
اللي بيني وبينه والحواجز فقالي:
انتي كده خوفتيني يا ندى
انا:من؟
احمد:خوفك من باباكِ ده ممكن يأثر علينا بعدين في المستقبل
انا: طب انت مفيش امل تكمل تعليم؟
احمد:انا ممكن اكمل يا ندى بس مستوايا؟ باباكِ هيوافق؟ هيرضى؟؟ انتي مستعدة
تتحدي باباكِ؟
انا:مقدرش يا احمد انت عارف دول اهلي مهما كان بس انا نويت لما انزل في
الصيف هقول
لماما عليك واشووف..
احمد:ربنا يستر يا ندى...
***********************************
لما نزلت تاني ورجعت البيت قررت اني احكي لماما عن احمد واشوف ايه رايها..
انا لماما:ماما فيه واحد معايا في الشغل يعني محترم جدا وشخص مؤدب وكده
ماما:دكتور؟
انا:لا هو مقدرش يدخل كلية ودخل معهد لظروف صعبة عنده
ماما:ظروف ايه دي؟
انا:يعني جاب مجموع كبير في الثانوية بس وفاة باباه خلته يدخل معهد سنتين
ويشتغل في نفس
الوقت عشان يشيل مسؤولية مامته واخواته البنات..
ماما:ربنا يوفقه بس انتي بتحكيلي ليه عليه
انا بخوف وارتباك:يعني يا ماما اصل حسيت منه باهتمام وكده
ماما:اهتمام ايه ده يا ندى!! واحنا من امتى عندنا الكلام ده!! اهتمام ولعب
وكلام فارغ!
انا:يا ماما ده مش لعب احمد عايز يدخل جد في الموضوع..
ماما:اسكتي ووطي حسك ‘ انتي عايزة ابوكِ يسمعك يقطع خبرك وخبري!! الحب اللي
بتتكلمي
عليه ده هو جوزك اللي تتجوزيه والمودة والاحترام والعشرة غير كده كله بيبقى
لعب وكلام
فاضي..
انا:يا ماما مش كله لعب فيه بيبقى جد
ماما:ندددى اقفلي الموضوع ده وانسيه وركزززي في مزاكرتك والا خليتك تبطلي
تروحي العيادة
ولقيت تلفوني بيرن من احمد فرديت عليه قدام ماما
ايوة يا احمد ازيك
احمد:ازيك انتي يا حبيبتي.. ايه فينك؟
انا:في المطبخ مع ماما
احمد:كلمتيها؟ طب سلميلي عليها
انا لماما:احمد بيسلم عليكي
ماما من غير نفس:الله يسلمه
انا لاحمد:بتقولك الله يسلمك.. طيب يا احمد هبقى اكلمك بعدين
وبعد ما قفلت معاه ماما بصتلي وقالتلي:
وهو بقى متعود يكلمك؟؟ ومنين جاب رقمك
انا:ماهو طبيعي يبقى معاه رقمي لانه معايا في الشغل..بس هو كلمني عشان
يقولي كل سنة وانتي
طيبة بمناسبة العيد يعني..
ماما:بصي يا بنتي عشان ابوكِ واللي هيجرالك لو عرف الولد ده تقطعي معاه
وتنسي الكلام
الفارغ اللي انتي قلتيلي عليه ده..
انا بحزن ودموع في عيني:بس يا ماما
ماما:بقلك ايييه من غير بس والا منك لابوكِ‘ اااه انا مش حمل يعرف وتبقى
وقعتنا سوووودة
وسكت من خوفي كالعادة..
ماما:تقطعي علاقتك بالولد ده مفهووووم
مشيت من المطبخ ودموعي بدأت تنزل ومبقتش عارفة هعمل ايه ولا هقول لاحمد
ايه..
**************************
تالت يوم العيد روحت العيادة عشان اشوف احمد ‘ قبلها كلمته وقلتله :
احمد عندي حاجة لازم اقولها ليك ضروري
احمد:طيب نتقابل
انا:مش هينفع يا احمد نتقابل برة ‘ اخاف
احمد بضيق:خلاص يا ندى نبقى نشوف في العيادة
وفعلا روحت العيادة وسارة طبعا كانت قاعدة معانا فقام احمد قالها:
سارة ممكن معلش تشتريلي اكل
سارة:ماشي يا احمد
بعد ما مشيت قالي:بصي انا جيبلك هدية بمناسبة العيد
انا:احمد فيه حاجة عايزة اقلها ليك
احمد بضيق:طيب انجزي يا ندى قولي ‘ عشان الحق اديلك هديتك
انا بارتباك وخوف:احمد احنا مش هينفع نكمل مع بعض
استنوني الحلقة اللي جاية.......
