الحلقـــــة التانية
تخرج سعاد منهكة من المطبخ وتقول:ياراجل حرام عليك بقى
عيالك بينحتوا في الصخر عشان
ترضى عليهم وانت قاطم وسطهم ..
يقوم فرغلي بكل عصبية ويروح رامي فحمة مولعة على مراته
سعاد ..
سعاد تصرخ بعلو صوتها على دخلة ابنها اللي عمره 18 سنة
عبد الله ويشوف ابوه وهو بيرمي
الولعة على رجل مامته فيجري عليه بعصبية:
انت بتعمل اييييه
فرغلي وهو بيزق بنته سماح:انجررري يا بنت الـ ... هاتي
بسرعة المعسل
عبد الله يروح لفرغلي ويشده من الفانلة بتاعته
ويقوله:حرااااام عليك امي
فرغلي بغضب:انت اتجننت يا ابن .... انت بتتهجم عليااااا
.. امشي غوووور برررررررة
عبد الله وعروقه بارزة:انت اللي هتطلع بررررة ‘ احنا
قرفنا من العيشة معاك
*********************************
ليلى بتخرج من المصنع وبتتمشى في الشارع لحد ما فارس
يقرب منها بعربيته ويزمر ليها:
اركبي
ليلى بتبص يمين وشمال:انا خايفة يا فارس
فارس:اركبي بقى يا ليلى ‘ رشا مشيت من ساعة
تبتسم ليلى وتركب بسرعة بكل لهفة واول ما تركب فارس يمسك
ايدها بحنان ..
ليلى:عارف يا فارس انا لما ببقى معاك بحس بأمان الدنيا
كلها اللي محرومة منه
فارس يبتسم ويكون ساكت..
ليلى:بقلك ايه يا فارس متنزلنيش جوة اوي الحارة يعني على
الشارع كده اللي قبل المنطقة
انت عارف احنا منطقة شعبية ومش عايزة حد يشوفني ..
فارس:ماشي حبيبتي..
**************************************
ليلى بتفتح الباب تلاقي عبد الله اخوها ماسك في فانيلة
ابوها وامها واقعة على الارض بتعيط
وماسكة رجلها وباين مكان حرق وسماح اختها بتعيط وسعد
واقف بعيد بيعيط..
ليلى بتجري على فرغلي وعبد الله وتقف في النص ما بينهم..
ليلى بخوف:بس يا عبد الله
فرغلي:وحياتك يا ابن المعفنة دي لاوريك ! يا انا يا انت
يا كلب يا نجس
عبد الله بزعيق:مش انا اللي طالع من هنا
ليلى بتزعق:بس يا عبد الله بقى بسسس ‘ جرررى ايه
يابااااا
عبد الله بزعيق:الحيوان بيرمي الووولعة على امك يا ليلى
وعايزاني اسكت!
ليلى:لييه ياباااا كده ليييييه
في اللحظة اللي الكل بيتخانق فيها يسمعوا صوت عياط بيبي
صغير
سعاد:روح يا سعد خليك مع اختك حنان في الاوضة ‘ شيلها
وسكتها
سعد:حاضر ياما
فرغلي:اطلع برة يا ابن الـ....
عبد الله بعند:مش انا اللي هطلع انت اللي هتطلع بقى
سعاد تصوت:يالهوووووووووووي
سماح بعياط:خلااااص اديني متزززفتة اروح اجيب المعسل
يخربيت ده معسل ولع الدنيا
عبد الله:وحياة اميييي ما انتي رايحة ‘ اترزعي يا بت
ليلى:ما تلمهااااا بقى يا عبد الله
عبد الله:وامي اللي رجلها اتحرقت دي
سعاد:اوووووولع انا في ستين داهية بس اسكتوا بقى ‘ انا
تعبت من الموال ده بقى
ليلى بغلب:والله حرام بقى مش كل ليلة ارجع البيت هلكانة
الاقي خناقة والعة هنا
سعاد:خشي يا ضنايا ريحي جتتك
ليلى:وهو عاد فيه راحة ياما في البيت ده
عبد الله يزق فرغلي ويقوله:ابقى اشوفك تمد ايدك على امي
تاني
فرغلي:يلا يا جعر يا منتن
ودخل عبد الله الاوضة ونام على فرشته اللي على الارض..
سعد:خد يا عبد الله اختك شكلها عملتها ومش عارف اتصرف
عبد الله :خلي حد من اخواتك يغيرلها
سعد:انا كنت شفت مرة في التلفزيون اللي على القهوة اعلان
كده فيه العيال النضيفة بيلبسوهم حاجه
عشان لما يعملوا على نفسهم حاجة شبه الكافولة دي !
عارفها ؟
عبد الله:اه عارفها مالها يعني يا سعد عشان مش فايقلك؟
سعد بكل براءة:مينفعش اجيبها انا كمان عشان لما اتزنق
يعني وابوك في الحمام؟!
عبد الله يضحك:ههههههه ياد يا عبيط دي زي الكافولة
بالظبط يعني للعيال الصغيرة بس اللي زي
حنان اسمها بامبرر ‘ بعدين انت كبرت يا سعد دلوقتي وبقيت
راجل..
سعد:بس انا مش عايز اروح الورشة
عبد باستغراب:ورشة ايه دي يا سعد؟
سعد:ابوك وداني ورشة المعلم عفت العجلاتي وبيضربني كتير
عبد الله بغضب:وامك وليلى سكتوا ازاااي!!
سعد:ماهو اختي ليلى حاولت مع ابويا بس محدش قدر عليه
عبد الله يبص شوية لسعد وبعدين يقوم يمشي من البيت ويرزع
الباب وراه..
فرغلي يتف بعد ما عبد الله يمشي ويقول: غور واد شمحطجي
سعاد بتخرج جري وراه وتناديه:يااااا عبد الله
بس مبيردش عليها
ليلى:ماله يامااا؟ هو خد في وشه كده ليه!؟
سعاد تبص لسعد اللي واقف مندهش على باب الاوضة:خد هنا
يااض قلتله ايه؟
سعد بخوف:والنيعمة ما قلتله حاجة
فرغلي بعد ما يشد نفس من الشيشة يزق برجليه سماح على
الارض ويقولها:
خلاااص غوووري بت غبية شبه امك ! فضلتي تحمي فيها لحد ما
الولعة بقت حامية
**********************************
في فيلا في المعادي رشا بتنزل من اوضتها وبتروح تقعد على
الصفرا مع مامتها وبابها عشان
يتعشوا.. العشا طبعا بيبقى من افخم انواع الأكل..
رشا بدلع:بابي مش جه الاوان بقى تزود فارس في مرتبه!
عزت:يا رشا يا حبيبتي انا مش عايزه يطمع فيكي وفينا
الام:ايه ده يا عزت! ابن اختي عمره ما يطمع في فلوسنا !
دي فلوسنا كانها فلوسه
رشا:بالظبط يا مامي !
عزت:يا نادية انا برضو مش عايز افتح عين الموظفين ولا
يقولوا ده عشان قريب صاحب
المصنع!
رشا بدلع:ايه ده يا papa انت ازاي تقول على فارس كده! بعدين ده هيبقى
مشروع جوز
بنتك المستقبلي ان شاء الله..
عزت:والله ده موضوع مش وقته خالص يا رشا
نادية:جرى ايه يا عزت!! هو فارس مش قد المقام ولا ايه!!
عزت:انتي عارفة ان نفسي رشا تتجوز حاتم ابن اخويا
رشا:بس انا بحب فارس يا بابي !!
عزت:ربنا يسهل مش وقته دلوقتي الكلام ده
***************************************
فارس في البيت قاعد في اوضته نايم على السرير وبيفكر
وفجأة تدخل عليه مامته.
مامة فارس:ايه يا حبيبي قاعد كده ليه؟
فارس:مفيش يا امي؟ فيه حاجة؟
مامة:حساك يا ابني بالك مشغول
فارس:عادي متشغليش بالك .. هو ....
وبيسكت فارس شوية فتفهم الام نظراته وترد تقوله:
في الاوضة بتاعته زي عادته
يقوم فارس يلبس هدوم تانية وياخد مفاتيحه ويقول بضيق:
انا خارج مع صحابي ..متستننيش ونامي ‘ هرجع متأخر
الام باستسلام:طب مش هتشوفه؟!
فارس باقتضاب:لا
ويخرج بسرعة..
**********************************
تاني يوم الصبح بتصحى سعاد كعادتها مرهقة جدا وبتحضر
الفطار وبعدها بشوية يصحى فرغلي
يقعد يقطمها بالكلام ويزعق في البيت ويشخط ..
سماح في الاوضة وهي نايمة في فرشتها:افففف ياااارب امتى
بقى نخلص من العيشة المقرفة دي
ليلى بتكون بتصلي فتخلص السلام وتقولها:الحمد الله
عيشتنا احسن من ناس كتيرة!
سماح:والنبي يا شيخة ليلى ما ناقصة مواعظك اللي على
الصبح
ليلى بتروح تصحي سعد اللي نايم وتقوله وهي قلبها
بيتقطع:سعد يا حبيبي ؟ اصحى
سماح تقولها:بدل ما نصحيه عشان يروح المدرسة بنصحيه عشان
يشتغل!
ليلى بتبصلها وتقولها بصوت واطي:متقلبيش عليه المواجع
بقى! قدرنا ان ابونا كده
سماح:انا مقهوورة انه خرجني من المدرسة وراضيلي الذل
وفوووق ده كله كل يوم
يخليني اجبله المعسل عشان مزاجه ويطفحنا احنا الكووووتة!
ليلى بقهر:يا بت اصطبحي بقى.. قوم يا سعد بقى
سعد:يوووه كل يوم ورشة كل يوم ورشة!
ليلى:كل يوم ايه يا سعد ‘ انت امبارح اول يوم
سعد وهو بيفتح عينه:ماشي امبارح والنهاردة؟! يبقى كل يوم
ولا لا
ليلى:طب قوم يا لمض عشان ابوك ميزعقش
سعد:مش قايم الا لما تقولولي ان خلص الحمام
سماح:خلص يا زفت قوم بقى مش ناقصين جاعورته على الصبح!
حنان تعيط فليلى تقول لسعد:قوم شوف حنان ‘ تلاقي امك يا
عيني بتظبط الشيشة لابوك
سعد:لا يا عم مش لاعب دي بتعمل على روحها كتير
ليلى:حرام عليك اختك الصغيرة بتعيط
سعد يروح بكل براءة لحنان وهي نايمة بتعيط ويقولها:بس يا
بت ابوكي جعان دلوقتي وممكن
ياكلك
وفجأة يلاقي حد بيضربه على قفاه:اااااي
فرغلي:بقى انا هاكلها طب ايه رايك لو مغورتش من وشي في
ظرف ثانية لكون واكلك انت!
يفضل سعد واقف قدام فرغلي وفاتح بقه!
فرغلي:مغورتش ليه!!
سعد:يا عم انت قلت في ظرف ثانية ! يعني زمانها خلصت خلاص
فرغلي بعصبية:غوووور يا ابن الـ ....وخد البت المقرفة دي
معاك
سعد:مش اد الخلفة بتخلفونا ليه
ويجري سعد بسرعة وهو شايل اخته الصغيرة على ايده فتقابله
سعاد وتاخد منه حنان وتقوله:
حد يكلم ابوه كده يا ولد!
سماح تخرج من الاوضة وهي لابسة وتقول:يلا يا سعد عشان
تنزل معايا
سعد:بقلكم ايه انا هستخبى جوة وانتم تقولوا للراجل اللي
جوة ده اني نزلت الورشة
سماح:ولما يا فالح يقلك فين الفلوس؟! هتقوله ايه
سعد:ما انتي هتجبيهم
سماح:قوم يا لمض قووم
سعد: اما
سعاد:نعم يا حبيبي؟
سعد:انا عايز اقدم على هجرة
سماح:هو انت يا مفعوص طلعلك شنب عشان تهاجر ‘ قوم ياااض
يلااااا
فرغلي بصوت عالي من جوة: وحياتك لو مقمتش خرجت على
الورشة لكون نافخك زي الكاوتش
سعد وهو بيتمتم بصوت واطي:وربنا لاسرق منفاخ من الورشة
عشان ابقى اجي انفخك انا
**********************************
في المصنع ليلى كانت بتشوف الشغل قدامها وفجأة تلاقي رشا
قدامها..
ليلى بتوتر:فيه حاجة؟
رشا وهي رافعة حاجبها:لما تخلصي تعدي على المكتب بتاعي
ليلى بتوتر:ح حاضر
تمشي رشا وتروح نوال لليلي وتقولها:عايزاكي في ايه
الحيزبونة دي ؟!
ليلى بحيرة:مش عارفة؟! مع اني الصبح معدتش على فارس زي
عادتي
نوال:ليه خفتي يا جبانة
ليلى:بصراحة انا خايفة عليه كمان ‘ هو المفروض الايام دي
داخل على ترقية مش عايزة
اي حركة مني تأخرله الترقية دي..
نوال:ماشي يا حنينة
ليلى:بقلك ايه انا هروحلها فعلا مش قادرة على الحيرة
واقعد احرق في نفسي
****************************************
ليلى تخبط على مكتب رشا وتدخل تلاقي رشا قاعدة ماسكة
التلفون وبتضحك وبتقول:
..............
استنوني الحلقة اللي جاية
