الحلقة العاشرة من قصة"شقـــــــــــــة 22"

الحلقة العاشرة

رن تلفون اية فجأة وهي قاعدة مع دانة ‘ ردت عليه:الو؟مين؟

عبود:انا عبود انا اللي صلحت العربية

اية بفرح وبعدين افتكرت اللي حصل فمثلت دور التقل:ايوة نعم يا عبد الله! خير؟

عبود:ممكن اشوفك؟

اية فرحانة اووي من جواها بس في نفس الوقت لسه بتحاول تتصنع التقل:ليه؟!

عبود:يعني انا تحت بيتك وعايز اشوفك..ممكن؟

اية:طيب خمس دقايق وانزل..

تلبس اية بسرعة وهي فرحانة اوي وتجري تنزل تحت واول ما تشوف عبود تعمل  نفسها مضايقة..

عبود:انا كلمت خليفة وخليته يجيلي مخصوص عشان يجبني هنا..

اية:ليه!

عبود:بصراحة انا عارف اني كنت رزل معاكي اوي ومكنش يصح يعني اللي عملته ده!

اية:ماشي

عبود:ايه كل التناكة دي!؟ ما انتي كنتي حلوة امبارح؟؟ قلبتي كده ليه!!

اية:يعني حضرتك هزأتني امبارح ومكنتش عايز يبقى فيه بينا اي كلام ونزلت وسبتني في نص الشارع

ودلوقتي جاي ليا وبتقلي انسى!!

عبود:اسمي عبود

اية:عبد الله ‘ عايز ايه؟

عبود:بصراحة من امبارح وانا بفكر فيكي! متعودتش حد يحتاجني جمبه وميلاقينيش! وتخيلي بقى اما

الحد ده يكون بنت زي القمر زي حضرتك يعني!

اية تبتسم باحراج:توتا عاملة ايه؟

عبود:اه صحيح فكرتيني بقى بتضحكي عليا وتحطي الفلوس في شنطة الحلويات!!

اية:ده حقك وانا مش بحب اكل حقوق الناس..

عبود:بس انا قلتلك يعني انتي اول مرة تيجي عندنا وانا معملتش حاجة كبيرة في العربية عشان كل ده!

اية:بردو..

عبود:طيب خلاص سماح المرادي..

اية:هو انا لو حبيت اشوف توتا ممكن؟ ولا صعب

عبود:انتي متأكده انك عايزة تقربي مني ومن عيلتي! يا اية الفرق ما بينا زي الفرق ما بين السما

والارض!!

اية:انت دارس صح؟

عبود:معايا دبلوم

اية:طيب يعني انت ممكن تكمل دراستك وعلى فكرة بقى انا مش شايفة انك بتشتغل حاجة عيب

ولا حرام ‘ ده انت ممكن ربنا يفتحها عليك وتكبر بمشروعك ويبقى عندك ورشة كبيرة ليك

ولا حتى تبدأ تفتح معرض عربيات!!

عبود:واهلك؟!

اية بسخرية:هههه اهلي!! هما فين يا عبد الله اهلي!! بقلك حصلت جريمة قتل وبيتحقق معايا

ومحدش عبرني!!

عبود:معلش ‘ ومتخافيش انا معاكي

اية بفرح:يعني هشوووف توتا؟؟

عبود:هتشوووفي يا توتا يا ستي..

اية:طيب يلا اركب ونروح ولا هتكون لسه مصحيتش؟

عبود:مين دي اللي لسه مصحيتش!! دي عفريتة بتصحى من النجمة وتصحيني عشان اروح الشغل

اية:يا حبيبتي ربنا يخليهالك يارب.. يابختها..

عبود:اشمعنى؟!

اية:عندها اخ حنين وبيخاف عليها وبيحبها..

عبود بحزن:ياستي اعتبريني اخوكي..

اية باحراج:طيب يلا اركب العربية

تركب اية العربية ويركب جمبها عبد الله وبعد ما يقعد وبعد شوية بيبص تحت رجله بالصدفة ويلاقي

بقعة دم كبيرة ناشفة!!

عبود باستغراب واندهاش:ايه ده يا اية!!!

اية وهي مش واخده بالي: ايه؟

عبود:ده دم!!!!!!

اية بخوف وتوتر شديد:هاا! ااااه ده ده اكيييد اما القطة بتاعت بوسي اتعورت!

عبود:قطة؟!
**************************************************************************************

في بيت اية نادين كانت قاعدة في اوضتها مع اهلها ومكنتش بتخرج برة عشان مكنتش عايزة تشوف

عنود لانها مكنتش طايقاها وفي نفس الوقت سايبة داليا مع اهلها ومشاكلها معاهم.. ومكنتش عايزة

يحصل اي احتكاك بينها وبين اهل سعدية..

بتخرج داليا من اوضتها وبتتلفت يمين وشمال وتروح البلكونة عشان تكلم حمزة..

داليا بصوت واطي:الوووو ايوة يا حمزة! انا مش قلتلك تتصل بيا ضروري! يعني ايه مش عارف

تتكلم!! لو سمحت مرة تانية اما اقلك ضروري يبقى تسيب اللي في ايدك وترد عليا بسرعة..

حمزة:عايزة ايييه يا داليا! قلتلك بابا رجع من السفر وكنا في المحكمة عشان يطلق امي!!

داليا بعصبية:بقلك ايييييييييه انا قرفت من مشاكل بيتك اللي مابتخلصش دي!! انا اهلي مصممين

اني ارجع معاهم السعووودية!!

حمزة:طب ما ترجعي على الاقل احسن ليكي تبعدي وتختفي من هنا شوووية..

داليا بعصبية:انت مجنوووووووون ولا عبييييييط!! اهلي عايزني ارجع اقعد سنة معاهم وبعدين

ينزلوني تاني!! وياعالم !!! هو انت ناوي تخلع ولا ايه!؟ وانزل معاهم ازااااي!! افرض جالي

عريس هناك!! اعمل ايه ساعتهااااا!!

حمزة:لا انزلي معاهم شوية وبعدين ارجعي ‘ انا بس عايزك تختفي من هنا شوووية..

داليا بعصبية:حمززززززززززة انت هتتجوزني ولا لا!!

حمزة:طبعا يا داليا ‘ بس بقلك انا اهلي في محاكم وقرف.. ده غير قضية الزفتة سعدية دي!!

داليا:بقلك ايه انا مش عايزة اسمع حجج واهية!! اعمل ايييييه مع اهليييييي!!! بقلك مصممميين

ياخدوني معاهم!!

حمزة:اهربي يا داليا..

داليا بصدمة:ايـــــــــــــــــــــه!! قلت ايـــــــــه!!

حمزة:اهربي يا دالياااا‘ انتي مينفعش تعيشي تاني مع اهلك ..

داليا بخوف:ووو ووقضية سعدية..

حمزة:هتهربي بعد ما نعرف هترسى على ايه!!

داليا:واهرب اروح فين؟وليييه؟

حمزة:انتي مش قلتيلي انك تعبتي من طريقة باباكي ومامتك معاكي وانهم مش فاهمينك وانك

مش عارفة تعيشي معاهم! وعلى طول عايشة في خوف ورعب بسببهم!! يبقى لازم تهربي

وهقعدك في شقة بتاعتي وهبقى اقعد معاكي لحد ما مشاكل اهلي تستقر ونتجوز على طول..

داليا بخوف:ووامتى هتخلص؟؟

حمزة:مش عااااارف.. داليا انتي بتشكي فيا؟

داليا:.....

حمزة:داليا!! معقووول خايفة مني؟! والله بحبك يا داليا .. انا بس مستني الفرصة الكويسة

اللي تيجي وافتح اهلي فيها..

داليا:مش وقت كلام دلوقتي في الموضوع ده.. خليني اشوف موضوع سعدية هيرسى على ايه

وساعتها هشوف هقدر اهرب ولا مش هلحق..

حمزة:متخافيش يا حبيبتي..
****************************************************************************************

بعد يومين اية معاها عنود ودانة وماشين في ممر مستشفى وبيروحوا لحد اوضة دكتور شريف

زي ما الممرض وصف ليهم الاوضة.. طبعا المستشفى مستشفى خاصة للامراض النفسية والعقلية..

اية جاية تخبط على باب الدكتور تمسكها عنود وتقولها:اية خلنا نرجع ‘ ما ابي ادخل مستشفى

انا مب مينونة!!

بمعنى:اية خلينا نرجع انا مش عايزة ادخل مستشفى انا مش مجنونة..

دانة بحنان:لا تخافين عنود ‘ ترانا وياج وبعدين هاي مستشفى زينه ما تخرع ..

بمعنى:متخافيش يا عنود واحنا معاكي وبعدين دي مستشفى كويسة متخوفش..

تدخل اية ووراها عنود ودانة ‘ يرحب بيهم دكتور شريف..

دكتور شريف شاب عمره تلاتين واسمر شوية ولون عينه بني غامق وعنده شوية شعر ابيض بسيط

اوي من قدام..

دكتور شريف بابتسامة فيها اطمئنان:مش عايزك تخافي يا عنود من حاجة ‘ هيبقى ليكي اوضتك

ووقت ما تحشي انك محتاجة تتكلمي هسمعك..

عنود باستغراب:انزين انتوا ليش بترجدوني اهني في المستشفى؟ انا مب مينونة؟!

بمعنى:طيب انتوا هتنيموني هنا ليه في المستشفى؟ انا مش مجنونة؟!

دكتور شريف:ومين قال بقى انك مجنونة! ده انتي حتى باين عليكي بنت عسولة وقمورة خالص

وشيك..

عنود بابتسامة فيها انكسار: شكرا على المجاملة

دكتور شريف:لا مبجاملش على فكرة..
************************************************************************************

في البيت بيجي الظابط ويطل من سعيد انه يتكلم معاه شوية يمكن يديله معلومات تفيدهم في البحث

عن القاتل..

الظابط:انت متجوز سعدية عن حب ولا عشان بنت عمك؟

سعيد:طبعا عن حب ده غير انها بت عمي!

الظابط:تفتكر مين له يد في انه يقتل سعدية ومش بس قتل لا ده اغتصبها كمان..

سعيد يتعصب اوي:والله العظيم لاجتلها..

الظابط بشك:مين دي؟

سعيد:هي اللي اسمها اية!!

الظابط:اشمعنى؟

سعيد:لانها هي اللي كانت سايباها سداح مداح للبنات اللي مأجرين اوض هنا.. سعدية اول ما جت

هنا اشتكت ليا كتييير عن البنات اللي بيرجعوا متأخر وعن اية اللي كانت بتجولها كل واحد حر

يا سعدية في امتى يرجع وامتى يروح!! اكيد واحد ندل جه الشُجة وسعدية كات لوحديها ......

يسكت شوية ويعيط وبعدين يحاول يكمل ويقول:وحصل اللي حصل...

الظابط:المشكلة ان اللي قتل زي ما يكون دارس وقت الموجودين!!

سعيد:تُبجى اية يا ساعة الباشاااا!! هي اللي اكيد عارفة كل واحدة بتيجي امتى وتروح امتى!!

الظابط:بس اية هتغتصب مراتك ازاي؟؟

سعيد بلجلجة:مُش عارف!! انا مبجتش عارف حاجة

الظابط:احنا رفعنا كل البصمات وملقناش ولا بصمة في الاوضة!

سعيد:فعلا!!

الظابط:ايوة.. القضية بجد صعبة عليا اوي ‘ مفيش بصمات ولا فيه سلاح ولا حتى فيه اي خيط

يدلني على القاتل!!

سعيد:مش هيضيع حج سعدية مش هيضيع..
**********************************************************************************

بعد تلت ايام اية نازلة عشان تروح لعبود تاخده هو واخته ويروحوا النادي ‘ بتفتح شنطة العربية

عشان تحط شنطتها اللي كانت محضرة فيها لبس الرياضة بتاعها واول ما تفتح تلاقي سكينة

مليانة دم!!! اول ما تشوفها لسه هتحاول تخبيها يجي على طول من وراها الظابط ويقلها:

احنا مضطرين نقبض عليكي يا اية بتهمة قتل سعدية.......

استنوني في الحلقة اللي جاية..........