ليلة قــــيس
الحلقــــة الأولــى
في حارة ضيقة مليانة بيوت جمب بعض وعمارات قديمة كان فيه
عمارة من دورين وفي كل دور
شقتين.. في الدور التاني كانت عيلة "فرغلي"
عايشة..
البيت عبارة عن صالة صغيرة ضيقة ومطبخ يدوب فيه بوتجاز
وتلاجة ومكان لواحد فقط يقف فيه
واوضتين ’ اوضة لفرغلي ومراته واوضة تانية لعياله الخمسة
وحمام صغير..
******************************
فرغلي خارج من الحمام بفانلة بيضة وبنطلون مقطوع وفي
رجله شبشب بصباع ومكشر وبيزعق:
انتي يا سعاد!! فين الطفح الفطار
سعاد بصوت مرهق من الاوضة: يا راجل ابقى شووف الاول قبل
ما تجعر من صباحية ربنا كده
هتلاقي عندك على الطابلية..
يخرج طفل صغير عمره تمن سنين جري من الاوضة التانية ويزق
رجل فرغلي ويدخل الحمام
بسرعة ويقفل الباب جامد..
فرغلي بغضب من الزقة ويقول:عيل برص بصحيح ‘ ايه خلااااص
مش قادر كتك القرف في شكلك
خلفة تعر..
الولد الصغير من جوة الحمام:مزنووووق وانت بقالك ساعة جوة مش عارف بتعمل ايه
فرغلي بتكشيرة وصوت عالي:اخلص يلاّ عشان تنزل معايا
اوديك الورشة للمعلم عفت
الولد الصغير:مش لاعب
فرغلي:يلا ابن الـ ...... مش بمزاجك يا روح امك ! انت
كبرت يلاّ ولازم تروح بقى تلقط
رزقك..
بتخرج ليلى من جوة الاوضة وبتكون جميلة الملامح ورشيقة
الجسم ولابسة حجاب وبلوزة وجيبة
طويلة وبتقول:
صباح الخير يابا
فرغلي وهو عمال ياكل بصلها بعينه ورجع يكمل اكل
ليلى:يابا سعد لسه صغير ومش حمل الشغل وبعدين ما انا
بدفعله مصاريفه
فرغلي بنظرات استنكار:جرى ايه يا بت الـ .... انتي هتذليني
عشان كام ملطوش يختي
ليلى :يابا انا عمري ذليتك ولا اتكلمت حتى! ده انا بشقى
من الصبح لبليل ومتكلمتش!
بس بقلك سيب سعد يروح المدرسة ..
تخرج سعاد من الاوضة بتعب وارهاق ويكون لبسها مبهدل
وجلابيتها مقطوعة ولفة راسها بمنديل
وتقول بارهاق: يا صباح يا عليم ‘ هو موال كل يوم الصبح
ده مبيخلصش!
فرغلي بزعيق:انا قلت البرص اللي جوة ده هيشتغل يعني
هيشتغل
ليلى:طيب انا هديك فلوس بس متخلهوش يشتغل
فرغلي بعند:انا قلت كلمة ومش راجع فيها .. وبعدين يكمل
بزعيق:ويلا يا ابن الـ .... اخرج من
الحمام بدل ما اجي انزلك في السيفون!
سعد من جوة الحمام بصوت واطي:اهو يارب انت اللي تنزل في
السيفون
***************************
تنزل ليلى وتروح الشغل وفي عينها دموع من قسوة باباها
اللي مصمم ينزل كل عياله يشتغلوا ..
ركبت كعادتها الميكروباص من على اول الشارع كالعادة عشان
تروح المصنع اللي بتشتغل فيه..
اول ما توصل وقبل ما تدخل المصنع تطلع مراية صغيرة من
شنطتها وتظبط حجابها وهدومها
وبعدين تطلع روج قديم مكسور وتحط منه بسرعة وتدخل المصنع
وهي راسمة ابتسامة على
وشها..
اول ما تطلع الدور اللي فيه شغلها بتروح لمكتب مكتوب
عليه مدير قسم العلاقات العامة بتخبط عليه
وبعد ما تسمع اتفضل , تدخل بانشكاح:صباح الخير
فارس بابتسامة:صباح النور على احلى عيون
ليلى:محبتش اروح شغلي وابتدي الا لما اصبح عليك الاول
فارس:وانا الصبح مبيبقاش ليه طعم غير لما تصبحي عليا
ليلى:يا سلام ’ مش عارفة ليه بحسك انك بكاش
فارس:سيبك انتي .. ايه القمر ده
ليلى بكسوف:بجد؟
فارس:اووي يا حبيبتي
ليلى:تسلملي يارب ‘ المهم انا مش عايزة ااخر عليك واتأخر
فارس:هنتغدى سوا؟
ليلى بابتسامة:هنتغدى
تخرج ليلى وتقابل في وشها رشا بتبص ليها بنظرات شك وغل
..
رشا:بتعملي ايه عندك؟
ليلى ونظرات عينها مرتبكة :مم مفيش اصل استاذ فارس
امبارح كان كك كان سألني على حجات
وانا قلتله لما اجي النهاردة الصبح هجيله واقوله على
طول..
رشا:اممم ‘ اتفضلي على مكتبك بسرعة
ليلى لسه هتمشي فتقول رشا: وياريت تخلي بالك ان مصنع
بابي مصنع محترم وبتاع شغل ! مش
بتاع حب وتسبيل !!
ليلى بتمشي وهي وشها في الارض ومنكسرة وبتروح المعمل
وتستلم شغلها وتبدي تشتغل..
نوال صاحبة ليلى في الشغل بتروح ليها وبتقولها:مالك؟
ليلى:مفيش
نوال:يا سلام؟! يعني انا معرفكيش مثلا
ليلى:كنت بصبح على فارس وبعدين رشا استلمتني وسمعتني
كلام بايخ
نوال بغيظ:وانتي بقى مردتيش كعادتك صح!؟
ليلى:ارد اقول اييه ها وهي بنت عزت السلحدار صاحب اكبر
مصنع عطور في مصر ! ارد اقول
ايه وهي اللي في ايدها تأكلني عيش وترميني عضم؟!
نوال:يا ستي اللي خلقها خلق غيرها بس متخلهاش تتنطط
عليكي كده..
ليلى:لا يختي اللي زي اتولد عشان يحط في بقه جزمة ويسكت
وبعدين تبص على بعيد فتلمح رشا جاية المعمل فتقول بسرعة:
روحي اشتغلي لحسن تيجي تسمعنا
كلمتين ملهمش لازمة..
رشا تدخل المعمل وتفضل تمشي على كل واحد وواحدة بيشتغلوا
وتشوف الشغل بنفسها وبعدين
توصل عند ليلى وتقولها:
فين الشغل بتاعك؟
ليلى بارتباك:اهو يا استاذة رشا
رشا تبص على ازازة البرفيوم اللي ليلى بتشتغل عليها
وتقول:ايه ده؟
ليلى بخوف:دد ده الطلبية اللي اا اللي المفروض بشتغل
عليها
رشا بصوت عالي وكبرياء:على فكرة انتي شغلك زباااااالة
واناااا ساكتة بقالي فترة على مرقعتك
هنا في المصنع..
نوال بغيظ:بالعكس بقى يا استاذة رشا دي ليلى اكتر واحدة
فينا بتشتغل بضمير
رشا تبص لنوال من فوق لتحت:مخصوم منك 10 ايام ! عشان
تتربي متتدخليش في اللي ملكيش فيه
ليلى بتبص برجاء لنوال انها تسكت ومتتكلمش وبعدين تقول
بانكسار:اللي حضرتك تقوليه هعمله
رشا تبص لست كبيرة واقفة بعيد شوية وتقولها:تديها شغل
زيادة وتخلصه النهاردة! وبكرة
هشوفه ولو مكنش زي ما انا عايزاه مش هيحصلك طيب..
تبص رشا باشمئزاز ليهم وبعدين تمشي واول ما تخرج من
المعمل تتف نوال وتقول:
ياخي مفيش مصيبة تيجي وتاخدها ونخلص من وش امها العكر ده
ليلى بحزن:دافعتي عني لييه بس ‘ اهي خصمتلك فلووس
نوال:ولا يهمك
ليلى:لااا يهمني منا عارفة انك بتشقي عشان تجيبي الدوا
لامك ‘ انا هدفعلك الـ 10 ايام دول
نوال بابتسامة:محدش بيموت من قلة الفلوس يا ليلى ‘ ربك
كررريم وقادر يعمل كل شيء
تبص ليلى بانكسار وحسرة على حالها وحال صحبتها وترجع
تكمل شغل ودموعها بتنزل على
خدها..
*********************************
بعد مرور ساعات ولما جه وقت الغدا نزلوا كل العمال
للكفتيريا اللي في المصنع عشان ياكلوا
وكانت ليلى ونوال قاعدين على طرابيزة وبياكلوا ’ جه فارس:
بتاكلوا لوحدكم من غيري
نوال:شفت اللي حصل؟
فارس باستغراب:ايه؟
ليلى:نوال!
نوال:الله ما لازم يعرف
فارس باستغراب:فيه ايه؟
نوال:بنت خالتك يا استاذ فارس مش عارفة ليه هارشة ملح
ليلى!
فارس:عملت ايه؟
ليلى:متشغلش بالك يا فارس
فارس:لا بجد عملت ايه؟
نوال:جت هزأت ليلى على الفاضي قال ايييه مبتشوفش شغلها
كووويس! وعمالة تقولها انتي
بتتمرقعي ولما جيت قلت الحق خصمت مني 10 ايام! وادت
وردية زيادة لليلى
فارس:لا لا مش هيحصل الكلام ده
ليلى:بلاش انت يا فارس تتدخل
فارس:انتي خايفة من ايه يا ليلى؟
ليلى:مش عايزة يحصل بينكم مشاكل بسببي
فارس:ملكيش انتي دعوة بس
نوال وهي بتبص بعيد:يوووه وش البومة جاية ’ معلش هي بنت
خالتك ااه بس مبقبلهاش
فارس يبتسم ويقول:معلش
رشا:فارس؟
فارس يلف على رشا:ايوة يا رشا؟ فيه حاجه؟
رشا بغرور:ايه اللي مقعدك تاكل هنا مع العمال؟! ما الاكل
بيجي لحد مكتبك فوق
فارس:اتخنقت من قعدة المكتب فقلت اجي اقعد اكل هنا ‘ اصل
هنا ونس
رشا وهي بتبص لليلي بتحدي:طب تعالى معايا بابي عايزنا
فارس:طيب اطلعي انتي يا رشا وانا جاي وراكي
ليلى بحزن:هتروح؟
فارس:معلش حبيبتي لازم اروح اشوف باباها , المهم ايه
رأيكم النهاردة بعد ما نخلص شغل اخرجكم؟
ليلى:انا عندي وردية زيادة ويادوب اخلصها واروح
فارس:لا مفيش وردية زيادة! انتي مغلطتيش انا هبقى اقلها
نوال:طب ما نخليها يوم الخميس احسن حتى يبقى صابح اجازة
فارس:خلاص ماشي .. هروح انا.. المهم ليلى ابقي عدي عليا
بعد ما تخلصي
ليلى بقلق:ما بلاش
فارس:هستناكي
***************************
فارس يروح مكتبه ولسه جاي يشوف شغله ‘ دخلت رشا فاجأه
ليه ..
فارس:رشا!
رشا بابتسامة بدلع:ايه؟ مالك مخضوض ليه؟
فارس:امم لا عادي بس مستغرب ‘ اصل كنت هجيلك بعد شوية
رشا تقفل الباب بالمفتاح وتروح عند فارس وتقوله:انا قلت
اجي اقعد معاك شوية لوحدنا من غير
ما حد يزعجنا خاالص..
فارس:رشا اا اانا مش حابب حد يشوفنا في الوضع ده! تخيلي
لو حد احتاجني وجه يدخل لقى الباب
مقفول بالمفتاح وانتي معايا؟!
رشا:احنا احرار ! الله بنت صاحب المصنع وابن خالتها !!
بعدين ترفع حاجبها وتقول:ولا انت خايف من حد معين؟!
فارس:زي؟
رشا:ليلى مثلا؟!
فارس سكت
رشا:هه انا مش متخيلة انت ازاي يا فارس تبص لواحدة
بالشكل ده!
فارس:وهو انا ايه اصلا يا رشا؟
رشا:انت مقامك اكبر بكتير
فارس:انا متولدتش زيك وفي بقي معلقة دهب! انا مستوى
عيلتي عادي
رشا:لا مش عادي ! نقول مستريح .. اه جايز your dad مش غني زي بابي بس انتم مش
فقرا! انتم الطبقة اللي بيسموها مرتاحة الحمد الله او
الطبقة المتوسطة..
فارس:رشا بتحاولي توصلي لايه؟!
رشا:بحاول اقلك انك محتاج واحدة تعليك مش توطيك اكتر
وتاخدك down فاهمني؟!
فارس:هه رشا انا فعلا مش عارف انتي بتتكلمي ليه كده او
عن ايه؟! مش معنى قعادي
على الغدا مع ليلى ونوال يبقى فيه حاجة في دماغي!
رشا بابتسامة بخبث:ايوة كده برافو ‘ اعقل .. ولو على
القعاد على الغدا تبقى مش مشكلة..
فارس بابتسامة:طيب روحي انتي دلوقتي وشوية وهاجي لبابكي
اشوفه عايز ايه..
***************************
في بيت "فرغلي" كان رجع فرغلي من الشغل وبيولع
الفحم عشان يشرب الشيشة ..
فرغلي قاعد بالفانلة البيضة بتاعته ولونها اصفر من الوسخ
ومقطعة وعمال بيولع الفحم ‘ بعدين
ينادي بصوت عالي:
انتي يا بت يا سمااح ! انتي يا زفتة؟
تخرج بنت عمرها 15 سنة من الاوضة ‘ شعرها منكووش رغم انه
ناعم ولابسة بيجاما اللي فوق
مش زي اللي تحت بتقول:
ايوة يابا؟
فرغلي:اجري يا بت هاتيلي معسل
سماح:ليه امال فين المعسل اللي جبتهولك امبارح؟
فرغلي بيبصلها بشذر ويقول:انتي هتعدي عليا المعسل ولا
ايه يا بت الـ ..... ؟!
سماح:يابا انا كل يومين تقريبا بجيبلك معسل والفلوس اللي
باخدها مبتكفيش
فرغلي:وهو انا مخليكي تشتغلي ليه اصلا ؟
تخرج سعاد منهكة من المطبخ وتقول:ياراجل حرام عليك بقى
عيالك بينحتوا في الصخر عشان
ترضى عليهم وانت قاطم وسطهم ..
يقوم فرغلي بكل عصبية ويروح .......
استنوني الحلقة اللي جاية
